በምርጫው ላይ የቀረቡ ቅሬታዎችን ለመመርመር ገለልተኛ የሕግ ባለሙያዎች ቡድን አደራጅቼ ማጣራት እያከናወንኩ ነው - ምርጫ ቦርድ

ብሔራዊ ምርጫ ቦርድ የቅሬታ ማቅረቢያው ጊዜ ነገ ቅዳሜ እንደሚያበቃ በማሳሰብ፣ ፖለቲካ ፓርቲዎች ሙሉ መረጃ የያዙ አቤቱታዎችን በአስቸኳይ እንዲያስገቡ በጥብቅ አሳሰበ

የኢትዮጵያ ብሔራዊ ምርጫ ቦርድ ግንቦት 24 ቀን 2018 ዓ.ም የተከናወነውን 7ኛውን ጠቅላላ ምርጫ የድምፅ አሰጣጥ ሂደት ተከትሎ፣ በሂደቱ ላይ ቅሬታና አቤቱታ ያላቸው የፖለቲካ ፓርቲዎች እስከ ነገ ቅዳሜ ግንቦት 29 ቀን 2018 ዓ.ም ድረስ የተሟላ ማስረጃ የያዘ አጠቃላይ አቤቱታቸውን እንዲያስገቡ በጥብቅ አሳሰበ።

ቦርዱ ዛሬ ባወጣው አስቸኳይ ማስታወቂያ እስካሁን የቀረቡ የተወሰኑ አቤቱታዎች የተቆራረጡና ሙሉ መረጃ የሌላቸው መሆኑ በገለልተኛ የሕግ ባለሙያዎች እየተከናወነ ባለው የምርመራ ሂደት ላይ ተፅዕኖ ማሳደሩን አስታውቋል።

ምርጫ ቦርድ በድምፅ መስጫው ዕለት የፖለቲካ ፓርቲዎች አቤቱታ ዴስክ በማቋቋም እንዲሁም «የምርጫ ቅድመ ማስጠንቀቂያ ጥቆማ ማድረጊያና ምላሽ መስጫ ሥርዓት» አማካኝነት በስልክ፣ በአጭር ጽሑፍና በደብዳቤ የቀረቡለትን ዕለታዊ ችግሮች ሲፈታ መቆየቱን ገልጿል።

በአሁኑ ወቅትም ከተለያዩ አካላት የቀረቡ ቅሬታዎችን ለመመርመር ገለልተኛ የሕግ ባለሙያዎች ቡድን አደራጅቶ ማጣራት እያከናወነ ይገኛል።
ይሁን እንጂ ቀደም ሲል ለፓርቲዎች ቅሬታ አቀራረብን በተመለከተ ግንዛቤ ተሰጥቶ የነበረ ቢሆንም፣ እስካሁን የቀረቡት አቤቱታዎች የተሟላ መረጃ ያላካተቱ መሆናቸውን ቦርዱ ጠቅሷል። ከተረቀቁት ቅሬታዎች መካከል አንዳንዶቹ በምርጫ ክልል ደረጃ መታየት ያለባቸው ሲሆኑ ሌሎቹ ደግሞ በቦርዱ በቀጥታ በምርመራ የሚታዩ መሆናቸውን ለይቷል።

ለፓርቲዎች የቀረበ ጥብቅ ማሳሰቢያ እና መሟላት ያለባቸው መሥፈርቶች

የአቤቱታ ማቅረቢያው ጊዜ ነገ ቅዳሜ ግንቦት 29 ቀን 2018 ዓ.ም የሚያበቃ በመሆኑ፣ በድምፅ አሰጣጥ፣ በቆጠራና ውጤት አገላለጽ ላይ ቅሬታ ያላቸው ተወዳዳሪ ፓርቲዎች ያሏቸውን አቤቱታዎች በአንድ አጠቃልለው፣ የሚከተሉትን 16 መዋቅራዊ ፍሬ ነገሮች አሟልተው ማቅረብ እንዳለባቸው ቦርዱ በጥብቅ አሳስቧል፦

1. መሠረታዊ መረጃዎች እና የአቅራቢው ማንነት
* ቦርዱ ባፀደቀው ስም ብቻ የተጻፈ የምርጫ ክልል እና የምርጫ ጣቢያዎች ስም ዝርዝር (ከ20 በላይ ከሆኑ በተለየ ወረቀት መያያዝ አለበት)።
* አቤቱታው የቀረበበት የምክክር ቤት ዓይነት (ለክልል ምክር ቤት፣ ለሕዝብ ተወካዮች ምክር ቤት ወይም ለሁለቱም)።
* የአቤት ባዩ ወኪል ሙሉ ስም፣ ኃላፊነት እና ስልክ ቁጥር እንዲሁም አቤቱታው ለመጀመሪያ ጊዜ የቀረበበት ቀን።

2. ከድምፅ አሰጣጥ፣ ቆጠራ እና ውጤት አገላለጽ ጋር የተያያዙ ጥሰቶች

በመራጮች ላይ የተደረጉ ግፊቶች፣ የሚስጥራዊነት መጓደል፣ መደለያዎች፣ ጣቢያው ሕገ-ወጥ በሆኑ ሰዎች መያዙ ወይም ታዛቢዎችና የዕጩ ወኪሎች እንዳይታዘቡ መከልከላቸው።

ውድቅ የሆኑ ወረቀቶች መቆጠር፣ የውጤት ማዳመር ሥርዓት መዛባት፣ የተሰበሩ/የተቀደዱ የባላቶ ሳጥኖች፣ ከተላከው በላይ የድምፅ ወረቀቶች መገኘት፣ ቆጠራው በቂ ብርሃን በሌለበት ወይም ከተፈቀደው ውጭ መከናወኑ።

የውጤት መግለጫ ቅጾች በአግባቡ አለመሞላት፣ ውጤት ማዘግየት እና የምርጫ ጣቢያ ኃላፊዎች የውጤት መተማመኛ ለወኪሎች ለመስጠት ፈቃደኛ አለመሆን።

3. የማስፈራራት ድርጊቶች እና ማረጋገጫዎች

* ሕገ-ወጥ እስራት፣ ዛቻና ማስፈራራት እንዲሁም የታጠቀ ኃይል ከመደበኛው መጠን በላይ በጣቢያው አካባቢ መሰማራቱ።
* በጥሰቱ የተሳተፉ ግለሰቦች ስም ዝርዝር ከነኃላፊነታቸው።
* የቀረቡ የሰነድ፣ የኦዲዮ፣ የፎቶግራፍ፣ የቪዲዮ ወይም የሰው ምስክሮች (ስም፣ አድራሻና ስልክ ቁጥር) ዝርዝር።
* ለታችኛው መዋቅር ቀርቦ የተሰጠ ውሳኔ ካለ መጥቀስ።

4. የሚጠየቀው የዳኝነት ዓይነት
ቅሬታ አቅራቢው ከቦርዱ የሚፈልገው ውሳኔ በግልጽ መቀመጥ እንዳለበት የተገለጸ ሲሆን፣ ይህም ውጤት እንዳይገለጽ እንዲታገድ፣ ድጋሚ ቆጠራ እና ውጤት ማስተካከል፣ ውጤት መሠረዝ እና ድጋሚ ምርጫ መካሄድ፣ ወይም በጥሰት ፈጻሚዎች ላይ አስተዳደራዊ ዕርምጃ እንዲወሰድ የሚሉትን ያካትታል።

ብሔራዊ ምርጫ ቦርድ በማጠቃለያው የሚቀርቡት አቤቱታዎች በሙሉ በእውነት የቀረቡ ስለመሆናቸው ማረጋገጫ ፊርማ፣ የተጻፈበት ቀን እና የፓርቲው ይፋዊ ማኅተም ሊያርፍባቸው እንደሚገባ በጥብቅ አሳስቧል።