በቴዎድሮስ አደባባይ የሚገኘው አዲሱ የዮድ አቢሲኒያ ግዙፍ የባህል አዳራሽ 1,500 ሰዎችን በአንዴ ያስተናግዳል ተባለ

ላለፉት 22 ዓመታት የኢትዮጵያን ቱባ ባህል፣ ዜማና ጣዕም ለዓለም በማስተዋወቅ "የኢትዮጵያ የባህልና የቱሪዝም አምባሳደር" የሚል እውቅናን ያተረፈው ዮድ አቢሲኒያ ጠቅላላ ንግድ ኃ.የተ.የግ.ማህበር፤ በከተማዋ እምብርት በቴዎድሮስ አደባባይ ያስገነባውን አዲስ ቅርንጫፍ ከአንድ ወር በኋላ በይፋ እንደሚመረቅ አስታውቋል።

​ፈጣን ግንባታና ከፍተኛ መዋዕለ ንዋይ፦
የዮድ አቢሲኒያ መስራችና ባለቤት አቶ ትዛዙ ኮሬ እንደገለፁት፤ ቦታውን ከአዲስ አበባ ከተማ አስተዳደር ተረክቦ ለአገልግሎት ዝግጁ ለማድረግ የፈጀው 33 ቀናት ብቻ ነው።

ለዚህ ግዙፍ ፕሮጀክት እስካሁን 80 ሚሊዮን ብር ለግንባታ ወጪ የተደረገ ሲሆን፣ ዘመናዊነትን ከባህል ጋር አቀናጅቶ የቀረበ ልዩ ማዕከል ነው።

​የማዕከሉ ልዩ ገጽታዎች፦
​የመያዝ አቅም፦ በአንዴ 1,500 ሰዎችን የማስተናገድ አቅም ያለው ሲሆን፣ የመመገቢያ ስፍራው ብቻ 1,200 ካሬ ሜትር አርፏል።

​ምቾት፦ ከአንድ መመገቢያ ወደ ሌላኛው በቂ መተላለፊያ ያለው ሲሆን፣ ከ500 በላይ መኪናዎችን ማቆም የሚችል ሰፊ ፓርኪንግ አለው።

​ቴክኖሎጂ፦ ለባህል ሙዚቃ ትርኢቶች የሚመጥን እጅግ ዘመናዊ የስፒከር (Sound System) ዝግጅት በጥናት ላይ ተመስርቶ ለመግጠም ዝግጅት ተጀምሯል።

​ሁለንተናዊ አገልግሎቶች፦
አዲሱ ቅርንጫፍ ከባህል ምግብ ባለፈ የሚከተሉትን አገልግሎቶች በአንድ ጣራ ስር ይሰጣል፦
✅ ለልዩ ኩነቶች፦ ሰርግ፣ መልስ፣ የምርቃት ስነ-ስርዓቶችና ለድርጅታዊ ስብሰባዎች የሚውሉ ሰፊ አዳራሾች።

✅ ቱሪዝም፦ የአየር ትኬት፣ የጉዞ ወኪል እና የሲቲ ቱር (City Tour) አገልግሎቶች።

✅ መዝናኛ፦ ስፖርት ባር፣ ዘመናዊ ካፌና ሬስቶራንት እንዲሁም የጌጣጌጥ መሸጫ ሱቆች።
​የሥራ ዕድል ፋይዳ፦
ይህ ፕሮጀክት በአጠቃላይ ለ550 ዜጎች የሥራ ዕድል ይፈጥራል። ለባህል ምግብ ቤቱ ብቻ ከሚያስፈልጉ 250 ሰራተኞች መካከል 75% የሚሆኑት ተቀጥረው ስልጠናና ስራ መጀመራቸው ተገልጿል።

​ስለ ዮድ አቢሲኒያ ባጭሩ፦
ተቋሙ በባህል ምግብ አዳራሽ፣ በዓለም አቀፍ ሆቴል፣ በአስጎብኚና የጉዞ ወኪል፣ በባልትና እንዲሁም በቡናና ካፌ ዘርፎች ተሰማርቶ ይገኛል። በተጨማሪም የኢትዮጵያን የቱሪዝም ዘርፍ ይበልጥ ለማሳደግ "ዮድ አቢሲኒያ ኢኮ ሎጅ" ግንባታ ላይ መሆኑ ይታወቃል