የካሜሩኑ ፕሬዝዳንት ፖል ቢያ ከ43 ዓመታት የስልጣን ቆይታ በኋላ የምክትል ፕሬዝዳንትነት ቦታን በድጋሚ መለሱ
#ethiopia | የ93 ዓመቱ የካሜሩን ፕሬዝዳንት ፖል ቢያ፤ በስልጣን ላይ ከቆዩባቸው 43 ዓመታት በኋላ ለመጀመሪያ ጊዜ በሀገሪቱ የምክትል ፕሬዝዳንትነት ቦታ እንዲኖር የሚያስችል ውሳኔ አሳለፉ።

ካሜሩን ከፈረንጆቹ 1961 እስከ 1972 የፌዴራል ስርዓትን በምትከተልበት ወቅት የምክትል ፕሬዝዳንትነት ሚና በህገ-መንግስቷ ሰፍሮ የነበረ ቢሆንም፤ በ1972 በተካሄደ የህዝበ ውሳኔ (ሪፈረንደም) ቦታው ተሰርዞ ቆይቷል። ከአምስት አስርት ዓመታት ገደማ በኋላ ግን በፓርላማ በፀደቀ አዲስ የህገ-መንግስት ማሻሻያ መሰረት ይህ ቦታ ዳግም ወደ ስራ ተመልሷል።

በአዲሱ ማሻሻያ መሰረት፤ ፕሬዝዳንቱ በድንገተኛ አደጋ ወይም በጤና እክል ምክንያት ስራቸውን ማከናወን የማይችሉበት ሁኔታ ቢፈጠር፣ ምክትል ፕሬዝዳንቱ በቀጥታ ስልጣኑን በመረከብ ቀሪውን የስልጣን ዘመን ያጠናቅቃሉ፤ በመቀጠልም አዲስ ብሄራዊ ምርጫ ይካሄዳል።

ይህን የምክትልነት ሹመትን የሚፈቅድ አንቀፅ ባሳለፍነው ቅዳሜ በተካሄደው የምክር ቤቱ ስብሰባ ላይ በ200 የድጋፍ፣ በ18 የተቃውሞ እና በ4 የድምፀ ተአቅቦ ድምፅ ፀድቋል።

ይሁን እንጂ የፖል ቢያ ተቃዋሚዎች ማሻሻያው "በችኮላ የተወሰነ እና ሰፊ የህዝብ ውይይት ያልተደረገበት ነው" በማለት ጠንካራ ተቃውሞ እያሰሙ ይገኛሉ።

ይህ ታሪካዊ የፖለቲካ ውሳኔ የመጣው፤ የፕሬዝዳንቱ ወቅታዊ የጤና ሁኔታ እና ከህዝብ እይታ መራቅ በሀገሪቱ ከፍተኛ መነጋገሪያ በሆነበት ወቅት ነው።

በካሜሩን ስለ ፕሬዝዳንቱ ጤና በአደባባይ ማውራት እጅግ የተከለከለና የሚያስቀጣ ተግባር ቢሆንም፤ አዛውንቱ ፖል ቢያ ለረጅም ጊዜ ከህዝብ አይን በመጥፋታቸው ምክንያት "ሞተዋል" የሚሉ አሉባልታዎች በስፋት ተሰራጭተው ሰንብተዋል። ነገር ግን ፕሬዝዳንቱ ከሰሞኑ በአደባባይ ብቅ በማለታቸው ወሬው ሀሰት መሆኑ ተረጋግጧል።

Getu Temesgen - (ጌጡ ተመስገን)
#getutemesgen #getu #ካሜሩን #ፖል_ቢያ #የአፍሪካ_ፖለቲካ #ዜና #cameroon #paulbiya #news