(ዘ-ሐበሻ ስፖርት) የብራዚል ብሔራዊ ቡድን የምንጊዜም ከፍተኛ ግብ አስቆጣሪ የሆነው እና በቢጫዋ ማሊያ የበርካቶችን ልብ በልዩ ችሎታው የገዛው ኔይማር ጁኒየር፣ በብሔራዊ ቡድን መድረክ የመጨረሻውን የስንብት ቃል በእንባ ታጅቦ ተናግሯል። ከዓለም ዋንጫው የጥሎ ማለፍ 16 ዙሪያ በኖርዌይ ያልታሰበ የ2ለ1 ሽንፈት አስተናግደው ከውድድሩ ከተሰናበቱ በኋላ፣ "ሁሉም ነገር እዚሁ ላይ ያበቃል" ሲል የውሳኔውን ጥልቀት እና የልብ ስብራቱን አሳይቷል።

ለሶስት ረጅም ዓመታት ከብሔራዊ ቡድኑ ርቆ ከቆየ በኋላ፣ በዚህ የዓለም ዋንጫ አስገራሚ ጥሪ ተደርጎለት ወደ ስብስቡ የተቀላቀለው የ34 ዓመቱ ኔይማር፤ በውድድሩ ላይ መሰለፍ የቻለው ለ37 ደቂቃዎች ብቻ ነበር። የብራዚልን እግር ኳስ አፈ-ታሪክ ፔሌን አስከንድሮ የሀገሪቱ የምንጊዜም ኮከብ ግብ አስቆጣሪ መሆን የቻለው ይህ የእግር ኳስ ጠበብት፣ በኖርዌዩ ጨዋታ በፍጹም ቅጣት ምት ያስቆጠራት ብቸኛ ግብ ሀገሩን ከጊዜያዊ ሽንፈት ልትታደጋት አልቻለችም።

ማክሰኞ ምሽት ክለቡ ሳንቶስ በኮፓ ሱዳሜሪካና የቬንዙዌላውን ዩሲቪ (UCV) 4ለ2 በሆነ ሰፊ ውጤት አሸንፎ ወደ ጥሎ ማለፉ 16 መቀላቀሉን ተከትሎ፣ ኔይማር ለጋዜጠኞች በሰጠው ስሜት ቀስቃሽ ቃለ ምልልስ የስንብት ቃሉን አረጋግጧል። "ከብሔራዊ ቡድን ጋር የነበረኝ ጊዜ አብቅቷል። ታሪክ ሰርቻለሁ፣ እጅግ ደስተኛም ነበርኩ። ለዚህች ማሊያ ደሜን እና ህይወቴን ሰጥቻለሁ... አሁን ግን ከዚህ በላይ አልፈልግም" ሲል በከፍተኛ ሀዘን ተናግሯል።

ይህ በእንዲህ እንዳለ ይማር በክለብ ደረጃ አሁንም የሳንቶስ የልብ ትርታ ሆኖ ቀጥሏል። እስከ ዓመቱ መጨረሻ ድረስ ከልጅነት ክለቡ ጋር ውል ያለው ኮከቡ፣ በአሁኑ ሰዓት ታሪካዊውን ክለብ ከወራጅ ቀጠና ለማትረፍ ከፍተኛ ትግል እያደረገ ይገኛል። ወደ ክለቡ ከተመለሰ በኋላ ባደረገው የመጀመሪያ ጨዋታ ሁለት ግቦችን በማስቆጠር ድንቅ አቋሙን ሲያሳይ፤ ግቦቹን ካስቆጠረ በኋላ ያሳየው 'ካርታ የማደል' የደስታ አገላለጽ የብዙዎችን ትኩረት ስቦ ነበር። ይህን ያደረገው፣ የቡድን አጋሮቹ በቬንዙዌላ የኮፓ ሱዳሜሪካና ጨዋታ እያደረጉ እሱ በፖከር (Poker) ውድድር ላይ በመሳተፉ ምክንያት ይተቹት ለነበሩት አካላት በፌዝ የተሞላ ምላሽ ለመስጠት ነበር።

በማክሰኞው የመልስ ጨዋታ በተጠባባቂ ወንበር ላይ ሆኖ የጀመረው ኔይማር፣ ሳንቶስ ያለ ብዙ ድካም ወደ ቀጣዩ ዙር ማለፉን አረጋግጧል። ሆኖም የዓለም እግር ኳስ አፍቃሪው ከሳንቶሱ የክለብ ድል ይልቅ፣ በችሎታው ልክ የዓለም ዋንጫን ሳያነሳ፣ በእንባ ተሞልቶ ብሔራዊ ቡድኑን የተሰናበተው የዚህ ድንቅ ተጨዋች ዜና ይበልጥ ልቡን ሰብሮታል። የኔይማር የብራዚል ማሊያ ታሪክ፣ በብዙ ውጣ ውረድ፣ በድንቅ ተሰጥኦ እና ባልተቋጨ የዓለም ዋንጫ ህልም ተከቦ፣ እዚሁ ላይ በይፋ ተቋጭቷል።