(ዘ-ሐበሻ ዜና) በትግራይ ክልል የሰብዓዊ እርዳታ ጭኖ ሲጓዝ በነበረ የካቶሊክ የረድኤት ድርጅት ኮንቮይ ላይ የተፈጸመውን የድሮን ጥቃት የአሜሪካ መንግስት በጽኑ ማውገዙን አስታወቀ። ጥቃቱን ተከትሎ አሜሪካ አፋጣኝ ምርመራ እንዲደረግ በጥብቅ ጠይቃለች። ዝርዝር መረጃውን አብረን እንመልከት።

የአሜሪካ የውጭ እርዳታ ኤጀንሲ እና የአሜሪካ የውጭ ጉዳይ ሚኒስቴር የአፍሪካ ጉዳዮች ቢሮ ዛሬ ባወጡት አስቸኳይ መግለጫ፣ ህይወት አድን ድጋፍ በማጓጓዝ ላይ በነበሩ የረድኤት ሰራተኞች እና ተሽከርካሪዎች ላይ የተፈጸመው ጥቃት ፈጽሞ ተቀባይነት የሌለው መሆኑን አሳውቀዋል። የሰብዓዊ መብት ሰራተኞች እና ንጹሃን ዜጎች በማንኛውም የጦርነት ሁኔታ ውስጥ ጥበቃ ሊደረግላቸው እንደሚገባ ያሳሰበው የአሜሪካ መንግስት፣ የሚመለከታቸው ባለስልጣናት በአፋጣኝ የተሟላ ምርመራ አድርገው ውጤቱን ይፋ በማድረግ ድርጊቱ ዳግም እንዳይፈጸም እንዲከላከሉ ጠይቋል።

በተጨማሪም እርዳታ ለሚፈልጉ ወገኖች ያለምንም እንቅፋት የሰብዓዊ ድጋፍ እንዲደርስ መንገዶች ክፍት እንዲሆኑ ያሳሰበው መግለጫው፤ ግጭት ውስጥ ያሉ ሁሉም አካላት ጠብ መንጃቸውን አስቀምጠው በአፋጣኝ ወደ ውይይት እንዲገቡ ጥሪ አቅርቧል።

በትግራይ የሰብዓዊ እርዳታ አቅራቢዎች ላይ የተፈጸመው ይህ የድሮን ጥቃት፣ በክልሉ አሁንም ድረስ ያለውን የጸጥታ መደፍረስ እና ለንጹሃን ህይወት የሚሰጠውን አነስተኛ ዋጋ የሚያሳይ ጉልህ ማሳያ ነው። የዓለም አቀፉ ማህበረሰብ በመግለጫ ከማውገዝ ባለፈ ተጠያቂነትን የሚያሰፍን ተጨባጭ እርምጃ ካልወሰደ፣ የሰብዓዊ እርዳታ አቅርቦቱ ሙሉ በሙሉ ሊስተጓጎል እና ክልሉን ወደ ከፋ ረሃብ እና ቀውስ ሊመልሰው ይችላል ሲሉ አስተያየት ሰጪዎች ተናግረዋል።