ኢትዮጵያ አንድ ቪዛ፣ ዓለም በውስጧ - ‎ጠቅላይ ሚኒስትር ዐቢይ አሕመድ (ዶ/ር) ቱሪዝም ዘርፍን አስመልክቶ የሰጡት ማብራሪያ
#tourism #ethiopiadelivers #ethiopia #pmoethiopia #landoforigins #abiyahmed #economicgrowth #ecotourism #greenlegacy #ebcworld

" target="_blank" class="inline-link">https://new-en.yenevibe.co...

የወፍ ዋሻ ጥብቅ ደን ብሔራዊ ፓርክ ሆኖ እንዲተዳደር ተወሰነ
*******************

የአማራ ክልል መሥተዳድር ምክር ቤት በሰሜን ሸዋ ዞን የሚገኘው የወፍ ዋሻ ጥብቅ ደን፣ ከሐምሌ 1 ቀን 2018 ዓ.ም ጀምሮ በብሔራዊ ፓርኮች የአስተዳደር ሥርዓት እንዲመራ የቀረበውን የደንብ ረቂቅ ሙሉ በሙሉ አጽድቋል።

የአማራ ክልል የአካባቢ እና ደን ጥበቃ ባለሥልጣን ዋና ኃላፊ አቶ ተስፋሁን ዓለምነህ እንደገለጹት፤ የወፍ ዋሻ ጥብቅ ደን ከ8 ሺህ 732 ሄክታር በላይ ስፋት ያለው ሲሆን፣ በአንኮበር፣ በባሶና ወራና እንዲሁም በጣርማ በር ወረዳዎች በሚዋሰኑ 15 የገጠር ቀበሌዎች የተከበበ ደን ነው።

ጥብቅ ደኑ የበርካታ ብዝኃ-ሕይወት ሀብቶች መኖሪያ በመሆኑ፣ ጥበቃና ልማት እየተደረገለት ወደ ብሔራዊ ፓርክነት እንዲያድግ ተከታታይ ሳይንሳዊ ጥናቶች ሲካሄዱበት መቆየታቸውን ኃላፊው አብራርተዋል።

ባለሥልጣን መሥሪያ ቤቱ ጥብቅ ደኑ ያለውን እምቅ የተፈጥሮ ሀብት መሠረት በማድረግ በርካታ የጥበቃና የልማት ተግባራትን ሲያከናውን መቆየቱን የገለጹት አቶ ተስፋሁን፤ ስፍራው በክልሉና በሀገር አቀፍ ደረጃ ከሚገኙ ብሔራዊ ፓርኮች ጋር እኩል ጥበቃና ልማት እንዲደረግለት የሚያስችል የጥበቃና ልማት ደንብ በማዘጋጀት ለክልሉ መሥተዳድር ምክር ቤት አቅርበው ሲያስፈጽሙ መቆየታቸውን ገልጸዋል።

አካባቢው በብሔራዊ ፓርክነት በይፋ ተመዝግቦ የቀጣይ የቱሪዝም ተስፋ እንዲሆን ውሳኔ በመተላለፉ፣ የባለሥልጣን መሥሪያ ቤቱ ኃላፊ ለክልሉ መሥተዳድር ምክር ቤት የላቀ ምስጋና አቅርበዋል።

የአማራ ክልል የአካባቢ እና ደን ጥበቃ ባለሥልጣን በአሁኑ ወቅት በክልሉ ውስጥ አምስት ብሔራዊ ፓርኮችን እና ሰባት የማኅበረሰብ ጥብቅ ስፍራዎችን በበላይነት በማስተዳደር የጥበቃና ልማት ተግባራትን እያከናወነ እንደሚገኝ አሚኮ ዘግቧል።
#ethiopia #northshewa #wofwashapark #nationalpark #biodiversity #ecotourism

ከአሸዋ ማዕበል ወደ አረንጓዴ ሀብት፦ በረሃዎችን ወደ ቱሪዝም መዳረሻነት የቀየረው የቻይና የአረንጓዴ ልማት ተሞክሮ
****************

ቻይና ዛሬ በዓለም ላይ የታላላቅ የደን ማገገሚያ እና የበረሃማነት መከላከል ፕሮጀክቶች ባለቤት ከሆኑ ሀገራት መካከል ትጠቀሳለች።

የዛሬው ስኬቷ ታዲያ ከአሸዋ ማዕበል፣ ከውሃ እጥረት እና ከበረሃ መስፋፋት ጋር ከተደረገ የረጅም ጊዜ ትግል በኋላ የተገኘ ነው።

በተለይ በጎቢ እና በኩቡቺ አካባቢዎች የነበረው ሰፊ በረሃማ መሬት ለዓመታት የአካባቢው ነዋሪዎችን ሕይወት አስቸጋሪ አድርጎት ቆይቷል።

በእነዚህ አካባቢዎች በየጊዜው የሚነሳ ኃይለኛ የአሸዋ ማዕበል ከተሞችን ይመታ ነበር፤ የእርሻ መሬቶችም በአሸዋ ይሸፈኑ ነበር።

ይህን ችግር ለመፍታት ቻይና በሚሊዮን ሄክታሮች በሚለካ መሬት ላይ ዛፎችን፣ ሳሮችን እና በደረቅ አካባቢ የሚበቅሉ ችግኞችን ተከለች።

የአሸዋ ክምችቶች እንዳይንቀሳቀሱ ልዩ የሆኑ የሣር አጥር ቴክኒኮችን በመጠቀም እና የውሃ ማቆያ ሥርዓቶችን በመገንባት አስደናቂ ውጤት ማስመዝገብ ቻለች።

በአንድ ወቅት ሕይወት ይኖርባቸዋል ተብለው የማይታሰቡ የነበሩ የሀገሪቱ አካባቢዎች ዛሬ በአረንጓዴ እጽዋት ተሸፍነዋል።

የዱር እንስሳት ተመልሰዋል፤ የአየር ጥራት ተሻሽሏል፤ የአካባቢው ሰዎችም ከእርሻ፣ ከደን ውጤቶች እና ከቱሪዝም ልማት ተጨማሪ ገቢ ማግኘት ጀምረዋል።

በአሸዋ ተራሮች ላይ ለመዝናናት፣ አረንጓዴ ፓርኮችን ለመጎብኘት፣ የኢኮ-ቱሪዝም ተሞክሮዎችን ለመቅሰም እና በአካባቢው የተፈጠረውን አስደናቂ ለውጥ ለማየት ጎብኚዎች በሚሊዮኖች ወደነዚህ አካባቢዎች ይተማሉ።

በተለይ ኩቡቺ በረሃ የአካባቢ ጥበቃ እና የኢኮ-ቱሪዝም ስኬት ተምሳሌት ሆኖ በዓለም አቀፍ ደረጃ ይጠቀሳል። ይህ ተሞክሮ ለሌሎች ሀገራት ጭምር ትልቅ ትምህርት የሚሰጥ ነው።

ዛሬ ለዛፍ ተከላ የሚወጣ ወጪ ነገ በአካባቢ ጥበቃ፣ በግብርና፣ በቱሪዝም እና በኢኮኖሚ ዕድገት በብዙ እጥፍ የሚመለስ ኢንቨስትመንት መሆኑን ያመላክታል።

ኢትዮጵያም በአረንጓዴ ዐሻራ ያመጣችውን ለውጥ አጠናክራ ከቀጠለች፣ ዛሬ የሚተከለው በቢሊዮኖች የሚቆጠር ችግኝ ነገ ለትውልድ የሚተርፍ የደን ሀብት፣ የውሃ ምንጭ፣ የካርቦን ማቆያ እና አዳዲስ የኢኮ-ቱሪዝም መዳረሻ ይሆናል።

ዛሬ የምንተክለው ችግኝ የነገ የኢኮኖሚ ዕድገት፣ የቱሪዝም ገቢ እና የአረንጓዴ ኢትዮጵያ መሠረት ነው።

በሀብተሚካኤል ክፍሉ
#greenlegacy #chinagreenwall #ecotourism #climateaction #environmentalrestoration #ebc

የ5ቱ ዓመታት ገፆች፦ መደመር ያዋለዳቸው የገበታ ፕሮጀክቶች
**************

ታሪክ በየዘመኑ የራሱን ዐሻራ ጥሎ ያልፋል። ከስድስተኛው ሀገራዊ ምርጫ አንስቶ ወደ ሰባተኛው ጠቅላላ ምርጫ ዋዜማ ስንሸጋገር የተፃፉት የአምስቱ ዓመታት ገፆች ደግሞ፣ ኢትዮጵያ ድብቅ የተፈጥሮ ውበቷንና ፀዳሏን አውጥታ ለዓለም ያሳየችባቸው የውበት አብዮት ድርሳናት ናቸው።

ለዘመናት "የ13 ወር ፀጋ" በሚለው የቱሪዝም መሪ ቃል ብቻ ስትጠራ የነበረችው ሀገራችን፣ ዛሬ ከመፈክር ባለፈ "ምድረ ቀደምት" በሚለው ከፍታዋ ልክ በተጨባጭ በዓለም አቀፍ መድረክ ደምቃ እንድትታይ ያደረጋት አስደናቂ የታሪክ እጥፋት ተፈጥሯል። የዚህ ታላቅ ሀገራዊ ትራንስፎርሜሽን የጀርባ አጥንትና ሞተር ደግሞ ከመደመር እሳቤ የተወለዱት የ"ገበታ" ፕሮጀክቶች ናቸው።

የገበታ ፕሮጀክቶች “ገበታ ለሸገር፣ ገበታ ለሀገር እና ገበታ ለትውልድ” ተራ የመሠረተ ልማት ግንባታዎች አይደሉም። ይልቁንም ሃብትን አስተባብሮ ከተፈጥሮ ፀጋዎች ጋር በማዋሀድ ኢትዮጵያን ወደ ተፈጥሯዊ የቱሪዝም መስህብነት የቀየሩና ከመደመር እሳቤ የፈለቁ እውነተኛ ኢትዮጵያዊ ትርክቶች ናቸው። የመደመር ትውልድ ሀገርን ማልማት ማለት የውጭ ዕርዳታን መጠበቅ ሳይሆን፣ የራስን እምቅ አቅም፣ የተፈጥሮ ውበትና ታሪክን ወደ ኢኮኖሚያዊ እሴት መቀየር መሆኑን በተግባር አሳይቶበታል።

ይህ የገበታ ጉዞ የተጀመረው በ"ገበታ ለሸገር" ሲሆን፣ ለዘመናት በቆሻሻ ተውጠው የነበሩ የከተማ ቦታዎችንና የተተው ተራራዎችን ወደ ምድር ገነት ቀይሯቸዋል። ጫካና ገደል የነበረው የእንጦጦ ተራራ ወደ ማራኪው "እንጦጦ ፓርክ" ሲቀየር፣ የአዲስ አበባን የልብ ትርታ ያደሰው "ወዳጅነት ፓርክ" እና ታሪክን ከተፈጥሮ ጋር ያዋሀደው ግዙፉ "አንድነት ፓርክ" የዚህ ስኬት በኩር ፍሬዎች ሆነዋል።

ይህ ስኬት በመዲናዋ ብቻ አልተገታም፤ የመደመር እሳቤ "ገበታ ለሀገር" በሚል አዲስ ሀገራዊ ንቅናቄ መላዋን ኢትዮጵያ አዳረሰ። ማራኪው የ"ወንጪ" ሐይቅ ከተፈጥሮ አቀማመጡ ጋር በተዋሀደ መልኩ በዓለም አቀፍ ስታንዳርድ ለቱሪዝም ክፍት ሆነ። የጣናን ሐይቅ ሞገድ የሚያማትረው የ"ጎርጎራ" ፕሮጀክት ታሪካዊቷን ከተማ ዳግም ሲያነቃ፣ በደቡብ ምዕራብ የሚገኘው "ኮይሻ" እና የታላቁ ሸለቆ ድንቅ ስጦታ የሆነው "ሀላላ ኬላ ሎጅ" እንዲሁም በጨበራ ጩርጩራ ብሔራዊ ፓርክ የተገነባው “ጨበራ የዝሆን ዳና ሎጅ” የኢትዮጵያን የተፈጥሮ ውበትና የባህል ብዝኃነት ቁልጭ አድርገው አሳይተዋል።

በዚህ ያላቆመው የመደመር ትውልድ "ገበታ ለትውልድ" በማለት ሌላ ምዕራፍ ከፈተ። የደንዲ ሐይቅ፣ የጢስ አባይ ፏፏቴ፣ የጅማ ዞን ቦንጋ አካባቢ እና የሶፍ ኡመር ዋሻን ጨምሮ በርካታ ድንቅ የቱሪስት መዳረሻዎች በተፈጥሮ ላይ ምንም ዓይነት አሉታዊ ተፅዕኖ በማያሳድር (eco-friendly) እና ከዓለም አቀፍ ስታንዳርድ ጋር በተናበበ አኳኋን እየተገነቡ ይገኛሉ።

እነዚህ ሁሉ የገበታ ፕሮጀክቶች ስኬታማ ሊሆኑ የቻሉበት ትልቁ ምስጢር የሥራ ባህል ለውጥ ነው። ፕሮጀክቶቹ የተመሩት "ጥራትና ፍጥነት"ን ባማከለ ጽኑ መርህ ነው። ለዘመናት ሲንከባለሉና ሲጓተቱ የነበሩ የመንግሥት ፕሮጀክቶችን ልማድ በመስበር፣ የገበታ ፕሮጀክቶች በተያዘላቸው በጀት፣ በተቀመጠላቸው እጅግ አጭር ጊዜ እና ዓለም አቀፍ ጥራታቸውን በጠበቀ መልኩ ተጠናቅቀዋል። ፕሮጀክቶቹ ከተፈጥሮ ጋር የፈጠሩት አስደናቂ መስተጋብር ሳይነካ የአካባቢን ሥነ-ምህዳር በጠበቀ መልኩ የተከናወኑ በመሆናቸው፣ ሀገራችንን የዓለም ጎብኚዎች ተመራጭ መዳረሻ አድርገዋታል።

የገበታ ፕሮጀክቶች የኢትዮጵያን እውነተኛ ፀዳል የገለጡ፣ የመደመር ትውልድ ሀገሩን በዓለም አቀፍ የቱሪዝም ካርታ ላይ ቀዳሚ ለማድረግ ያለውን ብቃት፣ ፍጥነትና የፈጠራ ጥበብ ያረጋገጡ ሕያው ሐውልቶች ናቸው።

ኢትዮጵያም "ምድረ ቀደምት" መሆኗን በኩራት እያወጀች፣ የተፈጥሮና የሰው ልጅ ጥበብ የተዋሀደበትን አዲሱን ገፅታዋን ለዓለም እየገለጠች ትገኛለች።

በአጠቃላይ፣ ከስድስተኛው እስከ ሰባተኛው ምርጫ የተጓዝንባቸው የአምስቱ ዓመታት ገፆች፣ የኢትዮጵያ ውበት ከግጥምና ከዘፈን ወጥቶ መሬት የነካባቸው የክብር ዘመናት ናቸው።

በአዶኒያስ ወልደአረጋይ
#ethiopia #tourism #ecotourism #greentourism #sustainabletourism #ebc