“ኢትዮጵያ ቀይ ባህርን መፈለግ ብቻ ሳይሆን ቀይ ባህርም ኢትዮጵያን እየፈለገ ነው”፦ አቶ ቀጄላ መርዳሳ
***********************

ኢትዮጵያ ቀይ ባሕርን መፈለግ ብቻ ሳይሆን ቀይ ባሕርም ኢትዮጵያን ይፈልጋታል ሲሉ የጠቅላይ ሚንስትሩ የወጣቶችና ስፖርት አማካሪ አቶ ቀጄላ መርዳሳ ገለጹ።

የኢትዮጵያ የባሕር በር ጉዳይ በምሁራን እይታ በሚል የአዲስ አበባ አመራር አካዳሚ ባዘጋጀው የውይይት መድረክ ላይ የተገኙት አቶ ቀጄላ መርዳሳ ቀይ ባሕርና ዓባይ ከኢትዮጵያ ብሔራዊ ጥቅም ጋር በቀጥታ የተያያዙ መሆናቸውን ጠቁመዋል።

ቀይ ባህር እንደ ኢትዮጵያ የባህር በር ለሌላቸው ሌሎች ሀገራትም ከኢኮኖሚ፣ ከደህንነትና ከሉዓላዊነት አንጻር የህልውና ጉዳይ መሆኑንም ነው የተናገሩት።

የኢትዮጵያ የባህር በር ጥያቄ የኢኮኖሚ ህልውና ለማረጋገጥ የሚደረግ ጥረት ብቻ ሳይሆን ለቀይ ባህር ቀጠና አስተማማኝ ጸጥታና የደህንነት ዋስትና መሰረት መሆኑን አስምረውበታል።

ኢትዮጵያ በቀይ ባህር ዳርቻ መኖሯ ለቀጠናው ሀገራትና ለአለም አቀፍ ንግድ መርከቦች ተጨማሪ ደህንነትና ዋስትና የሚሰጥ እንጂ ስጋት የሚፈጥር አለመሆኑንም ገልጸዋል።

በሌላ በኩል አምባሳደር ዲና ሙፍቲ በበኩላቸው፣ ኢትዮጵያ ከቀይ ባህር አካባቢ የ60 ኪሎ ሜትር ርቀት ላይ የምትገኝ ሀገር ሆና ማግኘት ያለባትን ጥቅም እንዳታገኝ በሚፈልጉ አካላት የባህር በር እንዳታገኝ መደረጓን አስታውሳለች።

አምባሳደር ዲና አክለውም ኢትዮጵያ የባህር በር ጥያቄዋን የምታራምደው የማንንም ሀገር ሉአላዊነት በመጋፋት ወይም በሃይል እርምጃ ሳይሆን በሰላማዊ፣ በዲፕሎማሲያዊ እና በሰጥቶ መቀበል መርህ ላይ ተመስርታ መሆኑን ገልጸዋል።
«የኢትዮጵያ የባሕር በር ጉዳይ በምሁራን እይታ» በሚል የአዲስ አበባ አመራር አካዳሚ ያዘጋጀው የውይይት መድረክ
በሃይማኖት ከበደ
#redsea #ethiopia #redseadiplomacy #hornofafrica #maritimesecurity

ትውልድ ያጣውን ትውልድ የሚያስመልሰው ታሪካዊው የባሕር በራችን
****************

የባሕር በር ማግኘት ልዩ ልዩ የጂኦ-ፖለቲካዊ ማደናቀፍ ሂደቶችና ሴራዎች ቢተገበሩበትም አዲሱ ትውልድ ዓይኑን ሊነቅልበት ያልቻለ፣ ለሀገር የኢኮኖሚ ደም ሥር፣ ለፖለቲካ ነፃነት ማረጋገጫና አገራዊ ክብርን መልሶ ለማንገሥ የሚደረግ ታላቅ ህልም ነው።

የቀደሙት ትውልዶች በጂኦ-ፖለቲካዊ ሴራዎችና በወቅቱ በነበሩ ውስብስብ ሀገራዊ ድክመቶች ምክንያት ካጧቸው ታላላቅ አገራዊ ሀብቶች መካከል የባሕር በር ተጠቃሚነትና የባሕር ኃይል ባለቤትነት ዋነኞቹ ነበሩ።

ይህ የታሪክ ስብራት በሀገራች ላይ ከፍተኛ የኢኮኖሚ ጫናን ከማስከተሉ ባሻገር፣ የኢትዮጵያን የረጅም ጊዜ ስትራቴጂካዊ ጥቅሞች በከፍተኛ ፈተና ውስጥ ጥሎት ቆይቷል።

የአሁኑ ትውልድ ደግሞ ይህንን የታሪክ ጠባሳ የማረም፣ የሀገሩን ዘላቂ መፍትሔ በራሱ ትከሻ ላይ የመሸከም እና የነገዋን ኢትዮጵያ በጽኑ መደላደል ላይ የመገንባት ታሪካዊ ኃላፊነት ወስዷል።

ይህ አገራዊ ጥያቄ ቀለል ያለ የፍላጎት ጉዳይ ብቻ ሳይሆን፣ የሀገር ህልውና እና የመጻኢ ዕድል መወሰኛ መሆኑን ትውልዱ ጠንቅቆ ይረዳዋል።

የባሕር በር ማግኘት ማለት ለንግድ ልውውጥ የሚወጣውን ከፍተኛ የቢሊዮን ዶላሮች የወደብ ኪራይ ማስቀረት፣ የገቢና ወጪ ንግድ እንቅስቃሴን ማፋጠን፣ የፍጆታ ዕቃዎችን ዋጋ በመቀነስ የዜጎችን ሕይወት ማቃለል እና የአገሪቱራችንን የኢኮኖሚ ሉዓላዊነት በተግባር ማረጋገጥ ማለት ነው።

በቀይ ባሕርና በአፍሪካ ቀንድ ቀጣና ውስጥ ተፅዕኖ ፈጣሪ፣ ተደማጭና ባለሙሉ ባለቤት ሀገር ሆኖ ለመቀጠል የራስ የሆነ የባሕር በር እና ዘመናዊ የባሕር ኃይል መኖሩ ወሳኝና አማራጭ የሌለው ጉዳይ ነው።

ትውልዱ ያጣውን የባሕር በር በጥበብ፣ በበሰለ ዲፕሎማሲና በጽኑ አገራዊ አንድነት የመመለስ ጥረት የቀደሙ አባቶችን አደራ የማስከበርና ለመጪው ትውልድ የበለፀገችና የተከበረች ሀገር የማስረከብ ታላቅ ራዕይ ነው።

ይህ ትውልድ እውነታውን፣ ሕጋዊ መብቱንና የታሪክ እዳውን ጠንቅቆ የሚያውቅ በመሆኑ፣ የባሕር በር ጥያቄ የጊዜ ጉዳይ እንጂ በምንም ዓይነት ሁኔታ የማይቀለበስና የማይቆም ታሪካዊ አገራዊ ጉዞ መሆኑን በተግባር እያረጋገጠ ይገኛል።

በልዩ እሸቱ
#ethiopያSeaOutlet #redseadiplomacy #nationalsovereignty #ethiopianprosperity #hornofafricaintegration

የባሕር በር ጥያቄያችን ታሪካዊ መብት፣ የኢኮኖሚ ኅልውና እና ይህ ትውልድ በቁርጠኝነት የሚያሳካው ሀገራዊ ህልም
*************************

ኢትዮጵያ በአፍሪካ ውስጥ በሕዝብ ብዛት፣ በፈጣን የኢኮኖሚ ዕድገትና በጂኦ-ፖለቲካዊ ስትራቴጂካዊ ስፍራዋ ከፍተኛ ሚና የምትጫወት ታላቅ ሀገር መሆኗ የዓለም እውነት ነው። ቢሆንም ላለፉት ሦስት አስርት ዓመታት የባሕር በር አልባ ሆና ቆይታለች።

ይሁን እንጂ የባሕር በር ማግኘት ለአንድ ሀገር የቅንጦት ጉዳይ ሳይሆን የብሔራዊ ጥቅም፣ የኢኮኖሚ ኅልውና እና የረጅም ጊዜ የደኅንነት መሠረት በመሆኑ፣ ይህ ታሪካዊ ፍላጎት በዓለም አቀፍ ሕግና በሰላማዊ ዲፕሎማሲያዊ ጥረት በዚህ ትውልድ ቁርጠኝነትና የጋራ ትግል በብቃት እውን እንደሚሆን ሙሉ እምነት አለ።

በአሁኑ ወቅት ከ130 ሚሊዮን በላይ ሕዝብ ያላት ኢትዮጵያ፣ የገቢና ወጪ ንግዷን በጎረቤት ሀገራት ወደቦች በኩል ብቻ የምታከናውን በመሆኗ ለወደብ አገልግሎት በየዓመቱ በቢሊዮን የሚቆጠር ዶላር እንድታወጣ ተገዳለች።

የሕዝቧ ቁጥር በፈጣን ሁኔታ እየጨመረ እና የኢንዱስትሪ ዘርፏ እየሰፋ በመጣበት በዚህ ዘመን፣ የቀጥታ የባሕር በር ማግኘት የሎጂስቲክስ ወጪን በከፍተኛ ሁኔታ በመቀነስ የሀገራችን የወጪ ንግድ ተወዳዳሪነት ወደ ላቀ ደረጃ ያሸጋግረዋል።

በቀይ ባሕር እና በኤደን ባሕረ ሰላጤ አካባቢ የሚታዩት ወታደራዊ እና ፖለቲካዊ እንቅስቃሴዎች የኢትዮጵያን ብሔራዊ ደኅንነት በቀጥታ የሚነኩ በመሆናቸው፣ አስተማማኝ የባሕር በር ማግኘት ለቀጣናዊ ደኅንነቷ እና ለባሕር ላይ ንግድ መስመሮች ጥበቃ ወሳኝ ነው።

አንድ ግዙፍ ሕዝብና ኢኮኖሚ ያላት ሀገር የባሕር በር እና የባሕር ኃይል አልባ ሆና እንድትቀጥል ማድረግ የጂኦ-ፖለቲካ ሚዛኑን የሚያሳጣ በመሆኑ፣ የባሕር በር ጥያቄያችንን ማሳካት የሰላምና የመረጋጋት ዋስትናችን ነው።

የኢትዮጵያ የባሕር በር ጥያቄ የሌሎችን ሀገራት ሉዓላዊነት በመጣስ የሚከናወን ሳይሆን፣ በዓለም አቀፍ ሕጎች፣ በሰላማዊ ዲፕሎማሲ እና በጋራ ተጠቃሚነት መርህ ላይ የተመሠረተ ነው።

የባሕር ሀብትን በጋራ የመጠቀም፣ የመሠረተ ልማት ዝርጋታዎችን የማቀናጀት እና አህጉራዊ የኢኮኖሚ ውህደት የመፍጠር አቀራረባችን ለቀጣናው ዘላቂ ሰላም እና ብልጽግና ትልቅ አስተዋፅኦ አለው።

የባሕር በር ጉዳይ ለኢትዮጵያ የወደፊት እጣ ፈንታ ወሳኝ የሆነ የብሔራዊ ጥቅም ማዕከል በመሆኑ፣ ይህ ትውልድ በበሰለ ዲፕሎማሲ፣ በጽኑ ሀገራዊ አንድነትና በስትራቴጂካዊ እይታ ይህንን ህጋዊ እና ታሪካዊ ፍላጎት በድል በማጠናቀቅ የሀገሩን ልዕልና ዳግም ያረጋግጣል።

ይህ ትውልድ የቆየውን ታሪካዊ ስብራት ጠግኖ፣ የቀጣናውን ሀገራት በጋራ ተጠቃሚነት በማሳመንና በቁርጠኝነት በመታገል የኢትዮጵያን የባሕር በር ህልም እውን እንደሚያደርገው ምንም ጥርጥር የለውም።

በአድማሱ አራጋው
#ethiopia #ebc #ethiopiaseaoutlet #redseadiplomacy #nationalinterest #hornofafricaintegration #ethiopiansovereignty