የ«መልካም ወጣት» ፕሮጀክት ግንባታ ለማጠናቀቅ አዲስ የገቢ ማሰባሰቢያ ሊካሄድ ነው!
​ #fastmereja I ለዘጠኝ ዓመታት በሐገር ውስጥ እና በውጭ ሐገር እንዲሁም በማርሲል ቲቪ ጨምሮ ከ500,000 በላይ ወጣቶችን ተሳታፊ ያደረገው «የመልካም ወጣት» አገልግሎት፣ በሀዋሳ ከተማ የተጀመሩ የልማት ስራዎችን ይበልጥ ለማስፋፋት አዲስ የገቢ ማሰባሰቢያ መርሃ ግብር ሊጀምር መሆኑ በተሰጠ ጋዜጣዊ መግለጫ ተነገረ።

በመድረኩ ላይ እንደተነገረው ባለፉት ዓመታት ከ60,000 በላይ ሰዎች ጌታን እንደግል አዳኛቸው እንዲቀበሉ ምክንያት የሆነው ይህ አገልግሎት በወጣቶች ትውልድ ግንባታ ላይ ጉልህ ሚና እየተጫወተ እንደሚገኝ ተነግሯል።

​የአገልግሎቱ መሪዎች እንዳስታወቁት፣ በሀዋሳ ከተማ 5,000 ሰዎችን የሚይዝ አዳራሽ ተገንብቶ የተጠናቀቀ ሲሆን፤ አሁን ላይ አቅሙን ወደ 15,000 ሰዎች ለማሳደግ ተጨማሪ የግንባታ ስራዎች ተጠናክረው ቀጥለዋል። ከዚህም በተጨማሪ ከ5 ባለ 5 ወለል የተማሪዎች ማደሪያ ሕንፃዎች መካከል 3ቱ ተጠናቀው የመጨረሻ ስራዎች እየተከናወኑላቸው ይገኛል፤ ቀሪዎቹ 2ቱ ሕንፃዎች አሁንም በግንባታ ላይ ናቸው። እንዲሁም 10,000 ሰዎችን ማስተናገድ የሚችል ትልቅ አሬና እና ለአእምሮና ሰውነት ማጎልመሻ የሚሆን ስፍራም በመገንባት ላይ መሆኑ ተገልጿል።

​ይህንን ግዙፍ ፕሮጀክት ሙሉ በሙሉ ለማጠናቀቅ ከ250 ሚሊዮን እስከ 300 ሚሊዮን ብር የሚደርስ በጀት እንደሚያስፈልግ ተገልጿል። ገንዘቡን ለማሰባሰብም በቀጣዮቹ 10 ወራት ውስጥ በጅማ፣ ቦንጋ፣ ቡታጅራ፣ ባስኬቶ፣ ዳውሮ፣ ጅጅጋ፣ ጊዶሌ፣ ሻኪሶ፣ ሳውላ እና ቡሌ ሆራን ጨምሮ በሌሎችም ከተሞች ታላቅ የገቢ ማሰባሰቢያ ጉዞ ይደረጋል። የዚህ ጉዞ መነሻ ጥቅምት 6፣ 7 እና 8 ቀን 2019 ዓ.ም በጅማ ከተማ እንደሚጀመር ታውቋል።

​ይህ የወጣቱን ትውልድ በስነ-ምግባር እና በእውቀት ለመገንባት የሚደረግ የጋራ አህጉራዊና ሀገራዊ ጉዞ በመሆኑ፣ በተጠቀሱት ከተሞች የምትገኙ ማህበረሰቦች ሁሉ በጸሎት፣ በገንዘብ፣ በበጎ ፈቃድ አገልግሎት እና በአቅማችሁ ሁሉ ከጎናችው እንድትቆሙ አስተባባሪዎቹ ጥሪያቸውን አስተላልፈዋል።

የእንግሊዝ ኤንባሲ የኢትዮጵያ እና ኤርትራ ውጥረቱ አሳሳቢ ነው አለ
​ #fastmereja I ​የብሪታንያ (የዩናይትድ ኪንግደም) ኤንባሲ በአዲስ አበባ በሰሜን ኢትዮጵያ ያለውን ወቅታዊ ሁኔታ በቅርበት እየተከታተለ መሆኑን አስታወቀ። ኤንባሲው በሰጠው መግለጫ፣ ሁሉም ኢትዮጵያውያን አካታች እና ሰላማዊ የወደፊት ዕጣ ፈንታ እንዲኖራቸው የአፍሪካ ህብረት በሚመራው የሽምግልና ጥረት ለሚደረገው ሁሉ ድጋፍ ለማድረግ ዩናይትድ ኪንግደም ዝግጁ መሆኗን አረጋግጧል።

​በመግለጫው የሰላማዊ ሰዎችን ደህንነት ማስጠበቅ ያለውን ትልቅ ፋይዳ እንደገና አፅንኦት ሰጥቶ የገለጸው ኤንባሲው፤ በተጎዱ አካባቢዎች መሰረታዊ አገልግሎቶች እንዲመለሱ እና ህይወት አድን ዕርዳታ ለተቸገሩት እንዲደርስ ጥሪ አቅርቧል። በተጨማሪም ሁሉም አካላት ደህንነቱ የተጠበቀና ያልተገደበ የሰብአዊ ድርጅቶች እንቅስቃሴ እንዲፈቅዱ እንዲሁም የሰብአዊ እርዳታ ሰራተኞችን እንዲያከብሩና እንዲጠብቁ አሳስቧል።

​በሌላ በኩል፣ በኢትዮጵያ እና በኤርትራ መካከል ባለፉት ጊዜያት እየተባባሰ በመጣው ውጥረት የተሰማውን ጥልቅ ስጋት የገለጸው የብሪታንያ ኤንባሲ፤ በክፍለ አህጉሩ የሚገኙ ሀገራት ሁሉ የጎረቤቶቻቸውን ብሔራዊ ሉዓላዊነትና ግዛት አንድነት እንዲያከብሩ ጥሪ አቅርቧል።

ኤንባሲው አያይዞም ግጭቶችን ለማቀዝቀዝ፣ በንግግር ለመፍታት እንዲሁም ልዩነቶችን በሰላማዊ መንገድ ለመፍታት ሁሉም ተሳታፊ አካላት አስፈላጊውን ጥረት እንዲያደርጉ አበክሮ አሳስቧል።

ጥራትና ደህንነቱ ሳይጠበቅ የሚጓጓዝ ጥሬ ወተት ለከፍተኛ የጤና አደጋ የሚያጋልጥ መሆኑ ተገለፀ!
#fastmereja :- ጥራትና ደህንነቱ ሳይጠበቅ ከቦታ ቦታ የሚጓጓዝ ጥሬ ወተት ለከፍተኛ የጤና አደጋ የሚያጋልጥ በመሆኑ፣ የህብረተሰቡን ጤና ለመጠበቅ በትራንስፖርትና አያያዝ ሂደት ላይ ተገቢው ጥንቃቄ ሊደረግ እንደሚገባ ተገለፀ።

ወተት ከታለበ በኋላ ተገቢው የንፅህና እና የቅዝቃዜ ቁጥጥር (Cold Chain) ሳይደረግለት በሚጓጓዝበት ወቅት እንደ E. coli Salmonella እና Listeria ያሉ አደገኛ ባክቴሪያዎች በቀላሉ የሚራቡበት መንገድ እንደሚሆን ተመላክቷል።

በተለይም ወተቱ ከታለበበት ጊዜ ጀምሮ እስከ ተጠቃሚው ድረስ ከ 4°C በታች ባለው የቅዝቃዜ መጠን ካልተጠበቀ፣ በሙቀት ምክንያት ተህዋሲያኑ በፍጥነት በመራባት ለከባድ የሆድ ቁርጠት፣ ለተቅማጥ፣ ለትውከት፣ ለሳንባ ነቀርሳ እንዲሁም ለተለያዩ ህመሞች ሊዳርጉ እንደሚችሉ ተጠቁሟል።

ይህ የጤና አደጋ በተለይ በህፃናት፣ በነፍሰ ጡር እናቶች፣ በአረጋውያን እና የበሽታ መከላከል አቅማቸው ዝቅተኛ በሆኑ የህብረተሰብ ክፍሎች ላይ ከባድ ጉዳት የሚያደርስ ነው።

የወተት ደህንነትንና ጥራትን ለማረጋገጥ የሚከተሉት አበይት እርምጃዎች ሊወሰዱ እንደሚገባ ተመላክቷል፦

ወተትን ለማጓጓዝ ደረጃቸውን የጠበቁ የአሉሚኒየም ወይም የማይዝግ ብረት (Stainless steel) ዕቃዎችን መጠቀም እና የዕቃዎቹን ንፅህና በየጊዜው መጠበቅ፤ የማቀዝቀዣ ዘዴዎችን መጠቀም በትራንስፖርት ወቅት ወተቱ እንዳይበላሽ የቅዝቃዜ ሰንሰለቱን የጠበቁ የመጓጓዣ ዘዴዎችን (Refrigerated transport) መተግበር እንዲሁም ተጠቃሚዎች ጥሬ ወተትን ከመጠቀማቸው በፊት በደንብ አፍልተው የመጠቀም ልምድን ማዳበር እንደሚገባ ነዉ የተገለፀዉ።

በመሆኑም አምራቾች፣ አጓጓዦችና ነጋዴዎች የምግብ ደህንነት መመሪያዎችን በአግባቡ በመተግበርየህብረተሰቡን ጤና የመጠበቅ ሀላፊነታቸውን እንዲወጡ ጥሪ ቀርቧል።

ህብረተሰቡ ጥራትና ደህንነቱ ያልተረጋገጠ የወተት ምርት ሲያጋጥመው ወደ 8482 በነፃ በመደወል ጥቆማ መስጠት እንደሚችል ባለሥልጣኑ አስታውቋል።

ለእናት በጎ አድራጎት ፋውንዴሽን በኢትዮጵያ ለሚገኙ ተማሪዎች፣ አራሶች እና ህፃናት ዘለቄታዊ ድጋፍ እያደረገ መሆኑን ገለጸ
#fastmereja :-በአሜሪካ የተመሰረተው እና በኢትዮጵያ በተግባር የእርዳታ ስራዎችን እያከናወነ የሚገኘው ለእናት በጎ አድራጎት ፋውንዴሽን (Leenat Charity Foundation)፤ በደብረ ብርሃን፣ ሻሸመኔ እና ከሚሴ በሚገኙ ትምህርት ቤቶች ለተማሪዎች የንፅህና መጠበቂያ (ሞዴስ)፣ ደብተር እና ልዩ ልዩ የትምህርት ቁሳቁሶችን በቀጥታ ማድረሱን አስታወቀ።

የህክምና ባለሙያ እና የፋውንዴሽኑ መስራች የእናትፋንታ አስማማዉ እንደገለጹት፤ ድርጅቱ በከሚሴ ብቻ በሶስት የተለያዩ ትምህርት ቤቶች በመገኘት ድጋፍ ያደረገ ሲሆን፣ በወንድም ካሊድ ፋውንዴሽን ባደረገው ጉብኝት ደግሞ ለበርካታ አራሶች የንፅህና መጠበቂያዎችን እንዲሁም ለህፃናት ዳይፐር ማበርከቱን ገልጸዋል። በተጨማሪም ለህፃናት እና ለአናቶች የምሳ ግብዣ በማዘጋጀት አብሮነቱን አሳይቷል።

ፋውንዴሽኑ በተለይም በገጠር አካባቢዎች ለሚገኙ ተማሪዎች የንፅህና መጠበቂያዎችን በማቅረብ፣ የጤና ትምህርት እና ከኢንፌክሽን ቁጥጥር ጋር የተያያዙ ግንዛቤዎችን የመፍጠር ስራዎችን ሲያከናውን መቆየቱ ተመላክቷል።

በቀጣይም በገጠር አካባቢዎች የሚገኙ እና የንፅህና መጠበቂያዎችን ለመግዛት አቅም የሌላቸውን ተማሪዎች በዘላቂነት ለመደገፍ፣ ሞዴሶችን እዚሁ አገር ውስጥ ለማምረት የሚያስችል ትልቅ ፕሮጀክት ተቀርፆ እየተሰራ እንደሚገኝ መስራቿ አብራርተዋል።

በወተት ተዋጽኦዎች አያያዝ እና አጠቃቀም ላይ ህብረተሰቡ አስፈለጊውን ጥንቃቄ እንዲያደርግ ተጠየቀ!
#fastmereja :- ህብረተሰቡ የወተት እና የወተት ተዋጽኦዎችን በሚገዛበት ወቅት በተገቢው ማቀዝቀዣ ውስጥ መቀመጣቸዉን ሳያረጋግጥ መግዛት ለከፍተኛ የምግብ ወለድ በሽታዎች እና ለጤና እክሎች እንደሚያጋልጥ ተገለጸ።

የወተት ተዋጽኦዎች በፍጥነት በጥቃቅን ተህዋሲያን (ባክቴሪያዎች) ሊበላሹ የሚችሉ በመሆናቸው በበቂ ቅዝቃዜ (ከ 4°C በታች) ሳይጠበቁ ሲቀሩ በፍጥነት የመበላሸት እና የምግብ መመረዝ (Food Poisoning) የማስከተል እድላቸው ከፍተኛ ነው።

የተጠቃሚዎችን ጤና ለማረጋገጥ እና ከብክለት ለመጠበቅ ህብረተሰቡ በሚገዛበት ወቅት እነዚህን ነጥቦች እንዲያስተውል ይመከራል፡

የማቀዝቀዣውን ሁኔታ ማረጋገጥ ምርቶቹ የተቀመጡበት ማቀዝቀዣ በበቂ ሁኔታ ማቀዝቀዙንና በአግባቡ እየሰራ መሆኑን ማየት፤ የአገልግሎት ማብቂያ ቀን (Expiry Date) ማየት የጽሁፍ መረጃውን በማንበብ ጊዜያቸው ያላለፈባቸው መሆናቸውን ማረጋገጥ

እንዲሁም የማሸጊያ ደህንነትን መፈተሸ፡ ያበጡ፣ የተቀደዱ ወይም የአየር መግቢያ ያላቸውን ማሸጊያዎች አለመጠቀም፤ የግዢ ጊዜን ማሳጠር፡ ምርቶቹን ከገዙ በኋላ ወደ ቤት እስከሚደርሱ በሙቀት ውስጥ የሚቆዩበትን ጊዜ ያህል ማሳጠር እና ወዲያውኑ ፍሪጅ ውስጥ ማስገባት እና መጠቀም እንደሚገባ ተገልጿል

ህብረተሰቡ ጥራትና ደህንነቱ ያልተረጋገጠ የወተት ምርት ሲያጋጥመው ወደ 8482 በነፃ በመደወል ጥቆማ መስጠት እንደሚችል ባለሥልጣኑ አስታውቋል።

ሜትሮ ኬተሪንግ የኢቢኤስ ፕሮግራም አቅራቢ ጥበብ ሰለሞንን ብራንድ አምባሳደር አድርጎ መረጠ
​ #fastmereja I በምግብ ዝግጅት የኬተሪንግ አገልግሎቶች ዘርፍ የሚታወቀውና ትልቅ ተወዳጅነትን ያተረፈው "ሜትሮ ኬተሪንግ"፤ ታዋቂዋን የኢቢኤስ ቴሌቪዥን ፕሮግራም አቅራቢ ጥበብ ሰለሞንን የድርጅቱ የብራንድ አምባሳደር አድርጎ መሾሙን አስታወቀ።

ተቋሙ ባለፉት ዓመታት በሜትሮ ቤከሪ እና ፐጀዘወፔስትሪ ስር ስራውን የጀመረ ሲሆን፣ ቆየት ብሎም የተለያዩ ስራዎችን በመስራት አሁን ላይ በትልልቅ ተቋማትና ኮርፖሬት ድርጅቶች ውስጥ የኬተሪንግ አገልግሎቱን በሰፊው በማዳረስ ላይ ይገኛል።

የድርጅቱ ባለቤት ​አቶ ፍጹም ተስፋዬ ባደረጉት ንግግር በምግብ ጥራት፣ በንፅህና እና በጤናማነት አጠባበቅ አሰራሩ በህዝብ ዘንድ ከፍተኛ ተወዳጅነትን ያተረፈው ሜትሮ ኬተሪንግ፤ ከምግብ ጋር በተያያዙ በርካታ ስራዎች ላይ ትልቅ አሻራ ማሳረፉን ገልጸዋል።

የአምባሳደር መመረጥም ተቋሙ ለህብረተሰቡ የሚያደርሰውን አገልግሎት ይበልጥ ተደራሽ ለማድረግ እና ከደንበኞች ጋር ያለውን ቁርጠኝነት ለማጠናከር ትልቅ ሚና እንደሚጫወት ተጠቁሟል።

​በቀጣይም ተቋሙ በምግብ ዝግጅት እና በኬተሪንግ አገልግሎት መስጫዎቻቸው ላይ ከፍተኛ ጥራት ያላቸውን አዳዲስ መርሆችን በመቅረጽ የደንበኞቹን ፍላጎት ለማርካት እንደሚሰራ የገለጹት የስራ ሃላፊዎች፣ በሂደቱም የድርጅቱን ዕድገትና ስኬት ከህዝብ ጋር ለማስተዋወቅ አርቲስት ጥበብ ሰለሞን ትልቅ አስተዋጽኦ እንደምታበረክት ተማምነዋል።

በ2013 ዓ.ም ስራ የጀመረው ሜትሮ በሲኤምሲ እና አያት ቅርጫፍ ያለው ሲሆን በልዩ ሁኔታ አምባሳደር አከባቢ በሚገኘው ግዙፉ በንግድ ባንክ ህንጻ ላይ ሶስተኛውን ቅርጫፍ ከፍቶ አገልግሎት እየሰጠ ይገኛል።

ከኢትዮጵያ የተባረሩት የኤርትራ ዲፕሎማቶች ኤርትራ ደረሱ
#fastmereja I በኢትዮጵያ የነበሩ የኤርትራ ኤምባሲ ዲፕሎማቶች እንዲሁም አፍሪካ ህብረት እና በተባበሩት መንግስታት የአፍሪካ ኢኮኖሚ ኮሚሽን የኤርትራ ተወካዮች ከአዲስ አበባ ተነስተው አስመራ መግባታቸው ተገለጸ።

የኤርትራው ዲፕሎማት አስመሮም ተከስተ በማህበራዊ ትስስር ገጻቸው ባሰፈሩት መረጃ እንደገለጹት፤ ከአዲስ አበባ የተመለሱት ዲፕሎማቶች እና የስራ ባልደረቦቻቸው በአስመራ ሲደርሱ በኤርትራ ውጭ ጉዳይ ሚኒስቴር ከፍተኛ ባለስልጣናት እና በአምባሳደር እስቲፋኖስ አፈወርቂ አቀባበል ተደርጎላቸዋል።

ዲፕሎማቶቹ ወደ ሀገራቸው የተመለሱት የኢትዮጵያ መንግስት በሰጣቸው የ48 ሰዓታት ጊዜ ገደብ መሰረት ነው።

በአዲስ አበባ 10 ሺህ ስኒ ቡና በማጠጣት በድንቃድንቅ መዝገብ ላይ ለመመዝገብ ያለመ መርሃ ግብር ተካሄደ
#fastmereja I በዘንድሮው የኢሬቻ ዋዜማ የኢትዮጵያን የቡና ባህል፣ ኢኮኖሚ እና ማህበራዊ ትስስር የሚያጎላ ታላቅ የቡና መጠጣት እና በአፍሪካ ድንቃድንቅ ሪኮርድ የማስመዝገብ መርሃ ግብር በዛሬው ዕለት በግዮን ሆቴል ተካሂዷል።

በኢስት አፍሪካ ኢንተርቴይንመንትና ኤቨንት ኦርጋናይዘር አዘጋጅነት በተዘጋጀው በዚህ መርሃ ግብር በርካታ ሴቶች ቡናውን በማፍላትና በማስተናገድ ስራ ላይ የተሰማሩ ሲሆን፣ 10 ሺህ ቡና ሲኒ በተለያዩ ክፍለ ከተሞች በአንድ ቦታ ተሰባስበው ቡና እንዲጠጡ ተደርጓል።

ዝግጅቱ የኢትዮጵያን የቡና ባህል በዓለም አቀፍ እና በአፍሪካ ደረጃ በድንቃድንቅ መዝገብ (Guinness World Records) ላይ ለማስመዝገብ ያለመ ታላቅ ጥረት አካል መሆኑም ተጠቅሷል።

በዝግጅቱ ላይ ጥሪ የተደረገላቸው እንግዶች፣ አባገዳዎች፣ የሀገር ሽማግሌዎችና በርካታ የከተማዋ ነዋሪዎች ታድሟል።

ሚስ ሉሊት ጋዲስ የ2019 ''ሚስ ቱሪዝም ኦሮሚያ'' አሸናፊ ሆነች
‎ #fastmereja I ‎የ2019 ሚስ ቱሪዝም ኦሮሚያ ዛሬ በተደረገው ውድድር ሉሊት ጋዲሳ 1ኛ በመውጣት የዘንድሮው የኦሮሚያ ቆንጆ መሆን ችላለች። ‎በዚህም ከ2018 አሸናፊዋ ሚስ ሲንቦኔ መኮንን የቆንጅና አክሊሉን ተጎናጽፋለች።
‎
‎ሚስ ሉሊት ጋዲሳ የ500ሺህ ብር ሽልማትም ተሸልማለች።

በትራንስፖርት እና ህዝብ በተሰበሰበበት ቲክቶክ ከፍተው የሚያድጮሁ ግለሰቦች የሚቀጣ ሕግ እንዲወጣ ጥሪ ቀረበ
#fastmereja I በሕዝብ ማጓጓዣ ትራንስፖርቶች፣ በካፌዎች፣ በሠርግና በለቅሶ ሥነ-ሥርዓቶች እንዲሁም ሌሎች በርካታ ሕዝብ በተሰበሰበባቸው ቦታዎች ላይ ስልካቸውን ከፍተው የቲክቶክ ድምፅ በከፍተኛ ድምፅ የሚያስጮሁ ግለሰቦች ድርጊት ከባድ ምቾት ማጣት ፈጥሮብናል ሲሉ የፋስት መረጃ ተከታታዮች ቅሬታቸውን ገለፁ።

​በርካታ ተከታታዮቻችን በላኩልን አስተያየት፤ በታክሲና በሕዝብ አውቶቡስ ውስጥ ለሥራና ለትምህርት በሚንቀሳቀሱበት ወቅት እንዲሁም በለቅሶና በሠርግ መሰል ማኅበራዊ ስብሰባዎች ላይ አላስፈላጊ ድምፅ ከፍ አድርገው የሚከፍቱ ግለሰቦች የሰዎችን ዕረፍትና ሰላም በማደፍረስ ላይ ይገኛሉ። ይህ ድርጊት የማኅበራዊ ድንበር ማለፍና የሌሎችን መብት አለማክበር በመሆኑ ድርጊቱን የሚያስቆም እና ጥፋተኞችን የሚያስቀጣ ግልጽ ሕግና መመሪያ ሊወጣ እንደሚገባ ተከታታዮቻችን በጥብቅ አሳስበዋል።

​የሥነ-ልቦናና የማኅበራዊ ጉዳይ ባለሙያዎች በበኩላቸው፤ በሕዝብ ፊት ያለ ፈቃድ አላስፈላጊና ከፍተኛ ድምፅ ያላቸውን ማኅበራዊ ሚዲያዎችን ማደመጥ የሕዝብን የአእምሮ ዕረፍት ከመንሳቱ በላይ ማኅበራዊ እሴቶችንና መከባበርን የሚያስቀር ድርጊት መሆኑን ይናገራሉ። በመሆኑም በሚከተለው ድርጊት ላይ የሚመለከታቸው የመንግሥት አካላት የሕግ ማዕቀፍ በማዘጋጀትና ቁጥጥር በማድረግ ማኅበራዊ ሥርዓትን ማስከበር እንዳለባቸው አስተያየት ሰጪዎች አፅንኦት ሰጥተውበታል።

​በተጨማሪም በሕዝብ ተሽከርካሪዎችና መሰብሰቢያ ቦታዎች ማኅበራዊ ሚዲያዎችን ለመጠቀም የሚፈልጉ ግለሰቦች የሌሎችን ሰላምና ዕረፍት ላለመንሳት ኤርፎን ወይም ሄድፎን መጠቀም እንደሚገባቸውና ይህንንም እንደ መልካም ማኅበራዊ ባህል ሊያዳብሩት እንደሚገባ ይመከራል።

አርቲስት ካሙዙ ካሣ በአዲስ አበባ ምክር ቤት ቃለ መሃላ ፈጸመ
#fastmereja I ​የሙዚቃ እና የኪነ ጥበብ ባለሙያው ካሙዙ ካሣ በ7ኛው ሀገራዊ ምርጫ ከአዲስ አበባ ሕዝብ የተሰጠውን ውክልና በመቀበል፣ በዛሬው ዕለት በአዲስ አበባ ከተማ ምክር ቤት ፊት ቀርቦ የቃለ መሃላ ስነ ሥርዓት ፈጽሟል።

​አርቲስቱ ከቃለ መሃላ ስነ ሥርዓቱ በኋላ ባስተላለፈው መልዕክት፤ መራጩ ሕዝብ የሌሊት ብርድና የቀን ሐሩር ሳይበግረው ውክልና እንደሰጠው ገልጾ፣ የተጣለበትን የሕዝብ አደራ በታማኝነት፣ በቅንነት እና ያለ አድልዎ ለማገልገል ዝግጁ መሆኑን አረጋግጧል።

​በቀጣይም ለሕዝቡ ባስገባው ቃል መሠረት ሁሉንም የሕብረተሰብ ክፍል በማሳተፍ፣ በተለይም በሥራ ፈጠራና በኪነ ጥበብ ዘርፎች ከተማዋንና ኢትዮጵያውያንን በሚመጥን መልኩ በቁርጠኝነት እንደሚሰራ ገልጿል።

“ረሃብ ተከላካዩ ተክል” ስለ እንሰት ድንቅ ተፈጥሮና ጠቀሜታ የሲኤንኤን ዘገባ
#fastmereja I ከ20 ሚሊዮን በላይ ለሚሆኑ ኢትዮጵያውያን ዋና የዕለታዊ ምግብ ምንጭ የሆነውና ድርቅን በመቋቋም የሚታወቀው እንሰት፣ በሰሃራ በታች ባሉ የአፍሪካ ሀገራት የምግብ ዋስትናን ለማረጋገጥ እንደሚረዳ ሳይንቲስቶች ገልጸዋል። በዓለም አቀፍ ደረጃ ትኩረት እያገኘ ባለበት በዚህ ወቅት፣ በሀገር ውስጥ አርሶ አደሮች የገበያ ተፈላጊነታቸው ወደተሻሉ የንግድ ሰብሎች በመዞራቸው የእንሰት አመራረት እያቀነሰ መምጣቱን ሲኤንኤን (CNN) ዘግቧል።

​እንደ ሲኤንኤን ዘገባ ከሆነ እንሰት የሚበላ ፍሬ አይሰጥም። ይልቁንም ኢትዮጵያውያን የግንዱን ታችኛ ክፍልና ከመሬት በታች ያለውን ሥሩን በመፋቅና በማቦካት ለቆጮ እና ለቡላ ዝግጅት ይጠቀሙበታል። ሰብሉ በደቡብና ደቡብ ምዕራብ ከፍተኛ ቦታዎች (ከባህር ጠለል በላይ ከ1,500 እስከ 3,000 ሜትር) የሚያድግ ሲሆን፣ 60 የእንሰት ተክሎች የአምስት አባላት ያሉት ቤተሰብ ለአንድ ዓመት መመገብ እንደሚችሉ ተመልክቷል።

​በኪው የሮያል ቦታኒክ ጋርደንስ የሳይንስ ተመራማሪ የሆኑት ጄምስ ቦሬል እንደገለጹት፣ እንሰት እንደ ስንዴ፣ በቆሎና ሩዝ በየወቅቱ መዘራት የማያስፈልገው ዓመታትን የሚቆይ በመሆኑና ድርቅን እንዲሁም በሽታን የመቋቋም አቅሙ ከፍተኛ በመሆኑ ተመራጭ ያደርገዋል። በፈረንሳይ እ.ኤ.አ. በ2021 የተደረገ ጥናት እንደሚያመላክተው፣ የእንሰት እርሻን በምስራቅና ደቡብ አፍሪካ ሀገራት በ12 እጥፍ ማስፋፋት ከተቻለ ተጨማሪ 111.5 ሚሊዮን ሰዎችን ከምግብ እጥረት ማዳን ይቻላል።

​ሆኖም ሰብሉ ከኢትዮጵያ ውጭ በስፋት እንዳይሰራጭ ባህላዊ፣ ህጋዊና ተግባራዊ እንቅፋቶች አሉበት። ኢትዮጵያ የባዮ-ፓይረሲ (የብዝሃ-ሕይወት ዘረፋ) ስጋትን ለመከላከል የዕፅዋት ዘሮችን ወደ ውጭ መላክ በጥብቅ የምትቆጣጠር ሲሆን፣ ከባድ የፊዚካል ድካም የሚጠይቀው የእንሰት ዝግጅት በዋናነት በሴቶች መከናወኑና ዘመናዊ ማሽኖች በስፋት አለመሰራጨታቸው ተግዳሮት ሆኗል። በተጨማሪም በ2025 ዓ.ም በኪው እና በአዲስ አበባ ዩኒቨርሲቲ የተደረገ ጥናት እንደሚያሳየው፣ 60 በመቶ የሚሆኑ የደቡብ ምዕራብ አርሶ አደሮች የእንሰት መሬታቸውን ወደ ሌሎች የንግድ ሰብሎች መለወጣቸውን አረጋግጠዋል።

የኢትዮጵያ የፈጠራ ባለሙያዎችን ለዓለም አቀፍ መድረክ የሚያበቃው «አደይ አዋርድ»ሊካሄድ ነዉ!
#fastmereja :-በኢትዮጵያ በዘመናዊ፣ ኮንቴምፖራሪ እና ተሞክራዊ (experimental) ክንውን ጥበባት ዘርፍ የተሰማሩ የፈጠራ ባለሙያዎችን ለማበረታታትና ዕውቅና ለመስጠት የተዘጋጀው «አደይ ኮንቴምፖራሪ አርት አዋርድ» (Adey Contemporary Art Award) ጥቅምት 07 ቀን በአድዋ ድል ሙዚየም በደመቀ ሁኔታ እንደሚካሄድ በተሰጠ ጋዜጣዊ መግለጫ ተገልጿል።

«የኢትዮጵያ የፈጠራ ጥበባት አዲስ ገፅታ» በሚል መሪ ቃል የሚካሄደው ይህ ዝግጅት፤ በአካላዊ ቲያትር አዘጋጅና ጸሐፊ አርቲስት ተክሉ አሻግር (ሔኖክ) ሀሳብ ጠንሳሽነት፣ በጂ ኤይት ኢንተርቴይመንትና ፕሮሞሽን እና በኢተርናል ሚዲያ ኮሙኒኬሽን እንዲሁም በአዲስ ሚዲያና ኔትወርክ አጋርነት የተዘጋጀ መሆኑ ተገልጿል።

ይህ መርሃ-ግብር በሀገራችን በበቂ ሁኔታ ትኩረት ያላገኙ አዳዲስ የፈጠራ ዘርፎችን ወደ ፊት ለማውጣትና ለዓለም አቀፍ ገበያ ለማስተዋወቅ ያለመ ሲሆን፤ በስድስት ዋና ዋና የኪነ-ጥበባት ትዕይንታዊ ክንውን ዘርፎች በስሩ ባቀፋቸው 19 የተለያዩ የጥበብ መስኮች ለተሰማሩ ባለሙያዎች ዕውቅና ይሰጣል።

ከነዚህም መካከል ዘመናዊ ሰርከስ፣ ዘመናዊ ውዝዋዜ፣ ዘመናዊና ኤሌክትሮኒክ ሙዚቃ (ዲጄዎችን ጨምሮ)፣ ፋሽንና ሞዴሊንግ፣ ስዕልና ቅርጽ፣ አጭር ፊልም እንዲሁም ለዘርፉ እድገት ከፍተኛ አስተዋጽኦ ላበረከቱ አንጋፋ ባለሙያዎች የሚሰጥ የህይወት ዘመን ሽልማት (Lifetime Award) ይገኙበታል።

የእጩ ጥቆማ ሂደቱ መጠናቀቁን ያረጋገጡት አዘጋጆቹ፤ አሸናፊዎችን ለመለየት የሚያስችለው ይፋዊ የድምፅ አሰጣጥ ሂደት በአዋርዱ ድረ-ገጽ ላይ መጀመሩን ተገልፆ በዚህም መሠረት አሸናፊዎች 60 በመቶ በህዝብ ድምፅ እና 40 በመቶ በባለሙያ ዳኞች በሚሰጥ ነጥብ እንደሚለዩም በመግለጫዉ ተገልጿል።

በአድዋ ድል ሙዚየም በደመቀ ሁኔታ በሚከናወነው በዚህ ፕሮግራም ላይ የአደይ አበባ ምንጣፍ ሥነ-ሥርዓት፣ የስዕልና ቅርፃ ቅርፅ ኤግዚቢሽን፣ የሰርከስና የዳንስ ቅንብርትርኢቶች፣ በአዱኛ ዳንስ ግሩፕ የሚቀርብ የመጀመሪያው ዓለም አቀፍ የመድረክ ሥራ፣ የፋሽን ሾው፣ የዘመናዊ ሙዚቃ ዝግጅቶች እንዲሁም የኔትወርኪንግና የዲጄ ምሽት እንደሚኖር ተመልክቷል።

ዝግጅቱን ከዘንድሮው የመክፈቻ ፕሮግራም በኋላ በየዓመቱ መስከረም 30 ቀን በቋሚነት ለማካሄድ የታቀደ ሲሆን፤ ከቀጣይ ዓመት ጀምሮ ደግሞ ለአሸናፊዎች ለቀጣይ ስራዎቻቸው የሚሆን የገንዘብ ድጋፍ (Grant) ለማመቻቸት ከአለም አቀፍ ተቋማት ጋር ንግግር እየተደረገ እንደሚገኝም ነዉ የተገለፀዉ።

የኢሬቻ በዓል ልዩ የኮንሰርትና የቁንጅና ውድድር ዝግጅት መጠናቀቁ ተገለጸ

​#fastmereja I ኢስት አፍሪካ ኢንተርቴይንመንት ኤንድ ኢቨንትስ በመስከረም 22 ቀን 2019 ዓ.ም በጊዮን ሆቴል የሚካሄደውን የኢሬቻ በዓል ልዩ ዝግጅት አስመልክቶ አጠቃላይ ቅድመ ዝግጅቶች መጠናቀቃቸውን በተሰጠ ጋዜጣዊ መግለጫ ተገለጸ።

​በዕለቱ ከተለያዩ ብሔር ብሔረሰቦች የተወጣጡ ታዋቂ አርቲስቶች የሚሳተፉበት ደማቅ ኮንሰርት የሚካሄድ ሲሆን፣ ጎን ለጎንም የ"ሚስ ዩኒቲ" የቁንጅና ውድድር እንደሚከናወን ተገልጿል። ለታዳሚዎች ምቹ የምግብ፣ የመጠጥ፣ የእረፍት ድንኳኖችና የትራንስፖርት አገልግሎት መመቻቸቱን አዘጋጆቹ አስታውቀዋል።

​የመግቢያ ትኬቶች በመደበኛ 1,000 ብር፣ በቪአይፒ (VIP) 10,000 ብር እና በቪቪአይፒ (VVIP) 20,000 ብር በቴሌብር እንዲሁም በየክፍለ ከተማው በሚገኙ ኤጀንቶች በመሸጥ ላይ ይገኛሉ። ከክልል ለሚመጡ ታዳሚዎች የትራንስፖርት አመቻች ኤጀንቶች የተዘጋጁ በመሆኑ ትኬት ሲገዙ መጠየቅ እንደሚችሉ ተጠቁሟል።

«ግራንድ ኢሬቻ ቦክስ ምሽት» መስከረም 22 ይካሄዳል
#fastmereja I በአድዋ መታሰቢያ ሙዚየም የሚካሄደው «ግራንድ ኢሬቻ ቦክስ ምሽት» የቦክስ ውድድር በመጪው መስከረም 22 ቀን 2019 ዓ.ም ምሽት እንደሚካሄድ አዘጋጆቹ አስታወቁ። ይህን ታሪካዊ ስፖርታዊ ዝግጅት በአፍሮ ኮ ትሬዲንግ እና ኤችኬ ኤንተርቴይንመንት ከአዲስ አበባ ወጣቶችና ስፖርት ቢሮ ጋር በመተባበር ያዘጋጁት እንደሆነ ተገልጿል።

​በዚሁ የስፖርት ምሽት ሰባት የወንዶች እና አንድ የሴቶች ውድድርን ጨምሮ በአጠቃላይ ስምንት የቦክስ ፍልሚያዎች ይካሄዳሉ። በውድድሩ ላይ የሚሳተፉት ተወዳዳሪዎች ከ48 እስከ 64 ኪሎ ግራም ክብደት ባላቸው የውድድር መደቦች የሚፋለሙ ሲሆን፣ ለዚህ ትልቅ ውድድር ላለፉት ዘጠኝ ወራት ያህል ከፍተኛ ዝግጅት ሲያደርጉ መቆየታቸውን በጋዜጣዊ መግለጫ ወቅት ተገልጿል። #ኹነት

"እኛ አሸናፊ ትውልዶች ነን" አቶ ሽመልስ አብዲሳ
#fastmereja I የኦሮሚያ ክልላዊ መንግሥት ፕሬዚዳንት አቶ ሽመልስ አብዲሳ ዛሬ በጨፌ ኦሮሚያ ባደረጉት ንግግር፣ ታላቅ አደራና ኃላፊነት የጣለባቸውን ሕዝብ አመስግነው የተሰጣቸውን ኃላፊነት በሚፈለገው ደረጃ ለመወጣት ቃል ገብተዋል።

ፕሬዚዳንቱ አክለውም የኦሮሞ ሕዝብ ማንነቱን፣ ነፃነቱን፣ ባህሉንና እሴቶቹን ለማስጠበቅ ውድ መስዋዕትነት ሲከፍል መቆየቱን አስታውሰዋል። የተገኘውን ድል መጠበቅ ብቻውን በቂ አለመሆኑን የጠቆሙት አቶ ሽመልስ፣ ስኬቱን ለማጠናከርና በሁሉም ዘርፍ የበለፀገች ኦሮሚያን ለመገንባት የሁላችንም ድርብ ኃላፊነት ነው ብለዋል።

"ከባድ ጊዜያትን አሳልፈናል፤ መስዋዕትነትም ከፍለናል፤ በፊታችን ያለው ፈተናና ታግለን የምናልፈው መንገድም ውስብስብ ነው፤ ሆኖም ለማሸነፍ በቁርጠኝነት መስራት አለብን" ሲሉ ገልጸዋል።

እኛ አሸናፊ ትውልዶች በመሆናችን የኦሮሞ ሕዝብ መጻኢ ዕድሉን ለመወሰን እውቀቱን፣ ሙያውንና ክህሎቱን አጠናክሮ መጠቀም እንዳለበት አስገንዝበዋል። የወደፊት ተልዕኳችን ታላቅ ነው ያሉት ፕሬዚዳንቱ፣ በትዕግስትና በቁርጠኝነት የተመዘገቡ ስኬቶችን አጠናክሮ ለማስቀጠልና በየዓመቱ አዳዲስ ድሎችን ለማስመዝገብ መረባረብ ወሳኝ መሆኑን ገልጿል።

ኤርትራ አዲስ ያስገነባችውን ግድብ አስመረቀች
#fastmereja I ​በኤርትራ ማዕከላዊ ዞን በገላ-ነፍሒ ንኡስ ዞን ስር በሚገኘው ዓዲ ሓዎሻ አስተዳደር አካባቢ በ11 ሚሊዮን ናቅፋ ገደማ ወጪ የተገነባ አዲስ የውሃ ግድብ መስከረም 16 ቀን 2019 ዓ.ም ተመረቀ። ግድቡን የመረቁት በሀገሪቱ የጦር ኃይሎች ውስጥ ከፍተኛ አመራር የሆኑት ማጀር ጄኔራል ረመዳን ኦስማን አወልያይ መሆናቸው ታውቋል።

​ይህ በአካባቢው ነዋሪዎች እና በሕዝባዊ ግንባታ አስተዋጽኦ በጋራ የተገነባው ግድብ፣ እስከ 180 ሺህ ሜትር ኩብ ውሃ የማከማቸት አቅም ያለው ሲሆን፣ ለአካባቢው ማህበረሰብ ንጹህ የመጠጥ ውሃ ለማቅረብና ለመስኖ ልማት ስራዎችን ለማስፋፋት ከፍተኛ አስተዋጽኦ እንደሚኖረው ተገልጿል። በግንባታው ሂደትም የሀገር መከላከያ ኃይል አባላትና ነዋሪዎች ንቁ ተሳትፎ አድርገዋል።

​በምረቃው ስነ-ስርዓት ወቅት የተገኙ የመንግሥት ባለስልጣናት አካባቢው ያገኘውን ይህን የውሃ ሀብት ህብረተሰቡ በአግባቡና በዘላቂነት እንዲጠቀምበት ጥሪ አቅርበዋል። በተጨማሪም ለግድቡ ግንባታ መሳካት የጎላ አስተዋጽኦ ላበረከቱ አካላትና ነዋሪዎች የእውቅና ሰርተፊኬት መሰጠቱን ሻባይት ዘግቧል።

አርቲስት ኢቲቃ ተፈሪ በታሰሩት አቶ ታዬ ደንደአ ዙሪያ ያቀረበው ጥሪ ትኩረትን ሳበ
#fastmereja I ​ታዋቂው የአፋን ኦሮሞ ድምጻዊ አርቲስት ኢቲቃ ተፈሪ፣ በአሁኑ ወቅት በሕግ ጥላ ሥር በሚገኙት የቀድሞው የሰላም ሚኒስቴር ዴኤታ አቶ ታዬ ደንደአ ላይ የሚፈጸመው እስርና እንግልት እንዲቆም እና በነፃ እንዲለቀቁ በማህበራዊ ሚዲያ ገጹ ጥሪ አቀረበ። አርቲስቱ በሰጠው አስተያየት፣ አቶ ታዬ ከልጅነታቸው ጀምሮ ስለ ህዝብ መብትና ጥቅም በጽናት ሲታገሉ የቆዩ፣ ከሙስና እንዲሁም ከማንኛውም የደምና የስርቆት ወንጀል ነፃ የሆኑ እውነተኛ የህዝብ ተቆርቋሪ ናቸው ብሏል።

​አርቲስት ኢቲቃ ተፈሪ አክሎ እንደገለጸው፣ አቶ ታዬ ደንደአ በጽኑ አቋማቸውና በግልጽ ተናጋሪነታቸው ሰዎችን ያስቀየሙበት አጋጣሚ ሊኖር ቢችልም፣ ከግል ጥቅማቸው ይልቅ የጋራንና የህዝብን ጥቅም ያስቀደሙ ሰው መሆናቸውን ገልጿል። "ከእሳቸው በላይ ለህዝብ መብት ከፊት ቀድሞ የቆመ አካል የለም" ያለው አርቲስቱ፣ አገሪቱ ውስጥ በርካታ ጥፋተኞች በነፃነት እየተዘዋወሩ ባሉበት ሁኔታ እንዲህ ያሉ ጠንካራና አቋመኛ ሰዎችን ማሰርና ማንግላታት ለችግሮች መፍትሔ እንደማይሆን አስገንዝቧል።

​በመጨረሻም አርቲስት ኢቲቃ ተፈሪ ለሚመለከታቸው የመንግሥትና የፍትሕ አካላት ጥሪ በማቅረብ፣ አቶ ታዬ ደንደአ ከእስር ተፈተው ወደ ህዝባቸው እንዲመለሱ እና አላስፈላጊ እንግልት እንዲቆም መጠየቁን በግል የማህበራዊ ሚዲያ ገጹ ባሰራጨው መልእክት መመልከት ተችሏል።

በእስራኤል የሚኖሩ የኤርትራ ተቃዋሚዎች በሀገራቸው ላይ ለውጥ ለማምጣት የሚሰራ ሰፊ ህዝባዊ እንቅስቃሴ እየገነቡ መሆናቸውን ገለጹ
#fastmereja I በእስራኤል የሚኖሩ የኤርትራ ተቃዋሚ ተንቀሳቃሾች በፕሬዝዳንት ኢሳይያስ አፈወርቂ የሚመራውን መንግስት ለመለወጥና በሀገራቸው ዲሞክራሲያዊ ስርዓት ለመትከል ያለመ ሰፊ ህዝባዊና ፖለቲካዊ እንቅስቃሴ እየገነቡ እንደሚገኙ አስታወቁ። ተቃዋሚዎቹ በቴል አቪቭ በሚገኝ ዋና ማዕከላቸው እንቅስቃሴያቸውን እያፋጠኑ ሲሆን፣ ልጆቻቸውን በእስራኤል እያሳደጉ ቢሆንም ዋና አላማቸው ግን ወደ ሀገራቸው የሚመለሱበትን ቀን ማዘጋጀት እንደሆነ ገልጸዋል።

እንደ ጄሩሳሌም ፖስት እና ሚድል ኢስት አየ ዘገባዎች፣ ከዚህ ቀደም "ብሪጌድ ንሐመዱ" በመባል ይታወቅ የነበረው እና አሁን ወደ "ኤርትሪያን ብሉ ሬቮሉሽን ፍሮንት" (EBRF) የተሸጋገረው ይህ ስብስብ፣ በስደት የሚኖሩ ኤርትራውያንን በማስተባበር ላይ ይገኛል። የተንቀሳቃሽ ቡድኑ አስተባባሪዎች በቅርቡ በእስራኤል ነስ ጽዮና ከተማ ባካሄዱት ጉባኤ ከ1,300 በላይ ኤርትራውያን መሳተፋቸውንና በዓለም አቀፍ ደረጃ የተመረጠ 51 አባላት ያሉት ምክር ቤት ማቋቋማቸውን አስታውቀዋል።

በእስራኤል የቡድኑ አስተባባሪ የሆኑት አታክልቲ አብርሃም (ሚካኤል) እና ሙሉእ ሱልጣን እንደገለጹት፣ በእስራኤል የተወለዱና ያደጉ ልጆቻቸው ዕብራይስጥ ቋንቋ የሚናገሩና ከአካባቢው ማህበረሰብ ጋር የተቀላቀሉ ቢሆንም፣ የኤርትራን ማንነትና ታሪክ እንዲያውቁ እየተደረገ ነው። "ማንም ሰው ለዘላለም ስደተኛ ሆኖ መኖር አይፈልግም" ያሉት አስተባባሪዎቹ፣ ህጻናቱን በእስራኤል በጥሩ ሁኔታ እያሳደጉ ያሉት በሀገራቸው ለውጥ ሲመጣ ወደ ኤርትራ የመመለስ ተስፋቸውን ሰንቀው እንደሆነ ተናግረዋል።

እንቅስቃሴው ከመንገድ ላይ ተቃውሞዎችና ግጭቶች ወጥቶ ወደ ተደራጀ የፖለቲካና የዲፕሎማሲ ክንፍ እየተቀየረ መሆኑን የዘገቡት የውጭ መገናኛ ብዙሃን፣ ቡድኑ በኢትዮጵያ አዲስ አበባ፣ በአሜሪካ እና በአውሮፓ ከሚገኙ አጋሮቹ ጋር በመሆን ተፅዕኖውን ለማስፋት እየሰራ እንደሚገኝ አመልክተዋል።







በእስራኤል የሚኖሩ የኤርትራ ተቃዋሚዎች በሀገራቸው ላይ ለውጥ ለማምጣት የሚሰራ ሰፊ ህዝባዊ እንቅስቃሴ እየገነቡ መሆናቸውን ገለጹ
#fastmereja I በእስራኤል የሚኖሩ የኤርትራ ተቃዋሚ ተንቀሳቃሾች በፕሬዝዳንት ኢሳይያስ አፈወርቂ የሚመራውን መንግስት ለመለወጥና በሀገራቸው ዲሞክራሲያዊ ስርዓት ለመትከል ያለመ ሰፊ ህዝባዊና ፖለቲካዊ እንቅስቃሴ እየገነቡ እንደሚገኙ አስታወቁ። ተቃዋሚዎቹ በቴል አቪቭ በሚገኝ ዋና ማዕከላቸው እንቅስቃሴያቸውን እያፋጠኑ ሲሆን፣ ልጆቻቸውን በእስራኤል እያሳደጉ ቢሆንም ዋና አላማቸው ግን ወደ ሀገራቸው የሚመለሱበትን ቀን ማዘጋጀት እንደሆነ ገልጸዋል።

እንደ ጄሩሳሌም ፖስት እና ሚድል ኢስት አየ ዘገባዎች፣ ከዚህ ቀደም "ብሪጌድ ንሐመዱ" በመባል ይታወቅ የነበረው እና አሁን ወደ "ኤርትሪያን ብሉ ሬቮሉሽን ፍሮንት" (EBRF) የተሸጋገረው ይህ ስብስብ፣ በስደት የሚኖሩ ኤርትራውያንን በማስተባበር ላይ ይገኛል። የተንቀሳቃሽ ቡድኑ አስተባባሪዎች በቅርቡ በእስራኤል ነስ ጽዮና ከተማ ባካሄዱት ጉባኤ ከ1,300 በላይ ኤርትራውያን መሳተፋቸውንና በዓለም አቀፍ ደረጃ የተመረጠ 51 አባላት ያሉት ምክር ቤት ማቋቋማቸውን አስታውቀዋል።

በእስራኤል የቡድኑ አስተባባሪ የሆኑት አታክልቲ አብርሃም (ሚካኤል) እና ሙሉእ ሱልጣን እንደገለጹት፣ በእስራኤል የተወለዱና ያደጉ ልጆቻቸው ዕብራይስጥ ቋንቋ የሚናገሩና ከአካባቢው ማህበረሰብ ጋር የተቀላቀሉ ቢሆንም፣ የኤርትራን ማንነትና ታሪክ እንዲያውቁ እየተደረገ ነው። "ማንም ሰው ለዘላለም ስደተኛ ሆኖ መኖር አይፈልግም" ያሉት አስተባባሪዎቹ፣ ህጻናቱን በእስራኤል በጥሩ ሁኔታ እያሳደጉ ያሉት በሀገራቸው ለውጥ ሲመጣ ወደ ኤርትራ የመመለስ ተስፋቸውን ሰንቀው እንደሆነ ተናግረዋል።

እንቅስቃሴው ከመንገድ ላይ ተቃውሞዎችና ግጭቶች ወጥቶ ወደ ተደራጀ የፖለቲካና የዲፕሎማሲ ክንፍ እየተቀየረ መሆኑን የዘገቡት የውጭ መገናኛ ብዙሃን፣ ቡድኑ በኢትዮጵያ አዲስ አበባ፣ በአሜሪካ እና በአውሮፓ ከሚገኙ አጋሮቹ ጋር በመሆን ተፅዕኖውን ለማስፋት እየሰራ እንደሚገኝ አመልክተዋል።

ጀነራል ዊንጌት ፖሊ ቴክኒክ ኮሌጅ ሙሉ ለሙሉ የሥራ ዕድል ያመቻቸላቸውን ተማሪዎች አስመረቀ!
#fastmereja :-በጀነራል ዊንጌት ፖሊ ቴክኒክ ኮሌጅ እና በዓለም አቀፉ የቤልጂየም ኩባንያ «ፑራቶስ» (Puratos) ትብብር የተቋቋመው «የፑራቶስ ኢትዮጵያ ዳቦ እና ኬክ ማሰልጠኛ ትምህርት ቤት»ላለፉት 2 አመታት ያሰለጠናቸዉን የመጀመሪያ ዙር 24 ሰልጣኞቹን በዛሬዉ እለት አስመረቀ።

በምረቃ ሥነ-ሥርዓቱ ላይ የተገኙት የጀነራል ዊንጌት ፖሊ ቴክኒክ ኮሌጅ ዲን አቶ መለሰ እንደገለጹት፤ መርሃ-ግብሩ ከምረቃ እና ከሰርተፊኬት መስጠት ባለፈ እውቀትን፣ የተግባር ክህሎትን፣ ትጋትን እንዲሁም የትምህርትና የኢንዱስትሪ አጋርነትን ያጎላ ታሪካዊ ክስተት መሆኑን ገልፀዋል።

ተመራቂዎቹ በዳቦ፣ ኬክ እና ቸኮሌት አሰራር ዘመናዊና ዓለም አቀፍ ደረጃውን የጠበቀ ስልጠና የወሰዱት 24ቱም ተመራቂዎች፣ የብሔራዊ የሙያ ብቃት ምዘናን (COC) 100% ማለፋቸው ተገልጿል።

በተጨማሪም በትምህርቱ ጥራትና በሰልጣኞቹ የላቀ ብቃት ምክንያት፣ ሁሉም ተመራቂዎች ገና ሳይመረቁና ከተመረቁ በኋላ ወዲያውኑ እንደ «ካርፉር» (Carrefour) ባሉ ዓለም አቀፍ የችርቻሮ ኩባንያዎች፣ በትልልቅ ሆቴሎች እና ምግብ ቤቶች ውስጥ የሥራ ዕድል ማግኘታቸው ተመልክቷል።

በዳቦና ኬክ አሰራር ዓለም አቀፍ ልምድ ያለው «ፑራቶስ ግሩፕ» ዘመናዊ ቴክኖሎጂንና አሰራርን ይዞ የመጣ ሲሆን፣ ይኸው አጋርነት ሀገር በቀል አቅምን በማሳደግ ረገድ አርአያነቱ የጎላ መሆኑ ተጠቅሷል።

የፑራቶስ ቤከሪ ስኩል ፋውንዴሽን (Puratos Bakery School Foundation) በተለይም ዝቅተኛ የኑሮ ደረጃ ላይ የሚገኙ ወጣቶችን በሙያ ትምህርት እና በተግባራዊ ስልጠና ማበቃት ላይ ትኩረት አድርጎ እንደሚሰራ ተጠቅሷል።

በምረቃው ወቅት ለተመራቂዎች በተሰጠው የሥራ መመሪያ፤ ምረቃ የትምህርት ማብቂያ ሳይሆን የሙያ ጉዞ መጀመሪያ በመሆኑ ክህሎታቸውን ሁልጊዜ እንዲያሻሽሉ፣ የሥራ ሥነ-ምግባር እንዲያከብሩ እና ከሥራ ተቀጣሪነት ባሻገር ወደ ሥራ ፈጣሪነት እንዲሸጋገሩ ተመክረዋል።

በተጨማሪም ሌሎች የቴክኒክና ሙያ ተቋማት ሥልጠናቸውን ከእውነተኛው የሥራ ዓለም ፍላጎት ጋር እንዲያጣጥሙ ጥሪ የቀረበ ሲሆን፣ አሰሪ ተቋማትም ለነዚህና መሰል ሰልጣኞች የሥራ ዕድል መፍጠራቸውን እንዲቀጥሉ ጥሪ አስተላላፊዎች አሳስበዋል።








ጀነራል ዊንጌት ፖሊ ቴክኒክ ኮሌጅ ሙሉ ለሙሉ የሥራ ዕድል ያመቻቸላቸውን ተማሪዎች አስመረቀ!
#fastmereja :-በጀነራል ዊንጌት ፖሊ ቴክኒክ ኮሌጅ እና በዓለም አቀፉ የቤልጂየም ኩባንያ «ፑራቶስ» (Puratos) ትብብር የተቋቋመው «የፑራቶስ ኢትዮጵያ ዳቦ እና ኬክ ማሰልጠኛ ትምህርት ቤት»ላለፉት 2 አመታት ያሰለጠናቸዉን የመጀመሪያ ዙር 24 ሰልጣኞቹን በዛሬዉ እለት አስመረቀ።

በምረቃ ሥነ-ሥርዓቱ ላይ የተገኙት የጀነራል ዊንጌት ፖሊ ቴክኒክ ኮሌጅ ዲን አቶ መለሰ እንደገለጹት፤ መርሃ-ግብሩ ከምረቃ እና ከሰርተፊኬት መስጠት ባለፈ እውቀትን፣ የተግባር ክህሎትን፣ ትጋትን እንዲሁም የትምህርትና የኢንዱስትሪ አጋርነትን ያጎላ ታሪካዊ ክስተት መሆኑን ገልፀዋል።

ተመራቂዎቹ በዳቦ፣ ኬክ እና ቸኮሌት አሰራር ዘመናዊና ዓለም አቀፍ ደረጃውን የጠበቀ ስልጠና የወሰዱት 24ቱም ተመራቂዎች፣ የብሔራዊ የሙያ ብቃት ምዘናን (COC) 100% ማለፋቸው ተገልጿል።

በተጨማሪም በትምህርቱ ጥራትና በሰልጣኞቹ የላቀ ብቃት ምክንያት፣ ሁሉም ተመራቂዎች ገና ሳይመረቁና ከተመረቁ በኋላ ወዲያውኑ እንደ «ካርፉር» (Carrefour) ባሉ ዓለም አቀፍ የችርቻሮ ኩባንያዎች፣ በትልልቅ ሆቴሎች እና ምግብ ቤቶች ውስጥ የሥራ ዕድል ማግኘታቸው ተመልክቷል።

በዳቦና ኬክ አሰራር ዓለም አቀፍ ልምድ ያለው «ፑራቶስ ግሩፕ» ዘመናዊ ቴክኖሎጂንና አሰራርን ይዞ የመጣ ሲሆን፣ ይኸው አጋርነት ሀገር በቀል አቅምን በማሳደግ ረገድ አርአያነቱ የጎላ መሆኑ ተጠቅሷል።

የፑራቶስ ቤከሪ ስኩል ፋውንዴሽን (Puratos Bakery School Foundation) በተለይም ዝቅተኛ የኑሮ ደረጃ ላይ የሚገኙ ወጣቶችን በሙያ ትምህርት እና በተግባራዊ ስልጠና ማበቃት ላይ ትኩረት አድርጎ እንደሚሰራ ተጠቅሷል።

በምረቃው ወቅት ለተመራቂዎች በተሰጠው የሥራ መመሪያ፤ ምረቃ የትምህርት ማብቂያ ሳይሆን የሙያ ጉዞ መጀመሪያ በመሆኑ ክህሎታቸውን ሁልጊዜ እንዲያሻሽሉ፣ የሥራ ሥነ-ምግባር እንዲያከብሩ እና ከሥራ ተቀጣሪነት ባሻገር ወደ ሥራ ፈጣሪነት እንዲሸጋገሩ ተመክረዋል።

በተጨማሪም ሌሎች የቴክኒክና ሙያ ተቋማት ሥልጠናቸውን ከእውነተኛው የሥራ ዓለም ፍላጎት ጋር እንዲያጣጥሙ ጥሪ የቀረበ ሲሆን፣ አሰሪ ተቋማትም ለነዚህና መሰል ሰልጣኞች የሥራ ዕድል መፍጠራቸውን እንዲቀጥሉ ጥሪ አስተላላፊዎች አሳስበዋል።

ታዋቂው ድምፃዊ ዳዊት መኮንን ከ27 ዓመታት የስደት ህይወት በኋላ ወደ ሀገሩ ተመለሰ
#fastmereja I ከ27 ዓመታት በላይ በአሜሪካ በስደት ሲኖር የቆየው ታዋቂው የኦሮምኛ ሙዚቃ አርቲስት ዳዊት መኮንን፣ ዛሬ መስከረም 15 ቀን 2019 ዓ.ም ወደ ሀገሩ ተመልሶ አዲስ አበባ ገብቷል።

​አርቲስት ዳዊት መኮንን ቦሌ ዓለም አቀፍ አየር መንገድ ሲደርስ በአባ ገዳዎች፣ በሀደ ሲንቄዎች፣ በባልደረባ የጥበብ ባለሙያዎች እንዲሁም በኦሮሚያ ክልል ከፍተኛ የመንግስት ኃላፊዎች አቀባበል ተደርጎለታል።






ታዋቂው ድምፃዊ ዳዊት መኮንን ከ27 ዓመታት የስደት ህይወት በኋላ ወደ ሀገሩ ተመለሰ
#fastmereja I ከ27 ዓመታት በላይ በአሜሪካ በስደት ሲኖር የቆየው ታዋቂው የኦሮምኛ ሙዚቃ አርቲስት ዳዊት መኮንን፣ ዛሬ መስከረም 15 ቀን 2019 ዓ.ም ወደ ሀገሩ ተመልሶ አዲስ አበባ ገብቷል።

​አርቲስት ዳዊት መኮንን ቦሌ ዓለም አቀፍ አየር መንገድ ሲደርስ በአባ ገዳዎች፣ በሀደ ሲንቄዎች፣ በባልደረባ የጥበብ ባለሙያዎች እንዲሁም በኦሮሚያ ክልል ከፍተኛ የመንግስት ኃላፊዎች አቀባበል ተደርጎለታል።

ቲክቶከሮች ሚሊዮን ብር ከአዋሽ ባንክ ተሸለሙ
#fastmereja I አዋሽ ባንክ ማህበራዊ ኃላፊነቱን ለመወጣት የፈጠራ ክህሎት እና ተሰጥኦ ያላቸውን ወጣቶች በተለያዩ ዘርፎች አወዳድሮ በመሸለም የበኩሉን አስተዋፅኦ በማድረግ ላይ ይገኛል።

በዚሁ መሠረት ባንኩ የ2019 ዓ.ም አዲስ ዓመትን ምክንያት በማድረግ ያዘጋጀውን የአበባየሆሽ/ሽኖዬ የቲክቶክ ቻሌንጅ ውድድር የማጠቃለያ እና የሽልማት ሥነ-ሥርዓት ዛሬ ሐሙስ መስከረም 14 ቀን 2019 ዓ.ም በዮድ አቢሲኒያ ባህላዊ ሬስቶራንት በደመቀ ሁኔታ አካሂዷል።

​በዚሁ ማጠቃለያ መርሃ-ግብር ላይ በውድድሩ የላቀ የፈጠራ ሥራ አቅርበው ከአንደኛ እስከ ሰባተኛ ደረጃን የያዙ ወጣቶች የገንዘብ ሽልማት ተበርክቶላቸዋል።

በዚህም መሠረት Bootina አንደኛ በመውጣት የ1 ሚሊዮን ብር ስትሸለም Iamsamson 500ሺ ብር ተሸላሚ ሆኗል፣ Maria Luna የ300 ሺህ ብር ተሸላሚ ሆናለች።

​በተጨማሪም ተወዳዳሪዎቹ Biniye21 የ150 ሺህ ብር፣ Fikade Unkuraa የ100 ሺህ ብር፣ እንዲሁም Edu sine እና Fiyorii እያንዳንዳቸው የ75 ሺህ ብር የገንዘብ ሽልማት አሸናፊ በመሆን ተሸልሟል።





ቲክቶከሮች ሚሊዮን ብር ከአዋሽ ባንክ ተሸለሙ
#fastmereja I አዋሽ ባንክ ማህበራዊ ኃላፊነቱን ለመወጣት የፈጠራ ክህሎት እና ተሰጥኦ ያላቸውን ወጣቶች በተለያዩ ዘርፎች አወዳድሮ በመሸለም የበኩሉን አስተዋፅኦ በማድረግ ላይ ይገኛል።

በዚሁ መሠረት ባንኩ የ2019 ዓ.ም አዲስ ዓመትን ምክንያት በማድረግ ያዘጋጀውን የአበባየሆሽ/ሽኖዬ የቲክቶክ ቻሌንጅ ውድድር የማጠቃለያ እና የሽልማት ሥነ-ሥርዓት ዛሬ ሐሙስ መስከረም 14 ቀን 2019 ዓ.ም በዮድ አቢሲኒያ ባህላዊ ሬስቶራንት በደመቀ ሁኔታ አካሂዷል።

​በዚሁ ማጠቃለያ መርሃ-ግብር ላይ በውድድሩ የላቀ የፈጠራ ሥራ አቅርበው ከአንደኛ እስከ ሰባተኛ ደረጃን የያዙ ወጣቶች የገንዘብ ሽልማት ተበርክቶላቸዋል።

በዚህም መሠረት Bootina አንደኛ በመውጣት የ1 ሚሊዮን ብር ስትሸለም Iamsamson 500ሺ ብር ተሸላሚ ሆኗል፣ Maria Luna የ300 ሺህ ብር ተሸላሚ ሆናለች።

​በተጨማሪም ተወዳዳሪዎቹ Biniye21 የ150 ሺህ ብር፣ Fikade Unkuraa የ100 ሺህ ብር፣ እንዲሁም Edu sine እና Fiyorii እያንዳንዳቸው የ75 ሺህ ብር የገንዘብ ሽልማት አሸናፊ በመሆን ተሸልሟል።

በኢትዮጵያ የአሜሪካ አምባሳደር ኤርቪን ማሲንጋ የህወሓት አመራሮች ጥቃት በመክፈታቸው ማዘናቸውን ገለጹ
#fastmereja I ​በኢትዮጵያ የአሜሪካ አምባሳደር ኤርቪን ማሲንጋ በህወሓት (TPLF) አመራሮች የተወሰደውን ውሳኔና የተከፈተውን ሰፊ ወታደራዊ ጥቃት በመቃወም መግለጫ አውጥተዋል። አምባሳደሩ በአዲሱ መግለጫቸው፣ በአሜሪካ ማዕቀብ የተጣለባቸው የህወሓት አመራሮች ሰፊ ጥቃት ለመሰንዘር የወሰዱት ውሳኔ አሳዛኝ እና የተሳሳተ እርምጃ መሆኑን ጠቅሰው፤ የቀድሞ የናይጄሪያ ፕሬዝዳንት ኦሉሴጉን ኦባሳንጆ ባመቻቹት የአፍሪካ ኅብረት የሰላም ውይይት ከመሳተፍ ይልቅ ወደ ማሸነፍ ወደማይቻል አላስፈላጊ ግጭት መግባት ለህዝቡ ምንም ዓይነት ጥቅም እንደማያመጣ አስገንዝበዋል ሲል በኢትዮጵያ የአሜሪካ ኤምባሲ ዘግቧል።

​አምባሳደር ማሲንጋ አክለውም ሌሎች ታጣቂ ቡድኖችም ተመሳሳይ አጥፊ መንገዶችን ከመከተል እንዲቆጠቡ መክረዋል። አሜሪካ ኢትዮጵያን ወደተሳሳተ እና አጥፊ መንገድ የሚገፉ ተጨማሪ አመራሮች ላይ ማዕቀብ የመጣል አማራጮችና መሳሪያዎች ያሏት ቢሆንም፣ አሁንም ቢሆን የከረረውን ችግር ለመፍታት ብቸኛው እና ትክክለኛው መንገድ ምክንያታዊ የፖለቲካ ውይይት ማድረግ እንደሆነ የሚያምኑ መሆኑን አምባሳደሩ ባወጡት ይፋዊ መግለጫ ላይ አጽንኦት ሰጥተው ገልጸዋል።

የአፍሪካ ኅብረት በሰሜን ኢትዮጵያ ባጋጠመው ውጥረት አፋጣኝ ንግግር እንዲጀመር ጥሪ አቀረበ
#fastmereja I ​የአፍሪካ ኅብረት ኮሚሽን ሊቀመንበር ማህሙድ አሊ የሱፍ በሰሜን ኢትዮጵያ ባሉ አካባቢዎች ዳግም እያየለ በመጣው ውጥረት እና ወታደራዊ እንቅስቃሴ ጥልቅ ስጋታቸውን ገልጸዋል። ሊቀመንበሩ ይፋ ባደረጉት ጋዜጣዊ መግለጫ፤ የህወሓት ኃይሎች የመቀሌ፣ የአክሱምና የሽሬ አየር ማረፊያዎችን መቆጣጠራቸውን፣ የፌደራል አካላትን ማሰራቸውን እና የሲቪል አቪዬሽን አገልግሎቶችን ማስተጓጎላቸውን አውግዘዋል። በተጨማሪም በደቡብ ትግራይ እና በአፋር ክልል አዋሳኝ ቦታዎች ላይ እያየለ የመጣው ግጭት እንዲሁም አዳዲስ የፖለቲካ እና ወታደራዊ ጥምረቶች መፈጠር ቀጠናውን የበለጠ እንዳያደፈርሰው ስጋት ፈጥሯል ተብሏል።

​ሊቀመንበሩ አክለውም በኖቬምበር 2022 እ.ኤ.አ በፕሪቶሪያ በኢትዮጵያ መንግሥት እና በህወሓት መካከል የተፈረመው ዘላቂ የተኩስ ማቆም ስምምነት ለሀገሪቱ ሰላምና መረጋጋት ብቸኛው መሰረት መሆኑን ገልጸዋል። የሲቪል አየር ማረፊያዎችን በኃይል መቆጣጠር ከፕሪቶሪያው ስምምነት መርሆች ጋር የሚቃረን እና የተገኙትን የሰላም ፍሬዎች የሚያበላሽ በመሆኑ፣ ወገኖች ሁሉ ከማንኛውም ውጥረትን ከሚጨምሩ እንቅስቃሴዎች ታቅበው በስምምነቱ ማዕቀፍ ውስጥ አፋጣኝ የቀጥታ ውይይት እንዲጀምሩ ጥሪ አቅርበዋል።

​በተጨማሪም የአፍሪካ ኅብረት ኮሚሽን የኢትዮጵያ ጎረቤት ሀገራት ውጥረቱን ከሚያባብሱ እርምጃዎች በመቆጠብ ለሰላምና ውይይት ድጋፍ እንዲያደርጉ የጠየቀ ሲሆን፤ የቀድሞ የናይጄሪያ ፕሬዝዳንት እና የአፍሪካ ኅብረት የቀድሞ የአፍሪካ ቀንድ ልዩ መልዕክተኛ ኦሉሴጉን ኦባሳንጆ አፋጣኝ የዲፕሎማሲ ጥረት በማድረግ ወገኖችን ወደ ውይይት እንዲመልሱ ጥሪ ማቅረባቸውን የአፍሪካ ኅብረት የመረጃና ኮሙኒኬሽን ዳይሬክቶሬት ይፋ ያደረገው መግለጫ ያመለክታል።

“የምድር ጌጥ ኢትዮጵያ” ታሪካዊ አውደ ርዕይ የመጎብኛ ጊዜ መራዘሙ ተገለጸ
#fastmereja I የሐመረ ብርሃን የብራና መጻሕፍት ሥራ ድርጅት ያዘጋጀው እና የልጆች እንዲሁም የቤተሰብ ታሪካዊ አውደ ርዕይ የሆነው "የምድር ጌጥ ኢትዮጵያ" የመጎብኛ ጊዜ ለተጨማሪ ሳምንታት መራዘሙን ተቋሙ በሰጠው ጋዜጣዊ መግለጫ አስታወቀ።

ዛሬ መስከረም 13 ቀን 2019 ዓ.ም በተሰጠው በዚህ መግለጫ፤ አውደ ርዕዩ ከመስከረም 30 ቀን ጀምሮ ለተከታታይ ሶስት ሳምንታት በየሳምንቱ ቅዳሜ እና እሁድ ለህዝብ ክፍት ሆኖ እንዲጎበኝ መወሰኑ ተገልጿል።

ይህ አውደ ርዕይ የኢትዮጵያ ኦርቶዶክስ ተዋህዶ ቤተክርስቲያን ከጥንት እስከ አሁን የኖረችበትን ወርቃማ የታሪክ ጉዞ የሚተርክ ሲሆን፤ ህጻናት እና ቤተሰቦች ታሪካቸውን፣ ሃይማኖታቸውን እና ሀገራዊ ማንነታቸውን በተለያየ የስሜት ህዋሳት (በማየት፣ በመዳሰስ፣ በመስማት እና በመቀምስ) እንዲረዱ ታስቦ የተዘጋጀ ነው።

አውደ ርዕዩ በሆላንድ ኤምባሲ ጀርባ በሚገኘው ሆላንድ ፓርክ ውስጥ የተዘጋጀ ሲሆን፣ ለጎብኚዎች ምቹ ለማድረግ ሰፊ የዝግጅት ስራዎች ተከናውነውበታል።

እንደ አዘጋጆቹ መግለጫ፤ አውደ ርዕዩ ቀደም ሲል ለተወሰኑ ቀናት ተዘጋጅቶ የነበረ ቢሆንም፣ በህዝቡ በኩል በቀረበው ከፍተኛ ጥያቄ እና የታሪክ እሴቱን ለበርካቶች ለማዳረስ ካለው እቅድ አንጻር የመጎብኛ ጊዜው እንዲራዘም ተደርጓል።

በመሆኑም መስከረም 30 እና ጥቅምት 1፣ ጥቅምት 7 እና 8 እንዲሁም ጥቅምት 14 እና 15 ቀን 2019 ዓ.ም ህብረተሰቡ በሆላንድ ፓርክ ተገኝቶ እንዲጎበኝ የሐመረ ብርሃን የብራና መጻሕፍት ሥራ ድርጅት ጥሪውን አስተላልፏል።

"አዲሱ መንግሥት መስከረም 25 ቀን 2019 ዓ.ም ይመሰረታል" አፈ-ጉባኤ ታገሰ ጫፎ
#fastmereja I የሕዝብ ተወካዮች ምክር ቤት አፈ-ጉባኤ አቶ ታገሰ ጫፎ የ7ኛው ጠቅላላ ምርጫ መጠናቀቅን ተከትሎ መስከረም 25 ቀን 2019 ዓ.ም የመንግሥት ምሥረታ እና የምክር ቤቱ መክፈቻ ሥነ-ሥርዓት እንደሚከናወን አስታውቀዋል፡፡ አፈ-ጉባኤው በሰጡት መግለጫ፤ 42 የፖለቲካ ፓርቲዎች፣ 10 ሺህ 438 ዕጩዎች እንዲሁም ከ54 ሚሊዮን በላይ መራጮች የተሳተፉበት 7ኛው ጠቅላላ ምርጫ ሰላማዊ፣ ዴሞክራሲያዊ፣ ፍትሃዊና ተዓማኒነት ባለው ሁኔታ መጠናቀቁን ገልጸዋል፡፡

​በሕገ-መንግሥቱ አንቀጽ 50 ንዑስ አንቀጽ 3 መሠረት የፌዴራሉ መንግሥት ከፍተኛ የሥልጣን አካል የሕዝብ ተወካዮች ምክር ቤት መሆኑንና ተጠሪነቱም ለኢትዮጵያ ሕዝብ እንደሆነ ያስታወሱት አፈ-ጉባኤው፤ የምክር ቤቱ የሥራ ዘመንም በመስከረም ወር የመጨረሻ ሳምንት ሰኞ እንደሚጀምር በሕገ-መንግሥቱ አንቀጽ 58 ንዑስ አንቀጽ 2 መደንገጉን አብራርተዋል፡፡ በተጨማሪም በሕገ-መንግሥቱ አንቀጽ 56 መሠረት በምክር ቤቱ አብላጫ መቀመጫ ያገኘ የፖለቲካ ድርጅት ወይም ጥምር ድርጅቶች የፌዴራሉን መንግሥት የሕግ አስፈጻሚ አካል እንደሚያደራጅና እንደሚመራ ጠቅሰዋል፡፡

​ለሥነ-ሥርዓቱ አስፈላጊው ዝግጅት ሙሉ በሙሉ መጠናቀቁን የጠቆሙት አፈ-ጉባኤው፤ በሕዝብ የተመረጠው አዲሱ መንግሥት ቀጣዩን አምስት ዓመታት ሀገርና ሕዝብ የመምራት ኃላፊነት እንደሚረከብ አረጋግጠዋል፡፡ በመጨረሻም መጪው ዘመን የሰላም፣ የጤና፣ የደስታ፣ የፍቅር፣ የአንድነት እና የብልፅግና እንዲሆን የመልካም ምኞት መልዕክታቸውን አስተላልፈዋል፡፡

ጆይ ኦቲዝም ማዕከል እያስገነባ የሚገኘዉን ህንፃ ለማጠናቀቅና ለብዙዎች ተስፋ ለመሆን የድጋፍ ጥሪ አቀረበ!
#fastmereja :-የኒያ ፋውንዴሽን ጆይ ኦቲዝም ማዕከል በኦቲስቲክ ህፃናት ድጋፍና ስልጠና ላይ የተጋረጡ የመሰረተ ልማትና የቦታ ጥበት ችግሮችን ዘላቂ በሆነ መንገድ ለመፍታት የሚያስችለውን አዲስ ዘመናዊ ህንፃ የመሰረትና የአፅም (G+6) ግንባታ ሙሉ በሙሉ አጠናቆ በፊኒሺንግ (የማጠናቀቂያ) ምዕራፍ ላይ እንደሚገኝ በዛሬዉ እለት አስታወቀ።

የማዕከሉ ዋና ሥራ አስኪያጅ ወ/ሮ እሌኒ ዳምጠው እንደገለጹት፣ ከመንግስት በተሰጠ 4,804 ካሬ ሜትር ቦታ ላይ በ4 ዓመታት ውስጥ እየተገነባ የሚገኘዉ ይህ ህንፃ ሙሉ በሙሉ ሲጠናቀቅ ማዕከሉ በቀጣይ በስፋትና በተሻለ ጥራት ለኦቲስቲክ ህፃናት፣ ወጣቶችና ቤተሰቦቻቸው የሕክምና፣ የትምህርት፣ የሙያ ስልጠናና የስነ-ልቦና ድጋፍ አገልግሎቶችን ተደራሽ ለማድረግ እንደሚያስችለዉ ገልፀዋል።

ከተመሰረተ ከ24 ዓመታት በላይ አገልግሎት ሲሰጥ የቆየው ይህ የበጎ አድራጎት ድርጅት፣ ባለፉት ዓመታት ከ2,500 በላይ ለሚሆኑ የኦቲዝም ተጽዕኖ ያለባቸው ህፃናትና ወላጆቻቸው ድጋፍ ሲያደርግ የቆየ ሲሆን በአሁኑ ወቅትም 120 ልጆችን በቀጥታ የሚያስተናግድ ሲሆን፣ 57 ሰራተኞችን በመያዝ ቤት ለቤት የድጋፍ ስራዎችንና የማህበረሰብ ግንዛቤ የመፍጠር እንቅስቃሴዎችን እያከናወነ እንደሚገኝም ነዉ የተገለፀዉ።

የህንፃውን የማጠናቀቂያ ስራዎች በፍጥነት ለማጠናቀቅ በተደረጉ የበጎ አድራጎት እንቅስቃሴዎች፣ የማዕከሉ የበጎ ፍቃድ አምባሳደር አቶ ዳንኤል እቁባይ ከወዳጅ ዘመዶቻቸው የተሰበሰበውን 1.5 ሚሊዮን ብር እና የራሳቸውን 1.5 ሚሊዮን ብር በማከል በአጠቃላይ 3 ሚሊዮን ብር ለህንፃው ግንባታ ገቢ ማድረጋቸው ተገልጿል።

በተጨማሪም በአሁኑ ወቅት ለህንፃው ሊፍት ገጠማ የሚሆን 8 ሚሊዮን ብር ለማሰባሰብ አዲስ የቻሌንጅ እንቅስቃሴ ከማዕከሉ ጋር በመተባበር በይፋ መጀመሩን የማዕከሉ ስራ አስኪያጅ ጠቁመዋል።

እንዲሁም የማዕከሉ አመራሮች ህብረተሰቡና አቅም ያላቸው ወገኖች በገንዘብም ሆነ በእቃ ድጋፍ በማድረግ የህንፃውን ግንባታ ለማጠናቀቅና ለብዙ ልጆችና ቤተሰቦች ተስፋ ለመሆን ከጎናቸው እንዲቆሙ ጥሪያቸውን አስተላልፈዋል።

ኒያ ፋውንዴሽን( ጆይ ኦቲዝም ማዕከል) በወ/ሮ ዘሚ የኑስ ተመስርቶ ከፖለቲካና ከሃይማኖት ነፃ በሆነ መልኩ በኢትዮጵያ በኦቲስቲክ ህፃናት፣ ወጣቶችና ቤተሰቦቻቸው ድጋፍ፣ ስልጠና፣ ህክምና እና ክብካቤ ላይ ትኩረት አድርጎ የሚሰራ የበጎ አድራጎት ድርጅት ነው።

በሕይወት እያለ የራሱን የሐዘን ባነር ያዘጋጀው ግለሰብ በቁጥጥር ስር ዋለ
#fastmereja I በደቡብ ምዕራብ ኢትዮጵያ ህዝቦች ክልል በቤንች ሸኮ ዞን ሰሜን ቤንች ወረዳ ኦካ ቀበሌ፣ በሕይወት እያለ የራሱን ፎቶ በመጠቀም "ከዚህ ዓለም በሞት ተለይቷል" የሚል የሐሰት የሐዘን መግለጫ ባነር አዘጋጅቷል የተባለ ግለሰብ በፖሊስ ቁጥጥር ስር ውሎ ምርመራ እየተካሄደበት ይገኛል።

​የሰሜን ቤንች ወረዳ ፖሊስ አዛዥ ምክትል ኢንስፔክተር ዘለቀ ኮሽካ እንደገለጹት፣ ድርጊቱ በማህበረሰቡ ዘንድ ከፍተኛ መደናገጥንና አለመረጋጋትን የፈጠረ ነው። አዛዡ አክለውም ያልተከሰተን የሞት ክስተት እንደተከሰተ አስመስሎ ማቅረብ አሳዛኝ የስነ-ምግባር ግድፈት መሆኑን ጠቁመዋል።

​ምክትል ኢንስፔክተሩ ህብረተሰቡ ማናቸውንም መረጃዎች ሳያጣራ እንዳያምንና ከተጨባጭ እውነት የራቁ የሐሰት ወሬዎችን በጥንቃቄ እንዲመለከት አሳስበዋል። በማህበረሰቡ ሰላምና ደህንነት ላይ የሚቀልዱና የህዝብን ስነ-ልቦና የሚነኩ ድርጊቶችን በሚፈጽሙ አካላት ላይ ፖሊስ አስፈላጊውን ህጋዊ እርምጃ መውሰዱን እንደሚቀጥልበትም አስታውቀዋል።

​ጉዳዩን የሰሜን ቤንች ወረዳ መንግስት ኮሙኒኬሽን የዘገበው ሲሆን፣ በግለሰቡ ላይ የሚደረገው የፖሊስ ምርመራ ተጠናቆ ህጋዊ እርምጃ እስኪወሰድ ድረስ ክትትሉ ይቀጥላል።

የላቁ የቴክኖሎጂ ስልጠናዎች በምርታማነት ማሻሻያና የልህቀት ማዕከል ሊሰጡ ነው!
​ #fastmereja I «ዲጂታል ኢትዮጵያ 2030» አገራዊ ራዕይን ለማገዝ እና አዲስ አበባን «ስማርት ሲቲ» ለማድረግ የሚደረገውን እንቅስቃሴ የሚያፋጥን የጋራ ትብብር ስምምነት ዛሬ መስከረም 12 ቀን 2019 ዓ.ም ይፋ ሆኗል።

ስምምነቱ በሮቴክ ኢንፎርሜሽን ቴክኖሎጂ እና በምርታማነት ማሻሻያና የልህቀት ማዕከል መካከል የተከናወነ ሲሆን፣ በኮምፒውተር ዘርፍ ለመሰልጠን ፍላጎት ያላቸውን ዜጎች በ3 ወራት ውስጥ አሰልጥኖ ወደ ሥራ ዓለም ለማሰማራት ያለመ ነው።

​ይህ የፈጠራ እና የክህሎት መርሃ-ግብር እንደ የሰው ሰራሽ አስተውሎት (Artificial Intelligence)፣ የላቁ የኢንፎርሜሽንና ኮሙኒኬሽን ቴክኖሎጂዎች፣ እንዲሁም የኤሌክትሮኒክስ፣ የሃርድዌር እና የሶፍትዌር ጥገናን ያካተቱ 7 ዋና ዋና የቴክኖሎጂ ዘርፎች ላይ ያተኩራል። ስልጠናው በቀጥታ ወደ ተግባራዊ የሥራና የቢዝነስ ዓለም የሚያሸጋግር መሆኑ ተገልጿል።

​ይህ ጅምር በአሁኑ ወቅት በኢንዱስትሪ እና በቴክኖሎጂ ዘርፎች የሚስተዋሉትን የክህሎት ክፍተቶች በመሙላት ረገድ ከፍተኛ ሚና እንደሚጫወትና አገሪቱ ለያዘችው የዲጂታል ትራንስፎርሜሽን ግብ ትልቅ በር ከፋች እንደሚሆን ታውቋል።

መዝገባ የተጀመረ ሲሆን
📍 Rotech Main Office
Bole Medhanialem, Abyssinia Plaza, 8th Floor, Office No. 806

📍 PICE Training Center
Lideta Tsebel, next to Kaizen Center

🌐 Website: www.rotechpice.com

የሚኒስትሩን መነፅር ሰርቃችኋል ተብለው የታሰሩ አራት ጋዜጠኞች ተለቀቁ
#fastmereja I የካሜሩን የኢኮኖሚ ሚኒስትር አላሚን ኦስማን ሜይ የመነፅር መስረቅ ጥርጣሬ ጋር ተያይዞ ለኣምስት ቀናት ታስረው የቆዩ አራት የካሜሩን ጋዜጠኞች ያለ ምንም ክስ ከእስር መለቀቃቸውን ቢቢሲ እና የሀገር ውስጥ መገናኛ ብዙኃን ዘግበዋል።

ጋዜጠኞቹ በቁጥጥር ሥር የዋሉት በያውንዴ ከተማ በተካሄደ የመንግሥት ይፋዊ መርሃ ግብር ላይ ዘገባ በመስራት ላይ እያሉ ነበር።

​እንደ ዘገባዎች ማብራሪያ፣ ሚኒስትሩ «ጠፋብኝ» ያሉት መነፅር በኋላ ላይ በራሳቸው የግል ተሽከርካሪ ውስጥ ተረስቶ ተገኝቷል። ቢሆንም ግን ጋዜጠኞቹ መነፅሩ ከተገኘ በኋላም ቢሆን ለተጨማሪ ቀናት በእስር ላይ እንዲቆዩ መደረጋቸው ከፍተኛ ቅሬታን ፈጥሯል።

​የጋዜጠኞች መብት ተሟጋቾች እና የካሜሩን የሙያ ማህበራት ድርጊቱን በፅኑ ኮንነዋል። በሺዎች የሚቆጠሩ ታዳሚዎች በተገኙበት መርሃ ግብር ላይ ጋዜጠኞቹ ብቻ ተለይተው መጠርጠራቸውንና ለእስር መዳረጋቸውን «የፕሬስ ነፃነት ላይ የተፈጸመ ጥቃት» ሲሉ የገለጹት ማህበራቱ፣ መንግሥት ይፋዊ ይቅርታ እንዲጠይቅ እና የመገናኛ ብዙኃን ባለሙያዎች መብት እንዲከበር ጥሪ አቅርበዋል።

​ጋዜጠኞቹ መስከረም 11 ቀን 2019 ዓ.ም ከእስር ሲለቀቁ ምንም ዓይነት ይፋዊ ክስ እንዳልቀረበባቸው ታውቋል።