ዶ/ር ወዳጄነህ መሐረነ ራዕይ የህፃናት መርጃን ጎበኙ
#ethiopia | ዶ/ር ወዳጄነህ መሐረነ በአዲስ አበባ የሚገኘውን ራዕይ የህፃናት መርጃ ድርጅት ጎበኙ።

በጉብኝታቸውም ድርጅቱ ልዩ የድጋፍ ፍላጎት ላላቸው ህፃናትና ወጣቶች እየሰጠ ያለውን የሙያ ስልጠና፣ የችሎታ ማሳያና ሌሎች የድጋፍ ሥራዎች ተመልክተዋል።

ዶ/ር ወዳጄነህ በጉብኝቱ ወቅት ህፃናቱ በሽመና፣ በሙዚቃ፣ በሸክላ ሥራና በሥነ ጥበብ ያላቸውን ችሎታ ሲያሳዩ ተመልክተዋል። ከጠበቁት በላይ በመደሰታቸውም፣ ከድርጅቱ ሥራ ጋር በመተባበር ለመቆም ቃል ገብተዋል።

ዶ/ር ወዳጄነህ እንደገለጹት፣ ልዩ የድጋፍ ፍላጎት ያላቸው ህፃናትና ወጣቶች ተገቢውን ዕድልና ድጋፍ ሲያገኙ ችሎታቸውን ማሳየትና ማዳበር ይችላሉ። በራዕይ የህፃናት መርጃ ያዩት ሥራም ይህንን በግልጽ እንዳሳየ ገልጸዋል።

በተለይም በየቤቱ ተዘግተው የሚኖሩ ብዙ ህፃናትና ወጣቶች የመማር፣ የመሰልጠንና ችሎታቸውን የማሳደግ ዕድል እንዲያገኙ ድርጅቱ ሥራውን ማስፋፋት እንዳለበት ጠቁመዋል። ህፃናቱን ከጥቃት መጠበቅና የሚያገኙትን ዕድል ማስፋትም አስፈላጊ መሆኑን አስገንዝበዋል።

የራዕይ የህፃናት መርጃ ድርጅት የኢትዮጵያ ተጠሪ ሰሎሜ ኩምሳ በበኩላቸው፣ ዶ/ር ወዳጄነህ ድርጅቱን መጎብኘታቸው ለህፃናቱና ለሚሠሩት ሥራ ትልቅ ድጋፍ መሆኑን ገልጸዋል።

እንደ ወይዘሮ ሰሎሜ ገለጻ፣ ራዕይ የህፃናት መርጃ በአሁኑ ወቅት የአእምሮ እድገት ውስንነትና የመማር ችግር ያላቸውን ወጣቶች በሙያ ስልጠና፣ በመሠረታዊ የኮምፒዩተር ትምህርት፣ በሙዚቃ፣ በሥነ ጥበብ፣ በስፖርትና በሌሎች ዘርፎች እያሰለጠነ ይገኛል። በተጨማሪም ለህፃናቱ የሥነ ልቦና፣ የሕክምናና ሌሎች አስፈላጊ ድጋፎችን ይሰጣል።

ድርጅቱ ባለፉት ዓመታት ከ350 በላይ ወጣቶችን ደግፏል። በአዲስ አበባ በአምስት ክፍለ ከተሞች በሚገኙ ወደ ሰባት ትምህርት ቤቶች ሥራውን ሲያከናውን፣ በአዳማም በአንድ ትምህርት ቤት ሥራ ጀምሯል።

ከሚሰጡት የሙያ ስልጠናዎች መካከል ሽመና ዋነኛው ሲሆን፣ ከሰለጠኑ ወጣቶች መካከል 12 ወጣቶች የሽመና ባለሙያዎች ሆነው ነጠላ፣ ሻርፕና የባህል ልብሶችን እያመረቱ መሆኑን ወይዘሮ ሰሎሜ አስረድተዋል።

ራዕይ የህፃናት መርጃ ድርጅት ወላጆችና መምህራን ስለህፃናቱ የተሻለ ግንዛቤ እንዲያገኙም ስልጠና ይሰጣል። በተለይም ልዩ የድጋፍ ፍላጎት ያላቸው ወጣቶች ከጥቃት እንዲጠበቁና በማህበረሰቡ ዘንድ ተገቢውን ድጋፍ እንዲያገኙ ጥሪ አቅርቧል።

ድርጅቱ በኢትዮጵያ በዶ/ር ፅጌ ጥበቡ መሥራችነት የተቋቋመ መንግሥታዊ ያልሆነና ለትርፍ ያልተቋቋመ ድርጅት ሲሆን፣ የአእምሮ እድገት ውስንነትና ሌሎች የአካል ጉዳቶች ያሉባቸውን ህፃናትና ወጣቶች በመንፈሳዊ፣ በስሜታዊ፣ በትምህርታዊና በሙያዊ ፕሮግራሞች በመደገፍ በክብርና በነፃነት እንዲማሩ፣ እንዲሰሩና እንዲኖሩ የሚያስችል አካባቢ ለመፍጠር እየሰራ ይገኛል።

በተጨማሪም ወጣቶችን በሸማ ሙያ፣ በኮምፒዩተርና በኮዲንግ፣ በሙዚቃ፣ በሥነ ሥዕልና በስፖርት በማሰልጠን ችሎታቸውን እንዲያዳብሩና በራሳቸው አቅም ለመስራት የሚያስችላቸውን ዕድል ለመፍጠር እየሰራ ነው።
#ethiopia #visionchildrensupportorganization #drwodajeneh #empoweringyouth #communitysupport #inclusion​ #visionchildrensupport #drwodajeneh #disabilitysupport #inclusion #communityservice #ethiopiannews #getutemesgen #getu #ጌጡ #ጌጡተመስገን #addisababa

ከልማዳዊ አሠራር ወደ ተቋማዊነት እየተሸጋገረ ያለው የመረዳዳት ባህላችን
****************

በእኛ በኢትዮጵያውያን ማህበራዊ ሕይወት ውስጥ ሰብዓዊነትና መረዳዳት አዲስ ሀሳብ አይደለም።

በችግርናም ሆነ በደስታ ጊዜያት አብረን የመቆም፣ ደካሞችን የመደገፍና ያለንን የማጋራት ጥንታዊ ባህል አለን።

በ2018 ዓ.ም የተከናወኑ ሰው ተኮር የልማትና የበጎ አድራጎት ሥራዎች ይህን ባህላዊ ዕሴት ከዕለት ተለት መፍትሔነት አውጥተው ወደ ተቋማዊና ዘላቂ የልማት ባህል ያሸጋገሩ ሆነዋል።

በአሁኑ ወቅት በመላው ሀገራችን በስፋት እየተተገበረ ያለው ሰው ተኮር ልማት የዜጎችን የዕለት ተለት ሕይወት ጥራት የመቀየርና የማኅበረሰብ አብሮነትን የማጠናከር ትልቅ ዓላማ ያለው ነው።

በበዓላትና በክረምት ወራት የሚከናወኑ የማዕድ የማጋራት መርሐ ግብሮች ለበርካታ አረጋውያንና ዝቅተኛ ገቢ ላላቸው ዜጎች የማኅበራዊ ዋስትና መረቦች ሆነዋል።

በተመሳሳይ መልኩ በክረምት ወራት በሺዎች የሚቆጠሩ ያረጁ የአቅመ-ደካሞች መኖሪያ ቤቶች የዜጎችን ክብርን በሚያስጠብቅ ደረጃ በበጎ ፈቃደኞች በመታደስ ላይ ይገኛሉ።

የከተሞች ጽዳትና ውበት ሥራዎችም መሠረተ ልማትን ከማስፋፋት ባለፈ የዜጎችን ጤና በመጠበቅ፣ ሰብዓዊ ክብርን ማዕከል ያደረገ የከተማ ሕይወት እንዲፈጠር አድርገዋል።

የክረምት በጎ ፈቃድ አገልግሎት ሕይወትን የማዳን ቅዱስ ተግባር ከሆነው የደም ልገሳ በተጨማሪ በርካታ ዜጎች ነፃ ሕክምና ያገኙበት ሀገራዊ ባህል እየሆነ መጥቷል።

እነዚህ በላቀ ደረጃ የተፈፀሙ ተግባራት ትልቁ ፋይዳቸው በዜጎች ቀጥተኛ ተሳትፎ የተከናወኑ መሆናቸው ነው።

ወጣቶች፣ ባለሀብቶች፣ የመንግሥት ሠራተኞችና የተለያዩ የኅብረተሰብ ክፍሎች ጉልበታቸውን፣ ዕውቀታቸውንና ሀብታቸውን አስተባብረው በመሥራታቸው በዜጎች መካከል የጠበቀ የማኅበራዊ ትስስር ፈጥሯል።

አቅመ-ደካማ ጎረቤቱን የሚረዳ፣ ቤቱን የሚያድስለት ወይም ደሙን የሚለግሰው አንድ ወጣት፣ የሀገሩና የማኅበረሰቡ ዋና አካል እንደሆነ ይሰማዋል።

ይህ ደግሞ በዜጎች መካከል አለኝታነትንና የጋራ ኃላፊነት ስሜትን በመገንባት ለሀገራዊ ጽናት፣ ለሰላም እና ለዘላቂ ልማት የማይተካ ምሰሶ ይሆናል።

ሰብዓዊነትን የልማት ማዕከል ማድረግ ማለት ድህነትንና ማኅበራዊ ፈተናዎችን በጋራ አቅም የመቀነስ ስትራቴጂ ነው።

በዚህ ዓመት የተከናወኑ ሰው ተኮር የልማት ተግባራት እንደሚያሳዩት፣ የበጎ አድራጎትና የመረዳዳት ሥራ ከጊዜያዊ ድጋፍነት አልፎ ሀገራዊ የልማት ማዕቀፍና የመልካም አስተዳደር አካል በመሆኑ ለነገዋ ኢትዮጵያ ግንባታ ትልቅ መንገድ ከፍቷል።

በኢንቲሃድ አብራር
#ethiopia #communityservice #socialsafetynet #socialcohesion #ebc

‎የጎንደር ዩኒቨርሲቲ የእንስሳት እርባታ ጣቢያ ማህበረሰቡን ተጠቃሚ እያደረገ ነው
‎
‎📌 በአመት እስከ 10 ሚሊዮን ብር ገቢ እያስገኘ ነው
‎
‎#ethiopia | ​የጎንደር ዩኒቨርሲቲ የእንስሳት ህክምና እና ሳይንስ ኮሌጅ የመማር ማስተማር እና የምርምር ስራዎችን ከማህበረሰብ አገልግሎት ጋር በማቀናጀት አርሶ አደሩንና የአካባቢውን ነዋሪ እያገዘ እንደሚገኝ የኮሌጁ ዲን ዶ/ር አቸነፍ መላኩ ገለጹ።
‎
‎ኮሌጁ በስድስት የትምህርት ክፍሎችና በተለያዩ የደረጃ ፕሮግራሞች ተማሪዎችን ከማስተማር ባለፈ፣ በስሩ በሚገኘው ክሊኒክ አማካኝነት ለአካባቢው አርቢዎች የእንስሳት ህክምና፣ የክትባትና የበሽታ መከላከል አገልግሎቶችን እየሰጠ ይገኛል።
‎
‎ከዚህም በተጨማሪ በዘመናዊ መልክ በተደራጀው የወተት እርባታ ጣቢያው አማካኝነት በቀን ከሁለት መቶ እስከ ሶስት መቶ ሊትር ወተት በማምረት ጥራቱን የጠበቀ ምርት በቅናሽ ዋጋ ለዩኒቨርሲቲው ማህበረሰብና ለአካባቢው ነዋሪዎች እያቀረበ መሆኑን አስታውቀዋል።
‎
‎​ይህ በየቀኑ ወደ ስምንት መቶ የሚጠጉ ደንበኞችን ተጠቃሚ የሚያደርገው የእንስሳት እርባታ ጣቢያ፣ ልዩ ድጋፍ ለሚያስፈልጋቸውና በሀኪም የታዘዘላቸው የሆስፒታል ታካሚዎችም በየቀኑ የወተት አቅርቦት እያቀረበ ይገኛል።
‎
‎የጣቢያው ስራ አስኪያጅ አቶ አያልሰው ተከስተ እንደገለጹት፣ ቀደም ሲል በአካባቢው ገበያ የወተት ዋጋ እስከ ሰማንያ ብር በሚሸጥበት ወቅት ጣቢያው በሀምሳ ብር ዝቅተኛ ዋጋ ለነዋሪው ሲያቀርብ የቆየ ሲሆን፣ አሁን ላይ ዋጋው ተሻሽሎ በ75 ብር እየቀረበ ይገኛል።
‎
‎ጣቢያው ከዚህ የወተት ሽያጭ ብቻ በወር እስከ 450 ሺህ ብር ገቢ የሚያገኝ ሲሆን፣ በዚህ አመት ብቻ ከእንስሳት ሽያጭ ካገኘው ከ4.1 ሚሊዮን ብር በላይ ገቢ ጋር ተዳምሮ፣ በአጠቃላይ በአመት ከ10 ሚሊዮን ብር በላይ ገቢ ማስመዝገብ መቻሉን አስታውቀዋል።
‎
‎​የተቋሙ የምርምር ስራዎችም ከጊዜ ወደ ጊዜ እየዘመኑ መምጣታቸውን የጠቀሱት ዶ/ር አቸነፍ፣ በተለይም አርሶ አደሩን የወንድ ኮርማዎችን የመጠበቅ ወጪ የሚያድንና የሴት ጥጃዎችን ብቻ የመውለድ እድልን የሚያሰፋ የሰው ሰራሽ ማዳቀል ቴክኖሎጂ ላይ በስፋት እየተሰራ መሆኑን ጠቁመዋል።
‎
‎ይህ በማህበረሰቡ ፍላጎት ላይ ተመስርቶ የተዘጋጀው ፖሊሲና የምርምር ሰነድ ለዩኒቨርሲቲው የምርምርና ትብብር ምክትል ፕሬዝዳንት የቀረበ ሲሆን፣ ሂደቱን ጨርሶ ለፖሊሲ አውጪዎች እንደሚተላለፍ ይጠበቃል።
‎
‎በአሁኑ ወቅት ጣቢያው እስከ መቶ ሀያ የሚደርሱ ላሞችና ለምርምር ስራ የሚውሉ በጎችን የያዘ ሲሆን፣ በቀጣይም በደኑ ውስጥ ያለውን የንብ እርባታ ከማስፋፋት ባለፈ በአሳ እርባታ ዘርፍም ለመሰማራት እቅድ ተይዞ እየተሰራ ይገኛል።
‎
‎በጌትነት ተመስገን
‎Getu Temesgen - (ጌጡ ተመስገን)
‎
‎#getutemesgen #getu #ጌጡ
‎
‎#ethiopia #gondaruniversity #gondaruniversity #communityservice #agriculturalresearch

የክረምት ደጋግ እጆች፦ የኢትዮጵያ ማኅበራዊ ዋስትና አዲስ ምዕራፍ
********************

ክረምት በኢትዮጵያ፣ ምድር አረንጓዴ የምትለብስበትና ተፈጥሮ ራሷን የምታድስበት የተስፋ ማብሰሪያ ወቅት ነው።

ነገር ግን ይህ የዝናብ እና የብርድ ወቅት መጠለያ ለሌላቸው እና አቅመ ደካማ ለሆኑ ወገኖቻችን ከባድ ፈተናን ይዞ መምጣቱ አይቀሬ ነው።

ሆኖም ኢትዮጵያውያን ይህን ተፈጥሯዊ ፈተና በትብብር እና በመደጋገፍ የማለፍ የቆየ እና የዳበረ ታላቅ ባህል አላቸው።

ዘር ለሌለው ዘር በመስጠት፣ መጠለያ ለሌለው መጠለያ በመሥራት እና አቅም ላነሳቸው ደቦ በመውጣት ነው ይህን ከባድ ጊዜ በጋራ የሚሻገሩት።

በኢትዮጵያ ማኅበራዊ ታሪክ ውስጥ በራስ ተነሳሽነት እና በጋራ ትብብር ላይ የተመሠረቱ የበጎ ፈቃድ አገልግሎቶች ጥልቅ ሥር ያላቸው የባህል እሴቶቻችን ናቸው።

ይህ በችግር እና በፈተና ወቅት እርስ በርስ የመረዳዳት ሥነ ልቦናዊ ዝግጁነት፣ ከ2011 ዓ.ም ጀምሮ ወደ ተቋማዊ እና ስትራቴጂያዊ ሀገራዊ ንቅናቄ ተሸጋግሯል።

አኃዛዊ መረጃዎች እንደሚያሳዩት፣ በ2010 ዓ.ም የነበረው የ10.8 ሚሊዮን ወጣቶች ተሳትፎ በ2017 ዓ.ም ወደ 25 ሚሊዮን አድጓል።

በተመሳሳይ መልኩ፣ በመርሐ ግብሩ ተጠቃሚ የሆኑ ዜጎች ቁጥር ከ13.6 ሚሊዮን ወደ 53 ሚሊዮን ከፍ ብሏል።

በ2015 ዓ.ም ብቻ በተካሄደው የክረምት በጎ ፈቃድ አገልግሎት ከ21.5 ሚሊዮን በላይ ወጣቶች በመሰማራት ከ17 ቢሊዮን ብር በላይ የሚገመት አገልግሎት ማበርከታቸው የንቅናቄውን ግዙፍ ሀገራዊ ፋይዳ በተግባር ያረጋግጣል።

ይህ ታላቅ ጥረት አብዛኛው ሕዝብ ከተለመደው የማኅበራዊ ዋስትና ሽፋን ውጭ በሆነበት ሁኔታ ላይ ክፍተቱን ለመሙላት የሚያስችል አማራጭ እና ውጤታማ ማኅበራዊ ዋስትና ሆኖ እያገለገለ ይገኛል።

የዘመቻው ዋነኛው ስኬት፣ አቅመ ደካሞችን በመደገፍ ረገድ የመጣው ስር ነቀል ለውጥ ነው። ጠቅላይ ሚኒስትር ዐቢይ አሕመድ (ዶ/ር) ከ2011 ዓ.ም ጀምሮ የክረምት ወቅት ከመግባቱ በፊት የአቅመ ደካሞችን ቤት የማደስ ዓመታዊ መርሐ ግብር ማስተዋወቃቸው ይታወሳል።

ይህ መርሐ ግብር ባለፉት ዓመታት በአዲስ አበባ ከተማ ብቻ ከ46 ሺህ በላይ ቤቶችን በአዲስ መልክ በመገንባት ዜጎችን በዝናብ እና በብርድ ከመሰቃየት ታድጓቸዋል።

የታሪካዊው የአዋሬ መንደር ስር ነቀል ለውጥ ለዚህ ታላቅ ማሳያ ነው። ቀደም ሲል ለኑሮ እጅግ አስቸጋሪ የነበሩ ያረጁ የጭቃ ቤቶች ዛሬ በአዲስ መልክ ተገንብተው ጽዱ፣ ምቹ እና ለሰው ልጅ ክብር የሚመጥኑ ሆነዋል።

የዘንድሮው የ2018 ዓ.ም የክረምት በጎ ፈቃድ አገልግሎት መርሐ ግብር ደግሞ የከተማ ልማትን ከገጠር ልማት ጋር ለማስተሳሰር የሚያስችል አዲስ ታሪካዊ ምዕራፍ ከፍቷል።

ይህ እሳቤ አርሶ አደሩ ያሉትን አካባቢያዊ ጸጋዎች ተጠቅሞ፣ ከተፈጥሮ ጋር ያለውን ቁርኝት በማጠናከር ዘመናዊ እና ጽዱ አኗኗር መምራት እንዲችል ለማድረግ ያለመ ነው።

ጠቅላይ ሚኒስትር ዐቢይ አሕመድ (ዶ/ር) የዘንድሮውን የክረምት በጎ ፈቃድ አገልግሎት መርሐ ግብር ሲያስጀምሩ ያስተላለፉት ጥሪ የንቅናቄውን መንፈስ በጉልህ ያሳያል።

ጠቅላይ ሚኒስትሩ “የክረምቱ ወቅት ሲደርስ፣ እኛም ለወገኖቻችን የምንዘረጋው የደግነት እጅ አብሮ ይጀግናል!" በማለት ነው መልዕክታቸውን የጀመሩት።

አክለውም፣ "ሀገራችንን በጋራ ማንሳት የምንችለው፣ አንዳችን ለሌላችን እጃችንን ስንዘረጋ ብቻ ነው! ስለሆነም እያንዳንዱ ኢትዮጵያዊ በዚህ ሥራ እንዲሳተፍ ጥሪዬን አቀርባለሁ” በማለት ሁሉም በሚችለው መንገድ ለመርሐ ግብሩ መሳካት የድርሻውን እንዲወጣ ጥሪ አቅርበዋል።

እኛስ በዘንድሮው የክረምት በጎ ፈቃድ አገልግሎት ላይ አሻራችንን ለማሳረፍ ምን ያህል ተዘጋጅተናል? የክረምቱን ቅዝቃዜ በደግነት እጆቻችን እናሙቀው!

በለሚ ታደሰ
#voluntarism #socialsecurity #communityservice #transformingethiopia

ያለደመወዝ ኢትዮጵያውያንን በማገልገል ላይ የሚገኙት አሜሪካዊቷ የሕፃናት ሕክምና ስፔሻሊስት
#ethiopia | ሕፃኗ ከመወለጃ ጊዜዋ ቀድማ በመወለዷ፣ ኪሎዋ ከሚጠበቀው በታች ሆኗል። ይህም በሕይወት ለመቆየት አስጊ እንደሆነ ይገለጻል። በዚህ ምክንያት የሕፃኗ ቤተሰቦች በጭንቀት ተውጠዋል።

ከዚህ ቀደም መሰል ሕፃናትን ከሞት የታደጉት እነ ዶ/ር ሚሼል፣ የዚህችንም ሕፃን ሕይወት ለማትረፍ ብዙ ለፍተዋል። ደግነቱ የዶ/ር ሚሼልና ባልደረቦቻቸው ልፋት መና አልቀረም፣ ከሳምንታት የልዩ ክትትል ሕክምና በኋላ የሕፃኗ የመኖር ተስፋ ለምልሟል።

ዶ/ር ሚሼል ዬትስ በደቡብ ኢትዮጵያ ክልል፣ ወላይታ ዞን፣ ሶዶ ክርስቲያን ሆስፒታል የሕፃናት ሕክምና ክፍል በበጎ ፈቃደኝነት በማገልገል ላይ ያሉ አሜሪካዊት የሕፃናት ሕክምና ስፔሻሊስት ናቸው። ላለፉት 12 ዓመታት በሆስፒታሉ ያገለገሉት ባለሙያዋ ተሞክሯቸውን አካፍለውናል።

ዶ/ር ሚሼል እንዳጫወቱን፣ 700 ግራም ብቻ ሆና የተወለደችው ሕፃን በሆስፒታሉ በተደረገላት ከፍተኛ ክትትልና እንክብካቤ በቅርቡ ከጨቅላ ሕፃናት ማቆያ (Incubator) ወደ እናቷ እቅፍ የተሸጋገረች ሲሆን፣ በጥሩ ጤንነት ላይ ትገኛለች።

ይህን መሰል የሕክምና ተዓምር ለእነ ዶ/ር ሚሼል የየዕለት ሥራ አካል ነው። የሚገርመው፣ እርሳቸውን ጨምሮ በሶዶ ክርስቲያን ሆስፒታል የሚያገለግሉ ሁሉም ዓለም አቀፍ ሠራተኞች ለአገልግሎታቸው ከሆስፒታሉም ሆነ ከሀገር ምንም ዓይነት ክፍያ አይቀበሉም።

የዕለት ተዕለት ኑሯቸው የሚደገፈው በትውልድ ሀገራቸው ከሚገኙ ወዳጅ ዘመዶቻቸው፣ ከአብያተ ክርስቲያናት እንዲሁም ከበጎ አድራጎት ድርጅቶች በሚደረግላቸው የገንዘብ ድጋፍ (donation) ነው።

ከሶስት ልጆቻቸው ሁለቱን በኢትዮጵያ የወለዱት አሜሪካዊቷ በጎ ፈቃደኛ ሐኪም፣ በሙያቸው ኢትዮጵያውያንን እያገለገሉ፣ የሕጻናትና እናቶችን ሕይወት ከሞት እየታደጉ ይገኛሉ።

በዶ/ር ሚሼል እና የሙያ አጋሮቻቸው ነፃ የሕክምና አገልግሎት አማካኝነት፣ የመክፈል አቅም የሌላቸው በርካታ ኢትዮጵያውያን ታክመው ድነዋል። ይህን ማየት ሁሉንም ድካም የሚያስረሳ ትልቅ በረከት መሆኑን ዶ/ር ሚሼል በእርካታ ይገልጻሉ።

ከትውልድ ሀገር ርቆ መኖር፣ የቤተሰብ አባል ሲታመም በቅርብ አለመገኘት እንዲሁም በሠርግና ልቅሶ አለመታደም ከባድ ቢሆንም፣ ፈጣሪ ለዚህ አገልግሎት እንደጠራቸውና ፍላጎታቸውን ሁሉ እርሱ እንደሚያሟላላቸው በጽኑ ያምናሉ።

ይህ ዓይነቱ የበጎ ፈቃድ አገልግሎት ሆስፒታሉ ለኅብረተሰቡ የሚያቀርበውን የሕክምና አገልግሎት በተመጣጣኝ ክፍያ ለማቅረብና አቅመ ደካሞችን ለመርዳት ትልቅ ዕድል ፈጥሯል ያሉን የሶዶ ክርስቲያን ሆስፒታል ዋና ሥራ አስፈጻሚ ኤፍሬም ገብረሥላሴ ናቸው።

ሆስፒታሉ የላቀ የሕክምና አገልግሎት መስጠት፣ ብቁ የሕክምና ባለሙያዎችን ማፍራት እና ከፍሎ የመታከም አቅም የሌላቸውን ማገዝን ዋነኛ ዓላማዎቹ አድርጎ መነሳቱን ገልጸዋል።

ሆስፒታሉ ዶ/ር ሚሼልን የመሳሰሉ በጎ ሰዎችን በማሰባሰብ እና በየዓመቱ እስከ 40 ሚሊዮን ብር በጀት በመመደብ ከመላው ኢትዮጵያ ለሚመጡ የመክፈል አቅም የሌላቸው ታካሚዎች ነጻ የሕክምና አገልግሎት በመስጠት ላይ ይገኛል።

Getu Temesgen - (ጌጡ ተመስገን)
#getutemesgen #getu #ebc #ethiopia #soddochristianhospital #communityservice #drmichelleyates

ደም በመለገስ የእናቶችን ሕይወት እንታደግ! — ከቡና ደጋፊዎችና ከኮሌጃችን የቀረበ ጥሪ
#ethiopia | ​ታላቅ የሰብዓዊነት መርሐ ግብር! ኮሌጃችን ከ"ኳስ ሜዳ እና አካባቢው የቡና ደጋፊዎች መረዳጃ ዕድር" ጋር በመተባበር ልዩ የደም ልገሣ መርሐ ግብር አዘጋጅቷል።

ይህ ልገሣ በተለይ በወሊድ ወቅት ደም ለሚያስፈልጋቸው እናቶቻችን ሕይወት መትረፍ ታስቦ የተዘጋጀ ነው። አንድ ጠብታ ደም የአንዲት እናትን ሕይወት፣ የአንድን ቤተሰብ ተስፋ ሊያድን ይችላል።

​ መቼና የት?

ነገ ሚያዚያ 18/2018 ዓ.ም (እሁድ)

ከጠዋቱ 2፡00 ሰዓት ጀምሮ

በኮሌጁ ቅጥር ግቢ — ዋናው ሕንጻ መግቢያ

የኢትዮጵያ ቡና ደጋፊነት በስታዲየም ጩኸት ብቻ አይገደብም፤ እንዲህ ባሉ ወሳኝ የሕይወት አድን ተግባራት ላይም ግንባር ቀደም መሆንን ይጠይቃል።

ነገ ጠዋት ሁላችንም በኮሌጃችን ቅጥር ግቢ በመገኘት ደም በመለገስ ለወገኖቻችን አለኝታነታችንን የምናሳይበት ዕለት ነው። እናቶችን ማዳን ትውልድን ማዳን ነው!

​ደምዎን ይለግሱ፣ ሕይወት ይታደጉ!

​#getu #blooddonation #ethiopiabunna #savemothers #communityservice #addisababa #humanitarian #lifesaving #ደምልገሣ #እናቶችንእናድን #ኢትዮጵያቡና #አዲስአበባ #ጌጡተመስገን #getutemesgen

ዮዳሄ የበጎ አድራጎት ድርጅት የማዕድ ማጋራት መርሐግብር ድጋፍ አደረገ

​#ethiopia | ዮዳሄ የበጎ አድራጎት ድርጅት የ1447 ዓመተ ሂጅራ የረመዷን ጾምን በማስመልከት በቂርቆስ ክፍለ ከተማ ወረዳ 09 ለሚገኙ ወገኖች የማዕድ ማጋራት መርሐግብር በዛሬው ዕለት አከናወነ።

​በመርሐግብሩ ላይ ንግግር ያደረጉት የዮዳሄ የበጎ አድራጎት ድርጅት ዋና ጸሐፊ አቶ ታፈሰ አመንሲሳ እንደገለጹት፤ ድርጅቱ ከተመሠረተ ጥቂት ወራትን ያስቆጠረ ቢሆንም፣ የቆመለትን ዓላማ ለማሳካት ሰፊ ጥረት እያደረገ ይገኛል።

ድርጅቱ ሥራውን ለማከናወን የውጭ ፈንዶችን ለማግኘት ጥረት ቢያደርግም፣ የታሰበው ድጋፍ ባልተገኘበት ወቅት "ዮዳሄ እጃችን ለድጋፍ፣ ልባችን ለፍቅር " በሚል መሪ ቃል መንፈስ አባላቱን በማስተባበር በወረዳው ለሚገኙ ወገኖች የረመዳንን ጾም በማስመልከት የማዕድ መርሐግብር ማከናወኑን ገልጸዋል።

​የቂርቆስ ክፍለ ከተማ ወረዳ 09 ዋና ሥራ አስፈጻሚ አቶ ደህንነት ገብሩ በበኩላቸው፣ ድርጅቱ በዚህ ፈታኝ ወቅት ያሳየው የተራድኦ ተግባር የሚመሰገን መሆኑን ገልጸው፤ መሰል የበጎ አድራጎት ሥራዎች የሕዝቡን የአንድነትና የመረዳዳት እሴት እንደሚያጠናክሩ ገልጸዋል።

​በመጨረሻም ለዝግጅቱ ስኬት አስተዋጽኦ ላበረከቱ የድርጅቱ አባላት፣ የወረዳው አመራሮችና በጎ ፈቃደኞች ምስጋና ቀርቧል።

​የቂርቆስ ክፍለ ከተማ ወረዳ 09 ዋና ሥራ አስፈጻሚ አቶ ደህንነት ገብሩ በበኩላቸው፣ ድርጅቱ በዚህ ፈታኝ ወቅት ያሳየው የተራድኦ ተግባር የሚመሰገን መሆኑን ገልጸው፤ መሰል የበጎ አድራጎት ሥራዎች የሕዝቡን የአንድነትና የመረዳዳት እሴት እንደሚያጠናክሩ ገልጸዋል።

​በመጨረሻም ለዝግጅቱ ስኬት አስተዋጽኦ ላበረከቱ የድርጅቱ አባላት፣ የወረዳው አመራሮችና በጎ ፈቃደኞች ምስጋና ቀርቧል።

​በዕለቱ የማዕድ ማጋራት መርሐግብር ላይ የቂርቆስ ክፍለ ከተማ ወረዳ 09 ዋና ሥራ አስፈፃሚ አቶ ደህንነት ገብሩ እና ሌሎች ጥሪ የተደረገላቸው እንግዶች ተገኝተዋል።

​የዮዳሄ የበጎ አድራጎት ድርጅት በሲቪል ማህበረሰብ ድርጅቶች ባለስልጣን በአዋጅ ቁጥር 1113/2011፣ በምዝገባ ቁጥር 7460 ጥቅምት 11 ቀን 2018 ዓ.ም ሕጋዊ ሰውነት አግኝቶ መንቀሳቀስ መጀመሩ ይታወቃል።
#getutemesgen #getu #ጌጡ #ጌጡተመስገን
#yodahecharity #ramadankareem #iftarsharing #ethiopia #socialimpact #communityservice #charityevent #kirkossubcity #selfreliance

ዩጎ ሲቲ ቤተክርስቲያን ለ200 የኮሪደር ልማት ባለሙያዎች የእራት ግብዣ አደረገ
#ethiopia | ​ለከተማችን ፅዳት እና ውበት ቀን ከሌት እየሰሩ ለሚገኙ በቦሌ ብራስ አካባቢ ለተመደቡ የኮሪደር ልማት ሠራተኞች፤ ዩጎ ሲቲ ቤተክርስቲያን ቅዳሜ ምሽት (ጥር 9 ቀን 2018 ዓ.ም) የራት ግብዣ በማድረግ አብሮነቷን እና ምስጋናዋን ገልጻለች።

​የቤተክርስቲያኗ ማህበራዊ አሻራ:

ከዚህ ቀደም በቦሌ ድልድይ አካባቢ ማራኪ መናፈሻዎችን ሰርቶ በማስረከብ አካባቢን አረንጓዴ የማድረግ ስራ የሰራችው ዩጎ ሲቲ ቤተክርስቲያን፤ አሁንም ማህበራዊ ኃላፊነቷን በመወጣት ከ200 በላይ ለሚሆኑ ባለሙያዎች የራት ግብዣ አድርጋለች።

​"ይህንን እንድናደርግ ለረዳን ጌታ ክብር ይሁንለት!"
ዩጎ ሲቲ ቤተክርስቲያን

​#yugocitychurch #communityservice #socialresponsibility #addisababa #corridordevelopment #thankyou

🌳 ቴፒን በጋራ እናልማ
የ"ትንሿ ኢትዮጵያ" ዳግም ውልደትና የልማት ጥሪ
#ethiopia | ​የታሪክ ድርሳናት እንደሚነግሩን ቴፒ ከተማ በ1911 ዓ.ም የተቆረቆረች፣ የኢትዮጵያ የዘመናዊነት አውራ ጎዳና ቀዳሚ ተጠቃሚ የነበረች ታሪካዊ የንግድ ማዕከል ናት። ገና በ1960ዎቹ የአውሮፕላን ትራንስፖርት፣ በ1966 የጤና ጣቢያና የጠጠር መንገድ የነበራት ቴፒ፤ ዛሬም ያንን ገናና ታሪኳን አድሳ ወደ ከፍታ ለመመለስ ቆርጣ ተነስታለች።

​ ቴፒ፦ የብዝሃነትና የተፈጥሮ ዕንቁ

​አረንጓዴ ካባ የደረበችው ቴፒ፣ "ትንሿ ኢትዮጵያ" ተብላ ትጠራለች። ብሔር ብሔረሰቦችና ሕዝቦች በፍቅርና በመከባበር የሚኖሩባት፣ የቡናና የቅመማ ቅመም ምርቷን ለዓለም ገበያ የምታቀርብ የኢኮኖሚ ምሰሶ ናት።

​🚧 የልማት እንቅፋትና አዲስ ተስፋ

​ከተማዋ በሀገር አቀፍና በዓለም አቀፍ ደረጃ ከፍተኛ ምርት የምታቀርብ ብትሆንም፣ የዘመናዊ መንገድ መሠረተ ልማት እጥረት ትልቅ ፈተና ሆኖባት ቆይቷል። ይህንን ችግር ለመፍታት፦
​ከሚዛን፣ ከማሻ-ጎሬ እና ከሽሽንዳ የሚመጡ ዋና ዋና መንገዶች በፍጥነት እየተገነቡ ይገኛሉ።

​ነገር ግን፦
የከተማዋ የውስጥ ለውስጥ መንገዶች የሁላችንንም እገዛ ይሻሉ።

​🤝 የ"ህብረት" ጥሪ ለቴፒ ልጆችና ለኢትዮጵያውያን በሙሉ!
​የቴፒ ከተማ አስተዳደር የከተማዋን ነባራዊ እድገትና ቀደምት ስልጣኔ ባገናዘበ መልኩ የውስጥ ለውስጥ መንገዶችን በራስ አቅም ለመገንባት ፕሮጀክት ነድፎ ወደ ተግባር ገብቷል።

​በሀገር ውስጥና በውጭ የምትገኙ የቴፒ ተወላጆች፣ ወዳጆችና የልማት አጋሮች በሙሉ፦ "ዘንድሮ የምትሞሸረውን ቴፒን በጋራ እናስውብ!" ስንል ጥሪያችንን እናስተላልፋለን።

​💰 የልማት ተሳትፎዎን በሚከተለው የባንክ አካውንት ያድርጉ፦
​የኢትዮጵያ ንግድ ባንክ (CBE)፦ 1000731791558
​የአካውንቱ ስም፦ ቴፒ ከተማ ህብረተሰብ ተሳትፎ አስፓልት ግንባታ

​💡 መፈክራችን፦ "በኅብረት ሁሉን እንችላለን!!"

​የከተማችን መልማት የሀገራችን ብልፅግና መሠረት ነው። ዛሬ ለቴፒ የምናደርገው ድጋፍ ለነገው ትውልድ የምናስቀምጠው ትልቅ አሻራ ነው።

​የቴፒ ከተማ አስተዳደር፤
በመምህር ኃይማኖት ተስፋዬ እና
በናትናኤል ዳኜ በኩል የተላለፈ መልዕክት

​#tepi #ethiopia #development #communityservice #infrastructure #coffeeland #unityindiversity #ethiopiaprogress #tepicity