ethiopianaviation

ሀገርን ከዓለም የሚያገናኘውና የብልጽግናችን መሠረት የሆነው የኢትዮጵያ አቪዬሽን
*******************************

የኢትዮጵያ አቪዬሽን ዘርፍ የአየር መንገድ አገልግሎት ብቻ አይደለም፤ ይልቁንም ሀገራችንን ከዓለም ጋራ የሚያስተስር፣ የኢኮኖሚዋን የደምስር የሚያንቀሳቅስና ለብልጽግናዋ ጉዞ መሠረት የሆነ የልማቷ የጀርባ አጥንት ነው።

ኢትዮጵያ ለጊዜው የባሕር በር የሌላት ሀገር ብትሆንም፣ የአቪዬሽን ዘርፏ በሰማይ ላይ የገነባው ጠንካራ የትራንስፖርትና የሎጅስቲክስ መረብ ሀገራችንን ከዓለም አቀፉ የንግድ መረብ ጋር አገናኝቷታል።

ከፍተኛ የውጭ ምንዛሬ ከመሰብሰብ ጀምሮ ቡና፣ አበባና ፍራፍሬን ጨምሮ ትኩስ የግብርና ምርቶችን በጥራትና በፍጥነት ወደ አውሮፓ፣ እስያና አሜሪካ ገበያዎች እንዲደርሱ በማድረግ ረገድ የካርጎ አገልግሎቱ የማይተካ ሚና ይጫወታል።

በሌላ በኩል፣ ኢትዮጵያ የአፍሪካ መዲና እንደመሆኗ መጠን በዲፕሎማቲክና በኮንፈረንስ ቱሪዝም የምታደርገው እንቅስቃሴ ሙሉ በሙሉ በአቪዬሽን ዘርፏ ጥንካሬ ላይ የተመሠረተ ነው።

ከአፍሪካና ከዓለም ዙሪያ የሚመጡ ዲፕሎማቶች፣ ነጋዴዎችና ቱሪስቶችን በቀጥታና በተቀናጀ መንገድ ወደ አዲስ አበባና ወደተለያዩ የሀገራችን መስህቦች በማጓጓዝ የሆቴልና መስተንግዶ አገልግሎት ዘርፍ ያነቃቃል።

በተጨማሪም እንደ ነገሌ ቦረና፣ ደብረ ማርቆስ እና ባሕር ዳር ያሉ የክልል ኤርፖርቶች መስፋፋት የክልል ከተሞችን የኢንቨስትመንትና የቱሪዝም ማዕከል እንዲሆኑ ያደረገ ሲሆን፣ ይህም በቀጥታና በተዘዋዋሪ ለብዙ ሺህ ዜጎች የሥራ ዕድል ፈጥሯል።

የኢትዮጵያ አቪዬሽን ዘርፍ ከአህጉራዊ የበረራ ማዕከልነቱ ባሻገር፣ የቀጣናውን የባሕር በርና የትራንስፖርት አማራጮች ለማስፋት የምታደርገውን ጥረት የሚደግፍና የኢኮኖሚ ዕቅዷን የሚያሳልጥ የሎጅስቲክስ ቅንጅት እየፈጠረ ይገኛል።

ይህ ዘርፍ ከባህርና ከየብስ ትራንስፖርት ጋር ሲቀናጅ ኢትዮጵያ በምስራቅ አፍሪካ ያላትን የሎጅስቲክስ የመሪነት ሚና በከፍተኛ ሁኔታ ያጎለብተዋል።

የኢትዮጵያ አቪዬሽን ዩኒቨርሲቲ እና የአውሮፕላን ጥገና ማዕከልም ዘመናዊ ቴክኖሎጂና ብቁ የሰው ኃይል በማልማት ለሀገራችን የዕውቀት ሽግግር ትልቅ መሠረት ናቸው።

በዚህም የኢትዮጵያ አቪዬሽን ዘርፍ ሀገራችንን ከዓለም ጋር የሚያገናኝ የንግድ ድልድይ እንዲሁም የውጭ ምንዛሬ ግኝትና የጠቅላላ ሀገራዊ ምርት ዕድገት ዋነኛ አንቀሳቃሽ በመሆኑ፣ የኢትዮጵያ ኢኮኖሚ የጀርባ አጥንት ቢባል ማጋነን አይሆንም።

በሔዋን ጌታቸው
#ethiopia #ebc #ethiopianaviation #ethiopianairlines #aviationindustry #economicgrowth #ethiopianeconomy #cargoservices #airlogistics #tourismethiopia

EBC

2 months ago

ከቦሌ ቀጥሎ ትልቁ ተርሚናል፤ የባሕር ዳር የደጃዝማች በላይ ዘለቀ ኤርፖርት
*******************

በኢትዮጵያ የእድገት ጉዞ ውስጥ ልዩ ትኩረት ከተሰጣቸው መሠረታዊ የልማት ዘርፎች መካከል የአቪዬሽን ኢንዱስትሪው አንዱና ዋናው ነው።

ለዚህ ዘርፍ በተሰጠው ከፍተኛ ትኩረት ምክንያት ከቅርብ ዓመታት ወዲህ በሀገሪቱ በርካታ አወንታዊ ለውጦችና የእድገት ማሳያዎች እየታዩ ይገኛሉ።

በተለይም የሀገር ውስጥ የመዳረሻ ኤርፖርቶች ቁጥር እየጨመረና የመሰረተ ልማት አቅማቸው እየጎለበተ መምጣቱ፣ የከተሞችን ሁለንተናዊ ተጠቃሚነት የሚያረጋግጥ ከመሆኑም በላይ፤ ከተሞች ማግኘትና መልማት በሚገባቸው ልክ እንዲያድጉ ትልቅ አስተዋፅኦ እያበረከተ ይገኛል።

በአማራ ክልል ባለፉት ጥቂት ዓመታት የተከናወኑ የመሰረተ ልማት ስራዎች የዚሁ ትልቅ ጉዞ ማሳያ ናቸው።

በቅርቡ ተጠናቆ አገልግሎት መስጠት የጀመረውን የደብረ ማርቆስ አውሮፕላን ማረፊያን ጨምሮ፣ በአሁኑ ወቅት የባሕር ዳር የደጃዝማች በላይ ዘለቀ ዓለም አቀፍ ኤርፖርት አዲስ ዘመናዊ ተርሚናል ግንባታ ተጠናቆ ለእንግዶች መቀበያነት ዝግጁ ሆኗል።

ይህ ተርሚናል ቀደም ሲል የነበረውን ጠበብ ያለና ምቹ ያልሆነ አሰራር ሙሉ በሙሉ በመቀየር፣ ዘመኑን በዋጀ መልኩ በሰፊ እና በዘመናዊ የሕንፃ ጥበብ የተገነባ ነው።

ይህ አዲስ ተርሚናል ከአዲስ አበባው ቦሌ ዓለም አቀፍ አውሮፕላን ማረፊያ ቀጥሎ ሁለተኛው ትልቅ የእንግዶች መቀበያ መሆን የሚያስችለውን አቅም ይዟል።

ይህም የባሕር ዳር ከተማን ውበት፣ ለምለምነትና የቱሪዝም መስህብነት ለሚመጡ መንገደኞች በግልጽ የሚያሳይ ከመሆኑም በላይ፣ ህብረተሰቡ የተከናወኑ የልማት ስራዎችን ተመልክቶ በተግባር ተጠቃሚ እንዲሆን ያደርጋል።

በአጠቃላይ እነዚህ መሰል የኤርፖርት መሰረተ ልማት ስራዎች በአንድ አካባቢ ብቻ የተወሰኑ ሳይሆኑ በሀገሪቱ የተለያዩ ክፍሎች በስፋት እየተከናወኑ የሚገኙ ናቸው። ይህም የከተሞችን ውበትና ተደራሽነት ከመጨመር ባሻገር፣ የኢትዮጵያ የነገ እድገትና የብልፅግና ጉዞ በተስተካከለና በጥሩ መስመር ላይ እንደሚገኝ በግልጽ የሚያሳይ አዎንታዊ ማሳያ ነው።
#ethiopia #bahirdarairport #ethiopianaviation #bahirdar #ethiopianairlines