የሞጆ ደረቅ ወደብ፡ የኢትዮጵያ የንግድ ሎጂስቲክስ ዘመናዊነት እና የቀጣናው የኢኮኖሚ ትስስር ማዕከል
*********************

ከጅቡቲ ወደብ እስከ ሀገር ውስጥ ማከፋፈያ ማዕከላት የተዘረጋው የሎጂስቲክስ አውታረ መረብ የኢትዮጵያ ኢኮኖሚ የደም ሥር ነው።

በዚህ የንግድ ሰንሰለት ውስጥ የሞጆ ደረቅ ወደብ ዕቃ ከማስተናገድ ባለፈ የሀገራችንን ወጪ ንግድ ከዓለም ገበያ ጋር የሚያስተሳስር ወሳኝ የሎጂስቲክስ መገናኛ ሆኖ እያገለገለ ይገኛል።

ከጅቡቲ ወደብ የሚነሱ የኢንዱስትሪ ግብዓቶች፣ የነዳጅ ምርቶች፣ ማሽነሪዎች እና ሌሎች የንግድ ሸቀጦች ወደ ኢትዮጵያ ገብተው ለተለያዩ መዳረሻዎች የሚሰራጩበት ዋነኛ ማዕከል የሆነው ሞጆ አሁን አዲስ የሎጂስቲክስ አቅም ተላብሷል።

በዓለም ባንክ ድጋፍ በ60 ሄክታር መሬት ላይ ያረፈው የዘመናዊ ሎጂስቲክስ ማዕከል የማስፋፊያ ግንባታ የመጀመሪያ ምዕራፍ መመረቅ ይህን የለውጥ ጉዞ የሚያጠናክር ትልቅ እርምጃ ነው።

ማዕከሉ በዓመት እስከ አንድ ሚሊዮን ባለ ሃያ ጫማ ኮንቴይነሮችን ማስተናገድ የሚችሉ ጣቢያዎች እና ዘመናዊ መጋዘኖችን በውስጡ ይዟል።

ከዚህም ባሻገር የደረቅ ብትን ጭነቶችን በሀገር ውስጥ ማሸግ እንዲቻል በማድረግ የሎጂስቲክስ ወጪን ለመቀነስ፣ የውጭ ምንዛሬን ለመቆጠብ እና ለዜጎች የሥራ ዕድል ለመፍጠር የሚያስችል ሰፊ አቅም ፈጥሯል።

የማዕከሉን የአሠራር ፍጥነት ከሚያሳድጉ አዳዲስ መሠረተ ልማቶች መካከል በኢትዮጵያ ለመጀመሪያ ጊዜ የተተከለው የባቡር ላይ ክሬን በዋናነት ይጠቀሳል።

ይህ ቴክኖሎጂ በባቡር መስመር የሚደረገውን የኮንቴይነር ዝውውር በፍጥነት በማከናወን የጭነት ማስተናገጃ ጊዜን በእጅጉ ያሳጥራል።

ከዚህ ቀደም የነበረውን የኮንቴይነሮች የቆይታ ጊዜ በመቀነስም የባለብዙ ዘርፍ የትራንስፖርት ትስስርን ውጤታማነት በተግባር ያረጋገጠ ነው።

የሞጆ ደረቅ ወደብ ዘመናዊነት የሚለካው በመሬት እና በሕንፃ ስፋት ብቻ አይደለም። በዲጂታል መሠረተ ልማት የተሳሰረ አሠራር መዘርጋቱ የማዕከሉን የአገልግሎት ፍጥነት እና ቅልጥፍና ወደ አዲስ ምዕራፍ አሸጋግሮታል።

ዘመናዊ የጣቢያ አስተዳደር ሥርዓትን ጨምሮ የጭነት መቆጣጠሪያ ቴክኖሎጂዎች እና የኤሌክትሮኒክ ክፍያ አሠራሮች ተግባራዊ መደረጋቸው የመረጃ ፍሰቱን ፈጣን፣ አሠራሩንም ግልጽ አድርጎታል።

በዚህም ቀደም ሲል ከወረቀት ሰነዶች፣ ከተደጋጋሚ ሂደቶች እና ከረጅም መዘግየቶች ጋር ተያይዘው የነበሩ የሥራ ጫናዎች ተቀርፈዋል።

የጉምሩክ ሂደቶች በፍጥነት እንዲጠናቀቁ እንዲሁም አስመጪዎች፣ ላኪዎች፣ አምራቾች እና ጠቅላላ የንግዱ ማኅበረሰብ በተሻለ ፍጥነት ሥራቸውን እንዲያከናውኑ ምቹ ሁኔታ ተፈጥሯል።

ይህ የሎጂስቲክስ አብዮት የሞጆ ደረቅ ወደብን ብቻ የሚመለከት ሳይሆን፣ የኢትዮጵያን የንግድ ሎጂስቲክስ ከባህላዊ አሠራር ወደ ዲጂታል፣ ፈጣን እና ተወዳዳሪ ሥርዓት የሚያሸጋግር ነው።

በተለይም የባቡር፣ የመንገድ፣ የደረቅ ወደብ እና የዲጂታል ሥርዓት ትስስር የሎጂስቲክስ ሰንሰለቱን የበለጠ ቀልጣፋ በማድረግ የንግድ ወጪን እና ጊዜን ለመቀነስ ወሳኝ አቅም ይፈጥራል።

ማዕከሉ ኢትዮጵያን፣ ደቡብ ሱዳንን እና ኡጋንዳን የሚያስተሳስረው የ‘ደሱ ኮሪደር' አካል በመሆኑ፣ የሀገራችንን የሎጂስቲክስ አቅም ከቀጣናዊ ገበያዎች ጋር ለማስተሳሰር የላቀ ድርሻ አለው።

ይህም በአፍሪካ አህጉራዊ ነፃ የንግድ ቀጣና ውስጥ ኢትዮጵያ የሚኖራትን ተሳትፎ ለማሳደግ እና ቀጣናዊ የኢኮኖሚ ትስስርን ለማጠናከር የጀርባ አጥንት ሆኖ ያገለግላል።

ከጅቡቲ ወደብ የሚጀምረው የጭነት ጉዞ በባቡር እና በመንገድ ተጓጉዙ፣ በሞጆ ዘመናዊ የሎጂስቲክስ ማዕከል በተሳለጠ አሠራር ትራንዚት አድርጎ ወደ ተለያዩ የሀገር ውስጥ እና ቀጣናዊ ገበያዎች ሲሰራጭ፤ የንግድ ፍሰቱን ከማቀላጠፍ ባለፈ የኢትዮጵያን ኢኮኖሚያዊ ተወዳዳሪነት የሚያረጋግጥ ይሆናል።

በኢንቲሃድ አብራር
#ethiopia #ebc #trade #logistics #economy #digitaltransformation #supplychain #afcfta

(ዘ-ሐበሻ ዜና) አዳዲስ ጥናቶች እንዳመለከቱት የአፍሪካ ሀገራት የዲጂታል የህዝብ መሠረተ ልማትን እያስፋፉ በመምጣታቸው፣ የዲጂታል መታወቂያ በአህጉሪቱ የፋይናንስ አካታችነትን ከሚያሳድጉ ዋነኛ ሞተሮች አንዱ ሆኗል። በተለይም በኢትዮጵያ፣ በናይጄሪያ እና በሩዋንዳ ተግባራዊ እየተደረጉ ያሉ መሠረታዊ የዲጂታል መታወቂያ ሥርዓቶች የፋይናንስ አቅርቦት ተደራሽነትን ቅርጽ እየቀየሩት ይገኛሉ።

የዓለም ባንክ፣ የብሩኪንግስ ተቋም፣ የተባበሩት መንግሥታት የአፍሪካ ኢኮኖሚክ ኮሚሽን (UNECA) እና የአፍሪካ ልማት ባንክ ያወጧቸው አዳዲስ ግምገማዎች እንደሚያሳዩት፣ እርስ በእርስ መናበብ የሚችሉ የዲጂታል መታወቂያዎች፣ የክፍያ ሥርዓቶች እና የአፍሪካ ነጻ የንግድ ቀጠና (AfCFTA) የዲጂታል ንግድ ስምምነቶች የፋይናንስ ተደራሽነትን እያፋጠኑት ነው። እስካሁን ባለው መረጃ መሠረት፣ የናይጄሪያው ብሔራዊ መታወቂያ (ኒን) ከ126 ሚሊዮን በላይ ዜጎችን የመዘገበ ሲሆን፣ የኢትዮጵያው 'ፋይዳ' ዲጂታል መታወቂያ ከታለመለት 90 ሚሊዮን ዜጎች ውስጥ ከ15 ሚሊዮን በላይ የሚሆኑትን መዝግቧል። የሩዋንዳው የባዮሜትሪክ መታወቂያ ሥርዓት ደግሞ ከሞላ ጎደል ሁሉንም የሀገሪቱን አዋቂዎች አካቷል።

የኢትዮጵያ ብሔራዊ መታወቂያ ፕሮግራም ዋና ዳይሬክተር አቶ ዮዳሄ ዘሚካኤል በበኩላቸው፣ "አንድ ኢትዮጵያዊ አርሶ አደር ወይም አነስተኛ ነጋዴ የፋይዳ መታወቂያ ሲያገኝ፣ በስልኩ የባንክ ሂሳብ ለመክፈት፣ ብድር ለማግኘት እና ድንበር ዘለል ንግድ ለማካሄድ የሚያስችለውን ህጋዊ ማረጋገጫ ያገኛል" ሲሉ አስረድተዋል። ይህ የዲጂታል ሪፎርም የደንበኞችን ማንነት የማረጋገጫ ወጪን በ90 በመቶ የቀነሰ ሲሆን፣ የድንበር ዘለል የገንዘብ ዝውውር ክፍያዎችንም ከዘጠኝ በመቶ ወደ ከሶስት በመቶ በታች በማውረድ ለአነስተኛ ንግዶች በቢሊዮን የሚቆጠር ገንዘብ በማዳን ላይ ይገኛል። በናይጄሪያም በየቀኑ ከ1.3 ሚሊዮን በላይ የማንነት ማረጋገጫ ጥያቄዎች እየተስተናገዱ መሆኑን የናይጄሪያ ብሔራዊ የማንነት አስተዳደር ኮሚሽን ዋና ዳይሬክተር አቢሶዬ ኮከር-ኦዱሶቴ ገልጸዋል።

የቀድሞው የዩኔካ ዋና ጸሐፊ ቬራ ሶንግዌ፣ አፍሪካውያን ገንዘብ ከአክራ ወደ ሌጎስ ለመላክ ብቻ በአውሮፓ ባንኮች በኩል በማሳለፍ እስከ አስር በመቶ የሚደርስ የውጭ ምንዛሬ ክፍያ ይቆረጥባቸው እንደነበር አስታውሰው፣ አሁን ግን በአፍሪካ ነጻ የንግድ ቀጠና ስምምነት ሥር የዲጂታል መታወቂያን ከክፍያ ሥርዓቶች ጋር በማስተሳሰር ይህን የገንዘብ ብክነት ማስቀረት መቻሉን አብራርተዋል።

ይህ የቴክኖሎጂ ሽግግር በተለይ የሴቶችን የፋይናንስ ተጠቃሚነት በእጅጉ ያሳደገ ሲሆን፣ በኢትዮጵያ እና ናይጄሪያ የሴቶች የባንክ ሂሳብ ባለቤትነትን ወደ 40 በመቶ በማሳደግ የጾታ ልዩነትን በማጥበብ ረገድ ትልቅ ሚና ተጫውቷል። በመጨረሻም የዲጂታል መታወቂያ (እንደ ሞሲፕ/MOSIP ባሉ ሥርዓቶች የተገነባው) ከአፍሪካ ነጻ የንግድ ቀጠና የክፍያ ሥርዓቶች ጋር መጣመሩ፣ ለ1.4 ቢሊዮን ህዝብ የተዋሃደ አህጉራዊ ኢኮኖሚ ለመገንባት ጠንካራ መሠረት እየጣለ መሆኑን የዘርፉ ተንታኞች አረጋግጠዋል።

(ዘ-ሐበሻ ዜና) ቻይና ዲፕሎማሲያዊ ግንኙነት ላላት ሁሉም የአፍሪካ ሀገራት፣ እንዲሁም በዝቅተኛ የዕድገት ደረጃ ላይ ለሚገኙ ሀገራት በሙሉ ከቀረጥ ነፃ የንግድ ዕድልን የፈቀደች የመጀመሪያዋ ግዙፍ ኢኮኖሚ ባለቤት ከሆነች ሶስት ወራት አልፈዋል። ከግንቦት 1 ቀን 2026 ጀምሮ ተግባራዊ የሆነውን ይህንን አበረታች ፖሊሲ ቻይና ለ53 የአፍሪካ ሀገራት ዘርግታለች። በቻይና የሚገኙ ሁለት የአፍሪካ ዲፕሎማቶች ይህ የቻይና ፖሊሲ በተለይም በቡና ንግድ ላይ ስላለው ጠቀሜታ፣ እንዲሁም ቻይና በ'ግሎባል ሳውዝ' ሀገራት መካከል ትብብርን በማሳደግ ረገድ ያላትን አርአያነት ሚና ለግሎባል ታይምስ አጋርተዋል።

በቻይና የኢትዮጵያ ኤምባሲ ምክትል የሚሲዮን መሪ የሆኑት ወይዘሮ አዚዛ ገለታ እንደተናገሩት፣ ይህ የንግድ ፖሊሲ ቻይና ከአፍሪካ ጋር ያላትን የጋራ ተጠቃሚነት ላይ የተመሰረተ የኢኮኖሚ ትብብር ለማጠናከር ያላትን ቁርጠኝነት የሚያሳይ ነው። የቡና መገኛ ለሆነችው ኢትዮጵያ፣ ይህ ጅምር ከፍተኛ ዕድሎችን ይዞ መጥቷል። "ቡና ቀዳሚ የግብርና የወጪ ንግድ ምርታችን ብቻ ሳይሆን የባህላዊ ቅርሳችንም አካል ነው" ያሉት ወይዘሮ አዚዛ፣ ኢትዮጵያውያን ለዘመናት ቤተሰብ እና ጎረቤት ተሰብስቦ ቡና በማፍላት የሚያካሂዱትን የእንግዳ ተቀባይነት እና የወዳጅነት መገለጫ የሆነውን ልዩ የቡና ባህል ጠብቀው ማቆየታቸውን አስረድተዋል።

የተሻሻለውን የገበያ ትስስር ተከትሎ ወደ ቻይና የሚላከው የኢትዮጵያ ቡና በከፍተኛ ሁኔታ እንደሚያድግ ይጠበቃል። ቻይና በዓለም ላይ በፍጥነት በማደግ ላይ ካሉ የቡና ፍጆታ ገበያዎች አንዷ መሆኗን እና በአሁኑ ወቅት የኢትዮጵያ ሶስተኛዋ ትልቋ የቡና ገበያ መዳረሻ መሆኗንም ምክትል ሚሲዮን መሪዋ ጠቁመዋል። ባለፈው ሀምሌ ወር የወጣው የ2026 የቻይና ከተሞች የቡና ልማት ሪፖርት እንደሚያሳየው፣ በ2025 የቻይና የቡና ኢንዱስትሪ ዋጋ 354.9 ቢሊዮን ዩዋን (52.63 ቢሊዮን ዶላር) የደረሰ ሲሆን፣ ይህም ካለፈው ዓመት ጋር ሲነጻጸር የ13.3 በመቶ ዕድገት አሳይቷል። ዓመታዊ የነፍስ ወከፍ የቡና ፍጆታ ከ22.24 ሲኒ ወደ 28.57 ሲኒ ከፍ ያለ ሲሆን፣ የቡና ፍሬ ገቢ ንግድ መጠን ደግሞ በ73.9 በመቶ አድጓል።

ቻይና ተግባራዊ ያደረገችው ከቀረጥ ነፃ ፖሊሲ የኢትዮጵያን ቡና ተወዳዳሪነት እንደሚያሳድግ፣ ከወጪ ንግድ የሚገኘውን ገቢ ከፍ እንደሚያደርግ እና በማቀነባበር፣ ማሸግ፣ ብራንዲንግ፣ ሎጂስቲክስ እና የጥራት ማረጋገጫን ጨምሮ በቡና እሴት ሰንሰለት ላይ ሰፊ ኢንቨስትመንትን እንደሚያበረታታ የኢትዮጵያዋ ዲፕሎማት ያምናሉ። ከዚህ ዓመት ሀምሌ 20 ጀምሮ፣ ቻይና ዲፕሎማሲያዊ ግንኙነት ካላቸው ሁሉም የአፍሪካ ሀገራት የኳራንቲን መስፈርቶችን ለሚያሟሉ የቡና ፍሬዎች ሙሉ የገበያ ዕድል (full market access) ፈቅዳለች። ይህ የሙሉ ገበያ ዕድል በቻይና-አፍሪካ የግብርና ገበያ ትስስር ትብብር ውስጥ እንደ ትልቅ ታሪካዊ ስኬት ይቆጠራል።

ኢትዮጵያ ይህንን ታሪካዊ ፖሊሲ በደስታ እንደምትቀበለው የገለጹት ወይዘሮ አዚዛ፣ ሀገሪቱ በ2024 የቻይናን ከቀረጥ ነፃ ዝግጅት ከተቀላቀለችበት ጊዜ ጀምሮ በሁለትዮሽ የንግድ እና የኢኮኖሚ ትብብር ላይ አዎንታዊ ተጽዕኖ ማየቷን ተናግረዋል። አክለውም "ፖሊሲው ከታሪፍ ማበረታቻነትም የዘለለ ነው። በጋራ መከባበር፣ የጋራ እድገት እና አሸናፊነት ላይ የተመሰረተ የደቡብ-ደቡብ ትብብር ተግባራዊ ቁርጠኝነትን ያሳያል" ብለዋል። ይህም የአፍሪካ ሀገራት የወጪ ንግዳቸውን እንዲያበዙ፣ የማምረት አቅማቸውን እንዲያጠናክሩ እና በዓለም አቀፍ የእሴት ሰንሰለት ውስጥ ይበልጥ ንቁ ተሳትፎ እንዲያደርጉ አዳዲስ ዕድሎችን ይፈጥራል።

እንደ 'ግሎባል ሳውዝ' አባላትነታቸው ኢትዮጵያ እና ቻይና አካታች እና ቀጣይነት ያለው ልማትን የማስተዋወቅ የጋራ ራዕይ ይጋራሉ። ይህ ጅምር ታዳጊ ኢኮኖሚዎችን የልማት ፍላጎት በተሻለ ሁኔታ የሚያንጸባርቁ የግብርና የንግድ ሕጎችን ለመገንባት ጠቃሚ መለኪያ መሆኑንም ጠቁመዋል። በተጨማሪም የቀጣናዊ ትስስርን እና ዓለም አቀፍ የገበያ ዕድልን በመደገፍ የቻይና-አፍሪካ የትብብር ፎረም እና የአፍሪካ አህጉራዊ ነፃ የንግድ ቀጠና ዓላማዎችን ያሟላል። የአፍሪካ ህብረት እንዳስታወቀው፣ AfCFTA አህጉሪቱን ወደ ዓለማችን ትልቁ የነፃ ንግድ ቀጠና ለመቀየር ያለመ የህብረቱ ቀዳሚ ፕሮጀክት ነው።

የቻይናው የገበያ ዕድል ከንግድ ፖሊሲነት ባሻገር ተራውን ሕዝብ የሚጠቅም የልማት ትብብር ማሳያ ነው። የቡና እርሻ በሚሊዮን የሚቆጠሩ ኢትዮጵያውያን ቤተሰቦችን ስለሚያስተዳድር፣ ወደ ቻይና ገበያ ሰፊ መግቢያ ማግኘት ለድህነት ቅነሳ፣ ለገጠር እድገት እና ለሀገራዊ የኢኮኖሚ ሽግግር ቀጥተኛ ትርጉም አለው። ፖሊሲው ለኢትዮጵያ ቡና ቋሚ ፍላጎት እንዲኖር፣ የአርሶ አደሩ ገቢ እንዲያድግ እና የገጠር ማህበረሰብ አቅም እንዲጠናከር ያደርጋል። ዲፕሎማቷ አክለውም፣ ቻይናውያን በግብርና ማቀነባበሪያ፣ በኮልድ-ቼይን (Cold-chain) ሎጂስቲክስ፣ በምግብ ማምረቻ እና እሴት በሚጨምሩ ኢንዱስትሪዎች ላይ በኢትዮጵያ የሚያደርጉትን ኢንቨስትመንት ሀገሪቱ በደስታ እንደምትቀበል አረጋግጠዋል። እንዲህ ዓይነቱ ኢንቨስትመንት የኢንዱስትሪ ልማትን፣ የቴክኖሎጂ ሽግግርን እና የስራ ፈጠራን ይደግፋል።

በቻይና የሌሶቶ አምባሳደር የሆኑት ማፓባሎ ሊዲያ ማይል በበኩላቸው ለግሎባል ታይምስ እንደተናገሩት፣ ከግንቦት ወር ጀምሮ ተግባራዊ የሆነው ከቀረጥ ነፃ ፖሊሲ፣ "በቻይና-አፍሪካ የትብብር ፎረም ማዕቀፍ ስር የተገቡ ቃሎች ቀጥተኛ እና ተጨባጭ ውጤት ነው። 'የጋራ ተጠቃሚነት ትብብር' የሚለውን ዲስኩር ወደ ተግባራዊ ፖሊሲ የሚቀይር ነው" ብለዋል። ፖሊሲው የንግድ ችግሮችን ለመቀነስ እና ተቋማዊ ዋስትናዎችን ለማስጠበቅ የተዋቀረ እና ደረጃ በደረጃ የሚተገበር አካሄድ መሆኑንም ገልጸዋል።

የአፍሪካ ሀገራት አሁንም ከቀረጥ ባለፈ እንደ ሎጂስቲክስ፣ ደረጃዎች እና የገበያ ትስስር አቅም ያሉ ፈተናዎች እንዳሉባቸው ለሚነሱ አስተያየቶች ምላሽ የሰጡት አምባሳደር ማይል፣ የታሪፍ ቅነሳ ንግድን ለማስፋፋት አስፈላጊ ቅድመ ሁኔታ ቢሆንም፣ ስምምነቶችን ከዳር ለማድረስ ግን ተጨማሪ ሁኔታዎች እንደሚያስፈልጉ አብራርተዋል። የባህር በር የሌላትን ሌሶቶን እንደ ምሳሌ ያነሱት አምባሳደሯ፣ ሀገሪቱ ከፍተኛ የሎጂስቲክስ መሰናክሎች እና የትራንስፖርት ወጪዎች እንዳሉባት ተናግረዋል። የጤና አጠባበቅ እና የእፅዋት ጤና እርምጃዎችን፣ እንዲሁም የጥራት ደረጃዎችን ማሟላት ለበርካታ የሌሶቶ ኢንተርፕራይዞች አሁንም ትልቅ ፈተና ነው።

አምባሳደሯ ከዚህ አበረታች የታሪፍ ፖሊሲ ሙሉ በሙሉ ተጠቃሚ ለመሆን፣ ለአፍሪካ ላኪዎች ስልታዊ የቴክኒክ ድጋፍ፣ በግብርና ማቀነባበሪያ ዘርፍ ላይ ያተኮሩ ኢንቨስትመንቶች እና የተሻሻለ የንግድ ማሳለጫ አሰራር እንደሚያስፈልግ ጠቁመዋል። "በቅርቡ በቻይና ጉምሩክ የተዋወቁት እንደ የግብርና ምርቶች 'ግሪን ቻናል 2.0' የመሳሰሉ አነሳሽነቶች እና የተፈቀደላቸው የኢኮኖሚ ኦፕሬተሮች የጋራ ዕውቅና አቅም ግንባታ ማስፋፋት፣ ከቀረጥ ውጪ የሆኑ የንግድ መሰናክሎችን ለማሸነፍ የሚያስፈልጉ ትክክለኛ የተቋማዊ ድጋፍ ዓይነቶች ናቸው" በማለት ማብራሪያቸውን አጠቃልለዋል።

የቢሾፍቱ አውሮፕላን ማረፊያ ፕሮጀክት ኢትዮጵያ በአቪየሽን ዘርፍ መሪነቷን እንደታጠናክር ያስችላታል - ሲኤንኤን
***********************

የዓለማችን ታዋቂው የዜና መረብ ሲኤንኤን (CNN) "ኮኔክቲንግ አፍሪካ" በተሰኘው ዝነኛ ፕሮግራሙ፣ የአፍሪካ የአቪዬሽን መሪ የሆነው የኢትዮጵያ አየር መንገድ እየመራው ያለውን ታላቅ የመሠረተ ልማት፣ የኢኮኖሚ እና የቱሪዝም እምርታ በሰፊው ዳስሷል።

ዘገባው እንደ አመላከተው፣ የኢትዮጵያ አየር መንገድ ለአህጉሪቱ ምሳሌ የሚሆን የዕድገት ሞተር ከመሆኑም በላይ ኢትዮጵያን የዓለም አቀፍ ትስስር ማዕከል በማድረግ ረገድ ወደ አዲስ እየተሸጋገረ ይገኛል።

ዘገባው ኢትዮጵያ የአቪዬሽን ዘርፏን ዘመናዊ በማድረግ፣ የአፍሪካ አህጉራዊ ነፃ ንግድ ቀጣናን (AfCFTA) ተግባራዊነት በማፋጠን እና የተፈጥሮ ሀብቶቿን ለዓለም አስተዋውቃ የቱሪዝም አቅሟን በመገንባት በኩል እያከናወነቻቸው ያሉትን ዐበይት ተግባራት በስፋት አሳይቷል።

በዘገባው ጎልተው ከተካተቱት ዐበይት ጉዳዮች መካከል በ12.5 ቢሊዮን ዶላር ወጪ ግንባታው የተጀመረው እና በአፍሪካ ታሪክ ትልቁ የሆነው የቢሾፍቱ ዓለም አቀፍ አውሮፕላን ማረፊያ ሜጋ ፕሮጀክት ቀዳሚው ነው።

ይህ ዘመናዊ የአቪዬሽን መንደር የመጀመሪያው ምዕራፍ ሲጠናቀቅ 60 ሚሊዮን፣ ሙሉ በሙሉ ሲጠናቀቅ ደግሞ በዓመት እስከ 110 ሚሊዮን መንገደኞችን የማስተናገድ እና 4 ሚሊዮን ቶን ካርጎ የማጓጓዝ ከፍተኛ አቅም ይኖረዋል።

የኢትዮጵያ አየር መንገድ ዋና ሥራ አስፈፃሚ አቶ መስፍን ጣሰው ከሲኤንኤን ዘጋቢ ጋር ባደረጉት ቃለ ምልልስ፣ አዲሱ አውሮፕላን ማረፊያ አፍሪካውያንን እርስ በእርስ በማስተሳሰር ረገድ የመሪነት ሚናውን እንደሚቀጥል ገልጸዋል።

በተጨማሪም አየር መንገዱ የአፍሪካ ነፃ ንግድ ቀጣናን ስኬታማ ለማድረግ እና አህጉራዊ የንግድ ትስስርን ወደ ላቀ ደረጃ ለማሸጋገር ቁልፍ ሞተር መሆኑን አስረድተዋል።

በዘገባው ላይ እንደተጠቆመው የኢትዮጵያን ተፈጥሯዊና ታሪካዊ ሀብቶች ለዓለም አቀፍ እና ለአህጉራችን ጎብኚዎች ተደራሽ ለማድረግ ዘመናዊ የመሠረተ ልማት ግንባታዎች፣ ደረጃቸውን የጠበቁ የማረፊያ ስፍራዎች እና አዳዲስ የመንገድ ዝርጋታዎች እየተከናወኑ ይገኛሉ።

ይህም ኢትዮጵያ ከቱሪዝም ዘርፍ የምታገኘውን የኢኮኖሚ ጥቅም ወደ ላቀ ደረጃ የሚያሸጋግር ነው።

የሲኤንኤን ዘገባ የኢትዮጵያ አየር መንገድ በአቪዬሽን ዘርፍ እያመጣ ያለውን ብሩህ ተስፋ እና በአቪዬሽን መሠረተ ልማት አህጉራዊ መሪነቷን በጽኑ የምታረጋግጥበትን የልማት ጉዞ በግልጽ ያሳየ ነው።

የአፍሪካ ኩራት የሆነው የኢትዮጵያ አየር መንገድ ሀገራችን የአህጉሪቱ ዋና የንግድ፣ የቱሪዝም እና የኢኮኖሚ መገናኛ ማዕከል በማድረግ ጉዞውን አጠናክሮ ቀጥሏል።

በሔዋን ጌታቸው

#ethiopia #ebc #bishoftuairport #ethiopianairlines #connectingafrica #cnn

የኢትዮጵያ አየር መንገድ
የኢትዮጵያ የዲፕሎማሲና የኢኮኖሚ ጥንካሬ መገለጫ
#ethiopia | የኢትዮጵያ አየር መንገድ ባለፉት ሰባ ዓመታት ከተራ የንግድ ተቋምነት ባለፈ፣ የሀገሪቱን የውጭ ግንኙነት ፖሊሲ የሚያስፈጽም ቀዳሚ የዲፕሎማሲ መሣሪያ ሆኖ አገልግሏል።

ተቋሙ በተለይ የኢትዮጵያን "Soft Power" ወይም ለስላሳ ኃይል በዓለም መድረክ ላይ በማገንነን ረገድ ወደር የለውም።

፩. የፓን-አፍሪካኒዝም ክንፍ
(The Wing of Pan-Africanism)

አየር መንገዱ አፍሪካን እርስ በእርስ በማገናኘት የፓን-አፍሪካኒዝም ርዕዮትን በተግባር ቀይሮታል። ብዙ የአህጉሪቱ ሀገራት የራሳቸው አየር መንገድ በሌላቸው ወቅት፣ የኢትዮጵያ አየር መንገድ ክፍተቱን በመሙላት የኢትዮጵያን ስልታዊ ተሰሚነት (Strategic Importance) ከፍ አድርጎታል።

ዛሬም ለ"አፍሪካ ነፃ የንግድ ቀጠና" (AfCFTA) ስኬት ዋነኛው የሎጂስቲክስ ሞተር ሆኖ እያገለገለ ይገኛል።

፪. ሰብዓዊ ዲፕሎማሲ
(Humanitarian Diplomacy)

የኮቪድ-19 ትዝታ
አብዛኞቹ ዓለም አቀፍ አየር መንገዶች በረራ ባቆሙበት ወቅት፣ የኢትዮጵያ አየር መንገድ የሕክምና ቁሳቁሶችን በማጓጓዝ እንደ ዓለም አቀፍ የሎጂስቲክስ ማዕከል ሆኖ አገልግሏል።

የኢቦላ ወረርሽኝ
በ2014 በምዕራብ አፍሪካ ወረርሽኙ በተከሰተ ጊዜ በረራ ባለማቋረጥ 'የችግር ጊዜ አጋር' መሆኑን በተግባር አሳይቷል። ይህ የሀገራችንን በጎ ገጽታ በዓለም ፊት ገንብቶታል።

፫. አዲስ አበባ፦ "የአፍሪካ ጄኔቫ"
(The Geneva of Africa)

አዲስ አበባ የአፍሪካ ኅብረት (AU) እና የተመድ የአፍሪካ ኢኮኖሚክ ኮሚሽን መቀመጫ እንድትሆን ካስቻሏት ዋና ዋና ምክንያቶች አንዱ የአየር መንገዱ ሰፊ መዳረሻ ነው።

መሪዎችና ዲፕሎማቶች በቀላሉ ወደ አዲስ አበባ እንዲመጡ በማድረግ ከተማዋ የአህጉሪቱ ፖለቲካዊ ርዕሰ መዲና ሆና እንድትቀጥል አድርጓል።

፬. የአሜሪካና ቦይንግ ቁርኝት
(The Boeing Factor)
አየር መንገዱ ከአሜሪካው ቦይንግ ኩባንያ ጋር ያለው የረጅም ዘመን ግንኙነት ለኢኮኖሚ ዲፕሎማሲያችን እንደ ምሶሶ ይቆጠራል።

ስትራቴጂካዊ አጋርነት
ኢትዮጵያ በአሜሪካ እይታ የዕርዳታ ፈላጊነት ገጽታዋ ተቀይሮ 'ስትራቴጂካዊ የንግድ አጋር' እንድትሆን አድርጓታል።

የፖለቲካ ማለስለሻ
(Lobbying Power)
በሁለቱ ሀገራት መካከል የፖለቲካ አለመግባባቶች በሚፈጠሩበት ወቅት እንኳን፣ እንደ ቦይንግ ያሉ ግዙፍ ተቋማት የንግድ ፍላጎት ግንኙነቱ እንዳይላላ እንደ ዋስትና ሆኖ ያገለግላል።

የ737 MAX ቀውስ
አየር መንገዱ አደጋውን ያስተዳደረበት ሙያዊ ብቃት፣ በዓለም አቀፍ የአቪዬሽን ማህበረሰብ ዘንድ 'አስተማማኝ አጋር' የሚል የከበረ ስም አሰጥቶታል።

ባጭሩ የኢትዮጵያ አየር መንገድ ቦይንግን መምረጡ የቴክኖሎጂ ፍላጎት ብቻ ሳይሆን፣ ኢትዮጵያ በዓለም አቀፍ ፖለቲካ ውስጥ ልዩ ስፍራ እንድታገኝ የሚያስችል ብልኅ የኢኮኖሚ ዲፕሎማሲ መሣሪያ ነው። ይህ ተቋም የሀገራችን ኩራት ብቻ ሳይሆን የዲፕሎማሲያችን ጋሻም ነው።

ለ Getu Tenesgen ( ጌጡ ተመስገን )
ቀመርቲ ጨንገሬ
#ethiopianairlines #diplomacy #boeing #panafricanism #aviation #economy #getutemesgen #getu #ጌጡ #ጌጡተመስገን #addisababa #softpower #ethiopia

የሆርሙዝ ስርጥ መዘጋትና ለኢትዮጵያም ጭምር ስጋት ነው
#ethiopia | የሆርሙዝ ስርጥ ለዓለም የንግድ እንቅስቃሴ፣ በተለይም ለነዳጅ ልውውጥ ወሳኝ የደም ዝውውር መስመር ነው። ኢራን ስርጡን መዝጋቷን ተከትሎ፣ እንደ ኢትዮጵያ ያሉ ነዳጅን ከባህር ማዶ የሚያስገቡ አገራት የህልውና ስጋት ውስጥ መውደቃቸው አልቀረም።

የምጣኔ ሀብት ባለሙያዎቹ እንደሚሉት፣ ይህ ቀውስ ኢትዮጵያ የነዳጅና መሰል ምርቶች እጥረት እንዳይገጥማት አስገዳጅ የሆኑ "Plan B" አማራጮችን እንድትከተል ያስገድዳታል።

የባለሙያዎች ምክረ-ሀሳብ

1. አቶ ክቡር ገና (የፓን አፍሪካን ንግድና ኢንዱስትሪ ምክር ቤት ዋና ዳይሬክተር)

* ዋናው ነጥብ፦ የዓለም ፖለቲካ ተለዋዋጭ በመሆኑ በአንድ መስመር ላይ ብቻ መተማመን አደገኛ ነው።

* መፍትሔ፦ ኢትዮጵያ የንግድ ትኩረቷን እንደ ጋና፣ ናይጄሪያ እና ጅቡቲ ባሉ የአፍሪካ አገራት ላይ በማድረግ የንግድ ኮሪደሮቿን ማስፋት አለባት።

2. ዶክተር ቆስጠንጢንዮስ በርኸተስፋ (የምጣኔ ሀብት ባለሙያ)

* ዋናው ነጥብ፦ የስርጡ መዘጋት የዓለምን ኢኮኖሚ ከማናጋቱም በላይ በኢትዮጵያ ላይ ቀጥተኛ አሉታዊ ተጽዕኖ አለው።

* መፍትሔ፦ በተለይም እንደ ናይጄሪያ ካሉ ነዳጅ አምራች አገራት ጋር ያለውን ዲፕሎማሲያዊ ግንኙነት በማጠናከር፣ የነዳጅ ፍላጎትን ከአህጉሩ ውስጥ ለማሟላት ጥረት መደረግ አለበት።

ለኢትዮጵያ የቀረቡ የመፍትሔ እርምጃዎች
ባለሙያዎቹ ኢትዮጵያ ከዚህ ኢኮኖሚያዊ አዙሪት እንድትወጣ የሚከተሉትን ነጥቦች በአጽንኦት ጠቅሰዋል፦

* የዲፕሎማሲ ጥንካሬ፦ ከአፍሪካ አገራት ጋር ያለውን ግንኙነት ለንግድና ለኢኮኖሚ ጥቅም በሚውል መልኩ ማስተካከል።

* የመዳረሻ ብዝሃነት፦ ምርቶችን ከአንድ አቅጣጫ ብቻ ከመጠበቅ ይልቅ፣ የአህጉራዊ የንግድ ትስስርን (AfCFTA) እንደ መልካም አጋጣሚ መጠቀም።

* ቅድመ ዝግጅት፦ መሰል ዓለም አቀፍ ቀውሶች ከመከሰታቸው በፊት አማራጭ መንገዶችን ቀድሞ መጥረግ።

"የዓለም ፖለቲካ ፊቱን ሲያዞር፣ ወደ ጎረቤት መመልከት የብልህነት መንገድ ነው!"

Getu Temesgen - (ጌጡ ተመስገን)
#getutemesgen #getu #ጌጡ #ኢትዮጵያ #ኢኮኖሚ #የሆርሙዝስርጥ #አፍሪካ #ንግድ #ነዳጅ #ethiopia #economy #hormuzstrait #africatrade

ከ1,400 በላይ ኩባንያዎች በአንድ መድረክ፡ 15ኛው ኢትዮ-ቻምበር ዓለም አቀፍ የንግድ ትርኢት ተከፈተ!

​በኢትዮጵያ የንግድና የዘርፍ ማኅበራት ምክር ቤት አዘጋጅነት የሚካሄደውና ትልቅ ግምት የሚሰጠው የንግድ ትርኢት ዛሬ በአዲስ አበባ፣ መስቀል አደባባይ በይፋ ተጀምሯል።

• ​👥 ተሳታፊዎች፦ ከ1,300 በላይ የሀገር ውስጥ እና 150 የሚሆኑ የ20 ሀገራት ዓለም አቀፍ ኩባንያዎች።

• ​📅 የቆይታ ጊዜ፦ ለ5 ተከታታይ ቀናት የሚቆይ የንግድ ድግስ።

• ​🎯 መሪ ቃል፦ "የኢትዮጵያን ይግዙ! በኢትዮጵያ ኢንቨስት ያድርጉ!"

• ​🏭 ዘርፎች፦ ከግብርና እስከ ከፍተኛ ቴክኖሎጂ፣ ከፋይናንስ እስከ ሎጅስቲክስ።

​የዝግጅቱ ፋይዳ፦

ይህ አውደ ርዕይ ኢትዮጵያ የዓለም ንግድ ድርጅት (WTO) አባል ለመሆን በምታደርገው ጉዞ እና በአፍሪካ ነፃ የንግድ ቀጣና (AfCFTA) ውስጥ ያላትን ተሳትፎ ለማጠናከር ትልቅ ድልድይ ይሆናል ተብሏል። በየቀኑ በአስር ሺዎች የሚቆጠሩ ጎብኝዎች ይጎበኙታል ተብሎ የሚጠበቅ ሲሆን፣ የንግድ ትስስር (B2B) መድረኮችም ተዘጋጅተዋል።

​🗣️ ከፍተኛ የስራ ኃላፊዎች ምን አሉ?

​🔹 ካሳሁን ጎፌ (የንግድና ቀጣናዊ ትስስር ሚኒስትር)፦

​"ይህ ትርኢት 'ኢትዮጵያ ታምርት' ንቅናቄን ከማስተዋወቅ ባለፈ፣ በማክሮ ኢኮኖሚ ሪፎርሙ የተፈጠሩ ዕድሎችን ለዓለም አቀፍ ኩባንያዎች ለማሳየት ትልቅ ፋይዳ አለው።"

​🔹 ሰብስብ አባፊራ (የምክር ቤቱ ፕሬዚደንት)፦

​"ዝግጅቱ ኢትዮጵያ የዓለም ንግድ ድርጅት (WTO) አባል ለመሆን ለምታደርገው ጉዞ እና በአፍሪካ ነፃ የንግድ ቀጣና (AfCFTA) ውስጥ ላላት ተሳታፊነት እንደ ድልድይ ያገለግላል።"

​💡 ለምን መጎብኘት አለብዎት?

• ​አዳዲስ የቴክኖሎጂ ውጤቶችን ለማየት።

• ​የንግድ አጋርነትን (B2B) ለመፍጠር።

• ​በየቀኑ በሚካሄዱ የፓናል ውይይቶች ላይ ለመሳተፍ።

ጠቅላይ ሚኒስትር ዐቢይ አሕመድ (ዶ/ር) የቢሾፍቱ ዓለም አቀፍ አውሮፕላን ማረፊያ ግንባታ ሥራን በይፋ አስጀመሩ!

ጠቅላይ ሚኒስትር ዐቢይ አሕመድ (ዶ/ር) የቢሾፍቱ ዓለም አቀፍ አውሮፕላን ማረፊያ ግንባታ ሥራን የመሠረት ድንጋይ በማስቀመጥ በዛሬው ዕለት በይፋ አስጀምረዋል።

ጠቅላይ ሚኒስትሩ ይህንኑ አስመልክቶ በማኅበራዊ ትሥሥር ገጽ ባሰፈሩት መልዕክት፣ “የኢትዮጵያን ፈጣን የአየር ትራንስፖርት ዕድገት እና እየሰፋ የመጣውን የኢትዮጵያ አየር መንገድ ዓለም አቀፍ ትሥሥር ዘላቂ ለማድረግ ወደ 25 ሚሊዮን የሚጠጉ መንገደኞችን በዓመት የማስተናገድ አቅሙ ላይ ከደረሰው ከአዲስ አበባ ቦሌ ዓለም አቀፍ አውሮፕላን ማረፊያ በተጨማሪ አዲስ ሜጋ ጣቢያ እየለማ ይገኛል” ብለዋል።

ይህ የተለያዩ አውሮፕላን ማረፊያዎችን የመገንባት ስትራቴጂ ኢትዮጵያን የወደፊቷ የአፍሪካ ግንባር ቀደም የአየር ትራንስፖርት በር የማድረግ ዓላማን ያነገበ መሆኑን ነው የገለጹት።

የቢሾፍቱ ዓለም አቀፍ አውሮፕላን ማረፊያ በአፍሪካ ታሪክ ትልቁ የአየር ትራንስፖርት መሠረተ ልማት ፕሮጀክት እንደሚሆንም ጠቁመዋል።

ይህም ከኢትዮጵያ ሀገራዊ የኢኮኖሚ ሪፎርም፣ የኢንደስትሪ ማስፋፊያ አጀንዳ እና የረጅም ዘመን የአቪየሽን ስትራቴጂ ጋር የተናበበ ነው።

ፕሮጀክቱ የኢትዮጵያ አየር መንገድን ዓለም አቀፍ ተወዳዳሪነት እንደሚያጠናክር የገለጹት ጠቅላይ ሚኒስትር ዐቢይ፣ በAfCFTA ማዕቀፍ የአፍሪካን የማገናኘት አቅም ይጨምራል፤ የንግድ እና ቱሪዝም ኮሪደሮችን ያሰፋል፤ ኢትዮጵያንም ቀዳሚ የበይነአኅጉር ማዕከል ያደርጋታል ብለዋል።

seledadotio
seledadotio

ጠቅላይ ሚኒስትር ዐቢይ አሕመድ የቢሾፍቱ ዓለም አቀፍ አውሮፕላን ማረፊያ ግንባታን በይፋ አስጀመሩ 🏗️✈️

​ጠቅላይ ሚኒስትሩ በአፍሪካ ታሪክ በትልቅነቱ ቀዳሚ የሚሆነውን የቢሾፍቱ ዓለም አቀፍ አውሮፕላን ማረፊያ ግንባታ የመሠረት ድንጋይ በማስቀመጥ ዛሬግንባታውን በይፋ አስጀምረዋል።

​የፕሮጀክቱ ዋና ዋና ነጥቦች፦

​🔹 ግዙፍ አቅም፦ በአሁኑ ወቅት በአመት 25 ሚሊዮን መንገደኞችን እያስተናገደ የሚገኘውን የቦሌ ዓለም አቀፍ አውሮፕላን ማረፊያን አቅም ለመደገፍና የኢትዮጵያ አየር መንገድን ዕድገት ዘላቂ ለማድረግ ያለመ ነው።
​🔹 የአፍሪካ የትራንስፖርት በር፦ ኢትዮጵያን የወደፊቷ የአፍሪካ ግንባር ቀደም የአየር ትራንስፖርት መግቢያና የበይነ-አኅጉር ማዕከል ያደርጋታል።

​🔹 አኅጉራዊ ትስስር፦ በአፍሪካ ነፃ የንግድ ቀጠና (AfCFTA) ማዕቀፍ የንግድና የቱሪዝም ኮሪደሮችን በከፍተኛ ደረጃ እንደሚያሰፋ ይጠበቃል።

​"ይህ ፕሮጀክት ኢትዮጵያን ቀዳሚ የበይነ-አኅጉር ማዕከል ከማድረጉም ባለፈ፣ የአፍሪካን የመገናኘት አቅም በከፍተኛ ደረጃ ይጨምራል" — ጠቅላይ ሚኒስትር ዐቢይ አሕመድ

አዲስ አበባ የ39ኛውን የአፍሪካ ህብረት የመሪዎች ጉባኤ ለማስተናገድ በመጨረሻው የዝግጅት ምዕራፍ ላይ ትገኛለች

ጉባኤው ከቀናት በኋላ በይፋ የሚጀመር ሲሆን፣ ቁልፍ መረጃዎቹም እንደሚከተለው ቀርበዋል፦

​📅 የጉባኤው መርሃ-ግብር
​የዘንድሮው ጉባኤ በሦስት ዋና ዋና ደረጃዎች ይካሄዳል፦
​ጥር 4 - 22፣ 2018 ዓ.ም የቋሚ ተወካዮች ኮሚቴ ስብሰባ።

​የካቲት 4 - 5፣ 2018 ዓ.ም የሥራ አስፈፃሚ ምክር ቤት (የውጭ ጉዳይ ሚኒስትሮች) ስብሰባ።

​የካቲት 7 - 8፣ 2018 ዓ.ም 39ኛው የመሪዎች ጉባኤ (የመንግስታት መሪዎች ስብሰባ)

​🏗️ የዘንድሮው ጉባኤ ዋና ዋና አጀንዳዎች

​ጉባኤው "አጀንዳ 2063"ን ማሳካት ላይ ትኩረት ያደረገ ሲሆን፣ የሚከተሉት ነጥቦች በዋነኝነት ይነሳሉ ተብሎ ይጠበቃል፦

​የውሃ እና ሳኒቴሽን ጉዳይ (2026 Theme): የዘንድሮው የህብረቱ ዓመታዊ መሪ ቃል በውሃ ሀብት አጠቃቀም እና በንፅህና አጠባበቅ ላይ ያተኮረ ነው።

​የአህጉራዊ ነፃ ንግድ ቀጠና (AfCFTA): የንግድ ልውውጥን ማሳለጥ እና የአፍሪካን ኢኮኖሚ ማስተሳሰር።

​ሰላምና ጸጥታ፦ በሱዳን እና በሌሎች ቀጣናዎች ያሉ ግጭቶችን መፍታት እና "ጠመንጃን የማርገብ" እቅድ አፈፃፀም።

​የአየር ንብረት ለውጥ፦ አረንጓዴ ኢነርጂን ማስፋፋት እና የአየር ንብረት ለውጥን መቋቋም የሚችሉ መሰረተ ልማቶችን መገንባት።

​ የአዲስ አበባ ዝግጅት

​ የፌዴራል ፖሊስ እና የጸጥታ አካላት በከተማዋ ሰላማዊ እንቅስቃሴ እንዲኖር ልዩ ጥበቃ እያደረጉ ይገኛሉ።

​የትራፊክ ፍሰት፦ እንግዶች ወደ አፍሪካ ህብረት ዋና መስሪያ ቤት በሚጓዙባቸው መንገዶች ላይ የትራፊክ መጨናነቅ እንዳይኖር አማራጭ መንገዶች ተለይተዋል።
​

ኢትዮጵያ የስጋ፣ የአትክልትና ፍራፍሬ ምርቶችን በካርጎ፤ ቡናና ጥራጥሬን በየብስ ወደ አፍሪካ መላክ ልትጀምር ነው!

ኢትዮጵያ የአፍሪካ ነፃ የንግድ ቀጠናን (AfCFTA) ተከትሎ ወደ አፍሪካ ሀገራት የምታደርገውን የኤክስፖርት ንግድ በሁለት ዋና ዋና የትራንስፖርት ሞዳሊቲዎች ልትጀምር መሆኑን የንግድና ቀጠናዊ ትስስር ሚኒስቴር አስታወቀ።

ንግዱን በይፋ ለማስጀመር ለሚደረገው የሐሙስ ዕለት መስከረም 29 ቀን 2018 ዓ.ም. መርሃ ግብር ከ40 በላይ ላኪዎች ተሳታፊ ሆነው ሰፊ ዝግጅት መደረጉ ተገልጿል።

የስጋና የአትክልትና ፍራፍሬ ምርቶች በዋናነት በካርጎ አገልግሎት አማካኝነት የሚላኩ ሲሆን፣ የኢትዮጵያ አየር መንገድ (Ethiopian Airlines) ካርጎ ሰርቪስ ለአፍሪካ ሀገራት በሚመጥን መልኩ ሰፋፊ መዳረሻዎችን ታሳቢ በማድረግ በቅርበት እየሰራ መሆኑ ተጠቁሟል።

በሌላ በኩል እንደ ቡና፣ ጥራጥሬ የደረቅ ምርቶች ደግሞ በ የብስ ጭነት ወደ አፍሪካ ሀገራት የሚሄዱ ይሆናሉ ተብሏል።

seledadotio
seledadotio

ኢትዮጵያ በአፍሪካ ነፃ የንግድ ቀጣና ዕድል የመጀመሪያውን ምርቷን ወደተለያዩ ሀገራት ልትልክ ነው - የንግድና ቀጣናዊ ትስስር ሚኒስቴር
#ethiopia | ኢትዮጵያ የአፍሪካ አህጉራዊ ነፃ ንግድ ቀጣና ስምምነት (AfCFTA) ድርድርን ማጠናቀቋን ተከትሎ መስከረም 29 ቀን 2018 ዓ.ም በሸቀጦች ዘርፍ የንግድ ትግበራዋን በይፋ እንደምትጀምር የንግድና ቀጣናዊ ትስስር ሚኒስቴር አስታወቀ፡፡

የንግድና ቀጣናዊ ትስስር ሚኒስትር ዴኤታ ወ/ሮ ያስሚን ውሀብረቢ እንደገለጹት ፤ የመጀመርያው የንግድ ልውውጥ በምስራቅና በደቡብ አፍሪካ አገራት ላይ ትኩረት ያደርጋል።

ነፃ ንግድ ቀጣና ንግድ ማስጀመሪያው ላይ በኢትዮጵያ አየር መንገድ ካርጎ ሥጋ፣ አትክልትና ፍራፍሬ እንዲሁም በየብስ ትራንፖርት ቡና፣ የጥራጥሬ ምርቶችና የቅባት እህሎች ወደ ኬንያ፣ ሶማሊያ እና ወደ ደቡብ አፍሪካ ይላካል ብለዋል፡፡

#afcfta

ኢትዮጵያ የአፍሪካ ነፃ የንግድ ቀጠናን ለመተግበር ለረዥም ጊዜ ሲጠበቅ የነበረዉን ደንብ አወጣች
#ethiopia | ኢትዮጵያ የአፍሪካ አህጉራዊ ነፃ የንግድ ቀጠና (AfCFTA) ስምምነትን በይፋ ለመተግበር የሚያስችል ደንብ ማውጣቷን አስታውቃለች።

በሚኒስትሮች ምክር ቤት የወጣው ደንብ ቁጥር 574/2017፣ ከአባል ሀገራት ወደ ኢትዮጵያ በሚገቡ ዕቃዎች ላይ የሚደረገውን የጉምሩክ ቀረጥ ቅነሳ በዝርዝር አስቀምጧል።

በነጋሪት ጋዜጣ በታተመዉ ደንብ መሰረት፣ ዕቃዎች በሶስት ምድቦች የተከፈሉ ሲሆን፣ ከ90% በላይ የሚሆኑት ዕቃዎች በ10 ዓመታት ውስጥ ቀስ በቀስ እየቀነሱ በመሄድ ሙሉ በሙሉ ከቀረጥ ነፃ ይሆናሉ። ሌላኛው የምድብ "ለ" ዕቃዎች ከ7% አይበልጡም፣ እነሱም ከ2026 ጀምሮ በ8 ዓመታት ውስጥ ከቀረጥ ነፃ ይሆናሉ።

የንግድና ቀጠናዊ ትስስር ሚኒስቴር የአፍሪካ ነፃ የንግድ ቀጠና ታሪፍ ሰንጠረዥ ተፈጻሚ የሚሆንባቸውን አባል ሀገራት የሚገልጽ ሲሆን፣ የገንዘብ ሚኒስቴር ደግሞ የዕቃዎችን ምድብ የመለየት እና የማስተካከል ስልጣን ተሰጥቶታል። በተጨማሪም፣ የኢትዮጵያ ጉምሩክ ኮሚሽን ለዕቃዎች የሥሪት ሀገር የምስክር ወረቀት ይሰጣል።

ይህ ደንብ ከነሐሴ 2017 ዓ.ም. ጀምሮ ተግባራዊ የተደረገ ሲሆን፣ የኢትዮጵያ ንግድ ከሌሎች የአፍሪካ ሀገራት ጋር ይበልጥ እንዲቀላቀል እና አዲስ የንግድ እድሎችን እንዲፈጥር ይጠበቃል ሲል ካፒታል አስነብቧል።