ደቡብ ኮሪያ የዓለም የ "AI" ሱፐር ፓወር ለመሆን 900 ቢሊዮን ዶላር ልታወጣ ነው።

ደቡብ ኮሪያ በሰው ሰራሽ አስተውሎት (AI) ቴክኖሎጂ ከዓለማችን ግዙፎቹ ሀገራት ከአሜሪካ እና ከቻይና ጋር ተሰልፋ ለመወዳደር እጅግ ግዙፍ እርምጃ መውሰድ ጀመረች።

ሀገሪቱ ለዚህ ዓላማዋ ወደ 900 ቢሊዮን ዶላር የሚጠጋ ግዙፍ ገንዘብ እየመደበች መሆኑን አልጀዚራ ዘግቧል።

ይህ የገንዘብ መጠን ለቴክኖሎጂው እድገት ብቻ ሳይሆን የነገውን የዓለም ገበያ ለመቆጣጠር የታለመ የረጅም ጊዜ ስትራቴጂካዊ ዕቅድ አካል ነው ተብሏል።

ለዚህም ደቡብ ኮሪያ የውጭ ሀገር ባለሙያዎችን ጥገኛ ከመሆን ይልቅ የራሷን የሀገር ውስጥ ብቁ ባለሙያዎች ማፍራት እንዳቀደች ነው የተገለጸው። ይህን ለማሳካት የትምህርት ሥርዓት ለውጥ መሰረት ነው ተብሏል።

ዕድሜያቸው ገና ለጋ የሆኑ የመጀመሪያ ደረጃ ትምህርት ቤት ተማሪዎች ከጅምሩ በሮቦቲክስ (Robotics) እና በኮዲንግ (Coding) ትምህርት እንዲዳብሩ እየተደረገ መሆኑ ተገልጿል።

ልጆች ገና በልጅነታቸው ከቴክኖሎጂ ጋር ተዋውቀው እንዲያድጉ እና የነገ ፈጣሪዎች እንዲሆኑ ጠንካራ መሠረት እየተጣለም ይገኛል ተብሏል።

ይህ የደቡብ ኮሪያ እርምጃ ሀገሪቱ በቴክኖሎጂው ዓለም ያላትን የበላይነት ከማረጋገጡም በላይ ሌሎች ሀገራት በወደፊቱ የትውልድ ማነጽ ሂደት ላይ ትምህርት የሚወስዱበት አርአያ ሊሆን ይችላል።

መስከረም 25 ቀን 2019 ዓ/ም

@tikvahethiopia

#ethiopia #kgm #southkorea

የደቡብ ኮሪያው KGM እና በUK ተቋቁሞ በአሜሪካ እና ኢትዮጵያ በኢንቨስትመንት ዘርፍ የተሰማራው B&C Group በኢትዮጵያ የኤሌክትሪክ መኪና መገጣጠሚያ ፋብሪካ ለማቋቋም የስትራቴጂክ ትብብር ስምምነት ተፈራርመዋል።

ስምምነቱ በደቡብ ኮሪያ፣ ሴዑል የተፈረመ ሲሆን፣ የመገጣጠም ሥራው በቀጣዩ ዓመት ለመጀመር ታቅዷል። በመጀመሪያው ዓመት 1,000 መኪናዎችን፣ በሁለተኛው ዓመት ደግሞ አቅሙን ወደ 3,000 መኪናዎች ለማሳደግ ዕቅድ ተይዟል።

ፕሮጀክቱ የኢትዮጵያን የመኪና መገጣጠም ኢንዱስትሪ ለማሳደግና በSUV እንዲሁም በሌሎች ምርቶች የሚታወቀው የደቡብ ኮሪያው አውቶሞሊል አምራች KGM ወደ ኢትዮጵያና የአፍሪካ ገበያ እንዲገባ ለማስቻል ያለመ ነው።

መስከረም 14 ቀን 2019 ዓ/ም

@tikvahethiopia

የመደመር ትውልድ ቁጭት፡- ኢትዮጵያን ወደ ከፍታ የማሸጋገር ራዕይ
********************
(የዕለቱ መልዕክት)

ከኢትዮጵያ እኩል የስልጣኔን መንገድ ከጀመሩት ሀገራት ጋር ስንነጻጸር ሀገራችን ለምን ወደኋላ ቀረች? የሚለው ጥያቄ የመደመር ትውልድ አቢይ ቁጭት ነው።

ሩሲያ እና ቻይና ከሁለተኛው የዓለም ጦርነት በኋላ ዜጎቻቸውን በቅጡ መመገብ ባልቻሉበት አስቸጋሪ ጊዜ የኒውክሌር እና የጠፈር ሳይንስ ቴክኖሎጂን ሲጀምሩ፣ ሀገራችን ግን የመጀመሪያውን የኢንዱስትሪ አብዮት ለመቀላቀል የሚያስችል አቅም ቢኖራትም በተለያዩ የታሪክ አጋጣሚዎች ሳይሳካ ቀርቷል።

በጋዝና በነዳጅ የበለጸጉ ሀገራት ዜጎቻቸውን ወደ ምቾት ሲያሸጋግሩ፣ ሀገራችን ግን ከግማሽ ምዕተ ዓመት በላይ የተቆፈረውን ጉድጓድ እንኳን ወደ ሀብትነት መቀየር ሳትችል ዘመናትን አሳልፈናል።

የዓለምን የኢኮኖሚ ከፍታ የተቆናጠጡት እንደ ቻይና፣ ደቡብ ኮሪያ እና ጀርመን ያሉ ሀገራት ታሪክ እንደሚያሳየው፣ ዕድገታቸው ከድህነት እና ከውድቀት በኋላ በተፈጠረ ጠንካራ ሀገራዊ ቁጭት ላይ የተገነባ መሆኑን እንረዳለን።

ቻይናውያን የመቶ ዓመት የውርደት ታሪካቸውን በከፍተኛ የሥራ ትጋት ቀይረው የዛሬዋን ልዕለ ኃያል ሀገር ሲፈጥሩ፣ ኮሪያውያን ደግሞ በአስቸጋሪው የውጭ ምንዛሪ እጥረት ወቅት የግል የወርቅ ጌጣቸውን ሳይቀር ለመንግሥት በማበርከት ሀገራቸውን ከብሔራዊ ኪሳራ ታድገዋል።

ይህ ሁሉ የሚያሳየው ሀገራት ወደ ከፍታ የሚወጡት ዜጎቻቸው ለነገው ትውልድ ሲሉ ዛሬ ላይ የጨከነ መስዋዕትነት ለመክፈል ሲወስኑ መሆኑን ነው።

የኢትዮጵያችንም የትናንት ትውልድ በደም መስዋዕትነት ሀገርን አጽንቶ ያቆየ ሲሆን፣ የዛሬው ትውልድ ደግሞ ሀገሩን ከድህነት ለማላቀቅ "የላብ መስዋዕትነት" ሊከፍል ግድ ይለዋል።

ይህ የላብ መስዋዕትነት የሚገለጠው እያንዳንዱ ዜጋ በተሰማራበት የሙያ መስክ በከፍተኛ ኃላፊነት፣ ተነሳሽነት እና ጽናት ሥራውን ሲያከናውን ነው። ለተተኪው ትውልድ የተሻለች ሀገር ለማስረከብ የዛሬን ምቾት መስዋዕት ማድረግና የተሰጠን ሀገራዊ ኃላፊነት መወጣት ያስፈልጋል።

ሀገራዊ መግባባትን እና ሰላምን መሠረት አድርጎ በአንድነት በመቆም ብሔራዊ አጀንዳዎችን ከዳር ማድረስ፣ ኢትዮጵያን ከታሪክ ተናጋሪነት ወደ ታሪክ ሠሪነት የሚያሸጋግራት ብቸኛው እና አስተማማኙ ጎዳና ነው።

ይሁን እንጂ ዛሬ አዲስ ታሪክ ለመጻፍ ሀገራችን ከጥልቅ እንቅልፍ ነቅታለች። የትናንቱን የጉስቁልና ልምምድ የሚጠየፍ እና የተሻገረ አስተሳሰብ ያለው የመደመር ትውልድ፣ የብልጽግናን ማማ ለመውጣት እንቅልፍ አልባ ጉዞ ጀምሯል።

መዝለልን እሳቤ በማድረግ እንደ አቦሸማኔ ለመፍጠን የቆረጠችው ኢትዮጵያ፣ ማንም በምንም ሁኔታ የማያስቆማት አዲስ የለውጥ ሪቫን ቆርጣለች።

በአፍሪካ ትልቁ የሆነውን ታላቁ የኢትዮጵያ ሕዳሴ ግድብን በራሷ አቅም የገነባችው ኢትዮጵያ፣ አፍሪካውያን ታላላቅ ፕሮጀክቶችን ማስተዳደር አይችሉም የሚለውን የተሳሳተ ትርክት በመስበር የኢኮኖሚ ዓድዋዋን ተቀዳጅታለች።

ይህ የሕዳሴው ግድብ ስኬት ለሀገራችን የሜጋ ፕሮጀክቶች አፈጻጸም ትልቅ መነሳሳትን የፈጠረ ሞተር ከመሆኑም በላይ አሁን ላይ አምስት እና ስድስት ትልልቅ ሀገራዊ ፕሮጀክቶችን በአንድ ጊዜ በልበ ሙሉነት ለማስጀመር አቅም ፈጥሮላታል።

በተለይም በሶማሌ ክልል የተገኘው የተፈጥሮ ጋዝን ጨምሮ በመሠረተ ልማት፣ በኢነርጂ አቅርቦት እና በግብርና ምርታማነት ላይ ያተኮሩት እነዚህ የልማት ውጥኖች ተጠናቅቀው ወደ ሥራ ሲገቡ የኢትዮጵያን የኢኮኖሚ መዋቅር እና የሕዝቧን የኑሮ ገጽታ ሙሉ ለሙሉ የሚቀይሩ ይሆናሉ።

ተፈጥሮ ያደለቻትን ጸጋዎች ተጠቅማ ዜጎቿን ከድህነት አረንቋ በማውጣት እያንዳንዱ ኢትዮጵያዊ የሚገባውን የብልጽግና ደረጃ እስኪያገኝ ድረስ ትጋት የተሞላበት የልማት ምዕራፍ ተከፍቷል።

ከዚህ ስኬት ጀርባ ያለው ዋነኛው ሚስጥር ራዕይን ወደ ተግባር የሚቀይር ጠንካራ እና ቁርጠኛ አመራር ነው። በቻይናም ሆነ በሲንጋፖር ዕድገት ውስጥ እንዳየነው ከላይ እስከ ታች ባለው የአመራር እርከን የቅርብ ክትትል ማድረጉ እና በየደረጃው ያለውን አስፈጻሚ አካል ተጠያቂ የሚያደርግ ሥርዓት መዘርጋቱ ለፕሮጀክቶቹ ፍጥነት ወሳኝ ድርሻ አለው።

ባለፉት ጥቂት ዓመታት የተመዘገቡት ድሎች እና የታዩት ውጤቶች እንደ መነሻ ሆነው የ2019 እና የቀጣዮቹ ዓመታት ጉዞ ኢትዮጵያን በሥራ የምትበለጽግባት፣ የታቀዱት ሥራዎች በላቀ አፈጻጸም የሚጠናቀቁባት እና ተስፋዎቿ ሁሉ ተጨባጭ የሚሆኑባት አገር ያደርጋታል።

እድገታችንን ለማስቆም የሚሞክሩ ኃይሎች የማይቻል ተራራ እንደገጠማቸው በተግባር የምናሳይበት ሀገራችንም የአፍሪካ የኢኮኖሚ እና የመሠረተ ልማት ማዕከል ሆና በጽኑ መሠረት ላይ የምትቆምበት ዘመን እውን እየሆነ ነው።

የኢቢሲ ዶትስትሪም ኤዲቶሪያል

(ዘ-ሐበሻ ዜና) ደቡብ ኮሪያ በሆርሙዝ ባህረ ሰላጤ የባህር ላይ ጉዞ ደህንነትን እና የንግድ መስመር ነጻነትን ለማረጋገጥ ወታደራዊ እርምጃዎችን ጨምሮ የተለያዩ ተግባራዊ አማራጮችን እየገመገመች መሆኗን አስታውቃለች።

የሀገሪቱን ፕሬዚዳንታዊ ጽህፈት ቤት (ብሉ ሃውስ) በመወከል መግለጫ የሰጡ አንድ ከፍተኛ ኃላፊ፣ በዚሁ አወዛጋቢ የባህር ክልል ጉዳይ ላይ ሴኡል ምንም ዓይነት ድጋፍ አላደረገችም እየተባለ የሚሰራጨው መረጃ "ከእውነት የራቀ ነው" ሲሉ አስተባብለዋል።

በሌላ በኩል፣ በደቡብ ኮሪያ እና በአሜሪካ መካከል ሲካሄድ የነበረው የጸጥታ እና የደህንነት ውይይት በአሁኑ ወቅት "ምንም ዓይነት መሻሻል እያሳየ አለመሆኑን" ኃላፊው አረጋግጠዋል። የሴሚኮንዳክተር ቴክኖሎጂ አቅርቦትን ጨምሮ ሌሎች ቁልፍ የኢኮኖሚ እና የደህንነት ጉዳዮች በሁለቱ አጋር ሀገራት መካከል ዋነኛ የውይይት አጀንዳ ሆነው እየተመከረባቸው እንደሚገኝ ዘገባው አክሎ አመልክቷል።

በሆርሙዝ ሁለት የነዳጅ ጫኝ መርከቦች ላይ ጥቃት ተፈጸመ፤ ሳዑዲ እና ኢራን እርስ በእርስ እየተካሰሱ ነው

​በመካከለኛው ምስራቅ የተነሳው ግጭት እየተባባሰ በሄደበት በአሁኑ ወቅት፣ በስትራቴጂካዊው የሆርሙዝ ሰርጥ በኩል አልፈው ወደ ፋርስ ወሽመጥ መውጫ በመጓዝ ላይ በነበሩ ሁለት ግዙፍ የነዳጅ ጫኝ መርከቦች ላይ በሚሳኤል ጥቃት በመሰነዘሩ በቀጠናው ያለው የጸጥታ ውጥረት ይበልጥ ተባብሷል።

​ጥቃቱ የተፈጸመው በኦማን ኻሳብ ከተማ አቅራቢያ ሲሆን፣ የተመቱት መርከቦች በባህሪ ኩባንያ የምትመራው የሳዑዲ አረቢያዋ "ሲድር"  እና በደቡብ ኮሪያው ሲኖኮር ኩባንያ የምትመራው የላይቤሪያ ሰንደቅ አላማ አላቢዋ "ሴኔጋል ፕሮስፔሪቲ"  ናቸው።

ሁለቱም መርከቦች በአጠቃላይ ወደ አራት ሚሊዮን በርሜል የሚጠጋ የሳዑዲ ድፍድፍ ነዳጅ አጓጉዘው በመጓዝ ላይ የነበሩ ሲሆን፣ በጥቃቱ ሳቢያ በሰራተኞቻቸው ላይ የደረሰ የጎላ ጉዳት እንደሌለ ተገልፇል።

​ሳዑዲ አረቢያ ድርጊቱን አጥብቃ በማውገዝ ኢራን በቀጠናው ሀገራት ላይ የምታካሂደው አባባሽ ጥቃት አካል ነው ስትል በጽኑ ከሳለች።

በአንፃሩ የኢራን አብዮታዊ ዘብ (IRGC) የቀረበበትን ክስ አስተባብሎ፣ መርከቦቹ ከአሜሪካ ጦር ድጋፍ በማግኘት የተከለከለ የባህር መስመር ለማለፍ ሲሞክሩ በሰርጡ ውስጥ በተጠመዱ ፈንጂዎች  መመታታቸውን ገልጿል።

​ይህ በሁለቱ መርከቦች ላይ የተፈጸመው ጥቃት የአሜሪካ ጦር በኢራን ወታደራዊ ኢላማዎች ላይ አዳዲስ የአየር ጥቃቶችን በሰነዘረበት እና ኢራንም በበኩሏ በኩዌት፣ ባህሬን እና ዮርዳኖስ በሚገኙ የአሜሪካ ወታደራዊ ሰፈሮች  የሮኬት ምላሽ በሰጠችበት ወቅት የተከሰተ ነው።

​ይህ ክስተት በዓለም አቀፍ የነዳጅ ገበያ እና የአቅርቦት መስመር ላይ ከፍተኛ መረበሽ እና የዋጋ ንረት እንዳያስከትል ስጋትን ፈጥሯል።

Seledadotio

የደቡብ ኮሪያ ጠንቋዮች AI ገቢያችንን ክፋኛ ቀንሶብናል ብለው አማረሩ

በቴክኖሎጂ ምጥቀት ቀዳሚ ከሆኑት የዓለማችን አገራት መካከል አንዷ በሆነችው ደቡብ ኮሪያ፣ የቅርብ ጊዜው የአርቴፊሻል ኢንተለጀንስ (AI) ዕድገት የዘመናት ታሪክ ባለው የባህላዊ ዕድል ትንበያ (ጥንቆላ) ኢንደስትሪ ላይ ከፍተኛ አደጋ እየደቀነ መሆኑ ተሰማ።

በአገሪቱ የሚገኙ ታዋቂ ዕድል ተንባዮችና ጠንቋዮች ወደ እነርሱ ይመጡ የነበሩ ደንበኞቻቸው ፊታቸውን ወደ AI ቴክኖሎጂ በማዞራቸው ምክንያት ሥራቸው ክፉኛ እንደ ተቀዛቀዘባቸው በምሬት በመግለጽ ላይ ናቸው።

በዋና ከተማዋ ሴኡል ዳርቻ በሚገኘውና በባህላዊ ዕድል ተንባዮች (ጠንቋዮች) መንደርነቱ በሚታወቀው ‘ሚያ መንደር’ ውስጥ አሁን ላይ የደንበኞች ቁጥር በከፍተኛ ደረጃ ቀንሷል።

ቀደም ባሉ ዓመታት የደቡብ ኮሪያ ነዋሪዎች ስለ ጤናቸው፣ ትዳር፣ ፍቅር፣ ገንዘብ እና የወደፊት ዕጣ ፈንታቸው ለመጠየቅ ወደዚህ መንደር በብዛት ይጎርፉ ነበር። ይሁን እንጂ ዛሬ ላይ አብዛኞቹ ዜጎች በአካል ወደ መንደሩ ከመሄድ ይልቅ በኢንተርኔት አማካኝነት እንደ ChatGPT እና Gemini ያሉ የ-AI መተግበሪያዎችን በመጠቀም ዕድላቸውን መተንበይ መምረጣቸው ተገልጿል።

በዚሁ መንደር ውስጥ ከቀሩት ጥቂት ዕድል ተንባዮች መካከል አንዷ የሆኑት የ86 ዓመቷ አዛውንት ሶንግ ኦ-ሱን ሁኔታውን ሲያስረዱ፣ እሳቸው አሁንም ከዘመናዊው የኢንተርኔት ዓለም ርቀው እንደሚኖሩና ዕድልን ለመተንበይ “አራቱ የዕጣ ፈንታ ምሰሶዎች” (Saju) የሚባለውን የኮሪያ ጥንታዊ ኮከብ ቆጠራ ዘዴ በብሬይል መጽሐፍ እያነበቡ እንደሚጠነቁሉ ገልጸዋል።

አዛውንቷ ባለፉት 40 ዓመታት ያካበቱት ይህ የሰዎች ስነ-ልቦና የመረዳትና የማማከር ልምድ AI በቀላሉ ሊተካው የማይችለው የላቀ ሰብአዊ ችሎታ መሆኑን በጽኑ ያምናሉ። “በሕይወት የመኖር ተስፋ ቆርጠው ለመሞት እንኳ ወደ እኔ የመጡ ሰዎችን አሳምኜና አጽናንቼ ሕይወታቸውን እንዲቀጥሉ አድርጌያለሁ” ሲሉም የሥራቸውን ማኅበራዊ ፋይዳ ያስረዳሉ።

Seledadotio
Seledadotio

(ዘ-ሐበሻ ዜና) የአሜሪካ የገንዘብ ሚኒስቴር የቦንድ ግዢ ዕቅዱን ማሳወቁን ተከትሎ የዶላር አቅም መዳከሙ፣ ዓለም አቀፍ ባለሀብቶች አዳዲስ የትርፍ አማራጮችን ፍለጋ ፊታቸውን ወደ ታዳጊ ገበያዎች እንዲያዞሩ እያደረጋቸው መሆኑን የኢኮኖሚ ትንታኔዎች አመለከቱ። ባለፈው ወር የአሜሪካው የገንዘብ ሚኒስትር ስኮት ቤሰንት የዋጋ ንረትን እና የዕዳ ጫናን ለማርገብ በማሰብ፣ የረዥም ጊዜ የመንግስት የዕዳ ሰነዶችን (ቦንዶችን) መልሶ የመግዛት ዕቅድን በእጥፍ ማሳደጋቸው ይታወሳል።

በብሩኪንግስ ኢንስቲትዩት ከፍተኛ ተመራማሪ የሆኑት ሮቢን ብሩክስ እንዳሉት ታዳጊ ገበያዎች በቀጣይነት ከፍተኛ የሆነ "የገንዘብ ጎርፍ" ያስተናግዳሉ ተብሎ ይጠበቃል። ይህ የሆነበት ዋነኛ ምክንያት ታላላቅ ያደጉ ሀገራት የመንግስት ቦንድ ወለድን ለመቀነስ የሚያደርጉት ጥረት፣ ባለሀብቶች በዝቅተኛ ወለድ ገንዘብ ተበድረው ከፍተኛ ትርፍ ወደሚያስገኙ ታዳጊ ገበያዎች እንዲያፈሱ ምቹ ሁኔታ ስለፈጠረላቸው ነው። የአሜሪካ መንግስት በገበያው ውስጥ ጣልቃ መግባቱ፣ የብድር ወለድ በድንገት እንዳያሻቅብ በማድረግ የባለሀብቶችን ስጋት በእጅጉ ቀንስዋል።

በቲዲ ሴኪዩሪቲስ የወጡ መረጃዎች እንደሚያሳዩት ዓለም አቀፍ የታዳጊ ገበያ የቦንድ ፈንዶች ባለፈው ሳምንት ብቻ 967 ሚሊዮን ዶላር የሚገመት የገንዘብ ፍሰት አግኝተዋል፤ ይህም ካለፈው ሳምንት ጋር ሲነጻጸር የ15 በመቶ ብልጫ አለው። በሌላ በኩል ባለሀብቶች ይበልጥ አስተማማኝ ወደሆኑ የሀብት ማከማቻ አማራጮች ፊታቸውን በማዞራቸው፣ የአሜሪካው ውሳኔ ለወርቅ ዋጋ መናርም ትልቅ አስተዋጽኦ አድርጓል።

በለንደን የዩኒየን ባንኬር ፕራይቪ የውጭ ምንዛሬ ስትራቴጂ ኃላፊ ፒተር ኪንሴላ...የአሜሪካ መንግስት እርምጃ ዶላርን በማዳከሙ ምክንያት ከፍተኛ ወለድ የሚከፍሉ የታዳጊ ሀገራት ገንዘቦች ዋነኛ ተጠቃሚ መሆናቸውን ገልጸዋል። ለምሳሌ የቦንድ ግዢው ከተዋወቀ ወዲህ የደቡብ ኮሪያ ዎን በ2.83 በመቶ፣ የብራዚል ሪያል በ0.64 በመቶ፣ እንዲሁም የደቡብ አፍሪካ ራንድ በ0.59 በመቶ በዶላር ላይ ብልጫ ማሳየት ችለዋል።
እንደ ትንታኔው ከሆነ ብራዚል እና ቱርክ አሁንም ድረስ ከፍተኛ የኢንቨስትመንት መዳረሻ በመሆን ቀዳሚውን ስፍራ ይዘዋል። ብራዚል 14 በመቶ እንዲሁም ቱርክ 37 በመቶ የሆነ ከፍተኛ የወለድ ምጣኔ በማቅረባቸው በባለሀብቶች ዘንድ ተመራጭ ሆነዋል። በተመሳሳይ ኮሎምቢያም በዚህ ዓመት ከፍተኛ የውጭ ኢንቨስትመንት መሳብ የቻለች ሲሆን፣ የሀገሪቱ የገንዘብ ዋጋም ከዓመቱ መጀመሪያ አንስቶ በ20 በመቶ እድገት አሳይቷል።

በአንጻሩ እንደ ህንድ ያሉ የእስያ ሀገራት ዝቅተኛ የወለድ ምጣኔ ያላቸው በመሆኑ (የህንድ ማዕከላዊ ባንክ የወለድ ምጣኔ 5.25 በመቶ ነው)፣ ከሌሎች ታዳጊ ገበያዎች አንጻር ተመራጭነታቸው ዝቅተኛ መሆኑን የስክዋክ ቦክስ እስያ ዘገባ አመልክቷል። የኢራንን ጦርነት ተከትሎ ከታዳጊ ገበያዎች በከፍተኛ ፍጥነት ወጥቶ የነበረው የውጭ ገንዘብ፣ አሁን በአሜሪካ የቦንድ ግዢ ፖሊሲ ምክንያት ዳግም እያንሰራራ መሆኑን የዘርፉ ባለሙያዎች አስረድተዋል።

የሰሜን ዋልታ የሀብት ጦርነት የአርክቲክ መቅለጥ የፈጠረው የብሪክስ እና የኔቶ አዲስ የጂኦፖለቲካ ፍጥጫ
************************

ለአያሌ ዘመናት በበረዶ ተሸፍኖ እና ከሰው ልጅ ተደራሽነት ተሰውሮ የነበረው እጅግ ቀዝቃዛው የአርክቲክ ቀጠና፣ በአሁኑ ወቅት የዓለም ልዕለ-ኃያላን ሀገራት የኃይል ማሳያና የጂኦፖለቲካ ፍጥጫ ማዕከል ሆኗል።

አየር ንብረት ለውጥ ባስከተለው ተፅዕኖ የአርክቲክ ግግር በረዶ ከሌላው የዓለም ክፍል በሦስት እጥፍ በሚበልጥ ፍጥነት እየቀለጠ መምጣቱ፣ ለዘመናት ተቆልፈው የነበሩ አዳዲስ የባህር ንግድ መስመሮችንና ግዙፍ የተፈጥሮ ሀብቶችን በቀላሉ ለማግኘት መንገድ ከፍቷል።

ይህ አዲስ ሁኔታ የቀደመውን የዓለም የንግድ እንቅስቃሴ እና የጉዞ ጊዜ በእጅጉ እየቀየረው ሲሆን፣ ለአብነትም የደቡብ ኮሪያ የንግድ መርከብ በባህላዊው የስዊዝ ቦይ መስመር አውሮፓ ለመድረስ እስከ 80 ቀናት ይወስድባት የነበረውን ጉዞ በአዲሱ የአርክቲክ መስመር ወደ 40 ቀናት በማሳነስ ወጪና ጊዜዋን በግማሽ መቀነስ ችላለች።

በተለይም በመካከለኛው ምስራቅ እና በቀይ ባህር አካባቢ በሚስተዋሉ የጂኦፖለቲካ ፍጥጫዎች ሳቢያ መደበኛ የንግድ መስመሮች ስጋት ውስጥ በመውደዳቸው፣ ዓለም አርክቲክን እንደ ዋነኛ የንግድ አማራጭ እንድታማትር አስገድዷታል።

ከዚሁ የአርክቲክ ግግር በረዶ ስር የተሸሸገው ያልተነካ ግዙፍ የኢኮኖሚ ሀብት የኃያላኑን ፉክክር ይበልጥ አጋግሎታል።

በአርክቲክ ውቅያኖስ ስር 13 በመቶ ያልተነካ የዓለም የነዳጅ ክምችት፣ 30 በመቶ የተፈጥሮ ጋዝ እንዲሁም ውድ ማዕድናት የሚገኙ ሲሆን፣ እንደ ኖርዌይ ያሉ ሀገራት በአካባቢው የነዳጅ ቁፋሮአቸውን በስፋት እያከናወኑ ይገኛሉ።

ይህ ግዙፍ ሀብት በቀጠናው ላይ ከፍተኛ የወታደራዊና የደህንነት ስጋት የደቀነ ሲሆን፣ የብሪክስ አባል የሆነችው ሩሲያ ወታደራዊ ጣቢያዎቿን በማደስና አዳዲስ የኑክሌር መርከቦችን በመገንባት የበላይነቷን ለማረጋገጥ እየጣረች ነው።

ቻይናም በበኩሏ "የፖላር ሀር መንገድ" የሚል አዲስ የባህር መስመር በመቅረጽ መዋዕለ ነዋይ እያፈሰሰች ትገኛለች።

በተቃራኒው ፊንላንድ እና ስዊድን ኔቶን መቀላቀላቸውን ተከትሎ የምዕራባውያን ወታደራዊ እንቅስቃሴ በእጅጉ በመጨመሩ የአካባቢው ውጥረት እየጋለ መጥቷል።

የአርክቲክ ግግር በረዶ መቅለጥ የቀጠናውን የተፈጥሮ ገጽታ ብቻ ሳይሆን የዓለም አቀፉን የጂኦፖለቲካና የኢኮኖሚ ሚዛን በከፍተኛ ደረጃ እየቀየረው ይገኛል።

የሰሜን ዋልታ ከአካባቢ ጥበቃ አጀንዳነቱ አልፎ፣ የዓለም ልዕለ-ኃያላን ሀገራት ያልተነካ የኃይል ሀብት የሚቀራመሙበትና ወታደራዊ አቅማቸውን የሚያንፀባርቁበት አዲስ የአለም አቀፍ ፖለቲካ ግንባር ሆኖ ቀጥሏል።

በሰለሞን ገዳ
#arcticgeopolitics #bricsvsnato #northernsearoute #resourcerace #arcticmeltdown

ደቡብ ኮሪያ ወደ አውሮፓ የሚወስደውን አዲሱን የአርክቲክ የባሕር ንግድ መስመር በሙከራ ደረጃ ለመጠቀም ታሪካዊ ጉዞ ጀመረች
**************************

በዓለም አቀፍ የባሕር ትራንስፖርት ዘርፍ ትልቅ አቅም ያላት ደቡብ ኮሪያ፣ የቡሳን ወደቧን የዓለም አቀፍ የንግድ ማዕከል ለማድረግና ወደ አውሮፓ የሚደረገውን የጭነት ጉዞ የሚያሳጥር አዲስ አማራጭ መስመር በስኬት ለመፈተሽ የሚያስችላትን የመጀመሪያውን የንግድ መርከብ ጉዞ በይፋ አስጀምራለች።

«ፓንስታር አክሮ» (PanStar Acro) የተሰኘችውና 2 ሺህ 758 መደበኛ ባለ 20 ጫማ ኮንቴነሮችን የመሸከም አቅም ያላት ግዙፍ የኮንቴነር መርከብ፣ በምሥራቅ ሩሲያና በቤሪንግ ባህር አድርጋ በሰሜናዊው የአርክቲክ የበረዶ መስመር በኩል ወደ ብሪታንያ፣ ኔዘርላንድስ እና ፖላንድ የምታደርገውን የ40 እስከ 45 ቀናት ጉዞ ጀምራለች።

የደቡብ ኮሪያው ፕሬዚዳንት ሊ ጄ-ምዮንግ የአርክቲክ የባሕር ትራንስፖርት ልማትን የሀገሪቱ ዋና የኢኮኖሚ ትኩረት በማድረግ እስከ እ.ኤ.አ. 2030 ድረስ መስመሩን መደበኛ የንግድ መሸጋገሪያ ለማድረግ አቅደው እየሰሩ ይገኛሉ።

ይህ የዓለም አቀፍ የንግድ ትስስር አዲስ ተስፋ የፈነጠቀበት የባሕር መስመር፣ የመርከቦችን የጉዞ ጊዜና ወጪ በከፍተኛ ሁኔታ የሚቀንስ ከመሆኑም በላይ ለዓለም አቀፍ ንግድ አስተማማኝ አማራጭ መውጫ በመሆን አዲስ የዘመናዊ ትራንስፖርት ምዕራፍ የሚከፍት ነው።

የመርከቧ አስተማማኝ ጉዞ እንዲረጋገጥና የበረዶ እንቅፋቶችን ለመሻገር ከሩሲያ ጋር አስፈላጊው የቴክኒክ ውይይት የተደረገ ሲሆን፣ የዓለም አቀፍ አየር ንብረት ለውጥና የበረዶዎች መቅለጥ የሰሜናዊውን መስመር ለባሕር ጉዞ ይበልጥ ምቹ እያደረገው መጥቷል።

ባለፈው ዓመት ብቻ ከ100 በላይ መርከቦች ይህንን የሰሜን የባሕር መስመር ለንግድ እንቅስቃሴ የተጠቀሙበት ሲሆን፣ የደቡብ ኮሪያ አዲሱ የሙከራ ጉዞም የመለዋወጫ ዕቃዎችንና ልዩ ልዩ ምርቶችን ጭኖ በስኬት ወደ አውሮፓ በማምራት ላይ ይገኛል።
#arcticshipping #southkoreatrade #panstaracro #maritimeinnovation #globaltraderoutes

''ቁስላችንን አትነካኩብን'' አሜሪካ
#ethiopia ​| በታህሳስ ወር 2011 እ.ኤ.አ. ኤምቪአርዲቪ የተሰኘው የደች አርክቴክቸር ድርጅት በደቡብ ኮሪያ ሴኡል ውስጥ «ዘ ክላውድ» የተሰኘ የመኖሪያ ህንፃዎች ፕሮጀክት ንድፍ ይፋ ማድረጉን ተከትሎ ከፍተኛ የዓለም አቀፍ ትችትና ቁጣ አስተናግዷል።

ንድፉ 260 እና 300 ሜትር ቁመት ያላቸውን ሁለት ግዙፍ ህንፃዎች የሚያሳይ ሲሆን በ27ኛው ፎቅ አካባቢ በ10 ፎቅ ስፋት ባላቸውና አወቃቀራቸው ከተለመደው ወጣ ባሉ አራት ማዕዘን ብሎኮች እርስ በርሳቸው እንዲያያዙ ተደርገው የተሰሩ ነበሩ።

​ንድፍ አውጪዎቹ እነዚህን ተያያዥ ክፍሎች ምግብ ቤቶችን፣ የመዋኛ ገንዳዎችን፣ መዝናኛዎችንና የጋራ ቦታዎችን የያዘ «ፒክሴሌትድ ደመና» ብለው ቢጠሩትም ህንፃዎቹ ከተወሰነ አቅጣጫ ሲታዩ በግንቦቹ መካከል ያለው ብሎክ በሴፕቴምበር 11 የሽብር ጥቃት ወቅት በኒውዮርክ መንታ ህንፃዎች ዙሪያ ይታይ የነበረውን ጭስና ፍርስራሽ የሚመስል ሆኖ ተገኝቷል።

​ይህ መመሳሰል በተለይም በአሜሪካውያን ዘንድ በፅኑ የተኮነነ ሲሆን ድርጅቱ ኤምቪአርዲቪ በበኩሉ መመሳሰሉ በፍጹም ሆን ተብሎ የተደረገ አለመሆኑንና በንድፍ ሂደቱም ወቅት ያላስተዋሉት መሆኑን ገልጾ ይፋዊ ይቅርታ ጠይቋል።

ምንም እንኳን ህንፃዎቹ በ2015 እ.ኤ.አ. ተገንብተው ያልቃሉ ተብሎ ተጠብቆ የነበረ ቢሆንም የፕሮጀክቱ አልሚዎች በኋላ ላይ በገጠማቸው የፋይናንስ ውድቀት ምክንያት ሰማይ ጠቀስ ህንፃዎቹ ሳይገነቡ ቀርተዋል።

በያፌት ገ/ህይወት

Getu Temesgen - (ጌጡ ተመስገን)
#getutemesgen #getu

(ዘ-ሐበሻ ዜና) ከ12.5 ቢሊዮን ዶላር በላይ ወጪ ይደረግበታል ተብሎ የሚጠበቀውና ከአዲስ አበባ በስተደቡብ ምስራቅ የሚገነባው አዲሱ ግዙፍ የአውሮፕላን ማረፊያ፣ በአሁኑ ወቅት በቦሌ ዓለም አቀፍ ኤርፖርት ላይ ያለውን የትራፊክ ጫና በዘላቂነት ለማቃለል ያለመ ነው። ይህ አራት ግዙፍ ማኮብኮቢያዎችን የሚያካትተውና ባለፈው ጥር ወር የዲዛይን ስራው የተጀመረው ፕሮጀክት፣ ሙሉ በሙሉ ሲጠናቀቅ በዓመት እስከ 110 ሚሊዮን መንገደኞችን የማስተናገድ ከፍተኛ አቅም ይኖረዋል።

ሮይተርስ የኢትዮጵያ አየር መንገድን ሪፖርት ጠቅሶ ሐሙስ ዕለት እንደዘገበው፣ የተርሚናሉን፣ የበረራ ሜዳውን እና ተያያዥ የመንገድ ትስስሮችን ግንባታ ለማካሄድ በእጩነት ከተለዩት ዓለም አቀፍ ኩባንያዎች ውስጥ የቻይና ተቋማት ትልቁን ድርሻ ወስደዋል። ቻይና ኮሙኒኬሽን ኮንስትራክሽን፣ ቻይና ሲቪል ኢንጂነሪንግ ኮንስትራክሽን፣ ቻይና ሮድ ኤንድ ብሪጅ እና ቤጂንግ አርባን ኮንስትራክሽን ግሩፕ የተባሉት ግዙፍ ተቋማት በእጩነት ተካተዋል። በአጠቃላይ ለግንባታው ከተመረጡት 33 ተወዳዳሪዎች ውስጥ 15ቱ በቻይና ኩባንያዎች የሚመሩ ጥምረቶች መሆናቸውንና ቀጣዩ ሂደትም ወደ ይፋዊ የጨረታ ውድድር መሸጋገር እንደሆነ አየር መንገዱ አስታውቋል።

በዚህ የጨረታ ሂደት የቻይናውያኑ ተቋማት የጣሊያኑን ዊቢውልድ፣ የፈረንሳዩን ቪንቺ፣ የደቡብ ኮሪያውን ሳምሰንግ ሲ ኤንድ ቲ እንዲሁም የቱርኩን ካልዮን እና አይሲ ኢክታስ የመሳሰሉ ስመ-ጥር የዓለም ኩባንያዎችን የሚገዳደሩ ይሆናል።

የኢትዮጵያ ባለስልጣናት እንደገለጹት በ2030 (እ.ኤ.አ.) ሙሉ በሙሉ ይጠናቀቃል ተብሎ የታቀደው ይህ ፕሮጀክት፣ ሲመረቅ የአፍሪካ ትልቁ የአውሮፕላን ማረፊያ ይሆናል ተብሎ ይጠበቃል። የአፍሪካ ልማት ባንክ ለግንባታው የሚሆን ፋይናንስን እያመቻቹ ካሉ ዋና ዋና ተቋማት አንዱ ሲሆን፣ ለፕሮጀክቱም 500 ሚሊዮን ዶላር የገንዘብ ድጋፍ ያደርጋል ተብሏል። ይህ የኢትዮጵያ ግዙፍ የመሰረተ ልማት ዝርጋታ፣ ኬንያ እና ሩዋንዳን የመሳሰሉ የቀጠናው ሀገራት የቱሪዝምና የንግድ እንቅስቃሴያቸውን ለማሳደግ በአቪዬሽን ዘርፍ እያደረጉት ያለውን ከፍተኛ ፉክክር ይበልጥ የሚያጋግለው ይሆናል።

(ዘ-ሐበሻ ዜና) ፕሬዝዳንት ዶናልድ ትራምፕ የሀገር መከላከያ ፀሀፊ ለሆኑት ፒት ሄግሴዝ፣ አሜሪካ ከደቡብ ኮሪያ ጋር በየዓመቱ የምታደርገውን የጋራ ወታደራዊ ልምምድ በከፍተኛ ሁኔታ እንዲቀንሱት ጥብቅ ትዕዛዝ አስተላልፈዋል። ትራምፕ በእሁድ እለት በራሳቸው ማህበራዊ ትስስር ገጽ ላይ እንዳሰፈሩት፣ አሜሪካ ከረጅም ጊዜ በፊት ጀምሮ በዚህ ወታደራዊ ልምምድ ላይ ለመሳተፍ መስማማቷ እጅግ እንዳላስደሰታቸው በግልጽ ተችተዋል።

ለዚህ አወዛጋቢ ውሳኔ ፕሬዝዳንቱ ሁለት ዋና ዋና መነሻዎችን አንስተዋል። የመጀመሪያው የደቡብ ኮሪያ የዲፕሎማሲ አቋም ሲሆን፣ አሜሪካ ኢራንን ከኒውክሌር ጦር መሳሪያ ነፃ ለማድረግ በምታደርገው ጥረት እንድትተባበር ለቀረበላት ጥያቄ ሴኡል "አይሆንም" የሚል ምላሽ መስጠቷ ትራምፕን አስቆጥቷል። ሁለተኛውና ትልቁ ምክንያት ደግሞ ፕሬዝዳንቱ ከሰሜን ኮሪያው መሪ ኪም ጆንግ ኡን ጋር ያላቸው "እጅግ መልካም" የሆነ ግላዊ ወዳጅነት ነው።

ትራምፕ ይህንን ወታደራዊ ልምምድ ሲተቹት፤ "እነዚህ ልምምዶች ከፍተኛ ወጪ የሚጠይቁና በአብዛኛው በአሜሪካ የሚሸፈኑ ከመሆናቸውም በላይ፣ እኔ ስልጣን ላይ እስካለሁ ድረስ ምንም አይነት ስጋት ላልፈጠረችብንና አክብሮት ላሳየችን ሀገር (ሰሜን ኮሪያ) ተገቢ ያልሆነ የጥላቻ መልዕክት የሚያስተላልፉ ናቸው" ብለዋል። ልምምዱን ሙሉ በሙሉ ለመሰረዝ አሁን ላይ ጊዜው ስላረፈደ፣ በምትኩ ግን የኦፕሬሽኑ መጠንና ስፋት በከፍተኛ ሁኔታ ተቀንሶ እንዲካሄድ ተወስኗል።

“ኡልቺ ፍሪደም ሺልድ” በመባል የሚታወቀውና ከኦገስት 17 እስከ 27 ሊካሄድ የታቀደው ይህ ወታደራዊ ልምምድ፣ በሁለቱ አጋር ሀገራት መካከል ያለውን ዝግጁነት ለማጠናከር ያለመ ነበር። ሆኖም ሰሜን ኮሪያ ይህንን የጦር ልምምድ "ለወረራ የሚደረግ የጦርነት ትዕይንት" ስትል አጥብቃ ያወገዘችው ሲሆን፣ ተቃውሞዋን በተግባር ለማሳየትም ባለፈው ሳምንት የባለስቲክ ሚሳኤሎችን ተኩሳለች። ሁኔታውን ለማርገብ በሚመስል መልኩ፣ ፕሬዝዳንት ትራምፕ ከኪም ጆንግ ኡን ጋር አብረው ያሉበትን ምስል ቅዳሜ እለት በማህበራዊ ሚዲያቸው በማጋራት "እኔ እና ኪም ጆንግ ኡን እጅግ በጣም እንግባባለን!" በማለት የሁለቱን ሀገራት ውጥረት ለማርገብ የፖለቲካ ካርዳቸውን ተጠቅመዋል።

(ዘ-ሐበሻ ዜና) ደቡብ ኮሪያ ከሰሜን ኮሪያ ጋር ሰላም ለመታረቅ ጥሪ አቀረበች፡፡ የደቡብ ኮሪያ ፕሬዝደንት ሊ ጄ ማዩንግ ከሰሜን ኮሪያ ጋር ያለው ጦርነት በይፋ እንዲቋጭ ለፒዮንጊያንግ ጥሪ አቀረቡ፡፡ የደቡብ ኮሪያ 81ኛ የነፃነት በአል ዛሬ በተከበረበት ወቅት ባደረጉት ንግግር ‹‹አንዳችን ሌላችንን ከማስፈራራት ተቆጥበን ለረጅም ጊዜ የዘለቀውን ጦርነት ለማቆም ውይይት እንጀምር›› በማለት ለሰሜን ኮሪያ መልእክት አስተላልፈዋል፡፡ በዚህ ሂደት እያደገ የመጣውን የሰሜን ኮሪያን የኒውክሌይር ለመግታት የሚያስችል ውይይት ለማድረግ እንደሚቻልም አስታውቀዋል፡፡

ለሁለት የተከፈሉት ኮሪያዊያን ከ1950 እስከ 1953 ያደረጉት ጦርነት የቆመ ቢሆንም እስካሁን የሰላም ስምምነት ላይ አለመድረሳቸው ይታወቃል፡፡ ፕሬዝደንት ሊ በዛሬ ንግግራቸው ‹‹ሁለቱ ኮሪያዎች እርስ በእርስ መከባበር ይገባቸዋል፡፡ አላስፈላጊ ግጭቶችንም ማስቆም ይኖርባቸዋል›› ካሉ በኋላ ይህ የሚጀምረው ጥላቻን በመቀነስና በደንብና በስርአት ግንዛቤ የማስጨበጥ ስራ ሲከናወን መሆኑን ጠቅሰዋል፡፡

አስከትለውም ‹‹ሰሜን ኮሪያና ደቡብ ኮሪያ ፊት ለፊት ተቀምጠው በሰላም አብሮ ስለመኖርና የጋራ እድገት ይመክራሉ ብዬ ተስፋ አደርጋለሁ፡፡ ከሰሜን ኮሪያ ይሁንታ ካገኘሁ የኮሪያን ባህረ ሰላጤ የተረጋጋ አደርጋለሁ›› ሲሉም ተናግረዋል፡፡ ፕሬዝደንቱ ይህንን ንግግር ያደረጉት ከአሜሪካ ጋር የሚያደርጉትን አመታዊ የ11 ቀናት ወታደራዊ ልምምድ ለመጀመር 24 ሰአታት ሲቀራቸው ነው፡፡ ይህንን ልምምድ ሰሜን ኮሪያ አጥብቃ እንደምትቃወም መግለጿ ይታወሳል፡፡

በቅድመ ውድድር ዘመን ጨዎታዎች ማንቸስተር ሲቲ ድል ሲያስመዘግብ ቼልሲ አቻ ተለያይቷል
***********************************

በማሌዥያ ኢስካንዳር ፑተሪ በሚገኘው ሱልጣን ኢብራሂም ላርኪን ስታዲየም በተደረገ የቅድመ ውድድር ዘመን የወዳጅነት መርሐ-ግብር ቼልሲ ከጆሆር ዳሩል ታዚም ጋር ተጫውቶ 3 ለ 3 በሆነ አቻ ውጤት ተለያይቷል።

በዚህ ማራኪ ጨዋታ ለቼልሲ ሊያም ዲላፕ ሁለት ግቦችን በፍጹም ቅጣት ምት ሲያስቆጥር ክሪስቶባል ማርኩዌዝ ደግሞ በራሱ መረብ ላይ አስቆጥሯል። በጆሆር ዳሩል ታዚም በኩል ደግሞ አይማን፣ ኦስካር አሪባስ እና ቤርግሰን ግቦቹን ከመረብ አሳርፈዋል።

በተመሳሳይ በደቡብ ኮሪያ ሴኡል በሚገኘው ሴኡል ወርልድ ካፕ ስታዲየም በተደረገ ሌላ የቅድመ ውድድር ዘመን የወዳጅነት መርሐ-ግብር ማንቸስተር ሲቲ ስፔናዊውን ክለብ አትሌቲኮ ማድሪድን ገጥሞ 3 ለ 1 በሆነ ውጤት አሸንፏል።

ለማንቸስተር ሲቲ የማሸነፊያዎቹን ግቦች ኦማር ማርሙሽ ሁለት እንዲሁም ሪያን አይት-ኑሪ አንድ ግብ ከመረብ ሲያሳርፉ፣ ለአትሌቲኮ ማድሪድ ብቸኛዋን ግብ ጆርጅ ዶሚንጌዝ አስቆጥሯል።
#chelsea #manchestercity #atleticomadrid #preseason #friendlymatch

የሙቀት ማዕበል በሰሜን ኮሪያ፡ መንግሥት ዜጎች የውሻ ሥጋ ሾርባ እንዲመገቡ መከረ

​በሰሜን ኮሪያ ታሪካዊ የሙቀት ማዕበል በመከሰቱ መንግሥት ዜጎች አካላቸውን ለማቀዝቀዝ የውሻ ሥጋ ሾርባ እንዲመገቡ መከረ።

​በሀገሪቱ የሙቀት መጠን ከዚህ ቀደም ተመዝግቦ የማያውቅ 36.7 ዲግሪ ሴልሺየስ የደረሰ ሲሆን፣ ይህም በሀገሪቱ የአየር ሁኔታ ታሪክ ከፍተኛው ሆኖ ተመዝግቧል። 'ሳምቦክ' በተሰኘው በዚህ የከፋ የሙቀት ወቅት የመንግሥት መገናኛ ብዙኃን እንደ የውሻ ሥጋ ሾርባ፣ የዓሣ ገንፎ፣ ሀብሐብ እና ዱባ ያሉ ምግቦች የሰውነትን ጥንካሬ ለመጠበቅና ሙቀቱን ለመቋቋም ይረዳሉ ብለዋል።

​የኮሪያ ማዕከላዊ ዜና ኤጀንሲ (KCNA) እንደገለጸው፣ በዋና ከተማዋ ፒዮንግያንግ የሚገኙ ምግብ ቤቶች እነዚህን ባህላዊ ምግቦች ለሚፈልጉ ደንበኞች አስተናጋጅነት እየሰጡ ይገኛሉ።

​ጎረቤት ደቡብ ኮሪያ ከሙቀት ማዕበሉ ጋር በተያያዘ ከ20 በላይ ሰዎች ሕይወት ማለፉን ብታረጋግጥም፣ ሰሜን ኮሪያ እስካሁን የሞት መረጃ አላወጣችም።

Seledadotio
Seledadotio

ሰሜን ኮሪያ ወደ ጃፓን ባሕር ባሊስቲክ ሚሳይል አስወነጨፈ
#ethiopia | ሰሜን ኮሪያ ዛሬ ከምሥራቅ ጠረፏ ከዎንሳን (Wonsan) አካባቢ ወደ ጃፓን ባሕር (በደቡብ ኮሪያ “ምሥራቅ ባሕር” ተብሎ የሚጠራው) አጭር ርቀት የሚጓዝ ተጠርጣሪ ባሊስቲክ ሚሳይል ማስወንጨፏን የደቡብ ኮሪያ ጦር እና የጃፓን ባሕር ዳርቻ ጥበቃ አስታውቀዋል።

በጃፓን ባለሥልጣናት መረጃ መሠረት ሚሳይሉ በጃፓን ግዛት ወይም በኢኮኖሚያዊ የባሕር ቀጠናዋ (EEZ) ውስጥ አላረፈም፤ እስካሁንም የደረሰ ጉዳት ወይም ሰው ጉዳት አልተዘገበም።

የደቡብ ኮሪያ፣ የአሜሪካ እና የጃፓን ወታደራዊ ኃይሎች የሚሳይሉን አይነትና የበረራ መረጃ በጋራ እየመረመሩ ነው።

ይህ የሚሳይል ሙከራ በአሜሪካና በደቡብ ኮሪያ የጋራ ወታደራዊ ልምምዶች ሊጀመሩ ጥቂት ቀናት ሲቀሩ የተፈጸመ ሲሆን፣ ፒዮንግያንግ እነዚህን ልምምዶች ለወረራ ዝግጅት አድርጋ እንደምትመለከታቸው ትገልጻለች።

ከቀናት በፊትም ሰሜን ኮሪያ በጃፓን የመከላከያ አቅም መስፋፋት ምክንያት “ተጨማሪ ወታደራዊ እርምጃዎች” ልትወስድ እንደምትችል አስጠንቅቃ ነበር።

የደቡብ ኮሪያ እና የጃፓን መንግሥታት የሚሳይሉን ሙከራ በማውገዝ የተባበሩት መንግሥታት የጸጥታ ምክር ቤት ውሳኔዎችን የሚጥስ ነው ብለዋል፤ በቀጣይ ተጨማሪ የሚሳይል ሙከራዎች ሊኖሩ እንደሚችሉም በከፍተኛ ንቃት እየተከታተሉ መሆኑን ገልጸዋል።

Getu Temesgen - (ጌጡ ተመስገን)

ደቡብ ኮሪያ ዜጎቿ ትዳር እንዲመሠርቱእና ልጅ እንዲወልዱ ገንዘብ እየከፈለች እንደሆነ ተነገረ።

በዓለማችን ዝቅተኛው የወሊድ መጠን የሚገኝባት ደቡብ ኮሪያ፣ የህዝብ ቁጥሯ እንዳይቀንስና የህጻናት ቁጥር እንዲጨምር ትልቅ አዲስ ዘመቻ ጀምራለች!

መንግሥት ወጣቶች እንዲጋቡና ልጅ እንዲወልዱ የሚያበረታቱ የገንዘብ፣ የቤት እና የህጻናት ማደጊያ ድጋፍ ፕሮግራሞችን ይፋ አድርጓል።

ወዲያው ጋብቻ የሚፈፅሙ አዲስ ባለትዳሮች

1ኛ የመኖሪያ ቤት ድጋፍ፣

2ኛ የህጻናት ማደጊያ አበል፣

3ኛ የወሊድ ክፍያ እና የአካባቢ አስተዳደሮች የሚሰጧቸውን ልዩ ልዩ ማበረታቻዎች በአንድ ላይ ሲደመሩ አጠቃላይ የሚያገኙት ድጋፍ ከፍተኛ መጠን ሊደርስ ይችላል።

ኢትዮጵያ ውስጥ ተመሳሳይ የጋብቻና የወሊድ የገንዘብ ማበረታቻ ቢጀመር... እርስዎ ያገባሉ?

Seledadotio
Seledadotio

ከውኃ ኃይል ባሻገር፤ የኢትዮጵያ አዲሱ የኒዩክሌር ኃይል ጉዞ እና የብልጽግና ተስፋ
****************

ኢትዮጵያ በመደመር መንግሥት የኃይል አቅርቦትና ፍላጎቷን ለማመጣጠን ከውኃ እስከ ንፋስ፣ ከጂኦተርማል እስከ ፀሐይ ኃይል ማመንጫዎችን በመገንባት በአፍሪካ አህጉር ተምሳሌታዊ ሥራዎችን እያከናወነች ትገኛለች።

ከጊቤ I እስከ ኮይሻ ያሉ ግዙፍ የውኃ ኃይል ማመንጫዎች እንዲሁም ከአባ ሳሙኤል እስከ ታላቁ የኢትዮጵያ ሕዳሴ ግድብ የተዘረጉት መሠረተ ልማቶች ማኅበረሰቡንና የአምራች ኢንዱስትሪዎችን በማንቀሳቀስ ለሀገራችን ኢኮኖሚ ትልቅ አቅም ሆነዋል።

ሆኖም ዘላቂ የኃይል ፍላጎትን በተወሰኑ አማራጮች ብቻ ማሟላት አዋጭ አለመሆኑን የተረዳው መንግሥት፣ በቴክኖሎጂ የታገዘ የኒዩክሌር ኃይል አስፈላጊነትን በመገንዘብ ስትራቴጂካዊ የኃይል አቅርቦት ፍኖተ ካርታ በማዘጋጀት ወደ ተግባር ገብቷል።

የኒዩክሌር ቴክኖሎጂ እንደ ፀሐይና ንፋስ ከአየር ንብረት ጋር የማይቀያየርና በቀን 24 ሰዓት በሳምንት 7 ቀን ያለማቋረጥ ኃይል የማመንጨት አቅም ያለው በመሆኑ ለትላልቅ ኢንዱስትሪዎች፣ ለአምራች ሴክተሮችና ለቴክኖሎጂ ማዕከላት የማይንቀሳቀስ መሠረት ይጥላል።

ይህ ቴክኖሎጂ ኤሌክትሪክ በሚያመነጭበት ወቅት ምንም ዓይነት የካርቦን ልቀት የሌለው በመሆኑ ለአየር ንብረት ለውጥ ትግልና ለአረንጓዴ ኢኮኖሚ ግንባታ ትልቅ አስተዋጽኦ አለው።

በተጨማሪም ከቅሪተ አካል ነዳጆች የዋጋ መዋዥቅና ጥገኝነት ነፃ የሚያደርግ ሲሆን፣ ከኃይል ማመንጨት ባለፈ በሕክምና፣ በግብርና፣ በኢንዱስትሪና ውኃ ማጣራት እንዲሁም ለብዙ ሺህ ዜጎች የሥራ ዕድል በመፍጠር ረገድ ከፍተኛ ፋይዳ አለው።

በዓለም አቀፍ ደረጃ ፈረንሳይ 70 በመቶ የኤሌክትሪክ ፍላጎቷን በኒዩክሌር በመሸፈን አነስተኛ የካርቦን ልቀት ማረጋገጥ ስትችል፤ አሜሪካ፣ ቻይና፣ ደቡብ ኮሪያ እና የተባበሩት አረብ ኤሚሬቶችም በዘርፉ ትልቅ ስኬት አስመዝግበዋል።

ኢትዮጵያም ይህንን ዓለም አቀፍ ተሞክሮ በመቅሰም ሁለንተናዊ ብልጽግናን ለማረጋገጥ የሚያስችል የኒዩክሌር ኃይል ፍኖተ ካርታ ቀርጻለች።

ሀገራችን በዘርፉ የተሻለ ልምድና ተሞክሮ ካለው የሩሲያው ሮሳቶም (Rosatom) ስቴት ኮርፖሬሽን ጋር ስትራቴጂካዊ ስምምነት ያደረገች ሲሆን፣ በአሁኑ ወቅትም ጠንካራ የደህንነት መሠረተ ልማትና የፋይናንስ ዝግጅት በማጠናከር ቴክኖሎጂውን ለኢንዱስትሪ፣ ለሕክምናና ለሳይንስ ዕድገት ለማዋል የጀመረችውን ጉዞ አጠናክራ ቀጥላለች።

በመሐመድ ፊጣሞ
#ethiopia #nuclearenergy #greeneconomy #sustainabledevelopment #energytransition

🚨በየ5 ደቂቃው ምስል የሚያነሳውና ሰላይ የሆነው የስማርት ፎን ምስጢር ይፋ ሆነ‼️ከሰሜን ኮሪያ በምስጢር ተሰርቆ የወጣ አንድ የስማርት ፎን ስልክ፣ የመንግስቱ አገዛዝ የዜጎቹን እያንዳንዱን እንቅስቃሴ ምን ያህል በአስፈሪ ሁኔታ እንደሚቆጣጠር ለዓለም አቀፉ ማህበረሰብ ይፋ አድርጓል።

ቢቢሲ (BBC) በሴኡል ካለው ዴይሊ ኤንኬ (Daily NK) ከተሰኘው የመገናኛ ብዙሃን ተቀብሎ ባደረገው የቴክኒክ ምርመራ፣ ስልኩ ከተራ መገናኛ መሳሪያነት ይልቅ በኪስ የሚያዝ የወታደራዊ የሰላይ መሳሪያ ሆኖ የተሰራ መሆኑን አረጋግጧል።

ይህ ስልክ ተጠቃሚው የሚያደርገውን ማናቸውንም እንቅስቃሴ በየ5 ደቂቃው በምስጢር ፎቶ (Screenshot) በማንሳት ተጠቃሚው ሊከፍተው ወደማይችለው የተደበቀ ፎልደር ይልካል፤ ይህም መረጃ በመንግስት የደህንነት አካላት ብቻ የሚከፈትና ለቁጥጥር የሚያገለግል ነው።

በተጨማሪም ስልኩ ከማንኛውም የዓለም አቀፍ ኢንተርኔት አውታረ መረብ ጋር በፍፁም እንዳይገናኝ ተደርጎ የተዘጋ በመሆኑ ከውጭ ዓለም የሚመጣ ማናቸውንም መረጃ ሙሉ በሙሉ ይከለክላል።

ከዚህም በላይ ተጠቃሚዎች በሚጽፉበት ወቅት ስልኩ በራሱ የቃላት ማረምያ ስልቶችን በመጠቀም ቃላትን ይለውጣል። ለምሳሌ “ኦፓ” (Oppa - በደቡብ ኮሪያ ወንድምን ወይም ፍቅረኛን ለመጠራት የሚያገለግል ቃል) የሚለውን ወደ “ኮምሬድ” (Comrade - ጓድ)፣ እንዲሁም “ደቡብ ኮሪያ” የሚለውን ቃል ወደ “ተላላኪ ሀገር” (Puppet state) በማለት በራሱ ጊዜ አድሶ ይጽፋል።

ይህ መሳሪያ ስልክ ከመሆን ይልቅ የሰሜን ኮሪያ አገዛዝ ዜጎቹ ምን ማንበብ፣ ማወቅ፣ መጻፍ እና መናገር እንዳለባቸው ሙሉ በሙሉ ለመቆጣጠር የፈጠረው ዘመናዊ የኪስ ውስጥ የክትትልና የቁጥጥር መሳሪያ ነው ተብሏል።

Seledadotio
Seledadotio

የኢትዮጵያ ኢንተርናሽናል ቴኳንዶ ቡድን በዓለም ሻምፒዮና ላይ ደማቅ ድል አስመዘገበ
‎
‎#ethiopia | ​በደቡብ ኮሪያ ጊምቺዮን ከተማ ከሐምሌ 3 እስከ 6 ቀን 2018 ዓ.ም በተካሄደው የዓለም ሻምፒዮና ላይ የተሳተፈው የኢትዮጵያ ኢንተርናሽናል ቴኳንዶ ብሔራዊ ቡድን፣ በአጠቃላይ ዘጠኝ ሜዳሊያዎችን በመሰብሰብ ታሪካዊ ውጤት አስመዝግቧል።
‎
‎ከ46 አገራት የተውጣጡ ከ2 ሺህ በላይ ስፖርተኞች በተሳተፉበት በዚህ ጠንካራ ውድድር ላይ፣ ለአምስት ወራት ያህል ዝግጅት ሲያደርግ የቆየው የሀገራችን ስብስብ ባሳየው አስደናቂ ብቃት የኢትዮጵያን ስም በዓለም አደባባይ ከፍ ማድረግ ችሏል።
‎
‎​የብሔራዊ ቡድኑ አሰልጣኝ እና የልዑኩ መሪ ኢንተርናሽናል ኢንስፔክተር ማስተር ኤልያስ ኩመል እንደገለጹት፣ ውድድሩ እጅግ ፈታኝና አድካሚ የነበረ ቢሆንም ካደረጉት ጥልቅ ዝግጅት አንጻር የተጠበቀውን ስኬት ማምጣት ተችሏል።
‎
‎ቡድኑ በአራት ተወዳዳሪዎች ብቻ በኢንተርናሽናል እና በኮፖት ቴኳንዶ የውድድር ዘርፎች የቀረበ ሲሆን፣ ሁሉም ተሳታፊዎች በየምድባቸው ሜዳሊያ ውስጥ መግባት ችለዋል። በዚህም ቡድኑ ሁለት የወርቅ፣ ሦስት የብር እና አራት የነሐስ ሜዳሊያዎችን በድምሩ ማሸነፍ ችሏል።
‎
‎Getu Temesgen - (ጌጡ ተመስገን)
‎
‎#getutemesgen #getu #ጌጡ
‎
‎#ethiopia #taekwondo #worldchampionship #gimcheon2026 #teamethiopia #ethiopiansports
‎
‎

(ዘ-ሐበሻ ስፖርት) እንግሊዝና አርጀንቲና ከሁለት አስርት አመታት በኋላ ለመጀመሪያ ጊዜ በፊፋ 2026 አለም ዋንጫ የግማሽ ፍፃሜ ግጥሚያ ሮብ እለት በአትላንታ ይገናኛሉ፡፡ ይህ ጨዋታ ወደፍፃሜ ለማለፍ የሚደረግ መሆኑ በራሱ ከባድ ቢሆንም በሁለቱ አገራት መካከል ያለው የረጅም ጊዜ ተቀናቃኝነት ደግሞ የበለጠ ትኩረት እንዲያገኝ አስችሎታል፡፡ የእንግሊዝና አርጀንቲና ተቀናቃኝነት መነሻው እግር ኳስ ሳይሆን ደቡባዊ አትላንቲክ ነው፡፡ በኤፕሪል ወር 1982 አርጀንቲና ‹‹ኢስላስ ማልቪናስ›› ብላ የምትጠራውንና እንግሊዝ ደግሞ ፋክላንድ ደሴት ብላ ስያሜ የሰጠችውን ቦታ የእንግሊዝ ጦር ሀይል ወረረ፡፡

ይህ ደግሞ በሁለቱ አገራት መካከል 2 ወር ከ1 ሳምንትና ከ5 ቀናት የፈጀ ጦርነትን ሊያስከትል ችሏል፡፡ በውጤቱም ከአርጀንቲና በኩል 649 ወታደሮች ሲገደሉ ከእንግሊዝ በኩል ደግሞ የ255 ወታደሮችን ህይወት የቀጠፈ ከመሆኑም በላይ 3 የደሴቱ ነዋሪዎችም ህይወታቸው አልፏል፡፡ ጦርነቱ የተጠናቀቀው ደግሞ ደሴቱን የእንግሊዝ ወታደሮች እንዲይዙት አርጀንቲና ፈቅዳ ነበር፡፡ አሁንም ድረስ ፋክላንድ ደሴት በእንግሊዝ አስተዳደር ስር የምትገኝ ቢሆንም ራስ ገዝ መንግስት ያላት ናት፡፡ በእንግሊዝና በአርጀንቲና መካከል ቀደም ሲልም በእግር ኳስ ተፎካካሪነት ያለ ቢሆንም ይህ ጉዳይ ግን የተቀናቃኝነቱን ደረጃ ከፍ አድርጎታል፡፡ ስለዚህም በሁለቱ አገራት መካከል ጨዋታ ሲኖር ደጋፊዎችና ሚዲያዎች ልዩ ትኩረት ይሰጡታል፡፡

ያለፉትን አራት አስርት አመታት በአለማችን ላይ ከሚከናወኑ አለም አቀፍ ጨዋታዎች ሁሉ ይህኛው እጅግ ትልቅ ፉክክር የሚታይበት ሆኖም ተመዝግቧል፡፡ ከፋክላንድ ደሴት ጦርነት ከአራት አመታት በኋላ ሁለቱ አገራት በ1986 የሜክሲኮ አለም ዋንጫ ለግማሽ ፍፃሜ ተገናኝተው ነበር፡፡ ከጠቀስነው የሜዳና ከሜዳ ውጭ ካለው ፉክክር ባሻገር ይህ ጨዋታ በአለማችን የአለም ዋንጫ ታሪክ በብዙዎች የታየና በከፍተኛ ሁኔታ መነጋገሪያ ለመሆን የቻለበት አጋጣሚ መፈጠሩ ይታወሳል፡፡ ይህንን አጋጣሚ የፈጠረው ደግሞ አንጋፋው የኳስ ኮከብ ዲያጎ አርማንዶ ማራዶና ነው፡፡ ያንን ጨዋታ አርጀንቲና ሁለት ለአንድ ማሸነፍ ብትችልም ማራዶና በእጁ ያስቆጠራት ጎል ግን የማትረሳ ነበረች፡፡ ይህ ከሆነ ከ12 አመታት በኋላ በ1998 የፈረንሳይ አለም ዋንጫ በ16ቱ ጥሎ ማለፍ ጨዋታ ሁለቱ ቡድኖች ድጋሚ ተገናኝተው ነበር፡፡

ይህኛውም ጨዋታ ከባድ ፉክክር የታየበት ሆኖ ሁለት እኩል ለመለያየት የቻሉ ቢሆንም በፍፁም ቅጣት ምት አርጀንቲና ለማሸነፍ በቅታለች፡፡ በመቀጠል በጃፓንና ደቡብ ኮሪያ በተካሄደው አለም ዋንጫ በምድብ ግጥሚያ ተገናኝተው እንግሊዝ አንድ ለባዶ አሸንፋ ነበር፡፡ ከዚያን ጊዜ ወዲህ ሁለቱ አገራት በአለም አቀፍ ውድድር ሜዳ ላይ ተገናኝተው አያውቁም፡፡ ነገር ግን ባለፈው አመት በጄኔቫ የወዳጅነት ግጥሚያ አድርገው እንግሊዝ 3 ለ 2 ማሸነፏ ይታወሳል፡፡ በነገው እለት ሁለቱ አገራት ከ24 አመታት በኋላ ለመጀመሪያ ጊዜ በአለም ዋንጫ ተገናኝተው የሚያደርጉት ግጥሚያ ከጨዋታም በላይ ልዩ ትኩረት ያገኘው ለዚህ ነው፡፡

ለመኖሪያ ቤት ፈላጊዎች አዲስ ተስፋን ይዘው የመጡት ዘመናዊ የግንባታ ቴክኖሎጂዎች
**********************

የ3ዲ ኮንክሪት ሕትመት፣ ቀላል የዓረብ ብረት ግንባታ እና የኮንቴይነር መኖሪያ ቤቶች የዓለማችን የግንባታ ቴክኖሎጂ አዳዲስ ቋንቋዎች ሆነዋል።

እነዚህ ቴክኖሎጂዎች በስፋት ጥቅም ላይ መዋል የጀመሩት በቅርብ ዓመታት ቢሆንም፣ በዓለም ዙሪያ በፍጥነት እየተስፋፉ ይገኛሉ።

እንደ አሜሪካ፣ ካናዳ፣ አውስትራሊያ፣ እንግሊዝ፣ ኔዘርላንድስ እና ደቡብ ኮሪያ ያሉ ሀገራት የዜጎቻቸውን የቤት ፍላጎት በተቀላጠፈ ሁኔታ ለመፍታት እነዚህን ቴክኖሎጂዎች ቀድመው ጥቅም ላይ ካዋሉ ግንባር ቀደም ሀገራት መካከል ይጠቀሳሉ።

በዚህ ረገድ ኢትዮጵያም ፈጥናለች፣ ሀገራችን በእርግጥም ዘምናለች፤ ከሰሞኑ እነዚህን ሦስት የግንባታ ቴክኖሎጂዎች በማጣመር፣ የዜጎችን የቤት ጥያቄ ለመፍታት አንድ ብላ ጉዞ ጀምራለች!

በኢትዮጵያ የመኖሪያ ቤት ፍላጎት እጅግ መሠረታዊ ከሆኑ ጥያቄዎች አንዱ ነው። የከተሞች መስፋፋት እና የሕዝብ ቁጥር ዕድገት ይህን ፍላጎት ይበልጥ አንገብጋቢ አድርገውታል።

በተለይ በዋና ከተማችን አዲስ አበባ ያለው የቤት አቅርቦት እና ፍላጎት አለመጣጣም ለከፍተኛ የቤት ኪራይ ንረት እና ለኑሮ ውድነት ዋነኛ ምክንያት በመሆኑ አፋጣኝ መፍትሔ ይሻል።

ይህን ችግር ለመፍታት መንግሥት ባወጣው የ10 ዓመት መሪ የልማት ዕቅድ፣ 4.4 ሚሊዮን ቤቶችን በተለያዩ አማራጮች ለመገንባት አቅዷል። ይህንንም ለማሳካት፦

✅ የግል ዘርፉን ማሳተፍ፦ ችግሩን ለመቅረፍ መንግሥትን ብቻ ከመጠበቅ ይልቅ፣ የግል አልሚዎች በስፋት እንዲሳተፉ የሚያስችሉ የሕግ ማዕቀፎች ተሻሽለዋል።

✅ የማኅበራት አደረጃጀት፦ በአዲስ አበባ እና በሌሎች ከተሞች ነዋሪዎች በማኅበር ተደራጅተው የቤት ችግራቸውን እንዲፈቱ የመሬት አቅርቦት እና መሰል ድጋፎች እየተደረጉ ይገኛሉ።

በሌላ በኩል ከዚህ ቀደም በተለመደው የቤት ግንባታ ሒደት ብቻ በከተሞች ያለውን የቤት አቅርቦት ችግር መፍታት ስለማይቻል፣ አዳዲስ ቴክኖሎጂዎች ተግባራዊ እየተደረጉ ነው።

እነዚህ አዳዲስ ቴክኖሎጂዎች የሚያበረክቱት አስተዋጽኦ በርከት ያለ ነው፦

👉 የ3ዲ ሕትመት (3D Printing)፦ ልዩ የሆነ ትልቅ ፕሪንተር በመጠቀም ኮንክሪት ወይም ሌሎች የግንባታ ቁሳቁሶችን በመደርደር ግድግዳዎችን እና መዋቅሮችን ይገነባል። ይህ ቴክኖሎጂ የብረት ግብዓትን እስከ 30 በመቶ፣ ሲሚንቶን ደግሞ ከ35 እስከ 40 በመቶ መቀነስ የሚችል ወጪ ቆጣቢ አማራጭ ነው። በአሁኑ ወቅት ባለ 4 ወለል (G+4) ቤቶች በዚህ ቴክኖሎጂ እየተገነቡ ሲሆን፣ ዲዛይኑ እስከ 14 ወለል እና ከዚያ በላይ የመገንባት አቅም አለው።

👉 ቀላል የአረብ ብረት ግንባታ፦ ቀላል እና ጠንካራ የብረት ክፍሎች በፋብሪካ ተዘጋጅተው ወደ ግንባታ ቦታ ተወስደው የሚገጣጠሙበት ዘዴ ነው። ይህም የመሬት መንቀጥቀጥ አደጋን የመቋቋም አቅም ያለው ሲሆን፣ ለፈጣን ግንባታ ምላሽ ከመስጠቱ ባሻገር ከእንጨት ይልቅ እጅግ ዘላቂ ነው።

👉 ተገጣጣሚ ቤቶች፦ የቅድመ-ፋብሪካ ቴክኖሎጂዎች የግንባታ ጊዜን በአጭሩ በመቅጨት ለፈጣን የቤት አቅርቦት ወሳኝ ሚና ይጫወታሉ።

መንግሥት እነዚህን ጊዜ፣ ጉልበት እና ወጪ ቆጣቢ የሆኑ አዋጭ የግንባታ ዘዴዎች ወደ ተግባር እያስገባ ነው። ኢትዮጵያ በጀመረችው በዚህ የለውጥ ፍጥነት ጉዞዋን ስትቀጥል፣ ቴክኖሎጂው ደግሞ በበኩሉ ፈጥኖ ቤታችንን ይገነባልናል።

በዚህም በመጪዎቹ ጥቂት ዓመታት ውስጥ፣ የዘመናት የቤት ጥያቄያችን ዘላቂ መፍትሔ እንደሚያገኝ ታላቅ ተስፋ ተጥሏል።

በዓይናለም ሀድራ
#ethiopia #ebc #housing #3dtechnology

ጀስቲን ቢበር ዓለም ዋንጫን ተቀላቀለ
#ethiopia | ​ፊፋ ረቡዕ ዕለት በሰጠው ይፋዊ መግለጫ እንዳስታወቀው ታዋቂው የፖፕ ሙዚቃ ኮከብ ጀስቲን ቢበር በርካታ ከዋክብት በሚሳተፉበትና የዓለም ዋንጫ የፍጻሜ ጨዋታ የዕረፍት ጊዜ የሙዚቃ ትዕይንት (halftime show) ላይ ለመሳተፍ ስሙ ተካቷል።

በዚህም መሠረት ቢበር ቀደም ሲል ዋና አጫዋች መሆናቸው ይፋ ከተደረጉት እንደ ማዶና፣ ሻኪራ እና የደቡብ ኮሪያው የሙዚቃ ቡድን ቢቲኤስ ካሉ የዓለም ታዋቂ የሙዚቃ ፈርጦች ጋር በመሆን መድረኩን በጋራ ያደምቃል።

ከተጠቀሱት ታላላቅ ከዋክብት በተጨማሪ የአፍሮቢትስ ድምፃዊ በርና ቦይ፣ ቬንዙዌላዊው የኦርኬስትራ መሪ ጉስታቮ ዱዳሜል እና በስታተን አይላንድ ኒው ዮርክ የሚገኘው የፒኤስ22 የአንደኛ ደረጃ ትምህርት ቤት ሕፃናት የኳየር ቡድን ከታዋቂው ኮልድፕሌይ የሙዚቃ ቡድን ጋር በመሆን በመድረኩ ላይ ሥራዎቻቸውን እንደሚያቀርቡ ታውቋል።

​በኮልድፕሌይ ቡድን መሪ ክሪስ ማርቲን አዘጋጅነትና መሪነት የሚቀናበረውና 11 ደቂቃዎችን ብቻ የሚወስደው ይህ የዕረፍት ጊዜ ትዕይንት፣ ከአስር ቀናት በኋላ ከኒው ዮርክ ከተማ ውጭ በሚደረገው የዓለም ዋንጫ የፍጻሜ ጨዋታ ወቅት ለዕይታ ይበቃል።

ይህ ታላቅ ዝግጅት “የፊፋ ዓለም አቀፍ የዜጎች ትምህርት ፈንድ” የተሰኘውን ተቋም ለመደገፍ ታስቦ የተዘጋጀ ሲሆን ፈንዱ በዓለም ዙሪያ የሚገኙ ሕፃናት የትምህርትና የእግር ኳስ ዕድሎችን በቀላሉ እንዲያገኙ ለመርዳት 100 ሚሊዮን ዶላር ለመሰብሰብ አልሟል።

ጀስቲን ቢበር በሰጠው መግለጫ የዓለም ዋንጫ ሰዎችን ከማንኛውም ነገር በተለየ መንገድ አንድ የሚያደርግ መሆኑን ጠቅሶ በዚህ ታላቅ የሙዚቃ ዝግጅት ላይ በመሳተፉና ዝግጅቱም በዓለም ዙሪያ ላሉ ሕፃናት የትምህርት ዕድልን ለማስፋፋት የበኩሉን አስተዋጽኦ እያበረከተ መሆኑን በማወቁ የተሰማውን ጥልቅ ምስጋና ገልጿል።

በያፌት ገ/ህይወት

Getu Temesgen - (ጌጡ ተመስገን)
#getutemesgen #getu

(ዘ-ሐበሻ ስፖርት) ግብፅ ለፊፋ ማመልከቻ ስታስገባ ጆሴ ሞሪንሆ ‹‹የጠራራ ፀሀይ ዝርፊያ ነው›› አሉ፡፡ የግብፅ እግር ኳስ ፌዴሬሽን ፕሬዝደንት ሀኒ አቦሪዳ ከአርጀንቲና ጋር በተደረገው ግጥሚያ ሙሉ ምርመራ እንዲደረግበት ለፊፋ ማመልከቻ ማስገባታቸውን አስታወቁ፡፡ ፌዴሬሽኑ በማመልከቻቸው በጨዋታው ላይ የተፈጠረው የዳኝነት ስህተቶች ግብፅ ከውድድሩ እንድትወጣ ቀጥተኛ አስተዋፅኦ ማድረጋቸውን ገልጿል፡፡

ዘለግ ያሉ ሀሳቦችን በያዘው በዚህ ማመልከቻው ከጠቀሳቸው ሀሳቦች ውስጥ ግብፅ ያገባችው ሁለተኛ ጎል በቫር ውሳኔ መሻሩ፣ በጨዋታው መጨረሻ ላይ ለግብፅ ፍፁም ቅጣት ምት አለመሰጠቱ፣ አርጀንቲና የማሸነፊያውን ጎል ከማግባቷ በፊት በመሀመድ ሳላህና ሀምዲ ፋቲ ላይ የተሰራው ጥፋት በቫር አለመታየቱና በአጠቃላይ በጨዋታው የቫር አሰራር ወጥነት የሌለው መሆኑ ይገኙበታል፡፡ በመሆኑም በዋና ዳኛው ፍራንሲስ ሌቲክሲየር፣ በረዳቶቻቸውና በቫር ተቆጣጣሪ አባላት ላይ ፊፋ ጥብቅ ምርመራ እንዲያደርግ የጠየቀው ፌዴሬሽኑ የምርመራው ውጤት እስከሚጠናቀቅ ድረስ የአለም ዋንጫ ጨዋታዎች እንዲቋረጡም አሳስቧል፡፡

የግብፅ ብሄራዊ ቡድን ተጨዋቾች ባለፈው የአለም ዋንጫ ሻምፒዮን በነበሩት አርጀንቲናዎች ላይ ላሳዩት የጨዋታ የበላይነትና ብቃት ‹‹ጀግኖች›› በሚል ያወደሳቸው ፌዴሬሽኑ በተፈጠረው የዳኝነት ስህተት ቡድኑ የበላይነቱን ማስቀጠል ባለመቻሉ ደጋፊዎችን ይቅርታ ጠይቋል፡፡ ፊፋ በዚህ ጉዳይ ላይ እስካሁን የሰጠው መልስ የለም፡፡ ይሁንና የግብፅ ብሄራዊ ቡድን እንዲህ አይነት ማመልከቻዎችን ለፊፋ ሲያስገባ ይህ የመጀመሪያው አይደለም፡፡ ከዚህ ቀደም በዳኞች ላይ ምርመራ እንዲደረግና ውድድሩ ምርመራው እስኪጠናቀቅ እንዲቋረጥ ጥያቄ አቅርቦ የነበረ ቢሆንም ፊፋ ግን የወሰደው እርምጃ የለም፡፡

በ2018 የአለም ዋንጫ ወቅት በምድብ ጨዋታ ግብፅ ከአዘጋጇ ሩሲያ ጋር ባደረገችው ግጥሚያ ከተሸነፈች በኋላ የዳኛው ውሳኔ እንዲመረመር ጠይቃ የነበረ ሲሆን ፊፋ ግን ጥያቄው ቸል ማለቱ ይታወሳል፡፡ እንዲሁም በ2002 አለም ዋንጫ ጣሊያን በ16ቱ ጥሎ ማለፍ ጨዋታ በደቡብ ኮሪያ መሸነፏን ተከትሎ የዳኝነት ምርመራ ጠይቃ ምንም እርምጃ ሳይወሰድ ቀርቷል፡፡ የግብፅ አሰልጣኝ የሆኑት ሆሳም ሀሰን በሰጡት መግለጫ ቡድናቸው በሜዳ ውስጥና ከሜዳ ውጭ ድል ወደአርጀንቲና እንዲሆን በተደረገው ሴራ ሰለባ መሆናቸውን ገልፀዋል፡፡ ሲናሩም ‹‹እኛ የተሻልን የነበርን ከመሆናችንም በላይ ተጋጣሚያችን ላይ ጫና ፈጥረን ነበር፡፡ ዳኝነቱ ግን ፍትሀዊ አልነበረም፡፡ ግባችንን ለምን እንደተከለከልን አላውቅም›› ብለዋል፡፡

ጨምረውም ‹‹የአለም ዋንጫ የማርኬቲንግ ጉዳይ ሆኗል፡፡ እነሱ በቻሉት መጠን ሜሲ በውድድሩ ላይ እንዲቆይ ፈልገዋል፡፡›› በማለት ገልፀዋል፡፡ የሪያል ማድሪዱ አሰልጣኝ ጆሴ ሞሪንሆ በበኩላቸው ዳኛው የሰጡትን ውሳኔ ‹‹በጠራራ ፀሀይ የተፈፀመ ዝርፊያ ነው›› በማለት ገልፀውታል፡፡ ሲናገሩም ‹‹ግብፆች ሁለት ለዜሮ እየመሩ በነበረበት ወቅት ሲጋጠሙ የነበሩት በሜዳ ላይ የነበሩትን 11 ተጨዋቾች ብቻ አልነበረም፡፡ በስታዲየሙ የነበረውን ፉጨትና የቫር ክፍሉን ጭምር እየተጋጠሙ ነበር፡፡ በአጠቃላይ የውድድሩን ስክሪፕት ለማሸነፍ ታግለዋል›› በማለት አስታውቀዋል፡፡

በዓለም ላይ 10 ረጃጅም ሕንፃዎች

* ሰማይን የሚነኩ የምህንድስና ጥበቦች
#ethiopia | በዘመናዊው ዓለም ረጃጅም ሕንፃዎች የከተሞችን ውበት ከማሳደግ ባለፈ የኢኮኖሚ አቅም፣ የቴክኖሎጂ እድገትና የምህንድስና ብቃት ምልክት ሆነዋል። በ2025 የተዘመነ ዝርዝር መሠረት ከ829.8 ሜትር እስከ 530 ሜትር የሚደርሱ ሕንፃዎች የዓለምን የከተማ ሰማይ መስመር (Skyline) በአስደናቂ ሁኔታ እየቀየሩ ይገኛሉ።

በዝርዝሩ ቀዳሚ የሆነው በዱባይ የሚገኘው ቡርጅ ካሊፋ ሲሆን፣ 829.8 ሜትር ከፍታው በዓለም ላይ ከፍተኛው ሕንፃ አድርጎታል። በፍጥነት የሚሰሩ ሊፍቶቹና ከ148ኛ ፎቅ የሚታየው የዱባይ እይታ በየዓመቱ ሚሊዮኖችን ጎብኚዎች ይስባል።

አብዛኞቹ ረጃጅም ሕንፃዎች በእስያና በመካከለኛው ምሥራቅ የሚገኙ ሲሆን፣ ቻይና ከፍተኛ ቁጥር ያላቸውን ሕንፃዎች በመያዝ ዝርዝሩን ትመራለች። የሻንጋይ ታወር፣ የፒንግ አን ፋይናንስ ሴንተር፣ የጓንግዙ CTF ፋይናንስ ሴንተር እና የቲያንጂን CTF ፋይናንስ ሴንተር በዝርዝሩ ውስጥ ተካተዋል።

በዓለም 10 ረጃጅም ሕንፃዎች

ቡርጅ ካሊፋ – ዱባይ፣ ዩኤኢ (829.8 ሜትር)

ሜርዴካ 118 – ኩዋላ ላምፑር፣ ማሌዥያ (678.9 ሜትር)

ሻንጋይ ታወር – ሻንጋይ፣ ቻይና (632 ሜትር)

መካ ሮያል ክሎክ ታወር – መካ፣ ሳውዲ አረቢያ (601 ሜትር)

ፒንግ አን ፋይናንስ ሴንተር – ሼንዘን፣ ቻይና (599 ሜትር)

ሎቴ ወርልድ ታወር – ሶል፣ ደቡብ ኮሪያ (555 ሜትር)

አንድ ወርልድ ትሬድ ሴንተር – ኒውዮርክ፣ አሜሪካ (541 ሜትር)

ጓንግዙ CTF ፋይናንስ ሴንተር – ቻይና (530 ሜትር)

ቲያንጂን CTF ፋይናንስ ሴንተር – ቻይና (530 ሜትር)

ቻይና ዙን (CITIC Tower) – ቤጂንግ፣ ቻይና (528 ሜትር)

እነዚህ ሕንፃዎች የምህንድስና ጥበብን እና የዘመናዊ ከተሞችን እድገት የሚያሳዩ ብቻ ሳይሆን፣ በየዓመቱ ሚሊዮኖችን ቱሪስቶች በመሳብ ለአገራቸው ኢኮኖሚ ከፍተኛ አስተዋጽኦ ያበረክታሉ።

Getu Temesgen - (ጌጡ ተመስገን)

የ5ቱ ዓመታት ገፆች፤ ታሪክ ተሰርቷል!
***************

የዘመናት ታሪክ ገፆች ሲገለጡ የአንድ ሀገር ዕጣ ፈንታ በአጭር ጊዜ ውስጥ ከስር መሰረቱ ተነቅንቆ አዲስ መልክ የሚይዝበት አጋጣሚ እጅግ ጥቂት ነው።

ላለፉት አምስት ዓመታት በኢትዮጵያ የተዘረጉትን የልማትና የለውጥ ገፆች ስናነብ፣ የተካሄደው ጉዞ "ለውጥ" ወይም "ሪፎርም" በሚሉ ቃላት ብቻ የሚገለፅ አይደለም።

ይልቁንም ከሪፎርም ባሻገር ወደ አብዮት የተጠጋ፣ የኢትዮጵያን አጠቃላይ ገፅታ የለወጠና ሥር ነቀል መዋቅራዊ ሽግግርን ያረጋገጠ ታላቅ ብሔራዊ ንቅናቄ ነው።

በዓለም የኢኮኖሚ ታሪክ ውስጥ፣ ጥቂት ሀገራት ብቻ ናቸው በፈጣን ጊዜ ውስጥ አስደናቂ የሚባል የዕድገት ዝላይ (Leapfrogging) ማሳየት የቻሉት።

ቻይና በሰላሳ ዓመታት ያመጣችው መዋቅራዊ ለውጥ፣ ደቡብ ኮሪያ በጄኔራል ፓርክ ቹንግ ሂ ቆራጥ መሪነት የተጓዘችው የኢንዱስትሪ ሽግግር፣ እንዲሁም ታይዋን ያስመዘገበችው የቴክኖሎጂ ስኬት ሁሌም በምሳሌነት ይነሳሉ።

ነገር ግን፣ ኢትዮጵያ በአምስት ዓመታት ውስጥ ብቻ እያስመዘገበች ያለው የለውጥ ፍጥነትና ስፋት እጅግ አስደናቂ ሆኖ እናገኘዋለን። በጠንካራና ቁርጠኛ አመራር እየተመራች፣ ኢትዮጵያ በሁሉም መስክ ወደ ታላቅነት የምታደርገው ሽግግር ከግምት በላይ የሆነ ጉዞ ነው።

ይህ ተአምራዊ የሚባል ዝላይ በገሃድ ከሚታይባቸው መስኮች አንዱ ግብርና ነው። ለዘመናት በልመናና በስንዴ ዕርዳታ ጥገኝነት ስትታወቅ የነበረችው ሀገር፣ በአምስት ዓመት ጊዜ ውስጥ የምግብ ሉዓላዊነቷን አረጋግጣ ወደ ስንዴ ላኪነት መሸጋገሯ እውነተኛ የኢኮኖሚ "ሉዓላዊነት" ማረጋገጫ ነው።

በተጠናከረ የኩታገጠም እና የበጋ መስኖ ስንዴ ልማት፣ የስንዴ ምርት በ2017 በጀት ዓመት 280 ሚሊዮን ኩንታል መድረሱ የዚህ ፈጣን ስኬት ማሳያ ነው። ኢኮኖሚው ከአንድ ወጥ ጥገኝነት ወጥቶ ወደ ብዝሃ-ዘርፍ ልማት በማደግ ፈጣን የኢኮኖሚ ዕድገት ማስመዝገቡ በጥቂት ሀገራት ብቻ የሚሳካ ታላቅ ድል ነው።

የለውጡ ጅረት በግብርና ብቻ አልተገታም። በአረንጓዴ ኢኮኖሚው ዘርፍ፣ እስከ ኮፕ ጉባኤ ድረስ ከ65 ቢሊዮን በላይ ችግኞችን በመትከል በእስካሁኑ ጉዞ የሀገራችንን የደን ሽፋን ከ17 በመቶ ወደ 23.6 በመቶ ከፍ በማድረግ ኢትዮጵያ የዓለም የአየር ንብረት ለውጥ መከላከያ ተምሳሌት ሆናለች።

በውሃና ኃይል (ኤነርጂ) ሽግግር፣ ታላቁን የሕዳሴ ግድብን ጨምሮ በርካታ ፕሮጀክቶችን በማጠናቀቅ የኃይል ማመንጨት አቅምን ወደ 9,554 ሜጋ ዋት አሳድጋለች።

በተለይም የኤሌክትሪክ ተሽከርካሪዎችን (EV) በመጠቀም የነዳጅ ጥገኝነትን መቀነስና የኢኮኖሚ ሉዓላዊነትን ማረጋገጥ ሌላው የዘርፉ ስኬት ነው።

በከተማ ልማት ዘርፍም የኮሪደር ልማት ፕሮጀክቶች ከተሞቻችንን የውበት፣ የንፅህናና የሥልጣኔ ማዕከል አድርገዋቸዋል።

በኢንዱስትሪና በዲጂታል ዘርፍ፣ "ኢትዮጵያ ታምርት" ንቅናቄንና የዲጂታል ኢትዮጵያ 2030 ስትራቴጂን በመተግበር፣ እንዲሁም ከ58 ሚሊዮን በላይ የቴሌብር ተጠቃሚዎችን በማፍራትና የኢንዱስትሪ ፓርኮችን ቁጥር በማስፋፋት ዘመኑን የዋጀ የቴክኖሎጂ አብዮት ተካሂዷል።

በማዕድን ዘርፍ የተከናወኑት የሪፎርም ስራዎችም እንዲሁ እጅግ አስደናቂ ናቸው። የኮንትሮባንድ ንግድን በመግታትና የወርቅ ምርትን ከ3.3 ቶን ወደ 38.8 ቶን በማሳደግ፣ ዘርፉ የውጭ ምንዛሬ ግኝታችንን ወደ ላቀ ደረጃ አሸጋግሯል።

የቱሪዝም ዘርፉም በተመሳሳይ በገበታ ለሀገርና በሌሎች የቱሪዝም መዳረሻዎች ልማት፣ የውጭ ቱሪስት ፍሰትን ወደ 1.3 ሚሊዮን በማድረስ ሀገራችንን ወደ ተፈጥሯዊ የቱሪዝም መዳረሻነት ቀይሯታል።

በዲፕሎማሲውና በፖለቲካው መስክም የተመዘገበው ስኬት የሚያስደምም ነው። ኢትዮጵያ የነበሩባትን ውስብስብ ጫናዎች በብልሃት ተቋቁማ፣ የውጭ ፖሊሲዋን ሚዛናዊ በማድረግ ወደ ብሪክስ (BRICS) አባልነት መቀላቀሏ ዓለም አቀፍ ተደማጭነቷን አረጋግጧል።

በድምሩ ሲታይ እነዚህ ሁሉ ስኬቶች በአንድ ላይ ሲገመገሙ ኢትዮጵያ በእርግጥም ተአምራዊ በሚባል የለውጥ ጎዳና ላይ ትገኛለች። ይህን ሁሉ ውስብስብ ሀገራዊ፣ ቀጠናዊና ዓለም አቀፍ ጫና ተቋቁሞ ማሳካት የቻለው "መፍጠር፣ መፍጠንና መዝለል" በሚል መርህ የተቃኘው የፖለቲካ ኢኮኖሚ ሥርዓትና ቆራጥ አመራር በመኖሩ ነው።

ይህ እንደ አዲስ የጀመረው የለውጥና የዝላይ ጉዞ በአጭር ጊዜ ከግብ ሲደርስ፣ ኢትዮጵያ በብልፅግና ማማ ላይ ደምቃ በመውጣት የአፍሪካዊ ተምሳሌትነትን አልፋ የዓለም የብልፅግና ተምሳሌት እንደምትሆን አያጠራጥርም።

የ5ቱ ዓመታት ገፆች፣ የዚህችን ታላቅ ሀገር አይበገሬነትና ትንሣኤ በደማቁ የፃፉ ህያው የድል ድርሳናት ናቸው!

በአዶኒያስ ወ/አረጋይ
#ethiopiarising #historyinthemakinget #foodsovereigntyet #greenlegacyethiopia #ethiopiainbrics

እንግሊዝን ስጋት ላይ የጣለው የአዝቴካ ስታዲየም ከፍታና የዲየጎ ማራዶና የእጅ ግብ ታሪክ።
#ethiopia | በአለም ዋንጫ በ16 ጥሎ ማለፍ ከሚጠበቁ ጨዋታዎች መካከል የጥምር አዘጋጇ ሜክሲኮ ከእንግሊዝ የሚያደርጉት ፍልሚያ ነው። ጨዋታው በታሪካዊው አዝቴካ ስታዲየም ይደረጋል። ይህ ስታዲየም 87523 ተመልካቾች መያዝ የሚችል ፣ በላቲን አሜሪካ በግዝፈቱ ተወዳዳሪ የሌለውና በአለም 8ኛው ትልቅ ስታዲየም ነው።

አዝቴካ ስታዲየም የ1970 እና 1986 ሁለት የአለም ዋንጫ ፍጻሜዎችንም አስተናግዷል።ይህ ስታዲየም ከባህር ጠለል በ2240 ሜትር ከፍታ ላይ የሚገኝ ሲሆን የብዙ እግር ኳስ ቡድኖችን ትንፋሽ ያቆመ ነው። የእንግሊዝና ሜክሲኮን ጨዋታ ከሜዳ ላይ ፍልሚያው ባሻገር መነጋገሪያ እንዲሆን ያደረገው ቀዳሚ ጉዳይም ነው።

ባለ ሜዳዋ ሜክሲኮ በዚህ ከፍታና ግዙፍ ስታዲየም ካደረገቻቸው 89 የነጥብ ጨዋታዎች የተሸነፈችው 2 ጊዜ ብቻ ነው። ባለፉት 22 ጨዋታዎች ደግሞ አንዱንም አልተሸነፈች።16 ጊዜ አሸንፋ በ6ቱ አቻ ተለያይታለች።

እንግሊዝ በ32ቱ ጥሎ ማለፍ ሮብ እለት በዲሞክራቲክ ኮንጎ ተፈትና 2 ለ 1 ስታሸንፍ የተጫወተችበት የአትላንታ ስታዲየም ከፍታ 300 ሜትር ብቻ ነበር። አርብ እለት ደግሞ ወደ ሜክሲኮ ተጉዘዋል። ለጨዋታ ከተለመደው ጊዜ አንድ ቀን ቀድመው ቢደርሱም ትንፋሽ የሚያቆመውን አየር ለመልመድ በቂ አልሆነም።

ከልክ ያለፈ ከፍታ ተጫዎቾችን ለኦክስጂን እጥረት ይዳርጋል። ሰውነታቸው አየሩን ወደ ሴሎቻቸው የመግፋት አቅም እንዲያጣ ያደርጋል ይላሉ ባለሙያዎች።

ይህ ደግሞ ተጫዎቾቹ የልብ ምታቸው እንዲፈጥን ፣ ትንፋሽ እንዲያጥራቸው ፣ በፍጥነት የፈሳሽ እጥረት እንዲገጥማቸው ፣ ከፍተኛ ድካም ውስጥ እንዲገቡና የማገገሚያ ጊዜያቸውን እንዲራዘም ያደርጋል።

በተጨማሪም የአየር እጥረቱ ኳስ በሚሞከርበትና ለቡድን አጋር በሚሻማበት ጊዜ ፍጥነትና ከፍታውን የማስቀየር አቅም አለው ተብሏል። ስታዲየሙ ሁሉንም ተጫዎቾች ተጨማሪ አቅም የሚጠይቅ ቢሆንም የግብ ጠባቂዎችን ፈተና ያበዛል ተብሏል። ይህ እግር ኳሳዊ ፈተና ግን ለእንግዳዋ እንግሊዝ ብቻ ሳይሆን ለባለቤቷ ሜክሲኮም የሚያጋጥም ነው።

ሜክሲኮ በአዝቴካ ያላት ታሪካዊ የበላይነት ብቻ ሳይሆን በዚሁ አለም ዋንጫ ካደረገቻቸው 4 ጨዋታዎች 3ቱን ተጫውታበት 3ቱንም አሸንፋለች። በመክፈቻው ደቡብ አፍሪካን 2 ለ 0 ፣ ቸክ ሪፐብሊክን 3 ለ 0 በምድብ ፣ በ32 ጥሎ ማለፍ ደግሞ ኢኳዶርን 3 ለ 0 ድል አድርጋለች። በ2ኛው የምድብ ጨዋታ ደቡብ ኮሪያን 1 ለ 0 የረታችበት ጨዋታ ብቻ ከአዜቲካ ውጭ ተደርጓል። ሜክሲኮ ያደረገቻቸውን 4ቱንም ጨዋታዎች ስታሸንፍ 8 ግቦችን አስቆጥራ አንድም ሳይቆጠርባት በመውጣት የማጥቃትና የመከላከል አቅሟን አስመስክራለች።

የሶስቱ አናብስት አሰልጣኝ ቶማስ ቱኸል ይህን የአዝቴካ ስታዲየም የከፍታ ፣ የደጋፊ ሁከትና ጩኸት ፈተና ለመወጣት የታክቲክ ለውጥ ያደርጋሉ ተብሎ ይጠበቃል። ኳስ በመቆጣጠር ፣ የጨዋታውን ፍጥነት በማዘግየት ፣ ጉልበት በመቆጠብ እድል ሲገኝ ብቻ ለማጥቃት ይገባሉ ተብሏል።

እንግሊዝ በዚህ ስታዲየም በ1986ቱ አለም ዋንጫ ሩብ ፍጻሜ በአርጀንቲና 2 ለ 1 ከተሸነፈች በኋላ ለመጀመሪያ ጊዜ ትጫወትበታለች። ለዘመናት የሚታወሰው የዲየጎ ማራዶና " የፈጣሪ እጅ ግብ " ለእንግሊዝ ሽንፈት ምክንያት መሆኑ ይታወሳል።

አርብ እለት ከብሪታኒያና ሜክሲኮኮ የወጡ መረጃዎች ዛሬ በሜክሲኮ ሲቲ አውሎ ንፋስና ጎርፍ የሚያስከትል የአየር ሁኔታ ሊከሰት እንደሚችል ስለተገመተ፣ ፊፋ የጨዋታ መርሃብ ግብር የማስተካከል እቅድ እንዳለው ቢነገርም ቀድሞ በተያዘለት ሰአት ይካሄዳል።

በሁሴን ግዛው

(ዘ-ሐበሻ ዜና) የደቡብ ኮሪያ የባህር ጉዳዮች ሚኒስቴር እንዳስታወቀው፣ ባለፈው ግንቦት ወር ላይ በተሰነዘረበት ጥቃት ጉዳት የደረሰበት 'ናሙ' የተሰኘው የጭነት መርከብ የጥገና ስራውን እንዳጠናቀቀ የሆርሙዝ የባህር መስመርን ለቆ ይወጣል።

በኤች.ኤም.ኤም ኩባንያ የሚንቀሳቀሰው ይህ ግዙፍ የጭነት መርከብ፣ አሜሪካ እና እስራኤል በኢራን ላይ ጦርነት ከጀመሩበት የካቲት 28 አንስቶ በባህረ ሰላጤው ውስጥ እንደተገታ ቆይቷል።

ሚኒስቴሩ በመግለጫው እንዳብራራው፣ በአሁኑ ወቅት በዱባይ ወደብ የጥገና ስራ እየተደረገለት የሚገኘው ይህ መርከብ በሐምሌ ወር መጨረሻ አካባቢ የባህር መስመሩን ለቆ ይወጣል ተብሎ ይጠበቃል። ኢራን በመርከቡ ላይ ያነጣጠረ ጥቃት መሰንዘሯን ያስተባበለች ሲሆን፣ የደቡብ ኮሪያ መንግስት በበኩሉ የጥቃቱን ሀላፊነት ማን እንደሚወስድ ወይም ጥቃቱ ሆን ተብሎ የተፈጸመ ስለመሆኑ በእርግጠኝነት ማረጋገጥ እንደማይችል አስታውቋል።

'ናሙ' የተሰኘው ይህ መርከብ 32 ባልደረቦችን አሳፍሮ የሚገኝ ሲሆን፣ አሁንም ድረስ በባህር መስመሩ ውስጥ ተይዘው ከሚገኙ ሁለት የደቡብ ኮሪያ መርከቦች አንዱ ነው። እስካሁን ባለው መረጃ መሰረት ወደ 24 የሚጠጉ መርከቦች የሆርሙዝ የባህር መስመርን በሰላም ለቀው መውጣት ችለዋል።

(ዘ-ሐበሻ ዜና) የደቡብ ኮሪያ ፕሬዝደንት ብሄራዊ ቡድኑ ከአለም ዋንጫ በመውደቁ ህዝባቸውን ይቅርታ ጠየቁ፡፡ በአለም ዋንጫ ምድብ አንድ የተደለደለችው ደቡብ ኮሪያ ቼክ ሪፐብሊክን ማሸነፍ ብችትልም በሜክሲኮና በደቡብ አፍሪካ ተሸንፋ ከውድድሩ ውጭ መሆኗ ይታወቃል፡፡

ይሁንና ጉዳዩ በደቡብ ከኮሪያ ውስጥ እንደቀላል አልታየም፡፡ የብሄራዊ ቡድኑ አሰልጣኝ ሆንግ ሚዩንግ ቦ ይህ ውጤት መገኘቱን ተከትሎ እሁድ እለት በፈቃዳቸው ስራ መልቀቃቸውን ያስታወቁ ሲሆን በሜክሲኮ በሰጡት ጋዜጣዊ መግለጫ ‹‹ውሳኔዎቼ ሁሉ ትክክለኛ ነበሩ ብዬ መናገር አልችልም፡፡ ይሁንና ለኮሪያ እግር ኳስ ይበጃል የምለውን ውሳኔ ሁሉ አሳልፌያለሁ›› ብለው ነበር፡፡

የደቡብ ኮሪያ እግር ኳስ ደጋፊዎች ግን ለተፈጠረው ውድቀት አሰልጣኙ ተጠያቂ መሆናቸውን በስፋት እየተናገሩ ይገኛሉ፡፡ ይህንን ሀሳብ የአገሪቱ ፕሬዝደንት ሊ ጃይ ሚዩንግም ይጋሩታል፡፡ ፕሬዝደንቱ አሰልጣኙ ከጅምሩ እንዴትና ለምን እንደተቀጠሩ እንዲጣራም ትእዛዝ ሰጥተዋል፡፡ ሲናገሩም ‹‹በአሰልጣኙ ምርጫና በአመራር ረገድ መዋቅራዊ ጉድለቶች ያሉ ይመስለኛል›› ያሉት ፕሬዝደንቱ የባህል፣ ስፖርትና ቱሪዝም ሚኒስትር ምርመራ እንዲያደርግ ጥሪ አቅርበዋል፡፡

በጥቅሉ መንግስት የአገሪቱን ስፖርት አስተዳደር ማሻሻል እንደሚገባውም አስረድተዋል፡፡ ፕሬዝደንት ሊ ንግግራቸውን በመቀጠል ‹‹የአለም ዋንጫ ተሳትፎ ከዝግጅት አንስቶ ከፍተኛ የታክስ ከፋዮችን ገንዘብና የአገሪቱን ሀብት የሚፈጅ በመሆኑ ለደረሰው ውድቀት መንስኤዎቹ በጥልቀት ሊመረመሩና ትንተና ሊሰጥባቸው ይገባል፡፡ እንዲህ አይነት ነገሮች እንዳይደገሙም በስፖርት አስተዳደር ላይ ጠንካራ ማሻሻያዎች እንዲደረጉ እንጠብቃለን›› በማለት ገልፀዋል፡፡ አክለውም ‹‹ይህ ተቀባይነት የሌለው ውጤት በመገኘቱ መላውን ህዝብ ይቅርታ እጠይቃለሁ›› ብለዋል፡፡

ኢትዮጵያ በጃፓን፣ ደቡብ ኮሪያ እና ኢንዶኔዥያ አዳዲስ የባህር ትራንስፖርት መስመሮች ጀመረች

የኢትዮጵያ የባህር ትራንስፖርትና ሎጂስቲክስ አገልግሎት በበጀት ዓመቱ ወደ ጃፓን፣ ደቡብ ኮሪያ እና ኢንዶኔዥያ አዳዲስ የጉዞ መስመሮችን በመክፈት የንግድ ትስስሩን እያጠናከረ እንደሚገኝ አስታውቋል።

የተቋሙ የኮርፖሬት ማርኬቲንግ መምሪያ ኃላፊና የኮርፖሬት ኮሙኒኬሽን ተወካይ አቶ ደምሰው በንቲ፣ በኢንዶኔዥያና በጃፓን መስመሮች ላይ ከባድ ማሽነሪዎችን፣ ተሽከርካሪዎችንና የኮንስትራክሽን መሣሪያዎችን የማጓጓዝ ሥራ በስፋት እየተከናወነ መሆኑን ለጋዜጣ ፕላስ ገልጸዋል።

ኃላፊው አክለውም፣ ወደፊትም የደንበኞችንና የሀገሪቱን ጥቅም ማዕከል ያደረጉ አዳዲስ መዳረሻዎችን የማስፋፋት ሥራዎች ተጠናክረው እንደሚቀጥሉ አረጋግጠዋል።

እነዚህ አዳዲስ የባህር መስመር ጉዞዎች መጀመራቸው የሀገሪቱን የንግድ እንቅስቃሴ በከፍተኛ ሁኔታ ያሻሽላል ያሉት አቶ ደምሰው፣ የወደብ ጭነቶች በአጭር ጊዜ ወደተፈለገው ቦታ እንዲደርሱ በማስቻል ጊዜንና ወጪን በከፍተኛ ደረጃ እንደሚቆጥብ አስገንዝበዋል።

Seledadotio
Seledadotio