“ለትግራይ ሕዝብ አማራጭ ፖሊሲ ይዤ በ7ኛው አገራዊ ምርጫ ለመወዳደር ዝግጅት እያደረግሁ ነው”

- የትግራይ ዴሞክራሲያዊ ፓርቲ

የትግራይ ዴሞክራሲያዊ ፓርቲ (ትዴፓ) በሰላም፣ በኢኮኖሚ እና በግብርና ላይ ትኩረት ያደረገ አማራጭ ፖሊሲና ማኒፌስቶ በመያዝ በ7ኛው አገራዊ ምርጫ ለመወዳደር ዝግጅት እያደረገ መሆኑን አስታወቀ።

የፓርቲው ምክትል ሊቀመንበር ፅጋቡ ቆባዕ ለአዲስ ዘመን ዕለታዊ ጋዜጣ እንደገለጹት፤ ፓርቲው ከኢትዮጵያ ምርጫ ቦርድ ጋር ያለውን ግንኙነት በማጠናከር ሕጋዊ መመሪያዎችንና የምዝገባ መስፈርቶችን የማሟላት ሥራ እየሠራ ይገኛል።

ምርጫው ዴሞክራሲያዊ፣ ፍትሐዊና ከማንኛውም ጫና ነፃ ሆኖ እንዲጠናቀቅ ሁሉም ባለድርሻ አካላት ግዴታቸውን ሊወጡ እንደሚገባ አሳስበዋል።

የትግራይ ሕዝብ ለተሻለ የሐሳብ አማራጭ ያለው ፍላጎት እየጨመረ መምጣቱን ምክትል ሊቀመንበሩ ጠቁመዋል።

ብዙኃን መገናኛዎች ሁሉንም ፓርቲዎች በእኩል እንዲያስተናግዱና መራጮች ያለ ሥጋት ድምፅ እንዲሰጡ ሁኔታዎች ሊመቻቹ ይገባል ብለዋል።

በክልሉ ከጦርነቱ ወዲህ ያለው የፖለቲካና የጸጥታ ሁኔታ ለምርጫው እንቅፋት እንዳይሆን ጊዜያዊ አስተዳደሩና የፖለቲካ ኃይሎች በመግባባት በጋራ እንዲሠሩ ጥሪ አቅርበዋል። ይህም ለዴሞክራሲያዊ ሥርዓት ዕድገት ወሳኝ መሆኑን አመልክተዋል።

@ጋዜጣ_ፕላስ