በኢትዮጵያ የዲጂታል ንግድ አዲስ ምዕራፍ፦ “ዳንቴል” AI የታገዘ የንግድ አማካሪና የገበያ መድረክ ይፋ አደረገ
#fastmereja I በኢትዮጵያ የቴክኖሎጂ ዘርፍ አዳዲስ ፈጠራዎችን ይዘው ብቅ የሚሉ ወጣቶች ቁጥር እየጨመረ በመጣበት በዚህ ወቅት፣ “ዳንቴል ሶፍትዌር” የተሰኘው ኩባንያ ወጣቶችንና ሴቶችን የንግድ ባለቤት የሚያደርግና በሰው ሰራሽ አስተውሎት (AI) የታገዘ የሞባይል መተግበሪያ በይፋ ስራ ማስጀመሩን አስታውቋል።

ባለፉት ሶስት ዓመታት በወጣት ሶፍትዌር ኢንጂነሮች ጥልቅ ምርምርና ዝግጅት ሲደረግበት የቆየው ይህ መተግበሪያ፣ በተለይ ያለምንም መነሻ ካፒታል ወደ ንግድ አለም መግባት ለሚፈልጉ ወጣቶች ትልቅ ተስፋ ይዞ መጥቷል።

📌 “ዳንቴል” ምንድን ነው? እንዴትስ ይሰራል?

የድርጅቱ መስራችና ስራ አስኪያጅ አቶ ፊሊጶስ ማርሳይ እንደገለጹት፣ “ዳንቴል” ተጠቃሚዎች በመተግበሪያው ላይ የሚገኙ የተለያዩ ምርቶችን እንደ ቴሌግራም፣ ፌስቡክ እና ቲክቶክ ባሉ ማህበራዊ ሚዲያዎች በማጋራትና ሽያጭ በመፍጠር የኮሚሽን ተጠቃሚ የሚሆኑበት የዲጂታል ንግድ መድረክ ነው።

የመተግበሪያው ልዩ ባህሪያት የሚከተሉት ናቸው፦

• AI የንግድ አማካሪ፦ መተግበሪያው ተጠቃሚዎች የትኛውን ምርት፣ በምን አይነት የገበያ ሁኔታ እና በምን ያህል ካፒታል መጀመር እንዳለባቸው የሚመራና የሚያማክር የራሱ የሆነ የAI (Artificial Intelligence) ስርዓት አለው።

• ያለ መነሻ ካፒታል መነገድ፦ ማንኛውም ወጣት ወይም ሴት ያለምንም ቅድመ ክፍያ ወይም ካፒታል የራሳቸውን የዲጂታል ንግድ እንዲጀምሩ ያስችላል።

• የደንበኞች መብት ጥበቃ፦ ድርጅቱ ከአቅራቢዎች ጋር ባደረገው ስምምነት መሠረት “ምርቱ ካልተመቸ የመመለስ መብት” (Return Policy) ተግባራዊ በማድረግ የደንበኞችን እምነት ይገነባል።

ምርቶች ለደንበኞች በፍጥነትና በጥራት እንዲደርሱ ለማድረግ “ዳንቴል” ከኢትዮጵያ ፖስታ አገልግሎት ጋር በቅንጅት መስራት ጀምሯል። ይህም ተጠቃሚዎች ያዘዟቸው ምርቶች ያሉበትን ደረጃ (Tracking) እንዲከታተሉና ባሉበት ሆነው እንዲረከቡ ምቹ ሁኔታን ይፈጥራል።

ይህ ቴክኖሎጂ በዋናነት በገበያ ውስጥ ያለውን የዋጋ ንረት ለመቆጣጠርና የመካከለኛውን ደላላ ሚና በመቀነስ ምርትና አቅራቢን በቀጥታ ለማገናኘት ያለመ ነው። ኩባንያው በአጭር ጊዜ ውስጥ 100 ሺህ የሚደርሱ ወጣቶችን ተጠቃሚ ለማድረግ አቅዶ እየሰራ ይገኛል።

“ዳንቴል ሶፍትዌር” በኢትዮጵያ ወጣት ኢንጂነሮች ተመስርቶ ለሶስት ዓመታት የቆየ ተቋም ሲሆን፣ አሁን ይፋ ያደረገው AI የታገዘ መተግበሪያ ለሀገሪቱ የዲጂታል ኢኮኖሚ ሽግግር ትልቅ አስተዋጽኦ ይኖረዋል ተብሎ ይጠበቃል።