የሽንት ቤት ፍሳሽ ወደ ወንዝ የለቀቀው ተቋም 400 ሺህ ብር ተቀጣ

የአዲስ አበባ ከተማ አስተዳደር የደንብ ማስከበር ባለስልጣንና የአራዳ ክፍለ ከተማ ወረዳ 5 አካባቢ ጥበቃ ጽ/ቤት በጋራ ባካሄዱት ቁጥጥር የቻይናው ካም ወይም ጂያንግዙ የተባለ ተቋም የሽንት ቤት ፈሳሽ በቀጥታ ወደ ወንዝ ሲለቅ በመገኘቱ የ400 ሺህ ብር የገንዘብ ቅጣት መቀጣቱ ተገልጿል።

​ባለሥልጣን መሥሪያ ቤቱ እንደገለጸው ድርጊቱ የአካባቢን እና የወንዞችን ንጽህና የሚበክል በመሆኑ በወጣው የደንብ መተላለፍ ደንብ ቁጥር 180/2017 መሠረት ተቋሙ ቅጣቱ የተጣለበት ሲሆን ወደ ወንዝ የሚለቀቀውን ፈሳሽም እንዲያስቆም ተደርጓል።

ማንኛውም የግልም ሆነ የመንግሥት ተቋም የአካባቢን ንጽህና የመጠበቅ ግዴታ እንዳለበት ያሳሰበው ባለስልጣኑ መሰል ህገ-ወጥ ድርጊቶችን በሚፈጽሙ አካላት ላይ የሚወሰደው አስተዳደራዊ እና ሕጋዊ እርምጃ ተጠናክሮ እንደሚቀጥል አስታውቋል።

ኅብረተሰቡ መሰል የአካባቢ ብክለት እና የደንብ መተላለፍን ሲመለከት በ 9995 ነፃ የስልክ መስመር በመደወል ጥቆማ እንዲሰጥ ጥሪ ቀርቧል።

#ዳጉ_ጆርናል