"ዓለምን ያስጨነቀው የአሜሪካና ኢራን ፍጥጫ"

ዛሬ የካቲት 15 ቀን 2018 ዓ.ም በመካከለኛው ምስራቅ ታይቶ የማይታወቅ የጦርነት ደመና አጥልቷል። በአሜሪካ እና በኢራን መካከል ያለው ፍጥጫ ወደ ለየለት ወታደራዊ እርምጃ ሊያመራ የሚችልበት የመጨረሻው ምዕራፍ ላይ መድረሱን የሚጠቁሙ መረጃዎች እየወጡ ነው።

ፕሬዝዳንት ዶናልድ ትራምፕ ለኢራን የሰጡት የ10 እና የ15 ቀናት የጊዜ ገደብ እየተቃረበ መምጣቱን ተከትሎ ቀጠናው በከፍተኛ ውጥረት ውስጥ ይገኛል። ፕሬዝዳንቱ "ኢራን አዲስ የኒውክሌር ስምምነት ላይ ካልደረሰች እጅግ የከፋ ነገር ይገጥማታል" ሲሉ የሰጡት ጠንካራ ማስጠንቀቂያ አሜሪካ ለጥቃት ዝግጁ መሆኗን የሚያሳይ ነው ተብሏል።

የአሜሪካ መከላከያ ሚኒስቴር (ፔንታገን) በታሪክ ታይቶ በማይታወቅ ሁኔታ ግዙፍ የባህርና የአየር ኃይል ክምችት በመካከለኛው ምስራቅ እያከናወነ ይገኛል።

የዓለማችን ግዙፉ የጦር መርከብ ወደ ሜዲትራኒያን ባህር እያመራ መሆኑ የተረጋገጠ ሲሆን ይህ መርከብ በታጠቀው ዘመናዊ ቴክኖሎጂ ማንኛውንም ኢላማ የመምታት አቅም እንዳለው ይነገራል።

ከመቶ በላይ የነዳጅ ጫኝ አውሮፕላኖች እና በርካታ የኤፍ-35 (F-35) ተዋጊ ጄቶች በገልፍ አገራት በሚገኙ ወታደራዊ ካምፖች ሰፍረዋል።

የዲፕሎማሲው ጥረት መክሸፍ
በጄኔቫ በኩል በኦማን አሸማጋይነት እየተደረገ ያለው ቀጥተኛ ያልሆነ ንግግር እስካሁን ምንም ዓይነት ተስፋ ሰጪ ውጤት አላሳየም። አሜሪካ ኢራን የኒውክሌር ማበልጸግ ሥራዋን እንድታቆም ስትጠይቅ ኢራን በበኩሏ "የራሴን መከላከያ የመገንባት መብት አለኝ" በሚል አቋሟ ጸንታለች።

ኢራን የአሜሪካን ወታደራዊ እንቅስቃሴ ተከትሎ ከሩሲያ ጋር በመሆን በኦማን ባህር ላይ የጋራ ወታደራዊ ልምምድ እያደረገች ትገኛለች። የኢራን ጠቅላይ መሪ አሊ ካሜኒ "አሜሪካ ጥቃት የምትሰነዝር ከሆነ የጦር መርከቦቿን የባህር ሲሳይ እናደርጋቸዋለን" ሲሉ ዝተዋል። ይህም ቀጠናው በማንኛውም ሰዓት ወደ ታላቅ ጦርነት ሊገባ እንደሚችል ስጋቱን ከፍ አድርጎታል።

ዓለም አቀፍ ተንታኞች ቀጣዮቹ 10 ቀናት የዓለምን የሰላም ዕጣ ፈንታ የሚወስኑ ናቸው እያሉ ነው። የአሜሪካው ፕሬዝዳንት ኢራን ለምን እስካሁን እጅ አልሰጠችም? የሚል ጥያቄ ማቅረባቸውም ጉዳዩን ይበልጥ አሳሳቢ አድርጎታል።

የኔታ ሚዲያ ሁኔታውን በንቃት እየተከታተለ መረጃዎችን ማድረሱን ይቀጥላል።