(ዘ-ሐበሻ መዝናኛ) ታዋቂው የሂፕ-ሆፕ አርቲስት ጄይ-ዚ ባቀረበው አስገራሚ የፍሪስታይል ራፕ ውስጥ በውስጡ አምቆ የያዘውን አውጥቷል። ጄይ-ዚ ቅዳሜ ምሽት በፊላደልፊያ በተካሄደው የሙዚቃ ዝግጅት ላይ ዋና አቅራቢ ሆኖ በመድረክ ላይ ራፑን ሲያቀርብ፣ በሂፕ-ሆፕ ኢንደስትሪ ውስጥ ላሉ ታላላቅ ስሞች ጠንከር ያለ ምላሽ ሰጥቷል። አድናቂዎቹ በማህበራዊ ሚዲያ ላይ እንደገመቱት፣ ጄይ-ዚ ኒኪ ሚናጅን እና ባለቤቷን ኬኔዝ ፔቲን ኢላማ አድርጓል። በራፑ ላይ የኒኪ ባለቤት በህግ የተመዘገበ የጾታ ትንኮሳ ወንጀለኛ በመሆኑ ልጃቸውን ትምህርት ቤት ማድረስም ሆነ ማምጣት እንደማይችል የሚጠቁም ሀሳብ አንስቷል። በተጨማሪም ኒኪ በኮንሰርት ላይ የራሷን ዘፈን ግጥም የረሳችበትን አጋጣሚ በማስመሰል አሽሙር ወርውሮባታል። የጄይ-ዚ ትችት በዚህ ሳያበቃ፣ ኒኪ በቅርቡ ዶናልድ ትራምፕን በይፋ መደገፏን ተከትሎ፣ ከየትኛው የፖለቲካ ወገን ጋር እንደቆመች በሚያሳይ መልኩ ተችቶታል።

በመቀጠልም ድሬክ በአዲሱ አልበሙ ላይ ለሰነዘረበት ትችት ጄይ-ዚ ጠንካራ አጸፋዊ ምላሽ ሰጥቷል። ድሬክ ቀደም ሲል በዘፈኑ ላነሳው ሀሳብ፣ ጄይ-ዚ የሀብት መጠኑ አሁንም መጨመሩን በማንሳት፣ በቢልቦርድ የሙዚቃ ሰንጠረዥ ላይ ያላቸውን ፉክክር በመጥቀስ እና የሌሎቹን ራፐሮች የስራ ውል በማጣጣል "ስለ ስኬት አታውሩኝ" በማለት ክፉኛ ተችቶታል። ድሬክ የጄይ-ዚ ዘመን እንዳበቃ ቢዘፍንም፣ ጄይ-ዚ ግን የሌሎቹን ራፐሮች ገቢና ውል በማንቋሸሽ እርሱ አሁንም ከላይ መሆኑን አረጋግጧል።

ታዋቂው ራፐር ካንዬ ዌስትም ከጄይ-ዚ ትችት አላመለጠም። ጄይ-ዚ በራፑ ላይ ድንበር አላፊ ባህሪ ያላቸውን ሰዎች በመተቸት፣ ከእርሱ ፊት ሲሆኑ ግን ጤነኛ እንደሚመስሉና እንደሚፈሩ በመግለጽ ጠንካራ ቃላትን ተጠቅሟል። በማህበራዊ ሚዲያ ላይ በጣታቸው ብቻ ጀግና የሚሆኑትንም በተመሳሳይ ወቅሷል። ከእነዚህ ታዋቂ አርቲስቶች በተጨማሪ፣ ጄይ-ዚ ቶሪ ሌንዝን፣ ዴሞን ዳሽን፣ እንዲሁም በዲዲ ላይ የጾታ ጥቃት ክስ ያቀረቡ ግለሰቦችን የሚወክለውን ጠበቃ ቶኒ ባዝቢን ሳይቀር በራፑ ላይ ማንሳቱ ታውቋል።

ጉዳዩን በተመለከተ ለድሬክ፣ ካንዬ፣ ኒኪ እና ለራሱ ለጄይ-ዚ ጥያቄ ቢቀርብም እስካሁን ከማንኛቸውም ወገን የተሰጠ ምላሽ የለም።