የአሜሪካ ኤምባሲ በኢየሩሳሌም ለዜጎቹ የአስቸኳይ ጊዜ የጥንቃቄ ማስጠንቀቂያ አስተላለፈ

(ዘ-ሐበሻ ዜና) በኢየሩሳሌም የሚገኘው የአሜሪካ ኤምባሲ በግዛቱ ውስጥ የሚንቀሳቀሱ የአገሪቱ ዜጎች ከፍተኛ ጥንቃቄ እንዲያደርጉ የሚያስጠነቅቅ መመሪያ አውጥቷል። ኤምባሲው ባወጣው መግለጫ በአካባቢው ካለው ከፍተኛ ውጥረት የተነሳ የጸጥታው ሁኔታ ውስብስብ መሆኑንና በፍጥነት ሊለዋወጥ እንደሚችል ገልጿል። በዚህም ምክንያት በመካከለኛው ምስራቅ የሚገኙ የአሜሪካ ዜጎች ቀጣይነት ያለው ጥንቃቄ እንዲያደርጉና አዳዲስ ሁነቶችን ለመከታተል የዜና ማሰራጫዎችን በንቃት እንዲከታተሉ አሳስቧል።

በተጨማሪም ዜጎች ሊከሰት ከሚችል ማንኛውም ዓይነት የየብስም ሆነ የየአየር ላይ ጥቃት ራሳቸውን ለመጠበቅ በአቅራቢያቸው የሚገኝ መጠለያ ያለበትን ቦታ አስቀድመው ማወቅ እንዳለባቸው ማስጠንቀቂያው ያክላል። ኤምባሲው አሁን ባለው የጉዞ መመሪያው ወደ እስራኤል እና አብዛኞቹ የባህረ ሰላጤው አገራት የሚደረጉ ጉዞዎች በድጋሚ ሊታዩ እንደሚገባ የገለጸ ሲሆን፣ ዜጎች ወደ ኢራን፣ ኢራቅ፣ ሊባኖስ፣ ሶሪያ፣ ጋዛ እና የመን ከመጓዝ እንዲቆጠቡ አሳስቧል።

ይህ የጉዞ ክልከላ እና የጥንቃቄ ማስጠንቀቂያ በአሁኑ ወቅት ምን እንደቀሰቀሰው በግልጽ ባይታወቅም፣ ከኢራን ጦርነት በፊት በአምባሳደር ማይክ ሃካቢ የቀረበውን መሰል ማስጠንቀቂያና ዜጎች ቀጠናውን ለቀው እንዲወጡ የተላለፉ የቀደሙ መመሪያዎችን የሚያስታውስ ሆኗል።