(ዘ-ሐበሻ ዜና) የካናዳው የማዕድን ኩባንያ አላይድ ጎልድ ኮርፖሬሽን ከቻይናው ዚጂን ጎልድ ጋር አድርጎት የነበረውን አጠቃላይ የአደረጃጀት እና የግዥ ስምምነት ማቋረጡን ዛሬ ጁላይ 29 ቀን 2026 ይፋ አድርጓል። ሆኖም ኩባንያው በምትኩ ዚጂን ጎልድ 295 ሚሊዮን የአሜሪካ ዶላር ስትራቴጂካዊ ኢንቨስትመንት በኩባንያው ላይ ለማፍሰስ መስማማቱን አስታውቋል።

ይህ ወሳኝ የፋይናንስ ውሳኔ፣ በኢትዮጵያ፣ ማሊ እና ኮትዲቯር ለሚገኙት የኩባንያው የማዕድን ማውጣት ፕሮጀክቶች ትልቅ አቅም እንደሚፈጥር ይጠበቃል።

ሁለቱም ኩባንያዎች ቀደም ሲል የገቡት ስምምነት በተቀመጠለት የጊዜ ገደብ (እስከ ዛሬ ጁላይ 29፣ 2026) ሊጠናቀቅ እንደማይችል በመገንዘባቸው ስምምነቱን በጋራ ስምምነት ሰርዘውታል። ለዚህም እንደ ዋና ምክንያት የተነሳው፣ እንደዚህ ዓይነት ግዙፍ የድንበር ዘለል የንግድ ዝውውሮች የሚያጋጥማቸው የውጭ ተጽዕኖ እና የሂደት ውስብስብነት መሆኑ ተገልጿል።

ከቀድሞው ስምምነት መቋረጥ ጋር በተጓዳኝ፣ ዚጂን ጎልድ በአላይድ ጎልድ ውስጥ 12.8 ሚሊዮን የተለመዱ አክሲዮኖችን ለመግዛት ተስማምቷል። በዚህም መሰረት እያንዳንዱ አክሲዮን አሁን ካለው የገበያ ዋጋ ብልጫ ባለው 32.55 የካናዳ ዶላር የሚሸጥ ይሆናል። ይህ ኢንቨስትመንት ሲጠናቀቅ ዚጂን ጎልድ የአላይድ ጎልድን 9.2 በመቶ አጠቃላይ ድርሻ የሚይዝ ሲሆን፣ ስምምነቱም በቶሮንቶ TSX እና በኒውዮርክ NYSE የአክሲዮን ገበያዎች ይሁንታን ካገኘ በኋላ በነሐሴ 10፣ 2026 አካባቢ ይጠናቀቃል ተብሎ ይጠበቃል።

አላይድ ጎልድ ከዚህ ስትራቴጂካዊ ኢንቨስትመንት የሚያገኘውን የተጣራ ገቢ የኩባንያውን የእድገት እቅዶች ለማፋጠን ይጠቀምበታል። ከተዘረዘሩት ዋና ዋና የትኩረት አቅጣጫዎች ውስጥ በኢትዮጵያ የሚገኘው ፕሮጀክት ዋነኛውን ስፍራ ይዟል። ኩባንያው በነሐሴ ወር ስራ ይጀምራል ተብሎ የሚጠበቀውን እና ከጥቂት ሳምንታት በኋላ የመጀመሪያውን ወርቅ ያመርታል ተብሎ የታቀደውን የኩርሙክ ወርቅ ማዕድን ፕሮጀክት ግንባታ ለማጠናቀቅ እና ምርት ለማሳደግ ይሰራል ብሏል።

ከዚህም በተጨማሪ በማሊ የሚገኘውን የሳዲዮላ ማዕድን ማውጫ በደረጃ ለማስፋፋት፣ እንዲሁም በኮትዲቯር ያለውን የምርት መጠን ለማሳደግ እና በአጠቃላይ በኩባንያው ስር ባሉ ቦታዎች አዳዲስ የማዕድን ፍለጋዎችን ለማካሄድ ይህ ገንዘብ ይውላል። ይህ እርምጃ አላይድ ጎልድ ኩባንያ ሙሉ በሙሉ በዚጂን ጎልድ ከመዋጥ አደጋ አምልጦ፣ ራሱን ችሎ በአፍሪካ ውስጥ ግንባር ቀደም የወርቅ አምራች ለመሆን የሚያደርገውን ጉዞ የሚያጠናክር ነው። የዘርፉ ባለሙያዎች ለዘ-ሐበሻ በሰጡት አስተያየት… በተለይም በኢትዮጵያ ቤኒሻንጉል ጉሙዝ ክልል ለሚገኘው የኩርሙክ ፕሮጀክት፣ ይህ የፋይናንስ ፍሰት ስራውን በተያዘለት እቅድ መሰረት ለማስጀመር ወሳኝ ሚና ይጫወታል ተብሎ ተስፋ ተጥሎበታል።