(ዘ-ሐበሻ ዜና) ሞት የሰው ልጅ እጣ ፈንታ ቢሆንም፣ አሟሟት ግን እንደየሰው ይለያያል። የ30 ዓመቱ ወጣት ኪሩቤል ከበደ አሟሟት ግን የጭካኔን ጥግ የሚያሳይ፣ አዲስ አበባን በእንባ ያጠበ እና ሰሚን ሁሉ በሀዘን የሰበረ አሳዛኝ ክስተት ሆኗል።

ቤተሰብ ለዘ-ሐበሻ እንደገለጸው፣ በፈረንሳይ ለጋሲዮን አካባቢ ተወልዶ ያደገውና ከቅርብ ጊዜ ወዲህ ኑሮውን በጎፋ ገብርኤል አካባቢ አድርጎ የነበረው ይህ ወጣት፣ በተለያዩ የንግድ ስራዎች ላይ ተሰማርቶ የራሱን ህይወት የሚገፋና ለቤተሰቦቹም ትልቅ ተስፋ የነበረ ታታሪ ሰው ነበር።

ነገሮች ሁሉ የተቀየሩትና የቤተሰብ የጭንቀት ጊዜ የጀመረው ባለፈው ሳምንት አርብ ዕለት ነበር። ኪሩቤል እንደወጣ ወደ ቤቱ አልተመለሰም። ቤተሰቦቹ በከፍተኛ ድንጋጤ እና ልብን በሚያደማ ጭንቀት ውስጥ ሆነው ለፖሊስ አመለከቱ። ሆኖም፣ የአዲስ አበባ ፖሊስ የጠፋ ሰውን ለመፈለግ ያለውን የ24 ሰዓታት የጥበቃ አሰራር ተግባራዊ በማድረጉ ፍለጋው ወዲያውኑ ሊጀመር አልቻለም። እነዚያ 24 ሰዓታት ለቤተሰብ እጅግ የረዘሙ የጭንቀት፣ ለኪሩቤል ደግሞ የሞት እና የህይወት ትግል የነበሩበት አሳዛኝ ጊዜያት ነበሩ። በእርግጥ አንድ ሰው ጠፋ ተብሎ ሪፖርት ሲደረግ ከጠፋበት ሰዓት የሚቆጠር 24 ሰዓት መጠበቅ የተለመደ አሰራር ነው።

የዘገየው የፍለጋ መጨረሻ ግን ማንም ሊሰማው የማይፈልገውን ዘግናኝ ዱብ ዕዳ ይዞ መጣ። የኪሩቤል አስከሬን ብሔረ ጽጌ መናፈሻ አካባቢ በሚገኝ የቆሻሻ መጣያ ገንዳ ውስጥ፣ በጆንያ ተጠቅልሎ ተገኘ።

ገዳዮቹ በወጣቱ ላይ የፈጸሙት የጭካኔ ድርጊት የሰውን ልጅ አእምሮ የሚዘገንን እና ርህራሄ የለሽነትን በግልጽ የሚያሳይ ነው። ቤተሰብ በሀዘን ተሰብሮ ለዘ-ሐበሻ እንደተናገረው፤ ወንጀለኞቹ የኪሩቤል ማንነት እንዳይታወቅ በሚመስል መልኩ ፊቱን በጭካኔ ተልትለውታል፣ አፉንም በፕላስተር አሽገውታል። ፍጹም ልበ-ደንዳንነት በተሞላበት ሁኔታም፣ እሱ እንዳይመስልና መርማሪዎችን ለማሳሳት በማሰብ የጓደኛውን መታወቂያ አስከሬኑ ላይ ጥለውበት ሄደዋል።

ይህን አሰቃቂ ድርጊት በተመለከተ ዘ-ሐበሻ ያነጋገራቸው የአዲስ አበባ ፖሊስ አመራር በበኩላቸው፣ ወንጀለኞቹ ለማሳሳት የጓደኛውን መታወቂያ ቢጥሉም በመታወቂያው ላይ ባለው መረጃ አማካኝነት ማንነቱን መለየት መቻላቸውን ገልጸዋል። የዚህን ወጣት ዘግናኝ ግድያ ተከትሎ ፖሊስ ሰፊ ምርመራ እያደረገ መሆኑን እና በወንጀሉ ተጠርጥረው በቁጥጥር ስር የዋሉ ሰዎች መኖራቸውንም አመራሩ አረጋግጠዋል። ምርመራው እንደተጠናቀቀም ሙሉ መረጃው ለሕዝብ ይፋ እንደሚደረግ ቃል ገብተዋል።

በዚህ አሳዛኝ ክስተት ውስጥ ሌላው ልብ የሚነካው እንቆቅልሽ የኪሩቤል መኪና ጉዳይ ነው። ወጣቱ የተገደለበት አሰቃቂ መንገድ አንጀት የሚያላውስ ሆኖ ሳለ፣ መኪናው ግን ሳሪስ አካባቢ ምንም አይነት ጉዳት ሳይደርስበት እና ሳይዘረፍ በሰላም መቆሙ ቤተሰብን ይበልጥ ግራ አጋብቷል።

በአንድ ወቅት በተስፋ እና በሕልም ተሞልቶ ሲራመድ የነበረው ኪሩቤል፣ ዛሬ በጨካኞች እጅ ህይወቱ ተቀጭቶ አስከሬኑ በቆሻሻ ገንዳ ላይ ሊጣል ችሏል። የቀብር ስነስር ዓቱም ትናንት ረቡዕ በፈረንሳይ ጊዮርጊስ ቤተክርስቲያን ተፈጽሟል። አሁን ላይ የኪሩቤል ቤተሰቦች እንባቸውን እያፈሰሱ፣ ነፍሱ በሰላም እንድታርፍ እየጸለዩ፣ እውነተኛው ፍትህ እስኪሰጣቸው ድረስ በጉጉት እና በታላቅ ሀዘን እየጠበቁ ይገኛሉ።