የሂትሮው አውሮፕላን ማረፊያ በኢራን ጦርነት ምክንያት የመንገደኞች ቁጥር ሊቀንስ እንደሚችል አስጠነቀቀ
*************

የለንደኑ ሂትሮው አውሮፕላን ማረፊያ በኢራን ጦርነት ሳቢያ በተፈጠረው አለመረጋጋት በዘንድሮው የፈረንጆቹ ዓመት ቀሪ ወራት የመንገደኞች ቁጥር ሊቀንስ እንደሚችል ማስጠንቀቂያ ሰጠ።

አውሮፕላን ማረፊያው ባወጣው የንግድ ሪፖርት መሠረት፣ በመካከለኛው ምሥራቅ ያለው ወቅታዊ ሁኔታ በአየር ጉዞ ላይ ከፍተኛ ተጽዕኖ እያሳደረ ይገኛል።

እንደ ቢቢሲ ዘገባ ጦርነቱን ተከትሎ በየቀኑ ግማሽ ሚሊዮን የሚጠጉ መንገደኞች የሚስተናገዱባቸው እንደ ዱባይ፣ ዶሃ እና አቡ ዳቢ ያሉ የትራንዚት ማዕከላት ጫና አርፎባቸዋል።

ከዚህ ጋር ተያይዞ በአሜሪካ የሚገኘው ስፕሪት አየር መንገድ (Spirit Airlines) በከፍተኛ የነዳጅ እጥረት ምክንያት ሁሉንም በረራዎቹን ማቋረጡንና ሥራ ማቆሙን ፎክስ ኒውስ ዘግቧል።

ይህ ውሳኔ በሺዎች የሚቆጠሩ ሠራተኞችን ከሥራ ውጭ ያደረገ ሲሆን፣ በአሜሪካ የአየር ትራንስፖርት ዘርፍ ላይ ትልቅ ድንጋጤ ፈጥሯል።

ከስፕሪት በተጨማሪ ሌሎች ታዋቂ ዓለም አቀፍ አየር መንገዶችም በነዳጅ ዋጋ መናርና በአቅርቦት እጥረት ምክንያት የበረራ መርሐ-ግብሮቻቸውን ለመቀነስና መስመሮቻቸውን ለማጠፍ መገደዳቸው ተመልክቷል።

ጠቅላይ ሚኒስትር ዐቢይ አሕመድ (ዶ/ር) በቅርቡ ምንም እንኳን በርካታ የዓለም አቀፍ አየር መንገዶች አሁን ባለው የነዳጅ ቀውስና ጂኦ-ፖለቲካዊ ውጥረት ምክንያት በረራዎቻቸውን ቢቀንሱም፣ የኢትዮጵያ አየር መንገድ ግን ያለ ምንም እንከንና መስተጓጎል መደበኛ አገልግሎቱን እያስቀጠለ መሆኑን መናገራቸው ይታወሳል።

ይህ የኢትዮጵያ አየር መንገድ ጥንካሬና አስተማማኝነት በዓለም አቀፍ ደረጃ ያለውን ተወዳዳሪነት የሚያሳይ መሆኑንም ጠቁመዋል።

በለሚ ታደሰ
#ebc #middleeastconflict #heathrowairport #spiritairlines #ethiopianairlines #globaltravel

የመካከለኛው ምስራቅ ውጥረት ለኢትዮጵያ አየር መንገድ አዲስ የገበያ ዕድል ፈጠረ
#ethiopia | በመካከለኛው ምስራቅ እየተባባሰ የመጣው ጂኦፖለቲካዊ አለመረጋጋት ለኢትዮጵያ አየር መንገድ ያልተጠበቀ የገበያ ዕድል ይዞ መጥቷል። በእስራኤል፣ አሜሪካ እና ኢራን መካከል ያለው ግጭት በባህረ ሰላጤው አገራት የአየር ትራንስፖርት ላይ መስተጓጎል በመፍጠሩ፣ በርካታ የደቡብ አፍሪካ መንገደኞች አዲስ አበባን እንደ ዋነኛ የመሸጋገሪያ (Hub) ማዕከል መጠቀም ጀምረዋል።

የኢንዱስትሪ መረጃዎች እንደሚያመለክቱት፣ ከመጋቢት ወር መጀመሪያ ጀምሮ በኢትዮጵያ አየር መንገድ በኩል የሚደረጉ የቦታ ማስያዝ (Bookings) መጠኖች የ110% ድንገተኛ ጭማሪ አሳይተዋል። የFlight Centre South Africa የሥራ ኃላፊ ሱ ጋሬት እንደገለጹት፤ ይህ ለውጥ የመጣው በተለመዱት የበረራ መስመሮች ላይ በተፈጠሩ ስረዛዎችና የአየር ክልል ገደቦች ምክንያት ነው።

የዓለም አቀፉ የአየር ትራንስፖርት ማህበር (IATA) መረጃዎች እንደሚያሳዩት፣ አየር መንገዱ አሁን ካለው ቀውስ በፊትም ቢሆን በቁልፍ የጉዞ መስመሮች ላይ የበላይነቱን እያጠናከረ ቆይቷል፦

* ወደ ሕንድ፦ በ2025 በጆሃንስበርግ-ሙምባይ መስመር በአዲስ አበባ በኩል ከ69,000 በላይ መንገደኞችን በማጓጓዝ ቀዳሚው ምርጫ ሆኗል።

* ወደ ብሪታንያ፦ በደቡብ አፍሪካ እና በእንግሊዝ መካከል ባለው መስመር ኤምሬትስን በ39,000 መንገደኞች በመብለጥ ትልቁ ቀጥተኛ ያልሆነ አጓጓዥ ለመሆን በቅቷል።

* ወደ አሜሪካ፦ በደቡብ አፍሪካ እና በአሜሪካ መካከል በሚደረግ ጉዞ ከዩናይትድ እና ከዴልታ በመቀጠል በሦስተኛ ደረጃ ላይ በመቀመጥ ጠንካራ ተወዳዳሪነቱን አስመስክሯል።

ይህ ወቅታዊ ክስተት የኢትዮጵያ አየር መንገድ በአፍሪካና በዓለም አቀፍ ደረጃ ያለውን ስትራቴጂካዊ ተመራጭነት ይበልጥ እያሳደገው ይገኛል ያለው ካፒታል ነው።

Getu Temesgen - (ጌጡ ተመስገን)
#getutemesgen #getu #ጌጡ #ethiopianairlines #aviationnews #middleeastcrisis #ethiopia #addisababahub #globaltravel #businessnews #africarising