በውይይት የፀና ታሪካዊ አንድነት እና ለተግባራዊ ለውጥ የተጣለ አዲስ መሠረት
********************

ኢትዮጵያ ለዘመናት ሲከማቹ የቆዩ ውስብስብ የፖለቲካ፣ የማህበራዊ እና የሀገራዊ ጉዳዮችን በሰላማዊ ውይይትና በበሰለ መግባባት ለመፍታት ስታካሂደው የቆየችው ታሪካዊ ሀገራዊ ምክክር አዲስ ታሪክ የተጻፈበት ሆኗል።

ለአራት አመታት ከታችኛው የሕብረተሰብ ክፍል ጀምሮ በየደረጃው ሲካሄድ የቆየው ይህ ሰፊ ሂደት፣ የተለያዩ የሀገራችንን ድምፆች በአንድ አገራዊ መድረክ አሰባስቦ በጋራ ጉዳዮች ላይ በግልጽ የመወያየትና የመደማመጥ ባህልን በጽኑ መሠረት ላይ አጠናክሯል።

ወደ 4,000 የሚጠጉ ተመካካሪዎችና የህዝብ ወኪሎች ከመላው ኢትዮጵያ በመምጣት በአንድ አዳራሽ መሰብሰባቸው፣ ሂደቱ ምን ያህል ሰፊ ህዝባዊ ተሳትፎንና የሁሉም አመለካከት ውክልናን ያካተተ እንደነበር በግልጽ የሚያስረዳ ነው።

ከአነስተኛ ቡድኖች ውይይት ጀምሮ እስከ ታላቁ አገራዊ ጉባኤ ድረስ የዘለቀው ይህ መድረክ፣ ተሳታፊዎች ልዩነቶቻቸውን በነፃነት የሚያቀርቡበት፣ የሌሎችን አመለካከት በትዕግሥት የሚያዳምጡበትና የጋራ መፍትሔዎችን በጋራ በሚፈልጉበት መንገድ የተቃኘ ነው።

በጉባኤው ወቅት ከ400 በላይ አበይትና ውስብስብ ሀገራዊ ጉዳዮች መቅረባቸው የኢትዮጵያ አገራዊ ጥያቄዎች ምን ያህል ሰፊ እንደሆኑ የሚያሳይ ነው።

በእነዚህ ፈታኝ ጉዳዮች መካከል በ99 በመቶ በሚሆኑት ላይ ሙሉ የጋራ መግባባት መድረሱ ደግሞ ኢትዮጵያውያን በልዩነቶቻቸው ውስጥ አገራዊ የጋራ ነጥቦችን ማግኘት እንደሚችሉ ለአፍሪካና ለዓለም ያስመሰከሩበት ታላቅ ስኬት ነው።

ከዚህ ታሪካዊ ምዕራፍ በኋላ ዋናው አገራዊ ትኩረት የምክክሩ ውጤቶች እንዴት ወደ ፖሊሲ፣ ሕግ፣ ተቋማዊ ለውጥና ተጨባጭ የህዝብ ጥቅም እንደሚቀየሩ ነው።

የምክክሩ እውነተኛ ስኬት በተካሄዱት ውይይቶች ብዛት ወይም በተሳታፊዎች ቁጥር ብቻ ሳይሆን፣ የተገኘው መግባባት በሀገራችን ዘላቂ ሰላም፣ መተማመንና የተሻለ የፖለቲካ ባህል መሠረት በመሆን የሚፈጥረው ተጨባጭ ውጤት ነው።

ይህ ሂደት የሚያስተላልፈው ትልቁ አገራዊ መልዕክት ልዩነቶችን ማጥፋት ሳይሆን በሰላማዊ ውይይት ማስተናገድ እንደሚቻል በማስመስከር፣ ከግጭት ይልቅ ውይይትን፣ ከመከፋፈል ይልቅ መግባባትን፣ ከተስፋ መቁረጥ ይልቅ የጋራ ሀገር ግንባታን የሚመርጥ አዲስ የሀገራዊ አስተሳሰብ ምዕራፍ መክፈቱ ነው።

በኢንቲሃድ አብራር
#nationaldialogueethiopia #consensusbuilding #ethiopianunity #peacefulcoexistence #institutionalreform

ዘመኑን የዋጀው ፌዴራል ፖሊስ፤ ከሀገራዊ ሪፎርም እስከ ድንበር ተሻጋሪ ወንጀሎች መከላከል ስኬት
***************

የሀገራችንን ታሪክና ልዕልና የሚመጥን ዘመናዊ የፖሊስ ተቋም ለመገንባት የተጀመረው ሀገራዊ ሪፎርም፣ የኢትዮጵያ ፌዴራል ፖሊስን ወንጀልን አስቀድሞ የመከላከል ቁመና ወደ ላቀ ደረጃ አሸጋግሮታል።

የፌዴራል ፖሊስ ጠቅላይ አዛዥ ኮሚሽነር ጄኔራል ደመላሽ ገብረሚካኤል እንደገለጹት፤ ተቋሙ የሀገራዊ ለውጡን ተከትሎ ባካሄደው ጥልቅ የሪፎርም ትግበራ አሁን ላይ ዘመኑን የዋጀና ውጤታማ ተግባራትን የሚያከናውን ጠንካራ አቅም መገንባት ችሏል።

ይህ አዲስ ተቋማዊ ቁመናም ፖሊስ ከተለዋዋጭ ሁነቶች እና ከዲጂታሉ ዓለም ፈጣን ዕድገት ጋር እኩል እንዲጓዝ ትልቅ አቅም የፈጠረለት ሲሆን፣ በተለይም በዓለም አቀፍና ድንበር ተሻጋሪ ወንጀሎችን በመከላከል ረገድ በርካታ ስኬታማ ተግባራትን ለማስመዝገብ እንዳስቻለው ተናግረዋል።

ተቋሙ በስኬት ከተወጣቸው ተልዕኮዎች መካከል በየአቅጣጫው መረባቸውን ዘርግተው በሕገ-ወጥ የሰዎች ዝውውር ላይ ተሰማርተው የነበሩ በርካታ ተጠርጣሪዎችን ከነመሪዎቻቸው እጅ ከፍንጅ በመያዝ ለሕግ ማቅረቡ ዋነኛው መሆኑን ኮሚሽነሩ አንስተዋል።

መሰል የደህንነት ስጋቶች በስፋት የሚከሰቱባቸውን ቀጣናዎች በመለየት ልዩ ትኩረት ተሰጥቶ እየተሰራ መሆኑን ያመለከቱት ኮሚሽነር ጄኔራል ደመላሽ፤ የብዙ ዜጎችን ሕይወት እየቀጠፈ በሚገኘው በዚህ ሕገ-ወጥ የሰዎች ዝውውር ላይ ፖሊስ በቁርጠኝነት ያከናወነው ተግባር በተለያዩ ዓለም አቀፍ ተቋማት ዘንድ ከፍተኛ አድናቆትና ዕውቅና የተቸረው መሆኑን አብራርተዋል።

በዚህም የተነሳ ተቋሙ ከኢትዮጵያ አልፎ በዓለም አቀፍ ወንጀሎች ቁጥጥር ዙሪያ አይተኬ ሚናውን እየተወጣ እንደሚገኝ ነው ያመላከቱት።

የወንጀል ድርጊቶች ከጊዜ ወደ ጊዜ እየረቀቁና በቴክኖሎጂ የታገዙ እየሆኑ ቢመጡም፣ ፌዴራል ፖሊስ በዛው ልክ ዘመናዊ ቴክኖሎጂንና ስልታዊ አደረጃጀትን በመጠቀም አቅሙን በከፍተኛ ደረጃ እያጠናከረ እንደሚገኝ መግለጻቸውን የፌዴራል ፖሊስ መረጃ ያመላክታል።

በዘርፉ ከሚሰሩ ዓለም አቀፍ ተቋማት ጋር በቅንጅትና በጋራ መሥራት መቻሉ የተቋሙን ተጽዕኖ፣ ተአማኒነትና ተደራሽነት ይበልጥ ከፍ እንዳደረገው የገለጹት ኮሚሽነር ጄኔራሉ፤ ወደፊትም ዘመኑን በዋጀ መንገድ የሕግ የበላይነትን የማስከበር፣ የዜጎችን ደህንነት የማረጋገጥና የሀገርን ሰላም ዘላቂ የማድረግ ስልታዊ ተልዕኮው ተጠናክሮ እንደሚቀጥል አስታውቀዋል።
#federalpolice #ethiopia #institutionalreform #bordersecurity #ethiopianbroadcastingcorporation