የካራማራ ድል የሥራ ዝግ ቀን ሆኖ እንዲታወጅ ጥሪ ቀረበ
#ethiopia | የኢትዮጵያን ሉዓላዊነት ለማስከበር በየዘመናቱ የተከፈሉ መሥዋዕትነቶች የሀገሪቱ የቁርጥ ቀን ልጆች የጀግንነት ታሪክ መገለጫዎች መሆናቸው ይታወቃል። ከእነዚህም መካከል በ1970 ዓ.ም የካቲት 26 ቀን በካራማራ ተራራ ላይ የተመዘገበው ታላቅ ድል አንዱ ቢሆንም፣ በቂ ትኩረትና ዝክር እየተሰጠው እንዳልሆነ የተለያዩ የሙያ ማኅበራት ገለጹ።
የኢትዮጵያ መከላከያ እና ፖሊስ ጀግኖች ቬትራንስ ማኅበር እንዲሁም የቀድሞ የኢትዮጵያ ሠራዊት አባላት የድጋፍ እና የልማት ማኅበር በጋራ ባስተላለፉት መልእክት፣ ቀኑ በሀገር አቀፍ ደረጃ በድምቀት ሊታሰብ እንደሚገባ አሳስበዋል።

"ዳግማዊ ዓድዋ"

የቬትራንስ ማኅበሩ ምክትል ሥራ አስኪያጅ ቀሲስ አንዱዓለም ገረመው እንደገለጹት፣ የካራማራ ድል የኢትዮጵያን ግዛት ጥሶ የገባውን ወራሪ ኃይል በአንድነት ቆሞ ድል የተደረገበት በመሆኑ "ዳግማዊ ዓድዋ" ሊባል የሚገባው ታሪካዊ ክስተት ነው። በተለይም ወጣቱ ትውልድ ከዚህ የጀግንነት ታሪክ ሊማር የሚገባው ብዙ ቁምነገር እንዳለ ጠቁመው፣ ማኅበሩ ቀኑን በልዩ ሁኔታ መዘከር መጀመሩን ገልጸዋል።

የመንግሥት ትኩረትና የሥራ ዝግ ቀን ጥያቄ
የቀድሞ የኢትዮጵያ ሠራዊት አባላት የድጋፍ እና የልማት ማኅበር ፕሬዝዳንት ሐምሳ አለቃ ብርሃኑ አማረ በበኩላቸው፣ ይህ ታላቅ ታሪክ ለትውልድ እንዲተላለፍ የሚደረገው ጥረት በቂ አለመሆኑን አንስተዋል። መንግሥት ለቀኑ ተገቢውን ትኩረት በመስጠት፦

* ቀኑን በብሔራዊ ደረጃ በድምቀት እንዲከበር እንዲያደርግ፣

* ዕለቱ (የካቲት 26) የሥራ ዝግ ቀን ሆኖ እንዲታወጅ ጥሪ አቅርበዋል።

ማኅበራቱ መንግሥት ይህንን ጥያቄ ተቀብሎ ተግባራዊ እስኪያደርግ ድረስ በራሳቸው አቅም የጀግኖችን ውሎና የታሪኩን ታላቅነት መዘከራቸውን እንደሚቀጥሉ አስታውቀዋል።
በመጨረሻም፣ "ኢትዮጵያ በታሪኳ ያደረገቻቸው ጦርነቶች በሙሉ ሉዓላዊነትን ለማስከበር የተደረጉ መሆናቸውን ታሪክ ምስክር ነው" ያሉት ማኅበራቱ፣ ለመላው የሀገሪቱ ሕዝብ "እንኳን ለካራማራ የድል በዓል በሰላም አደረሳችሁ" ሲሉ መልእክታቸውን አስተላልፈዋል።

Getu Temesgen - (ጌጡ ተመስገን)
#getutemesgen #getu #ጌጡ #menahriafm #ኢትዮጵያ #ካራማራ #የድል_በዓል #የካቲት26 #ታሪክ #ጀግንነት #ዳግማዊ_ዓድዋ