ኢትዮ ቴሌኮም ለቴሌፕሌይ አሸናፊዎች የኤሌክትሪክ መኪኖችን ዕጣ የማውጣት መርኃ ግብር አካሄደ
*****************

ኢትዮ ቴሌኮም ለቴሌፕሌይ ዲጂታል ጨዋታ ሽልማት አሸናፊዎች የተዘጋጁ ሦስት ዘመናዊ የቢ.ዋይ.ዲ ኤሌክትሪክ መኪኖችን ዕጣ የማውጣት መርኃ ግብር በመስቀል አደባባይ አከናውኗል።

ዕጣ የወጣላቸው ሦስት ባለዕድለኞች ሽልማታቸው በቀጣይ በሚዘጋጅ ይፋዊ መርሐ ግብር እንደሚረከቡ ተገልጿል።

ኩባንያው ዲጂታል ተደራሽነትንና የኢኮኖሚ እንቅስቃሴን ለማነቃቃት በሚያደርገው እንቅስቃሴ፣ የሀገር ውስጥ ቱሪዝምን ለማበረታታት ለ17 ደንበኞች ወደ ልዩ ልዩ የቱሪስት መዳረሻዎች የጉዞ ዕድል ማመቻቸቱን ገልጿል።

በተጨማሪም የዲጂታል ክፍተትን ለመሙላት የሚያስችሉ 119 ዘመናዊ ስማርት ስልኮች እና ከ1.9 ሚሊዮን በላይ የሞባይል ጥቅሎች ለደንበኞች ማበርከቱን ጠቁሟል።

በየቀኑ፣ በየሳምንቱ እና በየወሩ በሚካሄዱ ዕጣዎች በድምሩ 17.76 ሚሊዮን ብር በቴሌብር (telebirr) በኩል ለባለዕድለኞች ገቢ መደረጉም ተጠቅሷል።

መርሐ ግብሩ ከመዝናኛና ከሽልማት ባለፈ ሀገራችን ወደ አረንጓዴ ኢኮኖሚ እና ለአካባቢ ጥበቃ ተስማሚ ወደሆኑ የትራንስፖርት አማራጮች የምታደርገውን ሽግግር የመደገፍ ትልቅ አላማ ያለው መሆኑ ተገልጿል።

የቴሌፕሌይ መዝናኛ እና ሽልማት ወደፊትም ተጠናክሮ እንደሚቀጥል ያመለከተው ኢትዮ ቴሌኮም፤ ደንበኞች በጨዋታው ላይ ንቁ ተሳትፎ በማድረግ ዘመናዊ የኤሌክትሪክ መኪኖችን ጨምሮ ሌሎች ዕለታዊ፣ ሳምንታዊ እና ወርሃዊ ሽልማቶችን ማሸነፍ እንደሚችሉ አስታውቋል።

ዛሬ ዕጣ የወጣላቸውን ባለዕድለኞች ሳይጨምር ባለፈው አንድ ዓመት ውስጥ ብቻ በቴሌፕሌይ በኩል ከ32.6 ሚሊዮን ብር በላይ ግምት ያላቸው ልዩ ልዩ ሽልማቶች ለደንበኞች መበርከታቸውንም ኩባንያው ገልጿል።

በመቅደስ እንዳለ
#ebcdotstream #ethiotelecom #teleplay #greeneconomy #digitalethiopia #ethiopia

በአንድ ጀንበር 805.3 ሚሊዮን ችግኝ ተተክሏል #greenlegacy #ethiopia #greeneconomy #environmentalprotection #agroforestry #ethiopiannews #climateaction

የአረንጓዴ ዐሻራ የሰባት ዓመታት ሰባት አንኳር ስኬቶች
*************

አረንጓዴ ዐሻራ በኢትዮጵያ ምድር ከተጀመረበት ጊዜ አንስቶ ባለፉት ሰባት ዓመታት፣ ሀገራችንን ከአፈር መሸርሸር እና ከበረሃማነት የመታደግ ሀገራዊ ራዕይ ብቻ ሳይሆን፤ የምድርን ሕይወት የሚያድስ፣ የዜጎችን ሥነ-ልቦናዊ አስተሳሰብ የሚቀርጽ እና ኢኮኖሚያዊ አቅም የሚገነባ ታላቅ ሕዝባዊ ንቅናቄ ሆኖ ዘልቋል።

ይህ ሀገራዊ የሕልውና ጥረት ከሀገር በቀል የኢኮኖሚ ማሻሻያ ስትራቴጂዎች ጋር ተናብቦ ባለፉት ሰባት ዓመታት ያስመዘገባቸው ሰባት ዋና ዋና ተጨባጭ ስኬቶች እንደሚከተለው ተተንትነዋል።

1. የችግኝ ብዛትን ከጽድቀት ምጣኔ ጋር ያጣመረ አዲስ ታሪካዊ ሽግግር

ባለፉት ሰባት ዓመታት በቢሊዮኖች የሚቆጠሩ ችግኞች መተከላቸው ብቻ ሳይሆን፣ የተከላው ዋና ትኩረት ወደ ጥራት እና ድኅረ-ተከላ እንክብካቤ በማደጉ የችግኞች ጽድቀት ምጣኔ ከ80 በመቶ በላይ ማደግ ችሏል።

ይህም ቀደም ሲል የነበረውን "መተከል እንጂ አለመጽደቅ" የሚል የብክነት ታሪክን በመቀየር በቆላ እና በደጋ አካባቢዎች የተጎዱ መሬቶች በፍጥነት አረንጓዴ እንዲለብሱ እና ሥነ-ምኅዳራዊ ሚዛን እንዲጠበቅ አድርጓል።

2. ከአካባቢ ጥበቃ ወደ የምግብ ዋስትና የተደረገ መዋቅራዊ የኢኮኖሚ ሽግግር

አረንጓዴ ዐሻራ ከተፈጥሮ የደን ዛፎች ባሻገር እንደ አቮካዶ፣ ማንጎ፣ ፓፓያ፣ አፕል እና ቡና ያሉ ፍሬያማ ተክሎችን በስፋት አካትቷል።

ይህ ስትራቴጂያዊ እርምጃ ፕሮጀክቱን ከአካባቢ ጥበቃ ባለፈ የቤተሰብ የምግብ ዋስትናን የሚያረጋግጥ እና አባወራዎችን የገበያ ተጠቃሚ የሚያደርግ፣ ብሎም የሀገራችን የግብርና ምርት የወጪ ንግድ የሚያሳድግ የኢኮኖሚ ሞተር አድርጎታል።

ይህም የአካባቢ ጥበቃን ከዜጎች የዕለት ተዕለት ኑሮ ማሻሻል ግብ ጋር በማስተሳሰር ዘላቂነቱ የተረጋገጠ የልማት ምሰሶ እንዲሆን አስችሎታል።

3. የአረንጓዴ ኢኮኖሚ ግንባታ እና የወጣቶች የሥራ ዕድል ፈጠራ

በመላ ሀገራችን የተቋቋሙት በዐሥር ሺዎች የሚቆጠሩ የችግኝ ማፍያ ጣቢያዎች ለብዙ ዜጎች፣ በተለይም ለወጣቶች እና ለሴቶች አዲስ እና ዘላቂ የገቢ ምንጭ ሆነዋል።

ችግኝ ማፍላት፣ መንከባከብ እና ለገበያ ማቅረብ በራሱ አዲስ የኢንቨስትመንት ዘርፍ እና የሥራ ዕድል በመፍጠር፣ የሀገራችንን የአረንጓዴ ኢኮኖሚ ጅማሮ በጠንካራ መሠረት ላይ አኑሮታል።

ችግኞች ከተተከሉ በኋላ የሚደረገው ጥበቃ እና ክብካቤም በርካታ ወጣቶችን ተጠቃሚ ያደረገ ቋሚ የሥራ ዘርፍ መሆን ችሏል።

4. የውኃ ሀብት እና የታላላቅ ሀገራዊ የልማት ፕሮጀክቶች ዋስትና

በስፋት የተከናወነው የደን ልማት እና የአፈር ጥበቃ ሥራ የአፈር መሸርሸርን በመቀነስ፣ እንደ ታላቁ የኢትዮጵያ ሕዳሴ ግድብ ያሉ ሀገራዊ የሃይድሮ ኤሌክትሪክ ማመንጫዎች በደለል እንዳይሞሉ የመከላከል ታሪካዊ ሚና ተጫውቷል።

በተጨማሪም የከርሰ ምድር ውኃ መጠን እንዲያገግም እና የደረቁ የምንጭ ውኃዎች መልሰው እንዲፈልቁ በማድረግ አስተማማኝ የውኃ ዋስትናን እያረጋገጠ ይገኛል።

ይህ ታላላቅ መሠረተ ልማቶችን የመጠበቅ አቅም ለኢትዮጵያ ብልጽግና ብቻ ሳይሆን፣ ሀገራችን የውኃ ምንጭ ለሆነችላቸው የታችኛው ተፋሰስ ሀገራት ጭምር ትልቅ ትሩፋት ነው።

5. አረንጓዴ ዲፕሎማሲ እና የቀጣናዊ ትሥሥር ማጠናከሪያ

ኢትዮጵያ ያዘጋጀቻቸውን ችግኞች እንደ ጂቡቲ፣ ሶማሊያ፣ ደቡብ ሱዳን እና ኬንያ ላሉት ጎረቤት ሀገራት በማጋራት፣ የምሥራቅ አፍሪካን እና የአፍሪካ ቀንድን የቀጣና አየር ንብረት ለውጥ ተግዳሮት በጋራ የመከላከል መሪነት ሚናዋን በተግባር አሳይታለች።

ይህም አረንጓዴ ዐሻራን የድንበር ተሻጋሪ ዲፕሎማሲ፣ የቀጠናው ሰላም እና የጋራ ልማት መሣሪያ አድርጎታል።

በርካታ የአፍሪካ ሀገራትም የኢትዮጵያን ፈለግ በመከተል የአረንጓዴ ልማትን በሀገሮቻቸው እያስፋፉ ይገኛሉ።

ከዚህ ባሻገር፣ ኢትዮጵያ ባመጣቻቸው ተጨባጭ ስኬቶች “ዘላቂ የደን ልማት አያያዝ እና አጠቃቀም” በሚል ዘርፍ ከዓለም የምግብ እና እርሻ ድርጅት (FAO) ከፍተኛ እውቅናን አግኝታለች።

6. የከተሞች ሥነ-ምኅዳር መታደስ እና የኮሪደር ልማት ውበት

አረንጓዴ ዐሻራ በገጠር ተራራዎች ብቻ ተወስኖ ሳይቀር ወደ ከተሞች በመግባት የዘመናዊ ፓርኮች ግንባታ፣ የከተማ አረንጓዴ ልማት እና አሁን ላይ በስፋት እየተተገበረ ላለው የኮሪደር ልማት ዋነኛ አካል ሆኗል።

ይህም የከተሞችን የአየር ጥራት በከፍተኛ ደረጃ ከመጨመሩም በላይ፣ የሥነ-ሕይወት ስብጥርን ወደ ነበረበት በመመለስ እና ለዜጎች ምቹ የመዝናኛ እና የኑሮ አካባቢን በመፍጠር የከተሞቻችንን ገጽታ ሙሉ በሙሉ በመለወጥ ላይ ይገኛል።

7. ሕዝባዊ ንቅናቄ እና የዜግነት አገልግሎት ባህል ግንባታ

በአንድ ጀምበር በመቶ ሚሊዮኖች የሚቆጠሩ ዜጎች በነቂስ ወጥተው ችግኝ የመተከል ልምዳቸው፣ የአካባቢ ጥበቃን ከዘመቻነት አውጥቶ የባህል እና የዜግነት ግዴታ አካል አድርጎታል።

ይህም የሕዝባዊ ወንድማማችነትን ያጠናከረ እና የአካባቢ ጥበቃ ግንዛቤን በማሳደግ ለቀጣዩ ትውልድ የሚሻገር እጅግ ግዙፍ ማኅበራዊ እና ሥነ-ልቦናዊ ስኬት ነው።

በአጠቃላይ አረንጓዴ ዐሻራ ባለፉት ሰባት ዓመታት የተፈጥሮ ሀብታችንን ከመመለስ አልፎ ሀገራዊ አንድነትን ያጠናከረ፣ የማክሮ ኢኮኖሚ አቅማችንን የገነባ እና ኢትዮጵያን በዓለም አቀፍ መድረክ ለአየር ንብረት ለውጥ መፍትሔ አቅራቢ ሀገር ያደረገ አንጸባራቂ አዲስ የታሪክ ምዕራፍ ነው።

በለሚ ታደሰ
#ethiopia #ebc #greenlegacy #climateaction #greendiplomacy #greeneconomy

ከውኃ ኃይል ባሻገር፤ የኢትዮጵያ አዲሱ የኒዩክሌር ኃይል ጉዞ እና የብልጽግና ተስፋ
****************

ኢትዮጵያ በመደመር መንግሥት የኃይል አቅርቦትና ፍላጎቷን ለማመጣጠን ከውኃ እስከ ንፋስ፣ ከጂኦተርማል እስከ ፀሐይ ኃይል ማመንጫዎችን በመገንባት በአፍሪካ አህጉር ተምሳሌታዊ ሥራዎችን እያከናወነች ትገኛለች።

ከጊቤ I እስከ ኮይሻ ያሉ ግዙፍ የውኃ ኃይል ማመንጫዎች እንዲሁም ከአባ ሳሙኤል እስከ ታላቁ የኢትዮጵያ ሕዳሴ ግድብ የተዘረጉት መሠረተ ልማቶች ማኅበረሰቡንና የአምራች ኢንዱስትሪዎችን በማንቀሳቀስ ለሀገራችን ኢኮኖሚ ትልቅ አቅም ሆነዋል።

ሆኖም ዘላቂ የኃይል ፍላጎትን በተወሰኑ አማራጮች ብቻ ማሟላት አዋጭ አለመሆኑን የተረዳው መንግሥት፣ በቴክኖሎጂ የታገዘ የኒዩክሌር ኃይል አስፈላጊነትን በመገንዘብ ስትራቴጂካዊ የኃይል አቅርቦት ፍኖተ ካርታ በማዘጋጀት ወደ ተግባር ገብቷል።

የኒዩክሌር ቴክኖሎጂ እንደ ፀሐይና ንፋስ ከአየር ንብረት ጋር የማይቀያየርና በቀን 24 ሰዓት በሳምንት 7 ቀን ያለማቋረጥ ኃይል የማመንጨት አቅም ያለው በመሆኑ ለትላልቅ ኢንዱስትሪዎች፣ ለአምራች ሴክተሮችና ለቴክኖሎጂ ማዕከላት የማይንቀሳቀስ መሠረት ይጥላል።

ይህ ቴክኖሎጂ ኤሌክትሪክ በሚያመነጭበት ወቅት ምንም ዓይነት የካርቦን ልቀት የሌለው በመሆኑ ለአየር ንብረት ለውጥ ትግልና ለአረንጓዴ ኢኮኖሚ ግንባታ ትልቅ አስተዋጽኦ አለው።

በተጨማሪም ከቅሪተ አካል ነዳጆች የዋጋ መዋዥቅና ጥገኝነት ነፃ የሚያደርግ ሲሆን፣ ከኃይል ማመንጨት ባለፈ በሕክምና፣ በግብርና፣ በኢንዱስትሪና ውኃ ማጣራት እንዲሁም ለብዙ ሺህ ዜጎች የሥራ ዕድል በመፍጠር ረገድ ከፍተኛ ፋይዳ አለው።

በዓለም አቀፍ ደረጃ ፈረንሳይ 70 በመቶ የኤሌክትሪክ ፍላጎቷን በኒዩክሌር በመሸፈን አነስተኛ የካርቦን ልቀት ማረጋገጥ ስትችል፤ አሜሪካ፣ ቻይና፣ ደቡብ ኮሪያ እና የተባበሩት አረብ ኤሚሬቶችም በዘርፉ ትልቅ ስኬት አስመዝግበዋል።

ኢትዮጵያም ይህንን ዓለም አቀፍ ተሞክሮ በመቅሰም ሁለንተናዊ ብልጽግናን ለማረጋገጥ የሚያስችል የኒዩክሌር ኃይል ፍኖተ ካርታ ቀርጻለች።

ሀገራችን በዘርፉ የተሻለ ልምድና ተሞክሮ ካለው የሩሲያው ሮሳቶም (Rosatom) ስቴት ኮርፖሬሽን ጋር ስትራቴጂካዊ ስምምነት ያደረገች ሲሆን፣ በአሁኑ ወቅትም ጠንካራ የደህንነት መሠረተ ልማትና የፋይናንስ ዝግጅት በማጠናከር ቴክኖሎጂውን ለኢንዱስትሪ፣ ለሕክምናና ለሳይንስ ዕድገት ለማዋል የጀመረችውን ጉዞ አጠናክራ ቀጥላለች።

በመሐመድ ፊጣሞ
#ethiopia #nuclearenergy #greeneconomy #sustainabledevelopment #energytransition

ምድርን ከአረንጓዴ ልባስ፣ አርሶ አደሩን ከገቢ ምንጭ ጋር ያገናኘው አረንጓዴ ዐሻራ
**************

የኢትዮጵያ አረንጓዴ ዐሻራ መርሐ-ግብር ምድርን በአረንጓዴ ተክሎች ከመሸፈንና የአየር ንብረት ለውጥን ከመከላከል ባለፈ፣ ሀገራዊ የምግብ ዋስትናንና ምርታማነትን ወደማረጋገጥ የተሸጋገረ ታላቅ ስኬት እየመዘገበ ይገኛል።

ቀደም ሲል ለደን ጥበቃና ለተራቆቱ መሬቶች ማገገሚያ ብቻ ትኩረት ይሰጥ የነበረው ይህ ሀገራዊ ንቅናቄ፣ አሁን ላይ ስትራቴጂካዊ ለውጥ በማድረግ የአካባቢ ጥበቃን ከኢኮኖሚያዊ ተጠቃሚነት ጋር ያቀናጀ የኢኮኖሚ ምሶሶ ለመሆን በቅቷል።

ይህ ስኬት በጉልህ ከሚታይባቸውና ትልቅ እመርታ ከተመዘገበባቸው ዘርፎች መካከል የፍራፍሬ ምርት ልማት ግንባር ቀደሙን ስፍራ ይይዛል።

በአረንጓዴ ዐሻራ መርሐ-ግብር በሚሊዮኖች የሚቆጠሩ የተሻሻሉና ፍሬያማ የሆኑ የአቮካዶ፣ የማንጎ፣ የፓፓያ እና የኮምጣጤ ፍራፍሬዎች ዝርያዎች በስፋት እንዲተከሉ መደረጉ በየደረጃው ለሚገኙ አርሶ አደሮችና አምራቾች አዲስ የገቢ ምንጭ ፈጥሯል።

ንቅናቄው የአፈር መሸርሸርን በዘላቂነት ከመግታት ባለፈ፣ የመሬትን ለምነት በማሻሻልና የከርሰ-ምድር ውኃን በመጠበቅ ለፍራፍሬ ልማትና ለተሻሻለ ግብርና እጅግ ምቹ የሆነ ሥነ-ምህዳራዊ ሁኔታን ፈጥሯል።

ይህ የምርታማነት እመርታ አርሶ አደሩን ከራስ-አልፎ ለገበያ እንዲያመርት ከማስቻሉም በላይ፣ በከተሞች የሚስተዋለውን የፍራፍሬ አቅርቦት እጥረትና የዋጋ ንረት እያቃለለ ይገኛል።

ከዚህም ባሻገር፣ ጥራቱን የጠበቀ የፍራፍሬ ምርት በስፋት መመረቱ የኢትዮጵያን የኤክስፖርት አቅም በማሳደግና ወደ ውጭ የመላክ ዕድሎችን በማስፋት የውጭ ምንዛሬ ለማስገኘት የራሱን የጎላ አስተዋጽኦ እያበረከተ ይገኛል።

የኢትዮጵያ አረንጓዴ ዐሻራ ተፈጥሮን ከመንከባከብና ምድርን ከማልበስ ባለፈ፣ የዜጎችን ማዕድ በሥርዓተ-ምግብ እራስን ወደመቻል ያሸጋገረ ፕሮጀክት ነው። የአካባቢ ጥበቃና የኢኮኖሚ ዕድገት እንዴት እጅና ጓንት ሆነው እንደሚጓዙ እና የአየር ንብረት መከላከል ወደ ተጨባጭ ምርታማነት እንዴት እንደሚቀየር ያሳየ ሕያው ሀገራዊ ማረጋገጫ ሆኗል።
#greenlegacy #ethiopianbroadcastingcorporation #agricultureethiopia #foodsecurity #greeneconomy

"ከተፈጥሮ ጥበቃ ዶላር ማግኘት እንደሚቻል ማሳያ የሆነው የሁምቦ የደን ካርበን ፕሮጀክት"
********************

በተባበሩት መንግሥታት ድርጅት የንጹሕ ልማት ሥርዓት ተመዝግቦ የሚገኘውና በአፍሪካ የመጀመሪያው የሆነው የወላይታ ሁምቦ የደን ካርበን ፕሮጀክት፣ በተራቆቱ ተራሮች ላይ አዲስ ሕይወት በመዝራት የአየር ንብረት መዛባትን መከላከል እንደሚቻል ትልቅ ማሳያ እየሆነ ይገኛል።

ይህ ብቻ ሳይሆን፣ ከተፈጥሮ ጥበቃ ተጨባጭ የውጭ ምንዛሬ (ዶላር) ማግኘት እንደሚቻልም በተግባር ያሳየው ይህ ፕሮጀክት፤ በአፍሪካ አንደኛ፣ በዓለም ደግሞ ንጹሕ የደን ልማት ዘዴ ተጠቃሽ ፕሮጀክት ሆኖ በተባበሩት መንግሥታት ድርጅት በይፋ ተመዝግቧል።

በወላይታ ዞን በ2 ሺህ 728 ሄክታር መሬት ላይ ያረፈው ይህ ፕሮጀክት፣ ቀደም ሲል ጠፍተው የነበሩ ከ70 በላይ የአገር በቀል የዛፍ ዝርያዎች ተመልሰው እንዲያንሰራሩ ያደረገ ነው።

የአየር ንብረት ለውጥን ከመከላከል ረገድም ይህ ፕሮጀክት በዓመት በአማካይ ወደ 29 ሺህ 343 ሜትሪክ ቶን በላይ የካርቦን ዳይኦክሳይድ ጋዝ ከከባቢ አየር ውስጥ እንደሚያስወግድ ይታመናል።

በዛፎች ዕድገት እና በአየር ንብረት መለዋወጥ ውጤቶች ላይ በመመስረት ትክክለኛው የሚወገደው የካርቦን መጠን ከዓመት ዓመት ሊለያይ ቢችልም፤ 29 ሺህ343 ቶን በተባበሩት መንግሥታት ድርጅት የንጹሕ ልማት ዘዴ ምዝገባ ላይ የተቀመጠ ይፋዊ አማካይ ስሌት በመሆኑ፣ ለአለም አቀፉ የአየር ንብረት መረጋጋት ከፍተኛ አስተዋጽኦ እያበረከተ ይገኛል።

ይህ ስኬት ሊመዘገብ የቻለው “በአርሶ አደር የሚመራ የተፈጥሮ ደን መልሶ ማልማት የተባለውን ሳይንሳዊና ባህላዊ ጥበብ በማቀናጀት ደኑን በተደራጀ መልኩ በመንከባከብ ነው። በዚህም በተባበሩት መንግሥታት ድርጅት የንጹሕ ልማት ዘዴ መስፈርቶችን በአግባቡ በማሟላቱ በአህጉሪቱ ቀዳሚው ተጠቃሽ ፕሮጀክት ሊሆን ችሏል።

ደኑን ከመጠበቅ ባሻገር ለአካባቢው ማኅበረሰብ ዘላቂ የገቢ ምንጭ መፍጠር የቻለው ይህ ፕሮጀክት፤ በአሁኑ ወቅት 7 የደን ልማትና ጥበቃ የኅብረት ሥራ ማኅበራት በአንድ ዩኒየን ሥር ተደራጅተው ደኑን በባለቤትነት እየጠበቁት ይገኛል።

እነዚህ ማኅበራት በዓለም አቀፉ የበጎ አድራጎት ድርጅት "ዎርልድ ቪዥን" ድጋፍና አስተባባሪነት፣ የካርበን ፕሮጀክት ክሬዲትን ለዓለም ባንክ በመሸጥ በየዓመቱ በመቶ ሺዎች የሚቆጠር ዶላር ገቢ እያገኙ ነው። ይህም ለአካባቢው ነዋሪዎች የምግብ ዋስትናን ለማረጋገጥና የጤና መሻሻልን ለማምጣት ትልቅ አቅም ፈጥሯል።

የሁምቦ ፕሮጀክት ያሳየው ተጨባጭ ስኬት ኢትዮጵያ በረጅም ጊዜ ዕቅዷ በ2050 ዓ.ም የተለያዩ የአየር ንብረት ለውጥ መከላከያ ስትራቴጂዎችን በመተግበር፣ ወደ ከባቢ አየር የሚለቀቀውን የበካይ ጋዝ ወይም የካርበን ልቀት ፍጹም ዜሮ ለማድረግ ለጀመረችው አገራዊ ጉዞ ትልቅ ማሳያና አቅም የሚሆን ነው።

አሁን ላይ ይህ ስኬት ተስፋፍቶ በወላይታ ዞን ዳሞታ ተራራን ፕሮጀክት ጨምሮ በ9 ወረዳዎች ከ22,000 ሄክታር በላይ መሬት በካርበን ፕሮጀክት እየለማ የሚገኝ ሲሆን፤ 48 የደን ማኅበራት እና 3 የደን ዩኒዮኖች በዚሁ አረንጓዴና ትርፋማ ፕሮጀክት ላይ በንቅናቄ እየተሳተፉ ይገኛሉ።

በትዕግስቱ ቡቼ
#ebc #humbocarbonproject #wolaita #climateaction #greeneconomy

አረንጓዴ ዐሻራ በኢትዮጵያ የማር ምርት ላይ ያመጣው ተጨባጭ ለውጥ
**************************

የአረንጓዴ ዐሻራ መርሐ ግብር ከአየር ንብረት ጥበቃና የደን ሽፋንን ከማሳደግ ባለፈ፣ ለተፈጥሮ ሚዛን መስተካከልና ለብዝኃ-ሕይወት መበልጸግ የላቀ አስተዋጽኦ እያበረከተ ይገኛል።

ባለፉት ዓመታት የተከናወኑ የተቀናጁ የችግኝ ተከላና የአካባቢ ጥበቃ ሥራዎች የሀገራችንን የደን ሽፋን በከፍተኛ ደረጃ አሳድገውታል።

ይህም ለንብ ዝርያዎች መራባትና ኅልውና ወሳኝ የሆኑ አበቦች፣ ዕፅዋትና ተፈጥሯዊ መጠለያዎችን መልሶ በመተካት ረገድ ምቹና ተስማሚ የሥነ-ምህዳር ከባቢን መፍጠር አስችሏል።

የንብ እርባታ ከዕፅዋትና ከአበቦች መኖር ጋር በቀጥታ የተያያዘ በመሆኑ፣ በመርሐ ግብሩ አማካኝነት የሚተከሉ ደኖች ለአካባቢ ጥበቃ ብቻ ሳይሆን፣ ለምግብ ዋስትና እና ለንብ ማር ምርት ምቹ ሁኔታን ፈጥረዋል።

በዚህም ንቦች የሚሰማሩባቸው ሰፋፊ የዕፅዋት መስኮች በመፈጠራቸው በቂና ጥራት ያለው የምግብ በማግኘት በሀገራችን የሚመረተው የማር ምርት መጠንና ጥራት በተጨባጭ እንዲያድግ መርሐ ግብሩ ከፍተኛ እገዛ አድርጓል።

ይህ የማር ምርት ዕድገት በአየር ንብረት ጥበቃና በምግብ ዋስትና መካከል ያለውን ጥብቅ ቁርኝት የሚያሳይ ከመሆኑም በላይ፣ በገጠሩ የሀገራችን ክፍል ለሚገኙ አርሶ አደሮችና ማኅበረሰቦች አዲስ የገቢ ምንጭ የፈጠረ የአረንጓዴ ኢኮኖሚ ማሳያ ነው።

ከተፈጥሮ ጥበቃ ጎን ለጎን የሚገኘው ይህ ዕድል፣ አርሶ አደሩ የአካባቢውን ደን እንዲጠብቅና ከግብርናው ዘርፍ የሚያገኘውን ገቢ በንብ እርባታ እንዲያሳድግ ጉልህ አስተዋጽኦ አበርክቷል።

መርሐ ግብሩ ተስፋን መትከል ብቻ ሳይሆን፣ በተግባር ሊለወጥ የሚችልና ዘላቂነት ያለውን ኢኮኖሚያዊ አቅም በሀገር በቀል ዕውቀትና በተፈጥሮ ጸጋ ላይ እየገነባ መሆኑን በተጨባጭ አረጋግጧል።

ይህ ዓይነቱ የተቀናጀ ልማት ተፈጥሮን የመንከባከብ ተግባር እንዴት በቀጥታ ወደ ማኅበረሰባዊ ብልጽግና እና ወደ ሀገራዊ የምግብ ዋስትና ሊሸጋገር እንደሚችል በተግባር ያሳየ ውጤታማ ስትራቴጂ ነው።

በሔዋን ጌታቸው
#ethiopia #greenlegacy #beekeeping #honeyproduction #greeneconomy #ebc

ከአካባቢ ጥበቃ ወደ ዘላቂ ገቢ፤ “የሚበላና የሚሸጥ የአረንጓዴ ዐሻራ”
****************

በአረንጓዴ ዐሻራ መርሐ ግብር በኢትዮጵያ ከተተከሉ በቢሊዮን የሚቆጠሩ ችግኞች መካከል ለሥነ-ምህዳር ጥበቃ ብቻ ሳይሆን ለሀገር ውስጥ ኢኮኖሚ እና ለህብረተሰቡ የዕለት ተዕለት ኑሮ ከፍተኛ ጠቀሜታ ላላቸው ዕፅዋት ልዩ ትኩረት ተሰጥቷል።

የደን ሽፋንን መጨመር ትኩረቱን አድርጎ የጀመረው ይህ መርሐ ግብር ወደ የሚበላና የሚሸጥ አረንጓዴ ዐሻራ መርህ በመሸጋገር የሀገር ውስጥ የምግብ ዋስትናን ለማረጋገጥና የወጪ ንግድን ለማሳደግ ትልቅ ሚና እየተጫወተ ይገኛል።

በቅርብ ዓመታት በተደረጉት ዘመቻዎች የአርሶ አደሩንና የከተማ ነዋሪውን ገቢ በቀጥታ ሊቀይሩ የሚችሉ፣ የ“ከተማ ግብርና” እና የ“ትውልድ ዐሻራ” አካል የሆኑ በሚሊዮን የሚቆጠሩ የፍራፍሬ ችግኞች ተተክለዋል።

ከእነዚህም መካከል አቮካዶ ለላኪ ድርጅቶችና ለውጭ ገበያ የሚቀርብ በመሆኑ የአርሶ አደሩን ገቢ በከፍተኛ ሁኔታ ማሳደግ የቻለ ሲሆን፣ በተለይም በኦሮሚያ፣ በሲዳማ፣ በደቡብ እና በማዕከላዊ ኢትዮጵያ ክልሎች በተሻሻሉ የአቮካዶ ዝርያዎች ላይ የተሰራው ሥራ ለአግሮ-ፕሮሰሲንግ ዘርፉ ሰፊ የምርታማነት አቅም ፈጥሯል።

በተጨማሪም ማንጎ እና ፓፓያ በሀገር ውስጥ ኢንዱስትሪዎች ለጭማቂ ምርትና ለቀጥታ ፍጆታ በስፋት እየዋሉ ሲሆን፣ ሙዝ፣ ብርቱካን እና ሎሚ በየጓሮው በቀላሉ የሚጸድቁና ፈጣን የገቢ ምንጭ እየሆኑ ይገኛሉ።

ይህ በእንዲህ እንዳለ፣ አርሶ አደሩ ውስን ኢኮኖሚያዊና አካባቢያዊ ፋይዳ ባለው ባህር ዛፍ ላይ ለረጅም ዘመናት ጥገኛ ሆኖ የቆየ ቢሆንም፣ በተሰጠው ሰፊ የግንዛቤ ትምህርት ከባሕር ዛፍ የላቀ ጥቅም በሚሰጡ ተክሎች ላይ ትኩረት እንዲያደርግ ሆኗል።

በተለይም በማዕከላዊ ኢትዮጵያ ዝቅተኛ ጠቀሜታ ያላቸውን ዛፎች በመንቀል፣ በምትካቸው የምግብ ዋስትናን የሚያረጋግጡ የጓሮ አትክልትና ፍራፍሬዎችን እንደ ሙዝ፣ እንሰት እና ጃክ ፍሩት ያሉ ተክሎችን በመተካት ረገድ አመርቂ ውጤት እየተመዘገበ ይገኛል።

ባሕር ዛፍ ምንም እንኳን የውሃ ፍጆታው ጥንቃቄ የሚሻ ቢሆንም፣ ለግንባታ ማገርና ምሰሶ፣ ለቤት ማገዶ እና ለስልክ እንጨት ያለውን ከፍተኛ የገበያ ፍላጎት ለማሟላት በተመረጡና ምቹ በሆኑ ቦታዎች ላይ ብቻ ተተክሏል።

በሌላ በኩል የኢትዮጵያ ዋነኛ የውጭ ምንዛሬ አስገኝ በሆነው ቡና ላይ በአረንጓዴ ዐሻራ መርሐ ግብር የአሮጌ ቡና ተክሎችን በመተካትና በአዳዲስ መሬት ላይ ምርጥ የቡና ዝርያዎችን የመትከል ስራ በሰፊው ተከናውኗል።

እነዚህ ተክሎች በአጭር ጊዜ ውስጥ ወደ ፍሬያማነት በመሸጋገር አመርቂ ውጤት እያስገኙ ሲሆን፣ በደቡብና በደቡብ ምዕራብ የሀገራችን ክፍሎች ለሻይ ልማት የሚሆኑ ችግኞች በስፋት መሰራጨታቸው የአርሶ አደሩን የገቢ አማራጭ ዘርፈ-ብዙ በማድረግ ተስፋ ሰጪ ውጤት እያሳየ ይገኛል።

ከዚህም ባሻገር ለኢንዱስትሪ እና ለግንባታ ግብዓት የሚሆኑ የደን ዕፅዋት ልማት ላይ ሰፊ ትኩረት የተሰጠ ሲሆን፣ ለአፈርና ውኃ ጥበቃ ካለው ጠቀሜታ ባሻገር ለቤት መስሪያ፣ ለቤት ዕቃዎች ፋብሪካዎችና ለወረቀት ምርት ከፍተኛ የኢኮኖሚ እምቅ አቅም ያለው ቀርከሃ (አረንጓዴው ወርቅ) በስፋት ተተክሏል።

እንዲሁም ግራርና የደጋ ጥድ ለከፍተኛ ጥራት ጣውላ ምርትና ለደንን መሰረት ላደረጉ ኢንዱስትሪዎች በግብዓትነት እያገለገሉ ይገኛሉ።

በአረንጓዴ ዐሻራ መርሐ ግብር የተተከሉት እንደ ሰስባኒያና ሉሲና ያሉ የመኖ እጽዋት የእንስሳት ምርታማነትን ከመጨመር ባለፈ የአፈርን ለምነት በተፈጥሯዊ መንገድ እያሳደጉ ይገኛሉ።

በአጠቃላይ ይህ መርሃ ግብር አካባቢን ከመጠበቅ ባለፈ የምግብ ዋስትናን የሚያረጋግጥ፣ የወጪ ንግድን የሚያሳድግና የህብረተሰቡን ኑሮ የሚያሻሽል እውነተኛ የኢኮኖሚ ምሶሶ ሆኗል።

በመሐመድ ፊጣሞ
#ethiopianbroadcastingcorporation #greenlegacy #greeneconomy #ecofriendly #fruitexport

🍌 የሃዋ ገላን አርሶ አደሮች ጽናትና የጠቅላይ ሚኒስትሩ ጉብኝት! 🌱
#ethiopia | ​ጠቅላይ ሚኒስትር ዐቢይ አሕመድ (ዶ/ር) በቄለም ወለጋ ዞን ሃዋ ገላን ወረዳ በመገኘት፣ በ"ሌማት ትሩፋት" መርሃ-ግብር የለማውን አስደናቂ የሙዝ እርሻ በዛሬው ዕለት ጎብኝተዋል።

​ከጉብኝቱ የተገኙ ዋና ዋና መልዕክቶች፦

​💪 የጽናት ውጤት፦
አርሶ አደሮቹ መሬትና የውኃ ሀብትን በአግባቡ በመጠቀም፣ ባህላዊ የመስኖ ዘዴዎችን በማቀናጀት አካባቢያቸውን ወደ ተስፋ ሰጪ የግብርና ማዕከልነት ቀይረዋል።

​🛣️ የመሠረተ ልማት ፋይዳ፦
የተገነቡ የመንገድ መሠረተ ልማቶች የአርሶ አደሩን ምርት ያለ እንግልት ወደ ገበያ ለማድረስ ትልቅ አቅም መሆናቸውን ጠቅላይ ሚኒስትሩ በጉብኝታቸው ተመልክተዋል።

​🎯 የተቀናጀ ልማት፦
የልማት ጥረቶች ከማኅበረሰቡ ፍላጎትና አቅም ጋር ሲናበቡ የሚገኘውን ውጤት ይህ የሙዝ እርሻ ልማት በተግባር የሚያሳይ ነው።

​"የአካባቢን መሬትና የውኃ ሀብትን በአግባቡ መጠቀም ከተቻለ ትርጉም ያለው ለውጥ ማምጣት ይቻላል!" — ጠቅላይ ሚኒስትር ዐቢይ አሕመድ (ዶ/ር)

​#abiyahmed #ethiopia #kellemwollega #lemattirufat #agriculture #greeneconomy #getutemesgen #getu #ጌጡ #ጌጡተመስገን