ከፈተና ማህፀን የሚወለደው ስኬት፤ችግርን ወደ ወርቃማ ዕድል እየቀየረ ያለው የኢትዮጵያ የፈጠራ ትውልድ
*************

የአንድ ሀገር የነገ ብሩህ ጉዞ የሚወሰነው በወጣቱ የእይታ ስፋትና በጠንካራ የስራ ባህሉ ነው። ዛሬ ላይ የኢትዮጵያ ወጣቶች ከፊታቸው የተደቀኑትን ችግሮች እንደሚያደናቅፍ ግድግዳ ሳይሆን፣ ወደ ከፍታ እንደሚያሻግር የብረት ድልድይ የመመልከት አዲስና አነቃቂ አስተሳሰብ በመገንባት ላይ ይገኛሉ።

ችግር በራሱ የለውጥ ጥሪ ነው፤ ይህንን ጥሪ በንቃት ሰምቶ በብልሃትና በፈጠራ አዳዲስ መፍትሔዎችን ማመንጨት ደግሞ የዚህ ብልህ ትውልድ ደማቅ መለያ ምልክት እየሆነ መጥቷል። ወጣቱ የሚጋፈጣቸውን ተደራራቢ ፈተናዎች ወደ አዳዲስ አጋጣሚዎች የመቀየር አስገራሚ ጥበብን ተላብሷል።

አነስተኛ ሀብትን በመጠቀም ትላልቅ መፍትሔዎችን ማመንጨት፣ እንዲሁም የዲጂታል ክህሎትን ከሀገር በቀል እውቀት ጋር በማጣመር የገበያና የህብረተሰብ ክፍተቶችን በብቃት መሙላት የዕለት ተዕለት ክስተት ሆኗል። ይህ ጥበብ የሚመነጨው ከአስቸጋሪ ሁኔታዎች አሸናፊ ሆኖ ለመውጣት ካለው ጥልቅ ፍላጎትና መፍትሔ ላይ ብቻ የማተኮር የላቀ ብስለት ነው።

መልካም አጋጣሚዎች ወይም ዕድሎች ብቻቸውን ተዓምር አያመጡም። ዕድል በሩን ሲከፍት፣ ያንን በር አልፎ ስኬትን በተግባር የሚያረጋግጠው ግን የዕለት ተዕለት ጠንካራ ሥራና ትጋት ብቻ ነው። የኢትዮጵያ ወጣት የተቀበለውን አነስተኛ ዕድል እንኳን በትልቅ የስራ አክብሮትና ተስፋ ባለመቁረጥ ስሜት ኮትኩቶ የሚያሳድግ፣ ላቡንና እውቀቱን አዋህዶ አስደናቂ ውጤት የሚያሳይ የጽናት ትውልድ ነው።

የመንግስት፣ የልማት አጋሮች እና ዓለም አቀፍ የዲጂታል ዕድሎች በየዓመቱ ለብዙ ሺህ ወጣቶች የሥራ በር ለመክፈት ከፍተኛ ጥረት ያደርጋሉ። በዚህም ወጣቶች በተለያዩ የኢኮኖሚ ዘርፎች በሰፊው ተሰማርተው ድንቅ ስራዎችን እየሰሩ ይገኛሉ።

በምርትና ግንባታው ዘርፍ በአልባሳት፣ በእንጨትና ብረት ስራዎች፣ እንዲሁም በኮንስትራክሽን ህብረት ስራ ማህበራት ተደራጅተው አቅማቸውን እያሳዩ ነው።

በዲጂታልና አገልግሎት ዘርፍ የኦንላይን ስራዎችን፣ የዲጂታል ይዘት ፈጠራን፣ ኢ-ኮመርስን፣ የታክሲና የመልእክት ማድረስ አገልግሎቶችን በመዘርጋት ዘመኑን የዋጀ ስራ ይሰራሉ።

ከዚህም ባሻገር በግብርናና እሴት መጨመር የወተት ተዋጽኦዎችን፣ የዶሮ እርባታን፣ የአትክልትና ፍራፍሬ ልማትን እና የቅባት እህሎችን እሴት ጨምሮ በማቅረብ፣ እንዲሁም በህጋዊ የውጭ ስምሪት በመካከለኛው ምስራቅና በሌሎች ሀገራት በክህሎት የተደገፉ የሥራ ዕድሎችን በመጠቀም የሀገርን ኢኮኖሚ እያንቀሳቀሱ ነው።

በዚህ የለውጥ ጉዞ ውስጥ የመነሻ ካፒታልና የብድር አቅርቦት እጥረት፣ የመስሪያና የመሸጫ ቦታዎች ማነስ፣ የቢሮክራሲና የመልካም አስተዳደር እንከኖች፣ እንዲሁም የገበያ ትስስር ማነስ ተግዳሮቶች ሆነው መከሰታቸው አልቀረም።

ሆኖም እነዚህን መሰናክሎች በጥበብ የተሻገሩት ወጣቶች ከመንግስት ወይም ከለጋሾች የሚሰጠውን ድጋፍ እንደ መነሻ እንጂ እንደ መጨረሻ መፍትሔ ያላዩ፣ ከጊዜው ጋር አብረው የሚዘምኑ እና በቴክኖሎጂ የተደገፈ አሰራርን በተግባር ያዋሉ ጀግኖች ናቸው።

ችግርን ወደ ዕድል፣ ዕድልን ደግሞ ወደ ተጨባጭ ስኬት የመቀየር ጉዞ የጥቂቶች ሳይሆን የአጠቃላይ ትውልዱ የጋራ መርህ ሲሆን ሀገራዊ እድገታችን እና ብልጽግናችን እውን ይሆናል።

ጠቅላይ ሚኒስትር ዐቢይ አሕመድ (ዶ/ር) ለዚህ ወጣት ትውልድ ያላቸው አመለካከት በከፍተኛ ተስፋ እና እምነት ላይ የተመሠረተ ሲሆን፣ "ይህንን ትውልድ በአዲስ ዕይታ ነው የማየው፤ ትልቅ ተስፋ ይሰጡኛል፤ እጅግ የበቁ ናቸው፤ የአስተሰብ እና የመረዳት አቅማቸው ከቀደሙት ትውልዶች በግልጽ የተለየና የላቀ ነው" በማለት ለወጣቶች ያላቸውን ጥልቅ ክብርና ጽኑ እምነት ይገልጻሉ።

በመሀመድ ፊጣሞ
#ethiopianyouth #innovation #entrepreneurship #resilience #empowerment