(ዘ-ሐበሻ ዜና) በአየር ንብረት ለውጥ እና ከልክ ባለፈ አጠቃቀም ምክንያት አደጋ ላይ የወደቀውን የኮሎራዶ ወንዝ ለመታደግ፣ የዩናይትድ ስቴትስ የፌደራል ባለስልጣናት አሪዞና፣ ካሊፎርኒያ እና ኔቫዳ በቀጣዮቹ ሁለት ዓመታት ከወንዙ የሚያገኙትን የውሃ መጠን በከፍተኛ ሁኔታ ቀንሰዋል።
የውሃ ማከፋፈሉንና የሀገሪቱን ትላልቅ የውሃ ማጠራቀሚያዎች (ሌክ ፓዌል እና ሌክ ሚድ) አጠቃቀም የሚቆጣጠሩት ህጎች በዚህ ዓመት ሊያበቁ በተቃረቡበት እና ማጠራቀሚያዎቹ በታሪክ ታይቶ በማይታወቅ ሁኔታ በደረቁበት በዚህ ወቅት ነው ውሳኔው የተላለፈው። አርብ ዕለት በዩኤስ የሪከለሜሽን ቢሮ በተሰጠው መግለጫ መሰረት፣ የሶስቱ ግዛቶች የውሃ ድርሻ በአጠቃላይ ሩብ ያህል (25 በመቶ) እንዲቀንስ ተደርጓል። በዚህም የከፋውን ቅነሳ የምታስተናግደው አሪዞና ስትሆን፣ ድርሻዋ በአንድ ሶስተኛ (33 በመቶ) ያህል ቀንሷል።

ይህ ውሳኔ ግዛቶቹ በፈቃደኝነት ያቀረቡትን የውሃ ቅነሳ ሀሳብ ያጸደቀና በቀጣይ ዓመታት የውሃ አቅርቦቱ እንዴት እንደሚተዳደር የነበረውን ጥርጣሬ የፈታ ቢሆንም፣ መሰረታዊ የሆነውን የውሃ እጥረት ቀውስ ግን በዘላቂነት አይፈታውም። የወንዙ ፍሰት እየቀነሰ እና ማጠራቀሚያዎቹ እየደረቁ ቢመጡም፣ ማህበረሰቡ እና የእርሻ ስራዎች አሁንም ከፍተኛ መጠን ያለው ውሃ ማባከናቸውን ቀጥለዋል።

"ቀጣዮቹ ሁለት ዓመታት ደረቅ ከሆኑ፣ በኮሎራዶ ወንዝ ተጠቃሚዎች ላይ የሚደርሰው አደጋ እጅግ አስከፊ ይሆናል። ከዚህ በኋላ ክፉ ቀን ቢመጣ ልንደገፍበት የምንችለው ምንም አይነት ትርፍ የውሃ ክምችት የለንም።"
- ጄኒፈር ፒት፣ በብሄራዊ የኦዱቦን ማህበር የኮሎራዶ ወንዝ ፕሮግራም ዳይሬክተር

በአጭር ጊዜ ውስጥ የታችኛው የወንዙ ተፋሰስ አካል የሆኑት ሶስቱ ግዛቶች ይህንን የውሃ እጥረት ለመቋቋም በከርሰ ምድር ውሃ ላይ በስፋት መመስረት፣ የአንዳንድ ተጠቃሚዎችን አቅርቦት መገደብ ወይም ማቋረጥ፣ እንዲሁም ውሃን በቁጠባ ለመጠቀም በሚያስችሉ ፕሮጀክቶች ላይ ተጨማሪ መዋዕለ ንዋይ ማፍሰስ ይኖርባቸዋል።

ከዚህም በተጨማሪ የወንዙን ውሃ በብዛት በሚጠቀመው የግብርናው ዘርፍ ላይ ከፍተኛ ጫና ሊፈጠር ይችላል። አሁን ባለው መረጃ መሰረት ግማሽ ያህሉ የኮሎራዶ ወንዝ ውሃ ለእንስሳት መኖ (እንደ አልፋልፋ ላሉ) ሰብሎች ማምረቻነት ነው የሚውለው። የዚህ ከባድ ውሳኔ ትልቁ ሰለባ የምትሆነው አሪዞና ነች። ይህ የሆነበት ዋነኛው ምክንያት፣ ሰባት የምዕራቡ ክፍል ግዛቶች እና ሜክሲኮ ከአንድ ክፍለ ዘመን በፊት ባደረጉት ስምምነት መሰረት፣ አሪዞና በወንዙ የውሃ ክፍፍል ላይ አነስተኛ የቅድሚያ መብት ያላት ግዛት በመሆኗ ነው።