(ዘ-ሐበሻ ዜና) በማዕከላዊ ኢትዮጵያ ክልል፣ ጠምባሮ ልዩ ወረዳ ሙዱላ ከተማ የሚገኘው የኢትዮጵያ ወንጌላዊት ቤተክርስቲያን መካነ ኢየሱስ፣ በቤተክርስቲያኑ ይዞታ ላይ እየተፈጸመ ነው ያለውን የመንገድ እና የአጥር ክልከላ በመቃወም አድሏዊ አሰራር እንዲታረም እና መንግስት አስቸኳይ ፍትህ እንዲሰጠው ጠየቀ።

ቤተክርስቲያኑ ላለፉት 80 ዓመታት በጤና (ሆስፒታሎችና ክሊኒኮች)፣ በትምህርት፣ እንዲሁም በተፈጥሮና ሰው ሰራሽ አደጋዎች ወቅት ከኢትዮጵያ መንግስትና ህዝብ ጎን በመቆም ከፍተኛ አስተዋፅኦ ሲያበረክት የቆየ የሀገር ባለውለታ ተቋም መሆኑን ያነሳው የፍትህ ጥሪው፣ ይሁን እንጂ በሙዱላ ከተማ ከ5,000 በላይ ምዕመናንን የሚያስተናግደው አንጋፋው ቤተክርስቲያን በአሁኑ ወቅት አሳሳቢ በደል እየደረሰበት መሆኑን አስታውቋል።

የቀረበው ቅሬታ እንደሚያመለክተው፣ የቤተክርስቲያኗ ይዞታ በአራቱም አቅጣጫ በመንገድ እንዲከለል (በአጥር እንዲከበር) አለመደረጉ ተቋሙን ለአደጋ ያጋለጠና የአምልኮ ነፃነትን የሚገታ ተግባር ሆኗል። ከዚህም ባሻገር፣ የከተማዋ የህግ እና የፕላን ተፈጻሚነት በአንድ የሃይማኖት ተቋም ላይ ብቻ ተለይቶ መተግበሩ በመንግስት እና በህዝብ መካከል ያለውን መተማመን የሚሸረሽር ከመሆኑም በላይ፣ ለሴራ ፈላጊዎች እድል የሚሰጥ ነው ሲል አውግዟል።

ይህ የፍትህ መጓደል የመካነ ኢየሱስ ምዕመናንን ብቻ ሳይሆን፣ በወረዳው የሚገኙ ሌሎች አብያተ ክርስቲያናትን (ቃለ ህይወት፣ ሙሉ ወንጌል፣ መሰረተ ክርስቶስ፣ ካቶሊክና ኦርቶዶክስ) ስሜት የሚነካና ማህበራዊ ቀውስ ሊያስከትል የሚችል መሆኑ ተጠቁሟል።

ከዚሁ ጉዳይ ጋር በተያያዘ፣ በማዕከላዊ ኢትዮጵያ ክልል የከተማ ልማትና ኮንስትራክሽን ቢሮ በቅርቡ (ህዳር 2017 ዓ.ም) አውጥቶ ለዞኖች እና ልዩ ወረዳዎች በላከው ጥብቅ መመሪያ፣ በከተሞች የፕላን ዝግጅትና ትግበራ ወቅት የሚታዩ አድሏዊ አሰራሮችን፣ የህግ ጥሰቶችን እና የቦታ መቀራመቶችን ለማስቀረት ጥብቅ ክትትል እንዲደረግ ማሳሰቡ ይታወሳል። መመሪያው የህዝብ አገልግሎት መስጫ ቦታዎች ከፕላን ውጪ ወደ ሌላ አገልግሎት እንዳይቀየሩ ያገደ ቢሆንም፣ በሙዱላ ከተማ የሚታየው ችግር ግን የህግ የበላይነትን በተዛባ መልኩ በመተርጎም በቤተክርስቲያኑ ላይ ጫና እየፈጠረ መሆኑን ምዕመናኑ በቅሬታቸው አንስተዋል።

የጠምባሮ ልዩ ወረዳ እና የሙዱላ ከተማ አስተዳደር ጉዳዩን በቅንጅት በመመልከት፣ የቤተክርስቲያኗ ህጋዊ የይዞታ መብት ተጠብቆ ያለምንም መሸራረፍ ፍትህ እንዲሰጣትና ምዕመናኑ በሰላም አምልኳቸውንና የልማት ስራቸውን እንዲቀጥሉ "ፍትህ ለሙዱላ ከተማ መካነ ኢየሱስ ቤተክርስቲያን!" በሚል መሪ ቃል ጥሪያቸውን አስተላልፈዋል።