''ቀና ብለሽ የስንቱን ሕይወት እንደነካሽ ባየሽ ነበር''

📌የቀድሞዋ የኢፌዴሪ ርዕሰ ብሔር ሳህለወርቅ ዘውዴ በቅርቡ ሕይወታቸው ያለፈውን የረዥም ዘመን ወዳጃቸውን አምባሳደር ቆንጂት ስነጊዮርጊስ የአርባ ቀን መታሰቢያ በማስመልከት ያሰፈሩት መልዕክት
#ethiopia | እህቴ፣ ከ40 ዓመት በላይ የማውቃት ታማኝ ጓደኛዬ አምባሳደር ቆንጂት ሥነ ጊዮርጊስ ከተለየችን ሳምንታት፣ 40 ቀናት አለፉ።

የኢትዮጵያ ሰንደቅ ዓላማን ባውለበለበችበት አገር ሕክምናዋን ጨርሳ ወደምትወዳት፣ ዕድሜ ልኳን ወዳገለገለቻት አገርዋ ለመመለስ የነበራት ተስፋ ትልቅ ነበር።

ሁለት ጊዜ ቪየና ሄጄ ብዙ ተጨዋውተናል። ስንለያይ ያለችኝ እርሷን የተሰማት ነገር እንዳለ ያሳያል። ስጠብቃት የነበረው በብዙ ተስፋ ነበር።

ቆንጅቴ፣ዜጎቻችን፣ ሌሎች አፍሪካውያንና የብዙ አገር ዜጎች ..መልዕክት ሲልኩ፣ ሲያለቅሱ፣ አድናቆታቸውን ሲገልጹ..ነው የከረሙት። የሥራ ባልደረቦችሽና አለቃሽ የነበሩ የአገሪቱ መሪዎች ሸኝተውሻል። ቀና ብለሽ የስንቱን ሕይወት እንደነካሽ ባየሽ ነበር!!

በየቀኑ የምንነጋገረውን፣ምክሮችሽን፣ጥላ ከለላነትሽን...ነው ያጣሁት። ከፍተኛ ሃዘን ነው። በአንድ መስመር መልዕክት የማይገለጽ።ዝም ያሰኘኝ።

ሆኖም የአንቺ የተሟላና ዓላማ ያለው ሕይወት ከለቅሶ በላይ የሚከበር ነው። ጥረሽ ግረሽ ነው ው/ጉ የገባሽው። የ 53 ዓመት አገልግሎትሽ ነው በአግባቡ ሊከበር የሚገባው።ሌላ መለክያ ሊኖር አይችልም።

ወንዳች መካከል ብቸኛ ሴት አምባሳደር መሆን ችግር ነበር። አንቺ ስትመጪ በጋራ ታግለናል። አጠናክሮናል። ተነግሮ አያልቅም።

ቆንጅቴ አሁን ከማታውቂው እረፍት ጋር
እንደተለማመድሽ ተስፋ አለኝ። የማውቅሽን ያህል ግን ስትሯሯጪ፣ ስብሰባ ስትመሪ ትታይኛለሽ።

እረፊ፣ ለፍተሻል። አኩርተሽናል። ነፍስሽን በአፀደ ገነት ያኑርልን።

(ኤርምያስ በጋሻው)

Getu Temesgen - (ጌጡ ተመስገን)
#getutemesgen #getu

አንጋፋዋ ዲፕሎማት አምባሳደር ቆንጂት ሥነ-ጊዮርጊስ ከዚህ ዓለም በሞት ተለዩ
#ethiopia | በኢትዮጵያ የዲፕሎማሲ ታሪክ ውስጥ የጎላ አሻራ ያሳረፉት አንጋፋዋ ዲፕሎማት አምባሳደር ቆንጂት ሥነ-ጊዮርጊስ ባጋጠማቸው የጤና እክል በሕክምና ሲረዱ ቆይተው ከዚህ ዓለም በሞት መለየታቸው ተሰማ።

አምባሳደር ቆንጂት ከ1950ዎቹ አጋማሽ ጀምሮ በውጭ ጉዳይ ሚኒስቴር ውስጥ ከዴስክ ኦፊሰርነት አንስቶ እስከ ከፍተኛ ኃላፊነት ድረስ ሀገራቸውን በታማኝነት አገልግለዋል። በተለይም የቀድሞው የአፍሪካ አንድነት ድርጅት (የአሁኑ የአፍሪካ ህብረት) ከመመስረቱ አንድ ዓመት ቀደም ብለው ወደ ዲፕሎማሲው ዓለም የተቀላቀሉ ሲሆን፤ በአፍሪካ ቀዳሚ ከሆኑ ሴት ዲፕሎማቶች መካከል በግንባር ቀደምትነት ስማቸው ይጠቀሳል።

ከአምባሳደር ዮዲት እምሩ ቀጥሎ የኢትዮጵያ ሁለተኛዋ ሴት አምባሳደር በመሆን ታሪክ የሰሩት አምባሳደር ቆንጂት፤ በካይሮ፣ ኦታዋ፣ ቴል አቪቭ እና ቪየና በሚገኙ የኢትዮጵያ ሚሲዮኖች በባለሙሉ ስልጣን አምባሳደርነት ሀገራቸውን ወክለዋል። በተጨማሪም በአፍሪካ ሕብረት እና በተባበሩት መንግሥታት የአፍሪካ ኢኮኖሚክ ኮሚሽን የኢትዮጵያ ቋሚ መልዕክተኛ ሆነው በብቃት ሰርተዋል።

በቀጠናው ሰላም ግንባታም ከፍተኛ ሚና የነበራቸው ሲሆን፤ ከሰኔ 2009 እስከ መስከረም 2011 ዓ.ም ድረስ ኢጋድ ባመቻቸው የደቡብ ሱዳን የሰላም ስምምነት ሂደት ላይ በልዩ አማካሪነት በማገልገል የዲፕሎማሲ ልምዳቸውን አበርክተዋል።

አምባሳደሯ ለግማሽ ክፍለ ዘመን ገደማ ለሀገራቸው እና ለአህጉራቸው ላበረከቱት የላቀ የዲፕሎማሲ አገልግሎት ከዚህ ቀደም በሀገር ደረጃ ከፍተኛ ዕውቅና እና ሽልማት ተበርክቶላቸው እንደነበር ይታወሳል ሲል ሸገር ኤፍ ኤም ዘግቧል።

Getu Temesgen - (ጌጡ ተመስገን)
#getutemesgen #getu #ኢትዮጵያ #አምባሳደር_ቆንጂት #ዲፕሎማሲ #ውጭ_ጉዳይ_ሚኒስቴር #የአፍሪካ_ህብረት #ethiopia #ambassadorkonjit #diplomacy