ክህደት፣ መዘንጋት እና የከሸፈ ምኞት የኢትዮጵያ ጠላቶች የማይሳካ የሴራ ስሌት
********************

ኢትዮጵያ በታሪክ ጉዞዋ ውስጥ የተደቀኑባትን የውስጥና የውጭ ፈተናዎች በህዝቧ ታሪካዊ ጽናት የማይበገር አንድነት እና በጠንካራ ዲፕሎማሲ እያሸነፈች ዛሬ ላይ የደረሰች ታላቅ ሀገር ነች።

የዚህችን ሀገር ገናና ታሪክ እና የማይናወጥ ህልውና ያልተረዱ ባላንጣዎቿ ዛሬም በሉዓላዊነቷ ላይ በከንቱ ቅዠት የታጀበ ሴራ ሲሸርቡ ይስተዋላል።

የሀገራችን ተቃዋሚዎችና ታሪካዊ ጠላቶች የሚከተሉት ስልት በሶስት ዋና ዋና የተሳሳቱ ስሌቶች ላይ የተመሰረተ ነው፤ እነሱም እውነታውን መካድ፣ ተቋማዊና ታሪካዊ አቅማችንን መዘንጋት እና የከሸፈ የከንቱ ምኞት እስረኛ መሆን ናቸው።

የመጀመሪያው የተሳሳተ ስሌታቸው ኢትዮጵያ በከርሰ ምድር እና በገጸ ምድር የታደለችውን ተፈጥሯዊ ሀብት የጂኦ-ፖለቲካዊ ብልጫ እና ለማንኛውም ወረራ የማይንበረከከውን የወርቅ ህዝቧን እውነተኛ አቅም ለመቀበል አይኖቻቸውን መሸፈናቸው ነው።

በካራማራ እና በዓድዋ የተመዘገበውን ድል እና የነጻነት ተጋድሎ እውነታ በካደ ቅዠት ውስጥ መኖርን መርጠዋል። ሁለተኛው ስህተታቸው ደግሞ የኢትዮጵያን የሺህ ዓመታት ተቋማዊ ልምድ፣ ምቹ መልክዓ ምድራዊ አቀማመጥ እና ሀገሩን ለማስከበር እንደ እሳት የሚነደውን ወጣት ሀይል መዘንጋታቸው ነው። በጊዜያዊ ፈተናዎች የምትናወጥ ሀገር ስላልሆነች የኢትዮጵያን ውድቀት ማቀድ በፍጹም አይቻለውም።

ሶስተኛው እና መጨረሻው መገለጫቸው ደግሞ በሀገር ውስጥ ያሉ ባንዳዎችን በጥቅም በመግዛት ኢትዮጵያን ማዳከም ይቻላል ብሎ ማሰብ ሲሆን፤ ይህም ከእውነታው የራቀ፣ ጊዜ ያለፈበት እና መሬት ላይ ካለው የማይበገር የኢትዮጵያውያን አንድነትና እያደገ ከመጣው የመከላከያ አቅም ጋር በፍጹም የማይጣጣም ባዶ ህልም ነው።

ዛሬ ኢትዮጵያ የትናንት ታሪኳን እና ፈተናዎቿን ወደ ትምህርት ቀይራ፣ ሉዓላዊነቷን በጠንካራ የኢኮኖሚ መሰረት፣ በዘመናዊ ቴክኖሎጂ በታገዘ የመከላከያ HAይል እንዲሁም በብልህ ዲፕሎማሲ እያረጋገጠች ትገኛለች፤ የትኛውም አካል ሊፈጥር የሚችለው ስጋት ሳይኖር ሉዓላዊነቷ በህዝቧ ታሪካዊ ክንድ ተከብሮና ተፈርቶ ይኖራል።

በበርከት ሽመልስ
#ethiopiansovereignty #adwalegacy #strongethiopia #nationalunity #ethiopiandiplomacy #ebc

የባሕር በር ጥያቄያችን ታሪካዊ መብት፣ የኢኮኖሚ ኅልውና እና ይህ ትውልድ በቁርጠኝነት የሚያሳካው ሀገራዊ ህልም
*************************

ኢትዮጵያ በአፍሪካ ውስጥ በሕዝብ ብዛት፣ በፈጣን የኢኮኖሚ ዕድገትና በጂኦ-ፖለቲካዊ ስትራቴጂካዊ ስፍራዋ ከፍተኛ ሚና የምትጫወት ታላቅ ሀገር መሆኗ የዓለም እውነት ነው። ቢሆንም ላለፉት ሦስት አስርት ዓመታት የባሕር በር አልባ ሆና ቆይታለች።

ይሁን እንጂ የባሕር በር ማግኘት ለአንድ ሀገር የቅንጦት ጉዳይ ሳይሆን የብሔራዊ ጥቅም፣ የኢኮኖሚ ኅልውና እና የረጅም ጊዜ የደኅንነት መሠረት በመሆኑ፣ ይህ ታሪካዊ ፍላጎት በዓለም አቀፍ ሕግና በሰላማዊ ዲፕሎማሲያዊ ጥረት በዚህ ትውልድ ቁርጠኝነትና የጋራ ትግል በብቃት እውን እንደሚሆን ሙሉ እምነት አለ።

በአሁኑ ወቅት ከ130 ሚሊዮን በላይ ሕዝብ ያላት ኢትዮጵያ፣ የገቢና ወጪ ንግዷን በጎረቤት ሀገራት ወደቦች በኩል ብቻ የምታከናውን በመሆኗ ለወደብ አገልግሎት በየዓመቱ በቢሊዮን የሚቆጠር ዶላር እንድታወጣ ተገዳለች።

የሕዝቧ ቁጥር በፈጣን ሁኔታ እየጨመረ እና የኢንዱስትሪ ዘርፏ እየሰፋ በመጣበት በዚህ ዘመን፣ የቀጥታ የባሕር በር ማግኘት የሎጂስቲክስ ወጪን በከፍተኛ ሁኔታ በመቀነስ የሀገራችን የወጪ ንግድ ተወዳዳሪነት ወደ ላቀ ደረጃ ያሸጋግረዋል።

በቀይ ባሕር እና በኤደን ባሕረ ሰላጤ አካባቢ የሚታዩት ወታደራዊ እና ፖለቲካዊ እንቅስቃሴዎች የኢትዮጵያን ብሔራዊ ደኅንነት በቀጥታ የሚነኩ በመሆናቸው፣ አስተማማኝ የባሕር በር ማግኘት ለቀጣናዊ ደኅንነቷ እና ለባሕር ላይ ንግድ መስመሮች ጥበቃ ወሳኝ ነው።

አንድ ግዙፍ ሕዝብና ኢኮኖሚ ያላት ሀገር የባሕር በር እና የባሕር ኃይል አልባ ሆና እንድትቀጥል ማድረግ የጂኦ-ፖለቲካ ሚዛኑን የሚያሳጣ በመሆኑ፣ የባሕር በር ጥያቄያችንን ማሳካት የሰላምና የመረጋጋት ዋስትናችን ነው።

የኢትዮጵያ የባሕር በር ጥያቄ የሌሎችን ሀገራት ሉዓላዊነት በመጣስ የሚከናወን ሳይሆን፣ በዓለም አቀፍ ሕጎች፣ በሰላማዊ ዲፕሎማሲ እና በጋራ ተጠቃሚነት መርህ ላይ የተመሠረተ ነው።

የባሕር ሀብትን በጋራ የመጠቀም፣ የመሠረተ ልማት ዝርጋታዎችን የማቀናጀት እና አህጉራዊ የኢኮኖሚ ውህደት የመፍጠር አቀራረባችን ለቀጣናው ዘላቂ ሰላም እና ብልጽግና ትልቅ አስተዋፅኦ አለው።

የባሕር በር ጉዳይ ለኢትዮጵያ የወደፊት እጣ ፈንታ ወሳኝ የሆነ የብሔራዊ ጥቅም ማዕከል በመሆኑ፣ ይህ ትውልድ በበሰለ ዲፕሎማሲ፣ በጽኑ ሀገራዊ አንድነትና በስትራቴጂካዊ እይታ ይህንን ህጋዊ እና ታሪካዊ ፍላጎት በድል በማጠናቀቅ የሀገሩን ልዕልና ዳግም ያረጋግጣል።

ይህ ትውልድ የቆየውን ታሪካዊ ስብራት ጠግኖ፣ የቀጣናውን ሀገራት በጋራ ተጠቃሚነት በማሳመንና በቁርጠኝነት በመታገል የኢትዮጵያን የባሕር በር ህልም እውን እንደሚያደርገው ምንም ጥርጥር የለውም።

በአድማሱ አራጋው
#ethiopia #ebc #ethiopiaseaoutlet #redseadiplomacy #nationalinterest #hornofafricaintegration #ethiopiansovereignty

The World is Stunned by Ethiopia’s Election!

​#ethiopia #elections2026 #mirechayeapp #ethiopiansovereignty #ebcdotstream