ኬንያ የዓለም አትሌቲክስ ሻምፒዮናን ለማስተናገድ ተመረጠች!

ኬንያ በአፍሪካ አትሌቲክስ ታሪክ ትልቅ ምዕራፍ በመክፈት፣ የዓለም አትሌቲክስ ሻምፒዮናን ለመጀመሪያ ጊዜ ለማስተናገድ ተመረጠች።

በሃንጋሪ ቡዳፔስት በተካሄደው 242ኛው የወርልድ አትሌቲክስ ምክር ቤት ስብሰባ፣ የ2029 እና የ2031 የዓለም አትሌቲክስ ሻምፒዮና አዘጋጅ ሀገራት ይፋ ተደርገዋል።

በዚህም የ2029 የዓለም አትሌቲክስ ሻምፒዮናን ኬንያ፣ የ2031 ውድድርን ደግሞ ጀርመን እንዲያስተናግዱ ተመርጠዋል።

ይህ ውሳኔ በአፍሪካ አትሌቲክስ ታሪክ ልዩ ትርጉም አለው። የዓለም አትሌቲክስ ሻምፒዮና እስከዛሬ በርካታ ጊዜያት ቢካሄድም፣ አንድም የአፍሪካ ሀገር ውድድሩን አስተናግዳ አታውቅም።

በመሆኑም ኬንያ የ2029 የዓለም ሻምፒዮናን በማስተናገድ ይህንን ታሪካዊ የአፍሪካ ክብር የምታስመዘግብ የመጀመሪያዋ ሀገር ትሆናለች።

የሻምፒዮናው ውድድሮች በኬንያ ዋና ከተማ ናይሮቢ በሚገኘው እድሳት በተደረገለት ካሳራኒ ስታዲየም እንደሚካሄዱ ተገልጿል።

ኬንያ በረጅም ዓመታት የሩጫ ስፖርት ታሪኳ የዓለም ምርጥ አትሌቶችን በማፍራት የምትታወቅ ሀገር ናት። አሁን ደግሞ የዓለም ታላላቅ አትሌቶችን በራሷ ምድር ላይ በመቀበል የአፍሪካን የአትሌቲክስ አቅም ለዓለም ለማሳየት ታሪካዊ እድል አግኝታለች።

ከአፍሪካ የሩጫ ኃያልነት እስከ ዓለም ሻምፒዮና አዘጋጅነት — ኬንያ አዲስ ታሪክ ልትጽፍ ነው!

​#worldathletics #kenya #athletics #sports #የዓለምአትሌቲክስ #ኬንያ #አትሌቲክስ #ስፖርት #getutemesgen #getu #ጌጡ #ጌጡተመስገን #addisababa